نداء القلب

ج١٢

#نداء_القلب
الجزء الثاني عشر
اماسي الليل
حقوق النشر محفوظه
يزن: وصلت قلبي
رشا: الحمد لله على سلامتك
يزن: من دخلت للبيت ... تلگتني امي ...جنت مشتاقلها لدرجه شوفتها هونت عليه .. فراگ رشا
الام: نورت البيت حبيبي أمك .... ها شلونها العُغيس
يزن: الحمد لله زينه تسلم عليكم
الام: غدت غيحك من لقيتى ... مبين عليك ...
يزن: ابتسمت
نور: يزن وين غراض ابني ....
يزن: فتحت الجنطه انطيتهم الغراض .... نسيت العبايه بعدها بنفس الچيس
من طلعتها نور ... شفتها انثولت ... گتلها هاي مو الج بس مستحي
نور: ابتسمت لعد المن .... عبالي رشا دازتها ....
احمد: اخذيها حبيبتي ....( شفته استحى وعيونه تضحك يدري دا اداهره)...انطيهياه مبين بيها سالفه ... صار يضرب ألوان
يزن: دجيبوها..... واضحك
الام: احمد يزي ..مديهغ... اشبيك
احمد : التفتت على نور ... شو انت لا انطيتيني عبايه لا انطيتيني ورقه
ما اتعلمتي سوالف بت اختج
يزن: يويل هاي اني اشتريتها الها ... وبقت عندي من نتزوج تلبسها
نور: دتعلم لعد انت من اخوك ...
احمد : يويل انت ما منك بس المشاكل .... صاير رومانسي ....
يزن: تعلمت من اخويه الي جان يتنگع بالمطر حتى يشوف نور من ترجع من الكليه
نور: اي ذكره هالايام ... صاير ناكر ... طلعت اني مجلبه بي
يزن: اني اصعد انام وانتِ ذكري بجليكان النفط الي يوميه تارسه
ومودي لبيتكم يتحجج بي حتى يشوفج ههههه
احمد: يويل مو صوجك صوج العلمك هالدرب ... ما وديت جليكان النفط تركض حتى تشوف البغداديه ... دتبيع ثگل براسي
خيك ذب السناره وهي جتي انت ذبولك السناره ... ركضت للامارات
نور: هاي منو الاجتي....
يزن: اني صاعد انام خلي يفيدك الثقل ... هههه.... استلمي ام محمد ( نور)
صعدت لغرفتي ... اسمعهم واضحك ...
دخلت فرشت العبايه على القريوله تمددت واحسها بعطرها ... بقت ويايه
ما فارگتها ... من التعب نمت ... فزيت على صوت التلفون الو
رشا: الو يزوني وين صرت ... من الظهر ادك... صار المغرب وانت ماكو بقى بالي
يزن: من التعب ما ادري بالدنيا ... ياقمر خلي افوت اسبح واصحصح واخابرج ...
رشا: يله لعد اروح اتصل بنور لان لگيتها داگه عليه
اتصلت بنور الو
نور: عاشت ايدج الغراض تخبل ... العبايه الي جانت ويا الغراض دازتها الي لو صدك ليزن
رشا: هههه لا لج صدك مالته ... وين شفتيها ..
نور: بالچيس ويا الغراض ... بس من شافها گلي هاي مالتي
رشا: لا صدك مالته طخ بعقله واشتراها ... ردت ابقيها ما انطيهيا ...
مقبل الا اخذها ... ليش تريدين اخذلج شي مقارب الها
نور: اذا اكو اختها اريدها ... عجبت احمد ... گلي وصي رشا ...
رشا: لا والله بس هاي اني هم ردت مثلها ملگيت ... لج عنده سوالف
خبلني حتى اوفر طفل اخذ ... مشفتي
نور: هههه لا مشفته ... طلع يزن حنين ... ولا يبين عليه ... عاطفي
رشا: لا عاطفي .... متشوفين بت اختج ...ميته عليه ... اليوم احس روحي تايهه بلياه ..
