نداء القلب

ج١٠

#نداء_القلب
الجزء  العاشر
اماسي الليل
حقوق النشر محفوظه
رشا: للعصر طلعنا من المستشفى.... وامي شافت عيوني مبينه جنت ابچي من سألتني تحججت بمرضت ابويه .... من وصلنا للبيت بالي يم يزن ....
اريد اسمع صوته حتى قلبي يرتاح .... دكيت على نور ... كلت اشوف شنو صار الو
نور: ها رشاوي شلون صار عمو طالب
رشا: الحمد لله هسه رجعنا ... ويا عمو ابو طه وصلنا خطيه ... وگلها لامي اي شي تحتاجي اني يمج انت اختي
نور: الحمد لله .... وهذا فيصل ما وصل ...
رسا: لا بس اتصل على امي سألها شلونه ابويه ... وهاهيه حتى ما گلها راح امو اشوفه ولا جاب سيره يمعوده خلي بعيد حتى ابويه يرتاح ...
نور: صدك رغد راح تجي ....
رشا: اي  اتصلت على امي اسبوع الجاي تجي علمود اتشوف ابويه ... ومهيمن هم خطيه مقدم اجازه ... بلكت يقبلوها ... ويجينا
نور: يله احسن حتى شويه تغيرون جو وياهم ... تلتهون
رشا: نور اخبار يزن
نور: الظهر اجى  ويا احمد اتغدا يمنا ... قبل شويه اخذه احمد وطلعوا ويا الولد ... ما
يغيرون جو
رشا: شنو وضعه ... بعده عصبي
نور: لا بس ضايج .... ومرتين فتت للهول لگيته متمدد على القنفه و صافن
بس عادي هادئ... احمد بقى يشاقى وياه  ويضربه بالشقى ... يگله هاي
لان ضوجت رشا ... دا اتلوگ لمرتي لخاطر بت اختها ...
رشا: وشنو گله
نور : مجاوب بس يبتسم ... واحمد گله ... هاي دروب الزعل ... اخيك مجربها قبل ميقاوم اكثر من اسبوع
رشا: لا نور وضعكم يختلف انتوا .... هو قفل عليه لان اعتبرها ... اني
خلف بوعدي اله بعد ماعنده ثقه بيه ... خلي بعيد عني احسن مما يأذي نفسه ويروح يسوي بمثنى شي هو يخسر واني اخسر
نور: لا سمعته بحجي ويا احمد گله لخاطرها ما اكدر اسويله شي ...
لان يأذوها ... بس من كلامه عرفته متأذي ... لان ميكدر يحميج منهم
وانتِ بعيده
لان گله لو هي بالعراق .. الوضع غير شكل ... على الاقل ما اخليها هي
وامها وحدهم ...وابوها مريض بالمستشفى ... وهو دز ابو طه عليكم
رشا: نور... عفيه انت من تعرفين شي گليلي ... لتخلين بالي ترى والله ملتهيه ويا ابويه وامي ... الوضع بالبيت مشحون ... وامي تعبانه اكثر من ابويه
نور: ميخالف ليضل بالج احمد ويا ... هم ولدنا هيج اعصاب من يبردون يفكرون صح لتخافين
رشا: ان شاء الله ...
يزن : شاورت احمد ... اتصل على نور ...خلي تتصل برشا تشوف شنو الوضع
احمد: هسه اتصل ...
لتخاف ماكو شي رايح ابو طه وموصلهم للبيت العصر ... امور الحجي
تمام ...
يزن: ورشا
احمد:  زينه تگول ... هي هم سألت عليك ... يويل لتتعيقل انت اتواصل وياها  خطيه ...
يزن: لا اعرف اخبارها من نور ...
احمد: بكيفك .
