نداء القلب

ج١١

#نداء_القلب
الجزء الحادي عشر
اماسي الليل
رشا: اللهفه والارتباك سيطروا على تصرفاتي ....
حسيت نفسي مثل الطفل يفرح بجية العيد ... ما اعرف ابچي ماعرف اضحك ما اعرف ابتسم ... دوامه مشاعر ...مكبوته بداخلي تفجرت كلها بلحظه وصوله ...
رجعت للبيت اول ما دخلت سلمت ... هلو ماما اليوم اروح للمول
خوله: هلو هاي شبيج دنطي صبر اول ما فتحت الباب ... اريد اروح للمول ... درتاحي بالاول ...
رشا: ما احب  اكذب بس مجان بأيدي شي اتحجج بي گتلها مو
اتفقت ويا البنات من اوصل ارجعلهم خبر ...
خوله: اي ماشي روحي غيري جو ... بس انطي خبر لابوج بالاول  ديصلي
رشا: هسه رايحتله ... دخلت حاولت اضبط وضعيني ... دا احس نفسي مفضوحه ... الكل تدري مرتبكه ووضعي مخربط ...
هلو باباتي ... رحت بوسته ... وطلبت منه اطلع للمول ... وراها دخلت لغرفتي ... بعدني بملابسي ... فتحت الكنتور ... اختار شي اروح بي ...
نزلت الملابس  على جربايتي ... على كومة  الملابس العندي حسيت ما عندي شي اللبسه ... حتى ذوق ما بقى عندي ... دزيتله مسج ... يزون
يزن: ها حياتي وصلتي
رشا: اي وصلت شنو راح تلبس
يزن: ليش ... بالج شي معين تريدين اللبسه
رشا: لا براحتك ... فضول
يزن: راح اللبس تيشيرت  وجينز ... لحد هاللحظه بعدني مامستوعب ولا مصدك احنه بنفس المكان .... الا اشوفج .. وما اعرف شنو رد فعلي من راح نلتقي ....
رشا: اني هم متشوفني حتى ملابس ما اعرف اختار ... اريدك أتشوفني مثل
اخر مره
يزن: رشاوي اللبسي اي شي مو تتأخرين عليه
رشا: لا ما  اتأخر ... لبست مثله قميص وجينز وحجابي وكل شويه اروح يم المرايه اجيك ... اخر شي حسيت شتلته للمسكين  ... جانت مشاعر مبهمه كأنه راح التقي بشخص ما اعرفه او عقلي مامستوعب وومصدگ ... راح التقي بي
اتفقت ويا نلتقي بالفستيفال ستي ينتظرني برا يم المي .... انطيته مكان بالضبط يوگفلي يمه
اخذت تكسي ... احس قلبي مو ينبض يرچف ... حاله ما اعرف اوصفها ... مثل القلق  من  وصلت لبوابة المول نزلت بدون وعي رجليه تمشي بسرعه
حتى بعض الخطوات صارت من سرعتها مثل الركض .... جان بداخلي شعور اشتياق لدرجه تخيلت مراح اتحمل اشوفه وما اركض عليه واحضنه ... بس لحظه الي شفته من بعيد كاعد ويتلفت يدور عليه بين الوجوه ويهز برجله متوتر مثلي ... الخطوات تباطئة والدموع انحبست ...
احس مثل تيار يمشي بجسمي ... خجل وارتباك ... ردت اهون عليه وعليه
اللقاء ... التفيت من وراه ... لحد ما وصلت يمه ... تنهدت ياربي قلبي راح يطلع من مكانه مديت ايدي لزمت خده .... سألته مضيع شي
يزن : من سمعت صوتها وصارت ايدها على خدي...  تيار كهرباء مشى بجسمي متحملت جريتها بوست چف ايدها ... واستنشقت راحة ايديها ... جاوبتها مضيع روحي ...
