نداء القلب

ج٨

#نداء_القلب
الجزء الثامن
اماسي الليل
حقوق النشر محفوظه
رشا: لاخر لحظه جنت اتخيل نفسي ... راح اطلع من المطار حتى ارجعله .... ميهلي اخطي خطوه للطياره ...شكد من وصلت للمطار  بغداد بأول يوم اتمنيت الايام تمشي بسرعه حتى ارجع شكد ما اتمنى اليوم ما اطلع من العراق ولا اصعد طياره
شهر قلب حالي ذقت  بي اروع مشاعر حب سريعه ... بطلي
انسان بقدر القوه الي عنده بداخله قوه وحنيه ومشاعر ...التفت عليه
من قدمي لراسي ... ملكني ....وملك روحي الي تركتها وياه ...
بخبالاته وغيرته ... ولهفته ونظراته ... احس ويا كل مره نلتقي ...
قلبه يوصل لعندي ... واشوفه بكل نبضه من نبضاته ينطق اسمي  ياريت ما ضاع يوم ياريت من اول مره شفته بيها بالحنه حبيته ...رجعتلي ذكرى هاللحظات وخفقان قلبي من صاحني يولي
التفتت عليه.... وسامه ورجوله ونظرات جريئه ارتبك
مو من الخوف والخجل ارتباكي جان حب واعجاب من اول نظره
وردي القاسي مجان شجاعه بالعكس شعور بسيطرته عليه
وضعفي كدامه ...بدليل.... من اشرلي ... طعت امره وبقيت اطيعه
لاخر لحظه .... داحس بلمسة ايده من حاوط ايديه بين اديه
احس بي ويا كل حركه يتحركها السوار بأيدي ... ومحد راح يعرف المكتوب اسمه لان الكل راح يظن لابسه نفس سوار رغد
بس قلبي يعرف صاحب  الاسم وغلاته
غمضت عيني واتذكر ابتسامته ويا كل مره يطلع بيها من المي
اتذكر كل كلمه وكل تفصيله ..عشتها وياه بهاليوم ( الشط)
اتذكر كلماته وحركة شفايفه من تنطق الكلمه بلهجته ... بكد ما
عنده وسامه زادته هالكلمات وهاللهجه وسامه ... ورزانه ....
اوف يا قلبي .... بكد ما حبيت هالانسان اتمنيت ما التقى بيه ولا التقيت بي .... ولا نمر  بهالعذاب الي دا احسه بأول يوم فارگته
ياربي  .... سبب الاسباب حتى التقي بي....
ياربي انت عالم بالقلوب وألمها..... هون عليه وعليه واجمعنا من جديد ... جنت عايشه بعالم وحدي وياه اتخيله ويايه ووجهه ما فارگني لحظه  .... شفت امي دتسولف ويا مره هم رايحه للامارات
طلعت تلفوني ... اريد ابقى عايشه  بهالحقيقه ... ويطلع سفري وحياتي القبله هي الحلم  .... يا الله اريد اسيطر على دموعي ...حتى حسيت امي عرفت سبب هالدموع .... لكن
صعب عليها وعليه نعترف اني وياها نتحجج بنفس الاجابه من تحجي ويايه ماما ليش البچي قابل مراح اتشوفيها ( نور) ادعي الله يجمعنا وياهم بالخير ومن تسألني اگلها راح اشتاق لنور ولبيبي تعلمت عليهم واحس تعرف الي اقصده بهالكلام مو نور ...ياريت جنت اكدر اصارحها بحبي لابن عمها ....
يزن : من لحظه وداعها حسيت بمعاناة هالحب والفراگ..جنت اتمنى  من شفت ادموعها هي حلالي واكدر اخذها بحضني ...