نور: هو راجع وجهه يضحك ... كلنا انتبهنا عليه مرتاح غير عن ما جان قبل ميسافر
رشا: مو ابويه انطاه كلمه من اخلص هالسنه اذا بقيت موافقه عليه ... اتم الخطوبه
نور: ان شاء الله .... احمد گلي مره لخ اذا يروح نطلع فيزا ونروح ويا
رشا: ياريت ... يله حبي راح اروح لان گلي شويه ويخابرني
ورا شويه اتصل يثاوب الو
رشا: شلون تنسى العبايه بالچيس ... وكلهم شافوها ... شكد عيب
يزن: ابتسمت ها گلتلج خالتج ... والله علگت بينها وبين احمد من وراها ...
رشا: جان انطيتها الهم ... واني ادزلك غيرها ... نور خابرتني توصيني على وحده مثلها
يزن: لا والله انطيهمياه هو اني يمج ما بقيتها ...
رشا: زين انطيها الرصاصيه
يزن: چئ... كلشي ما انطي ... هن الج اول وتالي ... من تجين يمي ...
رشا: زين شسوي بيها الله عليك اريد اعرف ...
يزن: ههههه صايره فضوليه ... دا اجمعلج نيشان
رشا: كذاب ...
يزن: دعسوقه اذا گلتي كذاب مره لخ ... ما اعبرها ...
رشا: دگلي صار عندي فضول لتخليني افكر
يزن: لتشغلين فكرج بغيري ... دعسوقتي بعدني ممستوعب صرتي بعيده
دا اتخيل شويه وراح تگليلي ... راح اشوفك بفلان مكان
رشا: لا اني مستوعبه ... اليوم حسيت بمكانك خالي من داومت تخيلتك
شويه وراح تجي الى ان خلص الدوام ... اقتنعت انت ماموجود بنفس المكان
يزن: انتوا بعطلة نص السنه مو عندج اختج بعمان ... ليش متروحولها ...
رشا: ما ادري ... خليها لوقتها يجوز اقترح على اهلي اذا مهيمن ما كدر يجي ... لان مرات خواتي يجون بالعطله يمنا علمود الجهال ماعدهم دوام
يزن: اذا تجون ... اتفق ويا احمد وياسين نطلع كلنا لعمان نبقى فتره الي انتو بيها ... حتى اكدر اشوفج ...
رشا: الله كريم ...
مرت الايام .... وبدت حالة ابويه تدهور ... وبيوم تخربط ونقلنا للمستشفى
اتصلت على فيصل ... بلغته يجي ... اجى ويا تمارا ... للمستشفى
لاول مره اشوفه قلقان على ابويه ... ومخبوص يروح ويجي ...
بين المختبر والدكتور .... حسيت بقلق من شفت وضع امي ووضع فيصل
سألتهم اكثر من مره گلولي ... ماكو شي بس السكر مدينزل ... وعلى هالشي قلقانين ... جنت متوقعه الحاله مثل كل مره ... والي خلاني احس بهالشي ... من ادخل على ابويه احسه بعده قوي ... ويحاول كدامي يكون طبيعي ... ويضحك ويايه ...
لكن من وصل مهيمن .... لدبي بصوره مفاجئه ... قلبي علمني اكو شي وميريدوني اعرف ... على كد ما فرحت بجيته على كد ما وضعه وحالته خلتني قلقه واحاول ... من اشوفهم واگفين يحجون اروح يمهم استرق السمع ... من يشوفوني يبدلون الموضوع ... جنت اتصل على يزن ...
من يصير عندي مجال اطمنه عن ابويه لان دائما ويايه ويسألني عنه ... الى ان وصلت مرحله تعبت من القلق والتفكير ... الو
يزن: ها حبيبتي شنو الاخبار
رشا: بقيت ابچي ما ادري ... مدا اعرف احس ضامين عليه شي وابويه مو بخير
يزن: بعيد الشر ليش هالتشائم .... حبيبتي اهل السكر تصير عدهم هالحاله
يمكم اكو مستشفيات واطباء زينين ان شاء الله يكدرون يسيطرون على الحاله
لتفكرين اذكري الله وادعيله بدل هالدموع ... ثانيا ابوج من يشوفج بهالوضعيه يتعب بالزايد ...
رشا: يزن حتى مهيمن اجى بدون مرته وبدون مينطينا خبر ... ووضعه
قلقني ... مهموم ....
يزن: رشا غير ابو تعبان وبالمستشفى قابل تريدي يضحك ويشاقى ...
ان شاء الله يطلع عمو من هالازمه ساعتها يرجع مهيمن لوضعه الي متعلمه عليه
رشا: ان شاء الله ...