ولهاللحظه ما التفتت ... ردت المشاعر الي بداخلي تهدأ حتى اكدر اسيطر عليها ... وگفت گبالها وايدها لسى بأيدي 
رشا: من التقت نظراتنا ....  غمض عينه وجر نفس طويل ... لا اراديا على ابتسامته الي اموت عليها ابتسمت
شفايفنا ما نطقت بس العيون حجت كل الي بالقلب .... وعيوني ... متحملت
نظراته ... ولهفتها نزلت دموع ... مكتومه ... حسيت بأرتباكه من لزمة ايده لايدي بقوه لدرجه حسيت بألم خفيف ...
يزن : تعالي خلي نمشي ... اخذتها ومشينا وايديناتنا متشابكه ... نسيت كل التعليمات الي جنت انطيها النفسي ... اياك تحاول تحضنها اياك تتقرب منها ...  وتحجي وياها لاحد يشوفها وياك ... الا من  تكعدون بمكان .. أمن
اياك واياك ... وبلمسه منها نسيت نفسي وعقلي ... حتى الحجي الي جنت حافظه واريد اعبر بي ... نسيته ويا نظره عينها ... شكد جنت اكره مثنى بهاللحظه كرهته اكثر لان حرمني من احلى لحظات يعبر بيها رجال لمرته
عن حبه واشتياقه ... لو خاطبها قبل ٣شهور ونص جان هسه عاقد عليها
ما احذر ولا انجبرنا نلتقي من ورا الكل ... ولا اعرضها لمشكله ... بس مابيدي حيله ... الشوق غلبني ... وغلب الحذر
كعدنا واحد بصف اللخ ... سحبت ايديها الثانيه ...
رشا:  اكرهك
يزن:  فتحت عيني وضحكت ... ليش ياقمر
رشا: لان ما بقى بقلبي مكان احبك ازيد .....بعدني قمر متغيرت
يزن: بعده القمر مثل ماهو واحلى..... بس عطره متغير
رشا: ابتسمت ترى ايدي اذتني ... ودا احسك ممشتاقلي مثل ما اني مشتاقتلك
يزن: ابتسمت رخيت لزمتي ... وصعدت تك ايدها على قلبي حسي بدكاته مسوي انقلاب بس الي يريده ما اكدر ابينه ولا اسوي وانت مو حلالي   ...( من الاشتياق يتمنى يحضنها )
رشا:  ابتسمت ادري بس ردت اداهرك  واحجيك ...
يزن: ما اريد احجي خليني  غرگان بهالعيون  واشبع منها هالعشر ايام ...
رشا: واني ميكفيني عمر وياك
يزن: لو ماره بلي مريته ورا كل فيزا ترفض جان عرفتي هالعشر ايام
عندي عمر ... ونعمه ترجيتها من الله وحققها
رشا: الحمد لله من شفتك ... بخير بالي كله يمك... بس شو انت حليان
يزن: ابتسمت ... مو مستغرب هالعقل ... متعلم على خبالاتج بالتلفون
البنطرون مو كصيف
رشا: هههه اني هم مستغربه ما نقنقت ... شكيت مبدليك بس هسه ارتاح قلبي
موجود ويايه النسخه الاصليه ... عديها اليوم ...معرفت شلبس شفتهن گبالي لبستهن
يزن: يولي شتفقنا...
رشا: يولوا ... شوكت تبطل نقنقه ... وتخليني براحتي
يزن: ههههه لتاخذيني بالمديهغ خزرتها مبتسم .. البيس على مرامي بلا عناد
رشا: ماشي ما اللبسه بعد لخاطرك ... اللبس نفانيف
يزن: هسه نمر ناخذ عبايه تلبسيها هالايام حتى اخذها ويايه
رشا:شگد تحب العبي ... اذا كل مره اشوفك تاخذها ... تفتح محل.
يزن: لا ما احبها بس الرصاصيه الي عندي ... شكلها حلو ... واغيد  لخ هم ملونه مو سوده ...
رشا: اريد اعرف ليش تحبها ....