رشا: مر اسبوع عليه ... لا سامعه صوته ولا حاول يتصل ولا  يدز مسج
واني هم من شفته قافل عفته براحته ... لو يريدني ... جان سأل
بقيت اعرف اخباره من نور .... ومر الاسبوع الثاني على نفس الوضع بس كل يوم يمر اتأذى اكثر ... احس خلص ما النا رجعه وكل الي بيناتنا انتهى ... التهيت ويا رغد ورجلها وجهالها ... وامي وابويه .. تغيرت نفسيتهم من اجتي ... شويه التهوا وياها ... هي تعرف بموضوع يزن بس
مجانت تعرف اكو حب بيناتنا ... عبالها خطبه ومصارت ... وحجيتلها
كلشي حتى على تواصلنا بالتلفون وشلون انتهى الي بيناتنا ...لان جنت محتاجه احد ... افضفضله ويهون عليه ... بعد يزن ... واشتياقي اله
ادري  بحاله مثل حالي من نور ... بس معند وحسبها  تخليت عنه بأولها
مهيمن ... وفضوا الاجازه مالته  ومكدر يجي ...نعمان رجل نور يعرف يزن وعلاقته قويه بي من ايام قبل ... بتكريت ...
ومن خاطبني يزن  نعمان مأيد الموضوع لان گايللها لرغد ... يزن خوش ولد
وسبع.
بس ميعرف بباقي التفاصيل ... لان وصيت رغد متحجيله شي
بس عرفت منها  متواصلين بعدهم ... كل فتره يصير بينهم اتصال ....
وبيوم ... طالعين دنتعشى كلنا برا ... دگ تلفون نعمان ... سمعته
جاب اسم يزن عرفت ديحجي وياه ... وبقى يسولف ويا ... اتوقعت الموضوع مو صدفه ... احتمال عرف من نور ... هم بالامارات ...يمنا
واتصل عليه ...
رغد: بشه تدرين منو ويا نعمان على التلفون
رشا : اعرف يزن
رغد: لج ديسأله على الفيزا شلون حصلها
رشا: يجوز عنده شغل هنا... لو علمودي جان ... سأل عليه صارله اكثر من اسبوعين .. گاطع
رغد: ما ادري  والله يجوز لعد صدك شغل خلص انت لتفكرين بي وشيلي من راسج
رشا: ياريت الشغله سهله... وقلبي شلون يشيله
رغد: والله رشا اياج تقبلين بمثنى ترى اتشوفين ظيم ويا بيت عمي واطباعهم الخبيثه ... احنه منتوالم وياهم قلبنا طيب وماعدنا صلافه وخبث
هاي صارلنا اسبوعين يمكم ... بالجذب ست تمارا ما شالت تلفون ... سألت
والعتب مو عليها على اخوج ... حله وربطه بيدها
حتى نعمان البارحه سألني على فيصل شو لا مر لا سلم ... فشلت گتله مو
ميحجي ويا ابويه ... بينهم مشكله
رشا: خلي بعيد احسن ... ما منهم بس المشاكل هو ومرته
اني هم راح يبدي دوامي ... بعد ايام ان شاء الله هم التهي ....
يزن: جان عندي اخر امل ... تطلع الفيزا واروح اصالحها ... وهم اجاني رفض ... حسيت القدر واكف بطريقي وياها ... ومراح ينطينا مجال
نكمل سوا حسيته مثل الاشاره الي بيناتنا شي مستحيل يصير ... شكد جنت احس بالعجز .. ورا الرفض حسيت بالعجز والاستسلام اكثر ..
كل الي اكدر عليه احبها من بعيد وتبقى ... اول حب بحياتي ...حالي نقلب ...
وما الي خلگ الدنيا لا طبه لا طلعه لا ضحكه ... الي مهون عليه ... احمد
متنفسي الوحيد والدوام ... من عرفت من نور رغد بالامارات ... اتصلت على نعمان ... اساله شلون كدر يطلع فيزا...طلع لان رغد اهلها مقيمين ...
تطلعلهم بسهوله فيزه زياره ... ولان هي سابقا مقيمه ويا اهلها ...بسهوله
ينطوهم موافقه .... مات كل امل بداخلي  راح التقي برشا مره لخ ... مرت ٣ اسابيع حسيتها عمر ... ويوم على يوم اعصابي تتعب وما متحمل حجايه من احد ... حتى بالبيت يتجنبوني ... ومخليني على راحتي ... صارت متعتي وراحتي ابقى بغرفتي ... افكر بيها وعبايتها بحضني ... اتذكر كلامها
والشهر الي بقته بتكريت كدام عيني ... حبست نفسي بهالذكريات....
