طول الطريق فجرية مازادتش ولا كلمة راسيل راقدة في حضنها وأوس مقعمز لتالي يتفرج ع الشارع ..
غسان: ناخدو اعشي من المطعم؟!
فجرية لفت وجها للجيهة الثانية وماردتش عليه...
غسان طارتله: براحتك...قبل بندير فيك خير ونريحك من تطييب العشي 😒
فجرية تجاهلاته وماردتش عليه ودموعها في عيونها ....
وصلو للحوش قامت فجرية راسيل في حضنها وركبت بيها ..غسان خش لامه علي طول....
حطت فجرية راسيل في سريرها وغطتها وكذلك أوس...وقعمزت تشوفلهم وتبكي....تبكي علي حظها وسعدها الطايح...تبكي ع التضحيات الي ضحتهم وفي الاخير طلعو في الهواء ياربي...
ركب غسان بعد مااتفق مع أمه علي موضوع الخطبة وامتي بتمشي تطلبله نيروز...
فجرية سمعت باب الشقة مسحت دموعها ووقفت بحزم وإصرار وكان في عندها كلام مهم تبي تقوله.....
فتحت باب الدار وكان غسان ممتد ع السرير مشبك رجليه وإيديه ورا راسه...
غسان: شن مافيش مانتعشو؟
فجرية بجدية : لا مافيش
غسان قرن حواجبه وتفاجأ من رد فجرية: نعم؟
فجرية بثقة: اللي سمعته... ونبي نتكلم معاك في موضوع مهم
تربع غسان ع السرير: موضوع؟ ومهم معاها؟! تفضلي شن الموضوع اللي مخلينا من دون ماكلة اليوم
قعمزت فجرية ع الكرسي وهي تحاول تكون شجاعة وماتنزلش منها ولا دمعة: شوف انت بتتزوج براحتك... واني موافقة
قاطعها غسان: اوووووف رجعنا لنفس الدسكة مش حزيناها خلاص 😧
فجرية بأنفعال: خليني نتكلم...ولو لمرة في حياتك اسمعني....ديما أني اللي نسمع وانت تؤمر...ولو لمرة ديرلي قدر وأسمعني
غسان بقلة صبر: اوكي تفضلي ياستي سمعينا
فجرية تنهدت : زي ماقتلك أني موافقة...بس عندي شروط...
أولهم بنرجع نكمل قرايتي...ونبي تفتحلي حساب تحطلي فيه مبلغ شهري ليا نصرف منه علي نفسي...
كيف بيتكلم غسان قاطعاته: خليني نكمل لو سمحت ....
سكت غسان...
فجرية بحزن: تبي تعيش معاها هي علي طول انت حر...لاني بصراحة مش حنقدر نكون زوجة ليك بعد اليوم لاني عفتك وعفت حياتي معاك...ولولا أني عارفة ان وائل حيبهدلني ويرجعني ليك مرة واثنين وثلاثة كنت ماقعدتش اهني ولا لحظة
غسان : باه في شي ثاني؟
فجرية: حوش أماليك ماتشرطش عليا ننزلهم ولا ليا علاقة بيهم من اهني وغادي ....لاني حنكون لاهية بصغاري وقرايتي
غسان: خلاص؟!
فجرية: اي خلاص
غسان بعصبية: اوكي زي ماتبي وأني موافق علي كل شروطك وماعنديش مانع...وبيني وبينك لولا مانبيش صغاري يتشردو كنت عطيتك كلمتك وريحتك...واعتبريني من اهني وجاي شخص غريب عليك لانك حتكوني بالنسبة ليا أم صغاري وبس
شافتله فجرية بصدمة وحزن: بالسهولة هاذي ياغسان
غسان وقف بيطلع: مش انتي هكي تبي....وعلي فكرة بنبيلها شقة فوق منك...وصغاري مش حنتخلي عليهم....وطلع وقربع الباب بقوة
حست فجرية بغصة في قلبها ونار تحرق فيها عمرها ماتوقعت ان هاذا قدرها عند غسان.ع الاقل يعترض ويرفض ويقوللها نبيك يمكن نارها تبرد شوي ..عمره ماسمع منها كلمة توجعه ولاعمرها قصرت معاه في حاجة .... قبل مايكمل كلمته تنفذله طلباته....مريحاته ومهنياته...صغاره متربين ومتفوقين في قرايتهم بفضلها ....
وقفت بصعوبة خدت شرشف من الدولاب وامشت لدار الصغار امتدت ع الكنبة الموجودة وطول الليل دموعها ماوقفو ولاجاها نوم.....
####################
مر شهر وأصبحت علاقة فجرية وغسان رسمية... قدام الناس بس متزوجين اما في الواقع كل واحد يرقد في جيهة ..فجرية تبات عند صغارها وغسان في الدار...مافيش كلام بينهم نهائي الا للضرورة...بس فجرية كانت واقفتله من لبس وماكلة وقايمة حوشها ...