يزن:  ما اعرف من شفتها عليج حبيتها .... ( بداخلي  اعرف )
رشا: يله لعد خلي نروح ناخذها ... لان فد ساعه ارجع ...
يزن: لَكَن ( لعد) خليها لوقت ثاني ... خلينا هوني هالساعه
ياقمغ من لقيتك كل همي زتيتو( زحته او رميته)  ... احمد يديهغ بنور يقله غيحي تعلقت بيك وحبستيها بتكريت ... على الاقل غيح يزن تعلقت ب رشا وسافرت  للامارات ... تغير جو
رشا: ههههه الله يسعدهم ان شاء الله تكون نهاية حبنا مثلهم ...
مر الوقت بسرعه ... يزن لازم اروح ... حبيبي والله لو بيدي ما اعوفك ...
يزن: يله حبيبتي نطلع بتكسي واحد ... اوصلج  للبيت وارجع للفندق مشي
رشا: لا هنا أمان اني ارجع وانت روح ارتاح
يزن: لا اوصلج حتى اطمئن
رشا:  اتفقنا ثاني يوم يمرلي  وصلنا مسافه قريبه على البيت مشي خمس دقايق ... بقى واگف من بعيد يشوفني وصلت ويرجع ....
لليل ... دزلي مسج ... اذا كاعده ... خلي اشوفج من الشباك ... فتحت الشباك
شفته ... دزلي مسج ... اريد اصعد لابوج
جاوبته لا ما ريد احد يعرف انت هنا ... مراح اكدر اشوفك اذا عرفوا ...
وثانيا بلغتك ميكدر ينطيك موافقه ...بعده الموضوع ويا عمي متأجل الى ان اتخرج ... فدوه لتفتح عليه باب .. خليني خلصانه منهم ..ادري بيك ممرتاح
لان  راح التقي بيك من وراهم ... بس اليوم شفتك بمكان عام ..وادري انت حريص عليه ورايدني بالحلال وصبرت كل هالفتره حتى تجي ونلتقي ...
اتحمل واضغط على نفسك انت مو يوميه موجود ... يجوز بعدها  اشهر ما اكدر اشوفك
يزن: ماشي ... اريد اشوف وين  توصل ويا  عمج وابنه ... واصبر
ثاني يوم
يزن: صباح الخير ... هسه راح اطلع
رشا: انتظرك قلبي ... دقيقه  مو تجي مرتب نفسك
يزن: لعد شلون اجي ... ( اوف قلبي مخبلتني هالبنيه )
رشا: يولوا اغار ... مو بس انت تغار ... منين اجيب احساس
يزن : هههه هسه اجي لو ابقى ... وانزل للمسبح
رشا: يزن اذبحك اذا نزلت للمسبح كله روسيات ... انتظرك يزون
يزن: هههه حرام اذا انت عاقله  .... يله هسه طلعت
رشا: من وصل دگ عليه ... دليته مكاني ... مبتسم من بعد امتار
صباح الخير
يزن: حبيبتي  ها ي ٣ مره نگول صباح الخير  .... ويضحك
رشا:عمر حبيبي وروح حبيبي ... صباح الخير صباح الخير ( سويتها مثل الاغنيه )
يزن: هههههه لج شبيج اليوم طاگه فيوزاتج ....
رشا: ههههه اي والله من البارحه لليوم مو صاحيه ... اخاف اطلع دا احلم انت يمي
يزن: ان شاء الله يجي اليوم الي تكابليني بي صبح وليل ... ياقمر هاي الملابس احلى من البنطرون مال البارحه
رشا: ( جنت لابسه نفنوف ) ... امشي يزون ..خلي نتريك ... بعدين اقنعك
بالبنطرون ... بقينا نسولف على موضوعنا ... وموقف فيصل ... وابويه ومهيمن ... حسيته اطمئن من عرف ابويه ومهيمن .. ويايه 
وراها بقى يسولفلي على سفرة  عمان  محصل الاقامه  ... ومناك مقدم على فيزة الامارات ومقبوله .... وعدني كل ميصير عنده مجال ويحصل فيزا يجي
رشا: اي يزون نرجع على البنطرون ... انت تريد تلغي من حياتي ...