الى يوم الي رحت بي لبيت خالي بالقادسيه ... كاعد ويا الولد ... اجتي على
بالي ... متحملت ... ابقى بعيد اكثر دزيتلها مسج
💔عاهدتني الا تميل عن الهوى
وحلفت لي الا تنثني .... جاد الزمان وأنت ما واصلتني
يا باخلاً بالوصل انت قتلتني ... واصلتني حتى ملكت حشاشي
ورجعت من بعد الوصال هجرتني ... لما ملكت قياد سري بالهوى
وعلمت اني عاشق لك خنتني 💔
رشا : من سمعت صوت المسج قلبي حس هو ... دكات قلبي زادت
بين خوف لا قلبي متوهم ويطلع مو من عنده ... وبين لهفه واشتياق وتمني
يطلع هو
رحت لغرفتي من شفت المسج منه حتى وبعدني ما قاريته .. احس رجعتلي روحي ... من فتحته وشفت الكلام ويا كل كلمه دموعي تنزل ... لان حسيت
الكلام من انسان ميت ... وعتابه مأذي اكثر مما  اذاني ....
قلقت عليه .. وخفت اكو شي ورا هالمسج ... اجى على بالي كل الامور السيئه ... دزيتله
اشتهي الابتعاد عن كل شئ.... الاعنك فأنت راحةٌ لكل اوجاعي )
يزن: من وصلتىني الرد .... وصلني الامل والراحه الي فقدتها من يوم
الي  ما سمعت  بي صوتها وكلامها ...
دزيتلها اكو احد يمج
رشا: دكيت عليه .... الو
يزن: گمت طلعت ...  تنهدت ... الو يا قمر بعدني على بالك
رشا: منو ينسى روحه ونبضات قلبه
يزن: اويلي يابه روحي ردتلي ... موتيني
رشا: بلا عتاب ... اني هم جنت ميته بلياك... وانت هم اخذت روحي
يزن: والحل ... وين راح نصفى بهالحب ....
رشا: خليها على الله ....
يزن: اريد احجي وياج مثل قبل ... وشي يمنعني ... مديطلع الكلام
من سمعت صوتج ... طار كلشي من راسي
رشا : ابتسمت.... احجي ويايه تكريتي ... حتى يطلع الكلام
مو گتلي من شفتج بيوم الحنه نسيت البغدادي .... يجوز من سمعت صوتي
صار وياك نفس. الشي ... سمعت صوت نفسه وتنهيدته
يزن: عجل ليش اهلج وحدج مطلعيج
رشا: ههههه حتى الاقي التُكغيتي واتربع بقلبه
يزن: يا قمغ ليالي التُكغيتي .... ليله أظلم من يوم سافرتي
رشا: والتگغيتي شعل ضوّ بقلب القمغ... وبحبه بعده يضوي ....كافي يله ارجع
احجي بغدادي تعبتني ... بالگوه جمعت كلمتين
يزن: ههههه رجعنا للمداهر
رشا: يانور عيني .... ضحكتك تريح قلبي ... الله لا يحرمني منك ومن حبك
يزن لتعوفني ... والله تعبت بلياك ... من اسمع صوتك احسك ويايه .. ممفارگني
يزن: وانت ما غبتي عني لحظه .... ولا راح تغيبين ... صرت مسجون بيج
رشا: دزلي صورتك
يزن: اخاف ادزلج صورتي حاليا .... وتبدلين عليه
رشا: دزها لتدلل ... يزوني اموت عليك والله
يزن: لعد استلمي الصوره
رشا: ههههه اموت على الخزره والحاجب المعكود
رغد: شو كاعده وحدج ....
رشا: اشرتلها على التلفون
رغد: ها التكريتي قلبه حن ومتعب اختي .....
يزن: ابتسمت  سلميلي عليها ....
رشا: يسلم عليج
رغد : لا سلام ولا كلام متخاربين ..... من قبل منصير نسايب
يزن: ههههه دخلي اصير نسيبكم ... واتخاربي براحتج ... اجي لمصر اصالحج
رشا: ترى سمعتك مخليه اذنها ....
رغد: والله اذا ضوجتها بعد .... بكويلاتك ... ترى حافظتها ... لسوالفكم
من التكريتي العندي ...