ورا يومين ... دخلت يم ابويه للغرفه ... گلي تعالي بابا اريد احجي وياج جان مهيمن وامي موجودين ...
ما اعرف شنو الي صار بيه من سمعته هيج گلي نزلت دموعي قبل ما افتهم شكو قلبي علمني اكو شي جسمي كله رچف ...
مهيمن : رشا ماكو شي لتخافين ... شغله سهله ...
الاب: بابا اني عندي عمليه هاليومين ... وهاي دنيا ...اذا الله ما كتبلي عمر ... تاخذين امج وتطلعون يم مهيمن ... شوكت ما يطلع لم الشمل
مهيمن: الشغله ماشيه والمحامي گلي بأقرب وقت تطلع ... ليضل بالك
الاب: لابابا اني مرتاح منك بس اختك وامك يبقون يم فيصل ما اطمئن
اوعدني ... تشيلهم بعينك ورايه
رشا: اسمعهم ( وروحي مفرفحه من البچي ) بالاخص من شفت امي گامت تبچي حسيت الدنيا انتهت .... عفيه بابا لتحجي هيج الله يحفظك الي ما اروح لاي مكان اريد ابقى وياك لتخوفني بهالحجي ...
ان شاء الله تگوم بالسلامه وابوس بأيده ....
الاب: ان شاء الله حبيبتي ... لازم اوصي اخوج ... الدكتور گلي شغله سهله بس اني هيج ارتاح من احجي وياكم ... وافهمكم حتى ادخل للعمليه مطمئن
مهيمن: بابا اطمئن وارتاح محد يكدر يأذي امي لو وحده من خواتي ... واني موجود ... ورشا ميحتاج توصيني عليها تدري اني شكد متعلق بيها واحبها
لتخلي بالك ان شاء الله تبقى انت على راسنا ... ولا يحتاجون لاحد ...
رشا: عرفت ابويه راح يبترون قدم رجله بيومها بچيت بچي لحد مرجعت ويا مهيمن للبيت اجيب لامي غراض تحتاجها ...من نزلت من السياره وگفت الدنيا ظلمه ما حسيت بشي الا كعدت لگيت نفسي بالمستشفى ومعلگيلي المغذي لان ٣ ايام اني ما منتبهه لاكلي ...وبس بچي وسهر وقلق
من دخل الدكتور ... گلهم ان شاء الله ماكو شي ارهاق وتعب ... بس تسترد صحتها اريد تسويلي تحاليل دم اخاف عدها فقر دم ...
الصدك مهتميت لصحتي جان بالي يم ابويه امي والولد هم بالهم يمه .... ثاني يوم عمليته ...بقيت طول اليوم ادعي ... الله يحفظه حتى نسيت يزن ...
لليل گمت طلعت تلفوني من الجنطه
يزن: جنت مريض وبقى بالي ... رشا مختفيه وما اكدر ادك عليها لان ادري يم اهلها اخاف احد يشوف المسج لو الاتصال بقيت انتظر تتصل ... للمغرب طلعت لبيت احمد حتى اخلي نور تتصل وطمني ... بنص الطريق دگ تلفوني رقم اماراتي ... اتوقعت رشا ... الو ... اجني صوت رجولي
ابو رشا: مساء الاخير ابني ... اني ابو فيصل
يزن: اهلا عمي ... شلونك شلون صرت ان شاء الله بخير ( هنا حسيت نفسي غلطت تلافيت الغلط ... گتله نور گالت بعافيه
ابو رشا: الحمد لله على كل حال اني اتصلت عليك لان باجر عندي عمليه ..
وانت تعرف الدنيا حياة وموت ... انت اجيتني وطلبت مني رشا ... واني انطيتك كلمه اذا البنيه موافقه ... هي الك... بس هسه الوضع تغير اني اذا
لا سمح الله ما الي عمر ... فهي تسافر يم اخوها مهيمن ساعتها كلمتي تاخذها من ابني ... وترتب وضعك شلون توصلها وتخطبها ...
يزن: عمو ان شاء الله تگوم بالسلامه ويطول بعمرك واجي اطلبها منك ...
ابو رشا: عمو اني اتصلت عليك حتى ابري ذمتي ... وبنفس الوقت اذا
تصير القسمه اطمئن عليها ويا رجال مثلك ...