يزن: لا بس اللبسي شي طويل ويا ... مو هسه شفت بنات لابسي ويا ملابس طويله
رشا: فتحت عيني يزن جنت تبصبص ... على بنات الجامعه
يزن: يولي اباوع الي يصير كدامي بس والله مو مثل نظرتي الج
رشا: انقهرت من كل عقلي وقلبي وجعني ... بداخلي احجي ويا نفسي اذا ما اصير من قسمته ويتزوج وحده ثانيه يمكن اموت ... هالتفكير خلاني متوتره
وكأبني ... حس عليه وبقى يحجي ويايه ...
يزن: خليها بالج الرجال اذا يريد يسوي شي من وره مرته او حبيبته ميخليها تحس ... اكذب عليج اذا اكلج مجان عندي علاقات قبلج بس من اتقدمتلج لليوم ماعندي غيرج ... ولا افكر بهالامور... اني مو نبي بس دماغي مشغول شوكت وشلون راح يقبلون اخطبج ... على طول انت ببالي ...
ومكتفي بيج ...
رشا: يزن غير الموضوع...
يزن: يعني ما اقتنعتي ... بكلامي ... فوتي محاظرات اني رايح ...
رشا: من شفته وگف ... يزن ابقى
يزن: ما اتفكرين صاراكثر من ٣ اشهر شفت نجوم الضحى حتى اجي اشوفج ... وتالي تزعلين على موضوع تافه ...  الافضل اروح ...
عفتها وطلعت ....
رشا: من رجعت دكيت عليه مجاوبني ... دزيتله  انت ليش بسرعه
تصير عصبي ومتتحملني ... متصدك تزعل ...
يزن: من رجعت  منها جنت ضايج  طلعت للمول ... من افتريت شويه ارتاحيت ... دخلت محل عطور ...اخذت عطور رجاليه ... وبقى بالي
اخذ العطر الي شميته بأيدها البارحه ... جربت اشتم اكثر من عطر نسائي
معرفته ... طلعت  اتغدا ... ورها بشويه وصلتني مسجات منها ....
دزيتلها  دا اسبح  ...والمسبح مليان  صدك شگد اكو روسيات هنا ....
بقيت مبتسم انتظر رد فعلها دقايق ودزتلي
رشا: اخذ راحتك ... بس لتگلي جاي علمودج دا اشوفج انت جاي تتونس
يزن: دزيتلها صورتي ...مو فهمتج الرجال من يريد يسوي شي بس مخافة الله توگفه ... قنعتج اني بالمسبح وصدكتي...... واني بالمول يعني لو اريد اللعب من وراج ما اخليج تحسين ...
رشا: الضوجني مو الي بالك... غير شي
يزن: شنو الي ضوجج
رشا: تخيلتك أتصير لغيري والله قلبي لهسه يأذيني
يزن: ان شاء الله متصيرلي مره غيرج ... بله مو حرام عليج ضيعتيلي يوم
ولو اني محسب حساب هالخبالات وحجزت  عشر ايام بدل الاسبوع
رشا: والله حرام عليك انت اني مشتعله وانت بهالبرود
دگ عليه ... الو
يزن: يولي من البارد ... مو مشعول جدي من يوم حبيتج شنو الي يريحج
واسوي  اتزوج روسيه ههههه
رشا: حتى ما اذبحك
يزن: يويل يابه القمر يهدد...
رشا: اشتاقيتلك باجر عندي بس محاظره مهمه .. اخلصها ونطلع ..
لأتلانتس.... حتى تاخذ صور ويا الدلافين
يزن: بس اخلص غدا امر اشوفج من الشباك ....
رشا: ورا ساعتين .... مرمن شفته ... بقى واگف شويه يحجي ويايه  بالتلفون
يوم ثاني
يزن: حبيبتي انت كل الاماكن تندليها ...
