يوم جديد...
فجرية مع نسرين يلفو ع المحلات بتاخد شوي حاجات ولبسات....
نسرين: شن رايك في الستايل هاذا؟!
وكان قميص قصير ومركبله صاحب المحل جينز وبوت...
فجرية: شن انجنيتي إنتي؟ معقولة بنلبس هاذا؟! اولا مش عمري وثانيا قتلك نبي لبس محترم ومستور...
نسرين: قصدك حتي في الحوش بتلبسيلي الشي اللي يخبخب 😞
فجرية : لا في الحوش تو ناخد لبسات خفاف وبيجامات ...
نسرين مع غمزة: خودي حتي أرواب 😉
فجرية بعصبية: أرواب شنو؟ لمن بنلبسهم للحيوط 😡
نسرين: ألبسيهم لعمرك ياحنة 😌
فجرية: هيا بلادوة فاضية خير مانغير راي وناخد عبايات وجلابيب..😒
نسرين: لا لا خلاص... تعالي معايا في محل إسمه المحتشمة عنده تنسيقات حلوات وكلهم محترمات...
خدت فجرية كم لبسة حلوة ومستورة وخدت حاجات للحوش وللصغار طبعا...
قعمزو في كافي بيريحو شوي....
نسرين: أوس وراسيل خليتيهم عند بوهم؟!
فجرية: لا نزلتهم لحناهم...بوهم مش فاضيلهم 😒
نسرين: سحيقة المساحيق ان شاء الله ليه وليها 😑
فجرية: اي حقا أمس انقلب ع الفيس لقيت برنامج العناية اليومية بالبشرة تلخبطت ومعاش فهمت شي...
نسرين: بسيط جدا " غسول...تونر ...ومرطب" 👌
فجرية: اي ع أساس فهمت عليك 😒
نسرين : ياغبو...اشري غسول مناسب لبشرتك واغسلي بيه في الصبح اول ماتنوضي والليل قبل ماترقدي وبعد كل غسلة رشي علي وجهك امية ورد وبعد يجف ادهني بكريم مرطب...
فجرية: اووووف بندير هاذا كله 😦
نسرين: امالا شنو ؟ اللي يبي الورد🌷 يتحمل شوكه... خلي وجهك ينظف ويشعشع...وخودي وحدة من عطور رسولا فرغي الشيشة واغسليها كويس وحطي فيها امية ورد وكل ماتتذكري رشي علي وجهك...وحتشوفي كيف بشرتك تتغير...😗
فجرية: يصير خير
نسرين: طبعا ماتنسيش هالشوراب اللي موليات زي الكرشة 😂 ديما قشريهم بسكر وفازلين وحطي عليهم كريم مرطب...عشان يبانو موردات وحلوات 👄
فجرية: باه ويصير مني بعدين 😕
نسرين : مازال المشوار طويل ياحبييتي... بس هاذم الاساسيات...وكل مرة عالجي مشكلة في بشرتك.. مرة ثانية نقولك علي كم قناع استخدميهم كل نهاية أسبوع👌...
فجرية: أتاري الجمال مش ساهل ياكبدي 😪
نسرين: انتي حلوة وتهبلي حتي وانتي امنسرفة 😂😁بس تبي شوي اهتمام بس
فجرية ضربتها علي كتفها: ضمي فمك بلاتسهويك زايد 😡
نسرين: ههههههههه...هيا قريب يأذن المغرب وقت علينا...تو خوك يفتحلي موشح علاش مروحة متأخر 😑
فجرية: اكتبيلي أسماء الحاجات اللي قلتي عليهم في ورقة
عشان نمر ع الصيدلية ناخدهم وأني مروحة..
نسرين: اوكي.... تعالي في عطر يهبل إسمه si خلي ناخدلك منه... ودلعي روحك ياحنة 😍
#######################
حطت فجرية نسرين في حوشهم ..ومع المغرب وصلت لحوشها....
نزلت الشكاير حطتهم في بداية الدروج وامشت بتاخد الصغار من حوش شيابينها...
تسمع في عزوزتها تندب وتعيط...تكلم في نيروز: كيف ماتعرفيش اطيبي كيف ؟! 😱
نيروز بدلع: ماما ماتخلي فيا إندير في شي في الحوش 😊
ام غسان: وعاطياتك لراجل علاش عابية أمك ؟! 😨اهو عازم أصحابه علي العشي شن بنديرولهم ترا قوليلي يافالحة
نيروز: شن عرفني أني...اصلا مفروض قاعدة عروسة مانخشش للمطبخ مش تبوني نطيب 😒
ام غسان: راجلك هو اللي يبي مش أني يافالحة 😒
نيروز: يجيبلهم عشي جاهز وخلاص كثر ربي كان المطاعم...اوووووف
ام غسان: ياحليلي وخلاص علاش ياربي كنايني مش زي الناس ضروري كل وحدة تطلعلي فيها علة...علاش ياربي بس 😢
خشت فجرية: خلاص ياعمتي تو نجهز العشي ونبعتهولك
نيروز بتكبر: لا لا صحيتي ...أني بنطيب
ام غسان همستلها: شن بطيبي بس ياقهايري 😣 ... لا لا تو نتصرف مشكورة
فجرية: بلا عناد ياعمتي... خلي ننسترو قدام الضيوف توا وبعدين ساهل
ام غسان انحطت قدام الأمر الواقع وماتقدرش ترفض: انتي حرة بس ديري حاجة تستر مش تلبزي لبز 😒
فجرية تنهدت: أوس... راسيل... هيا ياماما خلي نركبو
راسيل: حي ماما 😄...هيييييييه ومشت تجري تعنقتها
أوس: ماما وينك؟ عندي واجب بنحله
فجرية: حي نسيته سامحني ياماما... هي تعالا ارفع معايا الكياس ونحلوه مع بعض
ام غسان: والعشي شن ماصارش منه 😑
فجرية بقلة صبر: لا ياعمتي صار مع أذان العشي يكون كل شي جاهز...
ام غسان: باهي اهو قاعدين نستنو 😒
ركبت فجرية هي وصغارها... فجرية: أوس حبيبي جهز كتبك وحل الواضح وبعدين نكمل معاك ...نحط العشي ع النار ونجيك باهي
أوس: حاضر.
فجرية: دخل أختك معاك وماتتعاركوش
راسيل: حاااضر ماما
صلت فجرية المغرب وبدلت حوايجها...ولبست برمودا سودا مع قميص طويل موف في الابيض وقامت شعرها ذيل حصان وخشت للمطبخ.....
كان عندها بوريك وبيتزا في الفريز...طلعتهم عشان يرتاحو وتسخنهم...
قرضت بصلتها وتبلتها وحطتها ع النار... وحطت الكسكسي ايبوخ...
طلعت أفخاذ دجاج نظفتهم وتبلتهم وحطتهم في الكوشة...وقعمزت للسلايط....
دارت سلاطة مقلية بادنجال وبطاطا وكوسة ومعاهم ذرة امعلبة وهريسة عربية مع زيتون وملح وليمون ورشة معدنوس...
وقرضت سلاطة خضرا مع طماطم وخيار وفلفل حلو وزيتون...ومعاهم امسير
مع أذان العشي كانو الصفر جاهزات وكل شي امغلف ومسلفر المشروب والفواكه جاهزات....مازال علي تسقاية الكسكسي وبس...
خدت دوش ع السريع ولبست بيجاما وردية لونها هادي .لفت شعرها بفوطة..وقعمزت مع أوس تحل في الواجب علي ماطلبو العشي ...
#########################