يزن: ان شاء الله اذا صارت القسمه اخليها بعيني ... وانت موجود بيناتنا
اذا اريد اطمئن عليك باجر على هذا الرقم
ابو رشا: اي هذا رقم ام فيصل ...
يزن: ان شاء الله تكوم بالسلامه اخذ راحتك عمو ..
بقى بالي ... لان سمعت اصوات يم ابوها بس صوتها ماكو وصلت لبيت احمد طلبت من نور تتصل عليها
ما حصلتها گتلها اطلبي رقم خوله واسأليها بين الحجي ....
نور: رشا اليوم متخربطه وهم بالمستشفى .. هسه احسن على المغذي ...
وعبالي يودولها التلفون بس خوله يم ابو فيصل ... گلتلي من تروح يم رشا
تخليني احجي وياها ..يمكن هسه نايمه
يزن: بقى بالي اكثر ... بقيت انتظر يم بيت احمد لليل ماكو خبر منها ...
رجعت للبيت ... صعدت انام مكدرت بقيت سهران ورا الوحده وصلني مسج
يزن اليوم التهيت ويا ابويه باجر عمليته ... مكدرت اتواصل وياك
دزيتلها : عندي علم انت مريضه ... شلون صرتي طمنيني
رشا: والله تعبانه من التفكير يزن ادعي لابويه يگوم بالسلامه
يزن: ان شاء الله ..رشاوي انتبهي على نفسج ... وصيري قويه ..لتخلين بالي
رشا: ان شاء الله... يزوني راح اروح اصلي ..وادعي لابويه
يزن: روحي حبيبتي ...
رشا: ثاني يوم العمليه جان اصعب يوم بحياتي ... ولا احد من الموجودين بعيني .. بس ابويه كدام عيني وشاغل كل تفكيري ... ولساني ما بطل دعاء وعيوني ما بطلت دموع ... الكل منهارين حتى فيصل ... اتمنيت ابويه يشوفه شلون متأذي عليه ... وبقلبي اعاتبه اگله ليش لعد من هو بخير توگف بوجهه وتغثه ... هسه يله حسيت بقيمته ... جنت اتمنى اكدر احجي هالحجي وياه واعاتبه بس ما اكدر بقيت كاتمه بقلبي ....
اباوع على مهيمن ... يواسي امي ... وحاله مثلنا ..
وراه فتره من الوقت ... طلعوا طمنونه ... وضعه زين ... الحمد لله
ردت بيه الروح ... الحمد لله يا ربي ... من طلعوا للغرفه وفكه البنج ...
دخلت شفته ... اوف ابويه سندي بهالدنيا اضيع بلياه... بوسته وملهوفه عليه
عبالك صار عمر مشايفته .... الحمد لله على سلامتك
دخل فيصل ومهيمن ...واني طلعت اتصل اطمن خواتي كلهن قلقات عليه ....
من خلصت وياهن كلهن اتذكرت يزن وصاني اطمنه دزيتله مسج
يزون بابا الحمد لله طلع من العمليه وصحته بخير بثانيه ردلي المسج
الحمد لله على سلامته ...بالي يمج من الصبح انتظر اطمنيني شلون صرتي حياتي
رشا: الحمد لله هسه ورا ما طلع ردت روحي ... وصرت زينه
يزن: الحمد لله ياقمر اشتاقيت اسمع صوتك ... ترى اني هم راح اتمرض
رشا: اسم الله ... بس يصير عندي مجال اتصل الظهر ارجع للبيت ... اكمل كم شغله وارجع للمستشفى احتمال اخابرك من اروح
يزن: يا روح يزن انتظرج
رشا: ما احس الا ايد على چتفي ... فزيت ... مهيمن
مهيمن: ها بشه تجين ويايه ننزل نتريك
رشا: اي والله اني هم راسي مصدع ما شاربه چاي ...
