فجرية طول الطريق تفكر في كلام نسرين اللي لعبلها ع الوتر الحساس لان غسان فعلا مش مركز هلبا في ناحية الحقوق 😁😁
وصلت للحوش وكان عقلها مش معاها ومش امركزة...تلاقت مع سلفتها اللي كيف فايقة من النوم وتتكسل..
أروي: صباح الخير
فجرية: أه... اهلين صباح النور
ام غسان: طيب فيك اللي جيتي هاوينا الحوت يستني فيك بسرعة ياذوبك تلحقي ع الغدي 😑
فجرية: حاضر ياعمتي 😒
أروي: بالله عليك يافوفا ديريلي اقهيوة من تحت إيدياتك خاطري فيها منك 😍
فجرية تنهدت: حاضر
ام غسان: بشويا عليك ريوة حبيبتي تعالي قعمزي ارتاحي 😍
أروي: صحيتي اعميمة
حضرت فجرية القهوة لسلفتها... وبعدين بدت في تحضيرات الحوت والغدي...
دارت طاجين حرايمي ومعاه رز وقلت بطاطا ونوعين من السلطات....
مع الساعة 2 مر غسان ع الصغار وروح بيهم كالعادة...
صبت فجرية الغدي وتغدو.... غسلت الماعين وبخرت الحوش وركبت لشقتها...خشت لدار الصغار عشان ترقدهم...
غسان يكلم في نيروز بصوت واطي: تي وينك اتصلت لين عييت علاش ماترديش؟؟
نيروز من غير نفس: ماكنتش جنب الفون😒
غسان: روزا حياتي علاش متغيرة عليا ؟
نيروز: غسان هي كلمة وحدة تبيني تعرف حوش أماليا...غير هكي أنساني
غسان: انتي شن تقولي 😕
نيروز: هاذا اللي عندي... وسكرت عليه
غسان بعصبية: اووووووف اوووووف
فجرية بااستغراب: بسم الله شن فيك غسان؟
غسان: من امتي انتي اهني؟
فجرية: توا جيت كنت انرقد في راسيل... خوفتني شن في؟
غسان: مافي شي ضغوطات في الشغل..
قعمزت فجرية في جنبه وحطت إيدها علي خده بحب: احكيلي أني مرتك
غسان نحا إيدها بعصبية: تعرفيني نكره ريحة الثوم اغسلي إيدك كويس اوووووف... وناض من جنبها
فجرية تشم في إيديها: عنده حق ...مايحبش الثوم عطيني السلامة حتي أني...
#####################
غسان خش للمربوعة وسكرها عليه أتصل بنيروز مرة واثنين ويعطي فيه مقفل تعفلق ع الاخر.... ولما يأس إنها ترد عليه رقد ....فجرية من التعب امتدت ع السرير وخدتها نومة ومافاقت الا علي أذان العصر...
فجرية مخلوعة: حي عليا نسيت غسان.... وناضت تجري جهزتله اقهيوة ومشت تفيق فيه
غسان صلي صلاته وقعمز يشرب في قهوته.... وفجرية في جنبه
فجرية: حقا الصغار يبو حوايج
غسان باانفعال : سيارتك وعندك...والفلوس تحت إيديك طلعيهم واشريلهم اللي ناقصهم
فجرية: اوكي... قلت نبلغك بس
غسان: يافجرية اني مش فاضي الشغل واخد كل وقتي ..في حاجات مافيش داعي تشغليني بيهم
فجرية: اي عندك حق .... أسفة
خشت عليهم راسيل وهي تحك في عيونها: بابا
غسان فتح إيديه: أهلين ياروح بابا تعالي 😍 وقعمزها علي فخده
فجرية: راسيل وريتي لبابا شن عطاتك الابلة اليوم
راسيل: عطتني دبدوب كبييييير ...قتلي انتي شاطرة ....وحتي حمودي عطاته
غسان: من حمودي هاذا 😕
فجرية بهمس: هاذا حبيب القلب 😁
غسان: ههههههههه حتي انتي يامفعوصة 😁
فجرية: بتهبلني بيه ...كل شي اعطيني اني وحمودي
غسان: والاستاذ أوس شن داير في قرايته
فجرية: كويس...مشيت سألت عليه والابلات كلهم يشكرو فيه ...
غسان: تمام...
امشت راسيل للصالة تتفرج ع التلفزيون....
فجرية بتردد: غسان؟!
غسان: نعم
فجرية: انت راضي عليا صح ؟
غسان: مافهمتش؟
فجرية: قصدي مش امنقصة عليك شي صح ؟!
غسان بعدم اهتمام ويشرب في قهوته: اي مش منقصة عليا شي...جهزيلي حوايجي خلي بنطلع
فجرية بفرحة: حاضر....
ام غسان اتصلت بفجرية وطلبت منها تنزل تغسل فرشة دار الضيوف والدواسات....
فجرية نزلت بقلة حيلة....وطلعت الفرش وبدت فيهم...
غير غسان حوايجه ونزل لامه...خداها علي جنب وخش معاها لدارها...
ام غسان: خيرك شن في؟
غسان: أسمعي يام في بنية نبيك تخطبيهولي
ام غسان: روروروروروروروروري ...ياوالله عليك نهار مبروووووك
غسان: اسسسسس يام اسسسس
ام غسان: وعلاش شن عيب والا حرام.... روروروروروري
فجرية سمعت الزغاريط قلبها انقبض ومافهمتش علاش....نحت المكنسة من إيدها وخشت: ان شاء الله خير ياعمتي شن هالزغاريط ؟
ام غسان بشماته: اوليدي ياحنة بيتزوج وبيجيبلي الكنينة اللي خاطري فيها 😍😍
فجرية: ولدك؟! مافهمتش منو تقصدي؟
ام غسان بخبث: اوليدي غسان منو غيره
فجرية توسعو عيونها بصدمة: غسان😱😱😱
...........
#يتبــع