اطمنها محد يأذيها واني موجود ولا احد يكدر يتقرب من قمري
مهلي ارجع لاهلي ولتكريت وهي ماكو ... راح يبقى الها ذكرى بكل مكان ... وين ما اروح راح اشوفها واتذكرها ... من امر من كدام بيت جدها من راح ادخل لبيتهم من راح افوت لكراج بيتنا وللهول ... من اروح لبيت احمد من اروح للشط من اركب سيارتي من انام بغرفتي ... وعبايتها نايمه بحضني ... حتى احساسي
ببشره ايدها لهسه احسها بين ايديه...نظره عيونها زعلها وضحكتها لسى ترن بأذني ... وكلامها حافظه كلمه بكلمه من اول يوم شفتها
ارتباكها باول يوم صادفتها سحرتني ... ودخلت قلبي بلا استأذان .. لو ادري بيها راح تصير اغلى من روحي جان ما
عصبت عليها واتهمتها بلا ادب ... حبيبتي  جمال وادب
عفويه صادقه متمرده .ساعة الغضب ... ( تنهدت) وعندي اخر امل ما تقلع  الطياره ويتأجل سفرهم ... اشتاقيتلها وهي بعدها
بالعراق ... شلون راح اتحمل غيابها عن عيني ... رجعت بوجهي لصديقي عدنان ... من ايام الجامعه بيتهم ببغداد ... يشتغل بالخطوط الجويه ... رحت سألته اريد اقدم فيزا لدبي ....
والولد ساعدني ... واخذت كل المعلومات الي احتاجها ... حتى اقدم ... الشي الي اجى بالي واني بغداد ... على كل الالم الي دا احس بي .... ردت اروح لمثنى اطلع قهري بي ... بس لعنت الشيطان ... وگلت اصبر وما ادخل نفسي بمشاكل .. بسببها
افقد اخر امل يجمعني بحبيتي....
دزيتلها مسج ... ياقمر شلونك بالي يمج
رشا: دزيتله يزن اكدر ادك عليك اسمع صوتك
بلحظتها دگ عليه الو
رشا:  (بدموع )الله لا يحرمني من هالصوت ولا من صاحبه
يزن: رشاوي ليش تخلين بالي ... والله اني متأذي اكثر منج
بس متأمل بأقرب وقت ان شاء الله اجي اشوفج.. ثانيا يوميه راح ابزعج بالمسجات والتلفونات وانطيج اخباري مفصله ..بعد ليش ضايج الحلو
رشا: دزلي هسه صورتك واني هم راح ادزلك صوره
يزن: حبيبتي بلا صور ... ادزلج صوره بس امسحيها اخاف احد يشوفها بتلفونج وتصيرلج مشكله .
لكن صورج لا ما اقبل ادزيها الي ولا حتى لامج ... شغلة التلفونات مو أمان يروح يضيع لو ينباگ ...ماشي قلبي
رشا: ماشي بس دزلي صورتك
يزن: دوگفي خلي ادزلج فد صوره حلوه ... اخاف تبدلين عليه
رشا: هههه اموت عليك وعلى خلقتك
يزن: اضحكي حبيبتي ريحي قلبي
رشا: اخاف انت تنسى شكلي ....
يزن: لا ما انسى عندي ٤ صور من وراج ايدي طولت  تعلمت الخمط بديتها بصور العرس مال احمد ونور اخذت منهن ٤ صور بدون ما اگلهم  انت طالعه بيها كامله ... وراها السوار وختمتها بالعبايه بقت بس صاحبة الغراض ان شاء الله يجي اليوم و اعقد عليها  ... وراها ما اريد من الله شي
رشا: يزن والله ويا كل مره تحجي ويايه احبك اكثر ... واحس
بحبك الي اكثر ... ومن سمعت صوتك ارتاحيت ...
يزن: ابقي ويايه اذا ماعندج شي ...
رشا: لا ماعندي انت هسه وين ...
يزن: يم ابن خالي اليوم ابات وباجر ان شاء الله ارجع للبيت
رشا: يله قلبي راح اروح نادوا على رحلتنا
يزن: توصلين بالسلامه ... عود طمنيني من ادخلين للبيت
رشا: ان شاء الله
وصلنا لمطار دبي ....  دزيت ليزن مسج وصلنا الحمد لله جاوبني 
من طلعت شوفت ابويه فرحتني و شالت من همي ...بكد ما مشتاقتله .. حبيبي بسبب هالموضوع طلع متخربط ومرتفع السكر عنده ...ومگال حتى ميخلي بالنا .... من وصلنا للبيت ... ورا شويه گعدنا فتح ويايه الموضوع ....راد يسمع مني سبب رفضي لمثنى وسبب قبولي بيزن
الحجه الي لگيتها مثنى ممخلص ويزن مكمل ... صعبه ابين مشاعري  كدام ابويه تحججت بيزن عجبتني اخلاقه ونور حمدتلي بي ... وشفت احمد زوجها كلش خوش ولد ... فوافقت على يزن لان نفس اطباع واخلاق احمد ... بس ردت اوصل  فكره لابويه عن رفضي لمثنى گتله حتى اذا ماقبلتوا تنطوني ليزن اني مثنى ما اقبل بي ... ما اتوالم وياه ... ولا ارتاحيتله ...