نزلت ويا مهيمن ... ورا نص ساعه دك تلفون .... جاوب الو ... شفته ركز وعكد حاجبه وعليكم السلام منو
شفته ابتسم ... اي رقم ام فيصل ...وياك مهيمن والحجي بخير الحمد لله ... رحم الله والديك على السؤال ... ان شاء الله بس اشوفه يكدر يحجي ... ادك عليك ... تتحمدله بالسلامه
مع السلامه
گلي العريس ... متت من الخجل .. كل حالي تخربط ... اريد اتصرف طبيعي معرفت ... ردت الغمطها ... گتله مهيمن اريد چاي ثاني
ابتسم
مهيمن: ليش وافقتي عليه ... ومقبلتي بمثنى ... اريد اعرف الي شفتي بيزن وماشفتي بمثنى
رشا: بقلبي شگله اختك تموت وتحتي بكلمه من يزن ... وتموت من مثنى على العذاب الي معيشنا بي اني ويزن
جاوبته ما ادري بس من رحنا لتكريت ... تصرفاته واخلاقه .. خلتني اوافق
ونور حمدت بي وشفت امي هم تحبه وهو هم صاحب واجب ...
مثنى .. ما ارتاحيتله ... احسبه مثل اخويه ...ما اتراهم وياه ويا بيت عمي
وانت ادرى بتمارا ...ميحتاج احجي
مهيمن : ابويه هم گال خوش ولد ... البارحه بليل سولفلي عليه .. من جاي للبيت ويا عمو ابو طه ... خلصي هالسنه ... الدراسه بيها مستقبل للبنيه
وراها تفكرين بالزواج
رشا: ان شاء الله .... شفته ابتسم
مهيمن:ولو امرج مو بدينا بيد مثنى بعد نهى عليج .... ( من شافني فزيت. ضحك) هههه والله يا الله
العالم وين وصلت واحنه بعدهم ابن العم ينهي على بت عمه وياخذها غصب
يعني ما ادري شلون رجال يقبلها على نفسه ياخذ وحده متريده
رشا: هالعرف ظلم للبنيه ... مجنت اعرفه الا من صارت سالفة مثنى
مهيمن: كومه اكو اعراف بيها ظلم والفصليه هاي حاله بعد اتعس من النهي

ورا ما الحمد لله ابويه گام يحجي ووضعه زين ....
رجعنا اني وامي للبيت ... حتى تنام وترتاح ونرجع لابويه العصر بقوا يمه الولد
دكيت على يزن ... جنت مشتاقه اسمع صوته بقى ويايه مساندني ...
شوكت ما ادزله مسج يجاوبني باللحظه ... مترقب شيصير ويايه...
شلونك قلبي
يزن: مو مليح ... صار يومين فلاونزا ...والبارحه لان طلعت المغرب لبيت احمد علمودج ... اتمرضت اكثر
رشا: ليش طلعت من انت مريض جان اتصلت بنور ...
يزن: گلت حتى من اتجاوبيها اخذ التلفون اسمع صوتج اخاف احد يمج ومتكدرين تحجين ويايه تالي شتلتيني لليل رجعت مسطور من الحراره
رشا: ياربي شنو هالاسبوع كله امراض والله قلبي ميتحمل بعد
يزن: ابتسمت ... ابقى احجي ويايه حتى اصير زين ... قلبي من يشتعل
تزيد الحراره
رشا: اذا دتدلل والله مابيه حيل ...گول مابيه شي وادلل
يزن: لج والله مريض ... شنو من دون العالم ما اتمرض ... شوكت تصيرين
مرتي ...ومن اتمرض الگاج يمي .. خايفه عليه
كبرت على سوالف الدلال براس امي ... اريد ادلل عليج
رشا: يزوني اسويلك شوربه ... اطلعوا ولكم ابوكم مريض
يزن: اي والله مشتاق للخبالات.... سويلي حبيبتي بلا غشته ( شعريه)
رشا: شنو مفهمت ...
يزن : بدون شعريه ... خليها وتعالي فركي راسي مصدع
رشا: شنو متزوجه خرده ...
يزن: ههههه يولي تعاجزتي على البعد ... لعد لو صدك شلون
رشا: هههه يزن والله تعبانه مابيه حيل حتى بالخيال احرك ايدي ...
صار كم يوم ... نوم منايمه مثل الاوادم ... اني هم مريضه المفروض اني ادلل ... والله دا احجي وياك ودا اغفي
يزن: ابقي ويايه منى لحد متنامين واسد الخط .... من حجيت وياها وما أجاني الرد عرفتها نامت ...
اوف ربي شوكت تصير مرتي وانيمها بحضني ...
رشا: جاوبته شبه نايمه ... بالگوه احجي ....سمعتك