رشا: لعد ماكو لهو هنا بدبي بس الطلعه والمطاعم والمولات ... لا اهل ولا كرايب ...
يزن: بيت فيصل وين ...
رشا: بابو ظبي ... وهذا المكان بس بأيام العطل يجوه علمود المطاعم والدلافين وحوض الاسماك ... شويه ونوصل ...
نزلنا من التكسي... ودخلنا ....
يزن : شو انت اليوم گصرانه ....
رشا: ابتسمت مو دائما اللبس عالي اليوم لابسه فلات..... ها راح تبدل عليه
يزن : ليش اگدر ... دعسوقتي
رشا: عاد مو دعسوقه هياتني صله لجتفك .... تعال نتفرج على السمج
حتى ناخذ صوره
يزن: ردت اداهرها ... دشوفين هاي السمجه ( ضخمه ) هاي اني ودشوفين هاي السمجه الصغيره هاي انتي
رشا: ترى لحيت هرقل افتدي ....
يزن: ههههه لج بالعكس احلى المره اكصر من الرجال .... حتى من تغثه مثل مغثة الصبح براشدي يطيرها
رشا: ها ددك على سالفة البارحه الصبح  .... تعال اصالحك بصوره
يزن: لا ماكو صور شتفقنا ....
رشا: يزن بس صوره اريدها تبقى ذكرى ... لخاطري ...
يزن : انطيني ايدج
رشا: خليت ايدي بأيده ...وگفت قريب عليه نزل التلفون على ايديناتنا اخذ صوره ..... هاي شنو دتقشمرني
يزن: هاي ذكرى لخاطرج وخلص .... لتلحين
رشا: بقى ايدي بأيده ....وگفنا نتفرج على السمج .... گتله زين اخذلي صوره عاد اني اتذكر انت موجود ويايه بهذا اليوم
يزن: انت ليش من اگلج شغله متسمعين كلام ما احب بنيه تاخذ صور بتلفون
بله سويتي الگتلج عليه وفرغتي صورج منه ...
رشا: اي نزلتها على الحاسبه ... والله مابي
يزن: ابتسمت لعد هاج تلفوني اخذيلي صوره حتى اتذكرج انت ويايه بهذا اليوم
رشا: عكدتله حاجبي شكد لئيم ... اخذتله صوره.... بقى طول الوقت يداهرني ...
يزن: دعسوقه  ...ورا الخطوبه كل ٤ خطوات نمشيها ناخذ صوره بالكاميرا  ...
رشا: شو اليوم بدلت القمر بدعسوقه ....
يزن: دعسوقه راهم اكثر ويا طولج .... القمر يحتاجله طول
رشا: حبيبي ذاك قمر الناس يحتاجله طول ... اني قمر ليالي التكريتي بهذا طولي
يزن: والله قمر لياليه .... ونبض قلبه ... ومطيره النوم من عينه ...
رشا: اي هيج صير عاقل ... لتنغر بطولك عليه
يزن: ههههه احبج ام راس القوي
رشا : ورا كم يوم التقينا بمول راد ياخذ شغلات  دخلنا لمحل ملابس رجاليه
يزن : اريد قمصان  فوتي اختاري ويايه
رشا: شفت قميص مقلم حلو نيلي وبي اقلام ...هذا شوفه
يزن: حبيبتي هذا بي وردي ...
رشا: يزن هذا رجالي بي قلم وردي عادي
يزن: هذا اذا اخذه لازم اشتري ويا فيونكه ورديه لشعري ههههه
رشا: مو اگلك معقد ...
يزن: حبيبه ألوان رجاليه ... اختاريلي ...
رشا: اختارينا ... وراها دخلنا لمحل راد عطور وهدايا ...
يزن: اريد اخذلهم نفس العطر الي تستخدمي
رشا: اني هوايه عندي.... اصلا ما اتذكر اليوم شمخليه
يزن: رشا الي جنتي مخليته اول يوم ....