يزن: ملي لازم بينو
رغد: لَكَن.. قعيد غاحه ... ولا تعب القمغ ...
يزن: هههه ريحتي قلبي يعني من اخذها ... راح تتعلم اللهجه
رغد:ههههه  تتعلم بدون متحس ... منك ومن جهالك
رشا: ها سمعت اطمئن ...
يزن: ما اطمئن الا وانت الي ... ساعتها لا اريدج تحجين تكريتي ولا اريد جهال ... انت وحدج تكفيني اريدج انت بلهجتج وبأطباعج  وخبالاتج
رشا: لا الخبالات اختصاصك قلبي اني المداهر اختصاصي
يزن: اشتاقيت للمداهر ....
رشا: يا رجال كاعد تتغزل .... وجهالك مجلبين بذيل دشداشتي طلعوا روحي شيل واحد منهم ... حاير بس بروحك
يزن: ههههه اريدهم ٦ واحد ورا اللخ ... بحيث افوت للبيت الگاج ...
مثل المخبله وشعرج مكفوش وصايره اعصاب
رشا: يا لئيم ... وانت وين جنت من تفوت ... حتى اعرف اجاوبك
يزن : جنت اتعلل ويا احمد والولد ...
رشا: مره لخ من تطلع تاخذ جالك لا اشمرهم بالشارع ... كافي عليه خبالات ابوهم ... اريد اروح امشط
يزن: هههههههه بالله مو عاقله .. واموت عليج  واذبحج اذا سويتيها وشمرتيهم
رشا: لعد تريد ٦ تگابلهم ٣ عليك و٣ اوزعهم  يم نور وغفران ويم خالتي ام نعمان ...
يزن: وانت شنو شغلج لعد
رشا: اداري ابوهم ... حتى ليتخبل عليه
يزن: هذا بسمار وعتب
رشا: فهمت يعني .... حسيت شكد اذيتني
يزن: ادري والله بس مو بكد اذيتي ... وياج حسيت نفسي عاجز ... ومربط ومتحملت هالشي ... وكلامج دگ بقلبي ... لا انت تنفعني ولا اخ
رشا: يزن جنت تعبانه والموقف الي نحطيت بي متحملته ولا عرفت اطلع منه ... والله مو قصدي اجرحك لو ازيد همك ... بس وياك ويا ابويه احس نفسي قويه ...
يزن: رشا ... قدمت فيزا للمره ٣ ... وماعندي أمل اشوفج مجرد ... محاوله
وتعبت من الانتظار ... وراح ابقى احاول بلكت وحده من المرات اتصيب
هسه گلولي اذا تروح تسوي اقامه بعمان ... بسهوله تطلعلك ... وناوي اروح اطلع اقامه ...هالفتره ... بس دا انتظر الفيزا ...
رشا: رجعنا مثل قبل .... سافرت رغد ...
وبديت اداوم .... بيوم جنت بالكليه الصبح .... دگ عليه يزن الو
يزن : انت وين
رشا: شنو انتِ وين ... خوفتني اكو شي  
حتى صباح الخير ماكو
يزن: صباح الخير لا ماكو  شي سلامتج ...اطلعيلي افتحي الباب اريد اشوفج
رشا: شذكرك بيها
يزن: ترى دا احجي صدگ...
رشا: يله فتحته وينك شو ماكو
يزن: انتِ ناصبه عليه  شوكت ترجعين للبيت ...
رشا :  الظهر يخلص دوامي ... ترى قلقتني شكو
يزن: تكدرين تطلعين العصر .... دا اوصيج على شغله ..
رشا: احاول من ارجع واردلك خبر شنو الشغله
يزن : فد ٣/٤ ساعات ادزلج صورتها ... حتى اشوفيها
رشا: احاول قلبي اطلع واجيبها
يزن: ضروري شغله مستعجله ...
رشا: ان شاء الله احاول بس دزلي الصوره .... ورا كم ساعة  دزلي  صوره
فتحتها صورته بمطار دبي ... من شفتها طگيت بچي ... دكيت عليه
گول والله انت هنا
يزن: وعيونج اجيت اشوفج ولو بيدي اطلع من التلفون

لقاء ما بعد ٣ شهور ونص