قعد غسان يستني في نيروز في السيارة ويفكر في اللي صار...خاطره مهناشي صح مايحبش فجرية بس حرام عمرها ماغلطت معاه مفروض اتصرف معاها بطريقة ثانية...
نزل وركب لشقتها فتح الباب ويسمع في شهقات وبكي قعد ايدور فيهم لقي فجرية طايحة ع السرير تبكي وراسيل حاطة راسها علي ظهرها وتبكي معاها ..
أما أوس كان واقف جنب الباب إيديه وراه ويحرك في رجله بعبث....دمعته في عيونه من منظر أمه اللي يقطع القلب...
اول ماخش عليهم غسان أوس أمشاله وقعد يضرب فيه برجليه: اطلع برا معاش تضرب ماما أطلع😡
غسان مصدوم ويتلقي في ضربات أوس بصمت...
فجرية : شن جاي تكمل عليا 😢
غسان: ساد مش قدام الصغار هكي حيتعقدو
فجرية وقفت وبعصبية: تي أما صغار اللي بيتعقدو...صغارك كرهوك ياغسان..أوس الصبح يقولي مانحباش بابا ....وراسيل اللي كانت ماترقد بلاك تعودت علي بعدك وعادي عندها....انت ضحيت بصغارك وبيا في سبيل سعادتك....ارحمني وطلقني ياغسان ع الاقل مانكرهوش بعض اكثر من هكي 😢😢
غسان مسك أوس من إيده وكذلك راسيل وطلع بيهم لدارهم: اقعدو اهني باهي تو نجي...
أوس قعمز بغضب وراسيل حضنت خوها وتبكي...غسان عيونه دمعو معقولة صغاره اللي ماكانت الضحكة تفارقهم هاذي حالتهم...
رجع لفجرية اللي كانت مقعمزة ع السرير وراسها بين إيديها وكانت علامات يد غسان واضحة علي ذراعها بطريقة بشعة
قعمز في جنبها وفي حركة غير متوقعة مرر روس صوابعه علي ذراعها: أسف
فجرية انتفضت من مكانها حست برعشة في جسمها تقول ضربها ضي...
غسان نزل راسه: خلينا نحاولو نتفاهمو علي خاطر الصغار ..مانبيش صغاري يبعدو عليا وفي نفس الوقت مانبيش نحرمهم منك....خلينا نتوصلو لحل
فجرية بعبرتها: مافيش حل ياغسان ..انت قتلتني بزواجك عليا ومستحيل نغفرلك
غسان رفع راسه: خلينا نجربو علاش لا ؟!
فجرية سكتت وماردتش عليه.....
غسان: خلي نرفع الصغار ندهورهم خلي يغيرو جو
فجرية: ارفعني لحوش أماليا وخلينيا نباتو نحس في روحي مخنوقة
غسان سكت شويا: اوكي جهزو أرواحكم
عنقرت نيروز من قدام جنب غسان وفجرية وصغارها من ورا...راسيل رقدت بعبرتها من البكي وأوس شاد في أمه...
وصلهم لحوش خوالهم وامشي عشان يرفع نيروز للمحلات...
خشت فجرية والصغار وكان وائل مقعمز يتغدا: هاذا شنو علاش جاية؟!
فجرية بألم: ماتخافش بنروح...جاية بنغير جو وبننتلف نروح وخشت لداخل...
نسرين: حرام عليك علاش كسرت خاطرها
وائل: بري جيبيلي امية وساد من التفتفيت الزايد 😡
قعمزت نسرين مع فجرية وحكتلها علي صار...
نسرين: عطه ضربة هالكلب 😡 يلقاه ويتلقاه ياربي
فجرية تبكي وخلاص.....
نسرين: سادك عيونك تفقصو من البكي...قداش نكرها هالعيلة الله لاتربحهم حسبي الله ونعم الوكيل فيهم
فجرية بعبرتها: الصغار وين...تبهدلو في جرتي ياناري
نسرين: رسولا رقدت وأوس يتفرج ع التلفزيون
خش عليهم وائل: نوضي دريلي طاسة شاهي 😡
نسرين من غير نية: باهي
قعمز وائل في جنب فجرية: عارفك حاقدة عليا بس اني لمصلحتك اللي ندير فيه
فجرية: كرهته ياخوي كرهته معاش نقدر نعيش معاه
وائل: مش حتلقي زيه صدقيني...صاحبي ونعرفه...غير انتم النساوين تكبرو في القصص..وكان تزوج عليك...المهم مش امنقص عليك شي انتي وصغارك وهاذا المهم
فجرية: وكرامتي
وائل: ايح علينا لا كرامة لا فجر ليبيا😒..فكري بعقلك...كل راجل ليه نزوة والمفروض تعرفي كيف تتصرفي
فجرية سكتت تفكر في كلام وائل....
وائل: صح أني عصبي معاكم بس انتم عيوني الاثنين اللي نشوف بيهم..انتي والملسنة أختك 😒
فجرية ابتسمت: ربي يخليك ليا ياخوي يارب
وائل: أسمعي عندي سفرة ضرورية الاسبوع الجاي وممكن نقعد شخر او اكثر.نبيك ترفعي نسرين تقعد معاك
فجرية: تو نشوفها بالك ماترضاش...ماتحبش تقعد عندي
وائل: مش برايها هوا 😡...تو نكلمها بعدين تمشي غصبا عنها شن بتقعد بروحها في الحوش .....وطلع
نسرين: شن قالك وائل؟!
فجرية: هدرزنا شويا...
نسرين: باهي...ربي يدوم عليكم 😏
فجرية: ههههههههههه.... تنهدت: خسارة بتفوتني لمة خالتي حليمة نكد عليا هالغسان😣
نسرين بخبث: ضرتك بتمشي؟
فجرية: أكيد...عمتي فرحانة بيها أكيد حترفعها معاها 😒
نسرين: باهي شن رايك ندبر عليك دبارة مش عادية 😉تاخدي فيها تارك من عمتك عزوزة الشر 😑
فجرية: فكيني منك...نسمع في كلامك وبعدين تجي علي راسي
نسرين: غير أسمعي مني بس هالمرة حنحبكها كويس
فجرية: كيف مافهمتش 😕
نسرين: هاتي وذنك وأسمعيني 👂
#####################
مع المغرب امشت ام غسان هي وكنتها نيروز وفرحانة بيها بطير...وتوري فيها للجارات
حليمة: ماشاء الله تبارك الرحمان عليها
ام غسان بغرور: تسلمي 😚
حليمة: امالا فجرية وين؟!
ام غسان: قالت تعبانة شوي وماخاطرهاش
حليمة: سلامتها
ام غسان: الله يسلمك..
حليمة: تفضلو تفضلو...
ام غسان: نيروز ابنيتي تعالي قعمزي معايا ع الطاولة
نيروز؛ خيرني نقعمز مع العزايز 😒 بنمشي غاديكا لطاولة المادامات
ام غسان انحرجت قدام حليمة وقعدت ترقع؛ اي اي ابنيتي عندك حق...عزايز احني مع ضحكة صفرا هاهاهاهاها
قعمزت نيروز علي طاولة وعزوزتها علي طاولة ثانية وهي ترحي عليها وع الموقف اللي دارتهولها...
خدت ام غسان فنجان النسكافيه ورشفت منه رشفة...
فجرية: السلام عليكم ياعمتي
ام غسان رفعت راسها وشرقت شرقة لين النسكافيه طلع من خشومها: منو فجرية؟! شن مدايرة في روحك 😨
#يتبــع....