رشا: ما اتذكره
يزن : امشي شوفيني الي عندج واني من اشتمه اعرفه
رشا: بقى يشتم العطور گلي بعد مدا اميز ... شتميت رجالي ونسائي خبطت عليه... جبتله گهوه گتله استنشق هسه ترجع تميز ... انطيته وراها ماركة بيها كم عطر استخدمه ... اخذ الورقه مني شمها شفته مركز ... رجع اشتم الگهوه
ورجع شم الورقه ... ابتسم هذا ... صدگ ضحكني ..
يزن:  مبتسم شكو تضحكين ولج ...فوك ما سطرتي راسي صار ساعة اشتم
حتى فقدت حاسة الشم ...
رشا: زين راح اخذلك عطر هديه .. مني الك
يزن : لا انت گليلي وينه واني اخذه .... اعتبري الهديه وصلت
رشا : رحت بوجهي على عطر گتله هذا شمه ... شمه عجبه گلي منو يخلي منه .. روحتج عليه مال احد مجربه
گتله لا بس مره دخلنا اني وابويه وامي دناخذ عطور ... فمن ينزل عطر جديد ... ينطوك تشتمه بالورقه ... اجيت على بالي وجنت مقرره اخذه الك بس اعرف احد يروح لبغداد ادزه ويا غراض نور ...
يزن: عندج غراض لنور ... خوش حجه حتى اشوفج بيها ...
رشا: همزين ذكرتني بيها خلي امر اخذلها كم شغله مال اطفال ...من فتنا ...
شفته يقلب  سألته تريد تاخذ شي
يزن: اريد تختاريلي شي لولد ..لو بنيه بس تخيلي لابنج لو بنتج
رشا: مفهمت لمنو تريده
يزن: اريد اخذه اتفائل بي ... يجي يوم نتزوج ويصير عدنا طفل ...
رشا: انت عندك سوالف اني ما افهمها ساعة عبي ساعه ملابس اطفال
يزن:  ابتسمت متلبسني جني اسمه رشا  مخبلني .
رشا: وصدك اختارينا سيت مال حديث الولاده ابيض  وذكرته بالعبايه ...
جلب الا ناخذ تالي اخذنا وحده بيضه وبيها شغل اسود ... الصدك طمعت بيها  من ديدفع الحساب  سألت اكو وحده ثانيه گلولي لا بس هاي القطعه رحت عليه گتله هاي متاخذها  وياك ..اريدها ...
يزن: اشبعي بيها لبس هالايام ... ورجعيها.. ما اطلع للمطار اذا موهي بجنطتي لو اعرف اجي لبيتكم اگله عمو بلا زحمه العبايه
رشا: ههههه عاد انت اسويها ... گلي راح اسويها ... بس مصدكته
مرت الايام صح سريعه بس حسيتها عمر وياه من فرحتي بي حسيت بكل لحظه تمر واحنه سويه الها طعم ثاني وذكريات طول عمري ما انساها
راح اتذكره بكل مكان التقينا سويه اكلنا ضحكنا اداهرنا ... قبل يومين من سفره
اجى ويايه للدوام من الصبح جنت بيومها معزومه العصر  بعيد ميلاد صديقتي بمطعم ... وتعرف بموضوع يزن اتفقت ويا يجي حتى اشوفه ... كعد على صفحه ينتظرني ... من ديطفون الشموع التقت نظراتنا ابتسم بوجهي ...
بداخلي دعيت ياربي لتحرمني منه اكتبلي اكمل حياتي وياه ونرتبط
بعدها كعدت ويا
يزن : شنو دعيتي
رشا : شلون عرفت .......
يزن : شفتج غمضتي ... من جنت اتفرج عليكم
رشا: اي صح ... خلي نطلع نتمشى ... طلعنا لزم ايدي ... يزن راح اشتاقلك
قلبي ...
يزن: الله كريم حبيبتي  ان شاء الله ما اطول عليج ..