الاب: لا بابا اني ما اغصب بنيه على زواج ... هاي عشره وقناعه
ما اتحمل خطيه وحده منكم باجر عگبه متتوفق ويا الرجال ابقى طول عمري اكل بنفسي لان غصبتها ...
بس اني يزن ما اكدر انطي موافقه حاليا الى ان احل الموضوع
واحجي ويا عمج الچبير ....
اني حتى فيصل تلاغيت ويا قبل كم يوم من ورا هالموضوع ...
خابرني مثنى گلي فيصل منطي كلمه  ... گايله انت اولى برشا من الغريب
واني وياك ... اقنع ابويه ينطيك كلمه ... رشا متصير لغيرك)
جاوبته ابني انت فاهم الزواج مابي كلمه الكلمه والموافقه للبنيه
اذا وافقت اكيد انطيها الك بس اذا معتبرتك مثل اخوها وماقبلت
ما اغصبها ....
رشا: بابا والله اعرف نفسي ما اتوالم ويا مثنى ... اني عندي فكره عن بيت عمي واطباعهم من خلال تماره واطباعها ...والامور الي تحجيها عن اهلها ... بابا اني الولد رحت وشفته عاملته مثل اخويه وحتى من عرفت رايدني متقبلته كخطيب ولا اتقبلت الفكره
الاب:الله كريم خلي اشوف شلون احل هالموضوع
والله من يوم المشيه لليوم اني مريض ... والسكر ما نزل ... انوب هذا فيصل عقله صغير مع الاسف .... ادري بي علمود مرته ...
متخبل علينا ... ويعيط
خوله: وشسوي لمرته شنو حتى يرضيها لازم ينطي اخته لاخوها
والله هاي حلوه بنيه متريده شنو هو غصب  وانت شلون تقبل يعيط عليك
الاب: يعني هو صغير ميفتهم ... شنو اسويله ميحترم ..ليش اني مقصر بتربيتهم مو ذاك اخو صوته ما اسمعه من احجي
الا هذا كل ميكبر يشيخ ...
خوله: مو اخاف احجي وتزعل ...
الاب: اعرف مرته ... أتزن براسه وهو يسمع الها ..
رشا: ثاني يوم الظهر ورا الغدا .... اجى فيصل ومرته وجهاله
جنت بغرفتي ... ما احس الا باب الغرفه انفتح ... تمارا ....
تمارا: هلو اشتاقينالكم ... مكانكم خالي ... ولج من هاي مثنى متخبل عليج واگعتلج السفره وصايره حلوه
رشا: هلو اني هم مشتاقتلكم ...بوستها وگتلها من تخابري امانه گليله رشا تگلك انت  اخويه وبمعزة فيصل ومهيمن ...
شفتها گلبت خلقتها ....
طلعت سلمت على فيصل .... هلو شلونك بوسته
فيصل: هلو ... تعالي اكعدي عندي موضوع وياج ماطول كلنا كاعدين
رشا: قلبي گام يدك سريع عرفت ... راح يحجون بموضوع الخطوبه
خوله: فيصل ماما مو وكتها ... غير وكت
تمارا : ليش خاله ... متريدين فيصل يدخل هي هم اخته ويريد مصلحتها
رشا: اباوع على ابويه ضايج وروحه طافره ... خفت عليه ليصير بي شي مكدرت احجي شي
فيصل: تدرين بمثنى رايدج ... لج بابا هذا ابن عمج احسن من الغريب ... ترى اني دا احجي وياج  افهمج مو دا اقنعج لان
رضيتي او ما رضيتي ... اني نطيت حجايه للولد انتِ اله
الاب: شوف اني محترمك كدام مرتك وجهالك ... حجايه زايده اسمعك كلام مسامعه مني قبل  رشا مسؤوله مني ...لا انت ولا اخوك الكم حق أتجبروها على شي واني عايش ... ولا الكم كلمه
تخص مستقبلها وحياتها الكلمه يمي اني اقرر مو انت بعدني مامتت وكاعد كدامي تتأمر
رشا: گام ابويه ودخل للغرفه ضايج
خوله: والله ما اعرف شحجي وياك دتشوفه مريض ... متخاف عليه يصير بي شي ... شبيك ماما شو كلش مخبوص بهالموضوع ... ليش منو بيكم اتزوج غصب حتى تريد اتزوج اختك غصبا عنها ... شوف من الاخير اختك طول ما اني وابوك عايشين الكلمه النا ومسؤوله من عدنا انت مو من حقك تجبرها على شي ...