غسان خطب نيروز ولبسها الدبلة...وبدا يبنيلها في شقة فوق شقة فجرية ويفتلك فيها وفرحان بيطير...فجرية كانت كل يوم تزيد تكرها بس علي خاطر ولادها كانت مضطرة تتحمل وتساير....
فجرية كالعادة مقعمزة تشرب في قهوة الصبح عند نسرين أختها...
فجرية تنهدت بحزن: ياريتني لا كنت تزوجت ولا وافقت عليه من الاول. ..
نسرين: الله غالب نصيب...بعدين شن عرفك انه بيطلع كلب يعني 😒
فجرية: الحمد لله ع كل حال
نسرين: باه شن صار فيك ...سجلتي في الكلية؟
فجرية بفرحة: اي دفعت رسوم التجديد وسجلت ....والاسبوع الجاي يبدو المحاضرات
نسرين: كويس ع الاقل تلهي بقرايتك وتنسي الواطي راجلك
فجرية بحزم: تعرفي بمجرد مانتخرج ونشتغل مش حنقعد ولا دقيقة... بنطلب الطلاق و ناخد صغاري وبنسافر بيهم لاي بلاد بعيد علي وجه 😡
نسرين بشهقة: تسافري؟ واني من ليا بعدك؟
فجرية: حتي انتي تعالي معانا
نسرين: وقرايتي وصاحباتي واهم شي كيف بنسيب بلادي..يقولو اللي يطلع من داره يقل مقداره
فجرية: باه كيف ندير لو قعدت بيهم اهني حياخدهم مني
نسرين: لين تتخرجي وتشتغلي ساهل...بالك يموت وتفتكي من خليقته 😒
فجرية: ههههههههه يعطيهالك ضحكتيني وأني ماخاطريش في الضحك
نسرين: شن اخبار عزوزة الشر عمتك😒
فجرية: مانعرفش من يوم اللي صار ماعاد شفت وجها...نركب طول لشقتي
نسرين: افتكيتي من مكشخها 😂
فجرية: بناخد جلابيب للكلية نبيك تنزلي معايا للسوق
نسرين: جلابيب شنو ياهمي..خوديلك كم لبسة حلوة وسطربي بيهم 😉
فجرية: تو بالله وجهي وجه تسطريب 😪
نسرين: ماهو غير كان تسمعي كلامي بس 😤
فجرية: فكيني بالله معاش يهمني حد....تهمني نفسي وبس واللي يريحني بنديره....
نسرين: باه لو اهتميتي بنفسك شويا شن بتخسري؟ انتي المستفيدة
فجرية: اي عشان الفالح يقول سيبتها وتجري في جرتي
نسرين: تو بالله شن دخل شعبان في رمضان؟ 😕
فجرية: لما بنلبس اول حاجة بيقولها اني نحاول نرجعه ليا ونلبسله ونفتلكله ....و مستعدة نموت الف موتة ولا نخلي
هالاحساس يوصله كرهته كرهته...فرط فيا بالساهل بمجرد ماقتله كل حد علي حاله ماصدق...
نسرين: بصراحة كلامك مااقنعنيش...كان حضرته بيتجوز عليك معناها خلاص تموتي بعده...مفروض تغيري حياتك كلها وتعيشي اللي طول عمرك حرمتي نفسك منه وماتخلي شي في خاطرك....عشان يعرف ان الحياة مش واقفة علي حضرته 😒
رشفت فجرية من فنجان القهوة وهي تفكر في كلام نسرين اللي نوعا ما اقتنعت بيه...
######################
روحت فجرية بالصغار كالعادة نزلت من السيارة تلاقت مع عزوزتها في الجنان....
ام غسان: صحيتي يابنت الاصول ماتقوليش عندي عمة نسأل عليها 😒
فجرية بألم: يشهد الله عليا كنت حاسبتك زي المرحومة أمي...بس ياعمتي للاسف انتي تكرهيني
ام غسان: اللطف هاذا كله علي خاطر غسان بيتزوج عليك وشن فيها؟ الرجالة كلهم يتزوجو هوا مش أول ولا أخر واحد فجرية: في شنو ضايقتك بس عشان تخربيلي حوشي 😢
ام غسان: حوشك خربتيه بإيدك...كان راجلك لاقي اللي يبيه لداخل مايدورش عليه لبرا...😏
فجرية سكتت ماردتش لان كلام عززتها حساته فيه جزء من الحقيقة والباين ان غسان يدور علي حاجات ثانية...
ام غسان: تو بعد تشوفي ضرتك تعرفي معني كلامي... ماشاء الله عليها ابنيتي جمال وأناقة واصغيرة ودلوعة... والله أخيرا اوليدي الدنيا ضحكتله 😊
فجرية بوجع وحزن : باهي ربي يهنيه.....وخدت صغارها وركبت لشقتها...
غسان كان جاايب عمال يركبو في دار النوم لشقته الجديدة وكان فرحان تقول اول مرة يتزوج....قبل ماتفتح فجرية شقتها لمحت هالنظرة في عيونه وهو نازل من الدروج وحست بوجع لا يطاق للدرجة هاذي ماكانش مرتاح معاها في حياته
###################