رشا: رفعت ايده بوستها الله يحفظك الي جان احساس بداخلي وگإبه خلت ادموعي تنزل ...
يزن: مسحت ادموعها ...اتحملي هالوضع المؤقت ان شاء الله تاليها خير
ترى من اشوفج هيج يبقى بالي عليج ... صيري سباعيه  اتفائلي .. الجاي
ان شاء الله احلى
رشا: تعودت  عليك صار كم يوم ...  والله مو هاين عليه نتفارگ مره لخ
يزن: ميخالف نصبر ... مابدينا شي ...
اليوم قبل سفره
رشا: هم اجاني للكليه بقى ويايه الى نهاية الدوام ... لان يعرف مراح اكدر اشوفه غير وقت ...جنت كلش متأزمه لان باجر طيارته الصبح ....
روحي تطلع من اتذكر ... هو هم بقى يواسيني ... وبقى قلق عليه ... گلي هسه راح اروح لان معزوم على غدا يم ابو طه ... ما اكدر بعد اتأخر لتبقين بالي ... من اخلص امر اشوفج من الشباك
رجعت للبيت انتظر منه مكالمه ... بقى مختفي ... وقت بين نهاية  العصر على المغرب ... اندگت الباب ...رحت فتحتها ... نصدمت وارتبكت ... يزن وابوطه .. ابتسم لان حس بصدمتي ... امي وابويه ورايه رحبوا بيهم ... دخلوا .... اجيت سألتهم   اسوي چاي لو گهوه وما اكدر ارفع عيني واشوف يزن ...
ابو طه : شلونج عمو ... جاوبته الحمد لله بخير
گلولي جاي ... اجتي امي ورايه گالت ترى ابوج عزمهم على العشى .. طلعي كبب بورك شنو تلگين بالفريز   وابوج هم وصى اكل من برا ... شوفي بعد شنو اتسوين ...
گتلها روحي انت اكعدي وياهم ... اني گلي واسوي مقبلات   وارتب الامور
دا احضر بالصينيه مال الجاي ... وسمعت ابو طه گله لابويه .. يزن البارحه وصل عنده شغله وراد مني اجي ويا عليك  تلتقي بي ... ويحجي وياك بالموضوع وجها لوجه ...
گلت خلي اطفر اودي الچاي قبل ما يحجي يزن ... وديته  ورجعت بسرعه للمطبخ وجهي تطلع منه حراره ... اريد اسمع شنو راح يحجون وشنو الرد
جان كلامه كله موزون ... حسيت ابويه كلش اتجاوب وياه  (ابويه اعتذر من يوم المشايه لان راحوا وفشلوهم ... گله لا ما عليك عتب هم اخوتك .. واني مقدر ومحترم وگفتك وياهم ...مو مال تتخارب وياهم علمودنا ... بس شغلة الزواج هاي متجي الا بالتفاهم والموافقه ... اني قبل ما اتقدم طلبت من نور تسأل رشا ... اذا اتقدم توافق ... وگلتلي اي موافقه ورجعت شفتها ببيتهم واخذت المرافقه عن لسانها ... والموضوع الي صار ما خلاني اتراجع عن طلبي ... واليوم اجيت
حتى ااگد بعدني شاريها ... ودا انتظر تنحل المشكله وارجع اتقدملها ... )
بقوا ابويه يحجي ويا على المشكله وگله تخلص هالسنه گتله لاخويه  وهي تختار ..اني ما اجبر بنيه على الزواج ... وانت هم اگلك نفس الحجي ...
خلي تخلص دراستها هالسنه واذا بعدها موافقه على طلبك اني منطيك كلمه
هي الك ... بس اذا رادت ابن عمها ... ذاك الوكت ... بعد قسمه ونصيب )
حسيت كلام ابويه مي بارد مزل على قلبي وقلبه لان ... هو انطلق .. وامي دخلت بالحديث كله جان ايجابي وامي ما قصرت بقت تمدح بي وشلون هناك بتكريت قام بالواجب ... ضاربه صفنه واسمع حجيهم سمعت .... وينج عمو شنو احنه غرب خالتله تعالي .... غلست
اجتي امي گلتلي روحي ... اني اكمل اكعدي ويه وتعاليلي .... من دخلت
استلمني ابو طه .... ادري عمو مستحيه مني من يزن كلنا اهل ... كعدت ...