فيصل: شوفي لج اخاف سمعتي حجي امي وابويه عبالج راح اخليج تفشليني ويا الولد ... وافقي احسن الج حتى لتسووين مشاكل بيني وبين ابويه وبين ابويه وعمي ...
رشا: مكدرت اجاوبه ...  بس ابچي لان اخاف منه ... سمعت ابويه صاحني ... گمت .. رحتلها نعم بابا
الاب : فوتي بابا بغرفتج وتكفي شره ...
رشا: بقى فيصل اسمعه صوته عالي يحجي ويا امي ... ويگلها
اخاف عبالج تنطوها لابن عمج گطنه وطلعوها من اذنكم .. مرته بقت ساكته ما اسمع صوتها بس امي من كلامها وياه جانت كلش مقهوره وصارت عصبيه عليه رزلته گلتله شو انت صاير متحترم لك اني امك ذولي جهالك شسوي ويانا يردوا الك ...تالي اخذ مرته وجهاله وطلع.
من طلعت  لگيت امي تبچي مقهوره لان يصيح عليها كدام مرته
ومحترم ابويه ...وراحت لگت ابويه نايم ....
گلتلي ذولي ديسووها شغلة عناد لان انت وافقتي على يزن وهو گرايبي عبالهم اني ما اقبل بمثنى علمود هالشي ... ماما خلي نتكفى شرهم ... ونگول ما ننطيها لاحد بعدها ممخلصه ...
ونگول ردينا خبر لعمامي وليزن  ماكو نصيب ... ونفض السالفه
حتى تخلصين واني اليوم احجي ويا مهيمن اوصي عليج اخاف يصير عليه وعلى ابوج شي ما أأمن عليج يم فيصل ومرته .......
راح اخلي يشوف طريقه ... يصير ميصير تروحين يمه .....
رشا: بكلام امي حسيت الدنيا ضاگت عليه ....وانقهرت عليها
وعلى ابويه ... گتلها اسم الله لتحجين هيج وتخوفيني ...
الام: لا ماما الواحد لازم يعرف اوادمه ويفكر للبعيد .....
رشا: للعصر سمعت امي وابويه يحجون ويا مهيمن ... ويوصوا عليه .... وراها صاحني ابويه گلي اخوج يريدج
الو
مهيمن: هلو بشه  شلونج
رشا: الحمد لله قلبي
مهيمن: لتضوجين ولا احد يكدر يغصبج على زواج هذا فيصل يحجي لحاله ....هسه راح ارتب اسويلكم انت وابويه وامي لم شمل ... بس تطلع اجيبكم يمي ... الله يسامحه ابويه من اول ما سافرت گتله  راح اسويلكم لم شمل تعالوا يمي ماقبل ....
رشا: مجان يدري ... الامور راح تصير هيج وفيصل .. كلش تغير
من ابويه تمرض وكعد بالبيت مهيمن ابويه وضعه الصحي كلش تعبان ... السكر صاعد عنده صار كم يوم مدينزل ... وامي تدري بيها من اتشوفه هيج نفسيتها تتعب ... عفيه من تصير الك فرصه تعال ... شويه من يشوفوك ... يرتاحون ...
مهيم: والله حبيبتي غير هالشغل ماخذني منكم ... بس ان شاء الله اخذ  اجازتي السنويه اجي اني وحوراء  نبقى يمكم .....
وابويه وامي اني متواصل وياهم يوميه ... واعرف الاخبار ... لتقلقين ان شاء الله ماكو شي
عمي حقهم صاير عليج مذابح ... دزتلي نور صور عرسها ...