شويه بس وجهي على ابويه ويزن هم ... دنسمع سوالف .. شويه وگمت ...
رحت لامي اساعدها ... گلتلي  انتِ بعدج موافقه على يزن ...
جاوبتها اي ... بعدني ... وتأكدت هسه من اجى على ابويه ... بعده رايدني
ودينتظر ... گلتلي ان شاء الله  يصير نصيب اني احبه واامن عليج يمه
طلعت اني يمهم اني من فرحتي بي سويت عشى من كل قلبي .. ورحت ارتب السفره يمهم ... هو صاير گبالي .. بس البقيه ظهرهم عليه ...
من شافهم ملتهين بالسوالف بدا يباوعلي ... بشفابفي همستله احبك
شفته ابتسم ودار وجهه عليهم ...
وراها التمينا على العشى ... ومن خلصنا كعدت وياهم ...  التفت عليه يزن كدامهم گلي ... صدك نور گلتلي اكو شغله يم رشا جيبها وياك .... اني فهمت قصده على العبايه كذاب ماباله الغراض بس بعد ميتحمل يغلس ... ويروح مماخذها وياه .. جاوبته اي صح همزين اتذكرت ... رحت جبتهن ابويه كلش ارتاحله وحبه.... هو هم لوتي ... عرف شلون يفتح مواضيع يخليهم يستمعون اله ... واتشاقى وياهم... غير مزاج ابويه ...بحيث اول ما طلعوا
(گلها لامي ..ذكرني بمهيمن ... شكد ارتاح من اكعد وياه )
بقلبي گلت الحمد لله ابويه حبه ...
اول ما رجع دگ عليه
يزن: تعالي شلون گلتيلي مره بالتلفون متعرفين اتسوين اكل ...
رشا: والله ما اعرف بس شغلات بسيطه ... بس العشا لا اعرف ... بس قصدت هاي سوالف اللحم والتمن والمركات لا ما اعرف ...ثانيا انت ليش مكلت راح اجي خليتني مثل الهبله .. ومتحملت الا اخذت العبايه
يزن: ههههه شفتج گلت راح تفضحنا...دعسوقه لو گايلج جان مخليتيني اجي
والصدك مخمختها ... گلت فرصه اخاف بعد متطلعلي فيزا وين اشوفه لابوج حجيت ويا ابو طه .... الرجال ايد ني گلي اني اجي وياك .... وهم ردت اشوفج واخذ العبايه الي غلستي عليها ... لا الصدك متحملت اطلع باجر ومشايفج...
رشا: لا باجر اجي للمطار اودعك ... امر عليك بتكسي نطلع سوا  وراها اروح للدوام ياه روح نام وارتاح وراك سفر
جان كلشي تمام الى ان وصلنا للمطار ... بعد متحملت ... كلامه ووداعه بقيت دموعي تنزل
يزن : يا قمر ... انتظريني لتخلفين بالوعد هالمره ...
رشا: اطمئن طول ما ابويه على راسي محد يكدر يجبرني على شي
يزن: خايف لا اوصل للعراق ويگولون صاير فيضان بدبي ... من ورا هالدموع .. كافي بداعتي .. ردتها تضحك اتذكرت سالفتها مال الجهال ...
ولج  يا مره كافي مو الجهال كاموا يبجون ...
رشا: ابتسمت ... مو اني ما مقهوره عليك مقهوره راح ابتلش بيهم وحدي
وترجع تلگى شعري مكفوش مامشطه ... بوسني من راسي
يزن: ههههه  ( اصعب شعور من تودع شخص وتبتسم بوجهه وانت بداخلك نار ... متطفى الابشوفته وقربه منك