طالعه تخبلين بشه ( اسم الدلع)
رشا: مهيمن والله مشتاقتلكم صار شكد مسامعه بشه ... منك ومن رغد وروان وريام كلكم صرتوا بعيدين ...
مهيمن: والله يا حبيبتي هاي الدنيا فرقتنا صرنا كل واحد بمكان .. والله ترى اني مامرتاح على بعدكم ...وفراك امي وابويه مو هين عليه ...والله اتحسر على كعدتي وياكم ولمتنا ايام قبل ...
الله كريم ان شاء الله نرجع نلتم مثل قبل
رشا:  ان شاء الله
بهاليوم مكدرت احجي ويا يزن ..... لان بقيت ويا ابويه ...
اتخربط .... ثاني يوم ... الحمد لله ودينا للدكتور ... طمن امي
وضعه احسن ... من رجعنا ... دخلت لغرفتي ... لگيت مسجات
من يزن عتب وباقي باله ....
مكدرت ادگ عليه دزيتله الو .... بسرعه جاوب
الو وين من البارحه لهسه ناسيتني
رشا: مكدرت احجيله بسالفة فيصل خفت عليه يضوج ويبقى باله .... حبيبي ابويه بعافيه ... هسه اجينا من الدكتور والتهيت وياه
يزن: انشاء الله مابي غير العافيه خيره
رشا: السكر صار كم يوم عالي اليوم الحمد لله احسن
يزن: الحمد لله جان طمنتيني بمسج ... خليتي بالي البارحه مكدرت انام ...من گلتيلي الظهر فيصل راح يجي وشفتج بعد ما رديتي ... حسبه تجيبني وحسبه توديني گلت هاهيه جبرها اتوافق ..
رشا: ( كذبت)لا مافتح الموضوع لان ابويه موجود ... بقوا يمنا شويه وراحوا
يزن: ريحتي قلبي جنت خايف منه ... اريد اسمع صوتج
رشا: ما اكدر هسه ...اني هم مشتاقه اسمع صوتك ..اشتاقيتلك يا تُكغيتي
يزن: مو بكدي يا روح التكريتي وكل اهله ... اليوم رحت قدمت على فيزا.... دبرت جماعه يساعدوني تطلع ... راح يرتبوها ...
عن طريق شغلهم ... اذا ما طلعت اكلف   ابو طه اكيد تعرفي ...
رشا: تقصد ابو طه ابن عمة امي اي اعرفهم كم مره رايحيلهم للبيت
يزن: اي هو حبيبتي  ابن عمتي بس دا انتظر بلكت تطلع بدون ما احتاجه ...
رشا: ان شاء الله يزوني راح ادزلك صوره
يزن: شتفقت وياج
رشا: اصبر شوف شنو الصوره ... مو صورتي ...وصلتك
يزن: هذا منو ...
رشا: مو حلو
يزن: يولي شو طالعه عينج ... هذا منو اخوج
رشا: اي مهيمن شلون عرفته
يزن :  بي شبه من القمر مالتي ... راح امر من يم الباب اطلعي اشوفج
رشا: يزن لتقهرني والله ترى تأذيني بهالحجي ...ياريت صدك
هسه اطلع واشوفك گبالي ...
يزن: لعد اني شگول على الاقل انت هناك ماكو مكان يذكرج بيه
اني وين ما التفتت الگاج كدامي ... البارحه رحت لبيت احمد
العصر ... والله متحملت ... من دخلت للهول اتذكرت من لزمت ايدج وخليتها على قلبي ... اوف يا البغداديه قلبتي حالي ورحتي
رشا: يزن مو تتمنى لو مشايفني .... ولا جايه وملتقي بيه  احجي والله ما ازعل
يزن: اي والله البارحه بليل اتمنيت لو مشايفج على الي دا احس بي بفراگج وحالة الخوف الي بداخلي لا القدر ياخذج مني وتصيرين لغيري ...
رشا: لو اعرف اموت نفسي ولا اصير لغيرك ... وعد
يزن : لا حبيبتي متصيرين لغيري لو اعرف  اكتلج واكتل روحي وراج حتى متشيلين الذنب
رشا: ان شاء الله ربك يوگف ويانا ... ويجمعنا ... بالحلال
يزن: ونعم بالله ....