ام غسان رفعت راسها وشرقت شرقة لين النسكافيه طلع من خشومها: منو فجرية؟! شن مدايرة في روحك😨
فجرية: معليش تأخرت عليكم ياعمتي بس ياذوبك لحقت نبدل ونجهز روحي😗...
ام غسان: 😨😨
خدت كرسي وقعمزت في جنبها مع ابتسامة النصر علي وجها...
ام غسان تشوفلها ومصدومة....ماكانتش فجرية اللي تعرفها وكأنها وحدة ثانية ولولا الصوت مستحيل كانت تزبطها....
نحكيلكم اللي صار
"نسرين بعد مازنت علي راس فجرية وقدرت تقنعها انها تمشي للمة بالرغم من أن جوها كان مش تمام بكل وغسان منكد عليها وعيونها منفوخات من البكي ..إتصلت ببنت جيرانهم وكانت مهبولة زي نسرين...
قعمزو لفجرية وحاسو عليها طلعو شرولها فستان ذهبي ع السريع ....مع تسريحة حلوة وميك اب مش عادي...
ووحدة تبلبز والثانية تساوي لين طلعت فجرية بشكل تفاجأت منه هي نفسها ماتوقعتش تكون بالجمال هاذا...بنت جيرانهم عندها سيارة وصلت فجرية للمة وقالولها لما تكمل ترن عليهم يجو يروحو بيهم"
فجرية: عمتي وين نيروز علاش ماقعمزت في جنبك؟!
ام غسان: أه... أني قلتلها قعمزي مع المدامات شن بدير بينا احني العزايز 😑
فجرية: ولو ياعمتي إنتم الخير والبركة 😘😘
ام غسان عيونها بيطلعو في فجرية 😨😨 وفي خاطرها: معقولة هاذي فجرية...😨😨
حليمة بشهقة: منو فجرية؟! الصلاة ع النبي عليك طالعة ماشاء الله
فجرية وقفت سلمت علي حليمة وباست إيدها: تسلمي ياخالتي حليمة وتتتربي في عزكم السنفورة
حليمة: سلمها ياربي... والله هاذي الكنينة الصح طحتي وين استرحتي ياام غسان
ام غسان الصدمة بكشتها:😨😨😨
فجرية قعمزت وهي شادة ضحكتها من منظر عزوزتها اللي قريب تنجلط....
نيروز شافت بالصدفة لطاولة عزوزتها وتلامحت اللي مقعمزة ولما زادت ركزت عرفتها...
نيروز: برنية😱...شن جابها ؟! وكيف ولت هكي 😨 غبارة كان يشوفها غسان...هالحقيرة توا خطر عليها تلبس وتفتلك ماهو قداش ليها سنة امنسرفة زي الشغالات 😡
وناضت لعندهم: عمتي جيت بنقعمز في جنبك نونسك 😍
ام غسان مازال تشوف لفجرية وساكتة:😨😨
فجرية: كيف حالك نيروز؟
نيروز بدون ماتشوفلها: الحمد لله... وقعمزت حطت رجل علي رجل...
شويا وبدو يقدمو في العشي.....
نيروز خدت تليفونها واتصلت بغسان: أيوه حبي 😍 مازال شويا ياعمري خلي نتعشو ونروحو ..هههههههه عيب غسان اصبر عاد 😉
فجرية توترت لانها عارفة ان نيروز متعمدة تغيظها بس حاولت تبان عادية...
تعشو وكل شويا نيروز تتصل بغسان وعلي كلمات غزل وحب وكلام بالالغاز كله عشان تقهر فجرية...
فجرية حاولت تبرد أعصابها وتكمل عشاها...ضرب تليفونها وكانت نسرين...
فجرية: ألو نوسة...
نسرين: فجرية عارفتك بتعصبي 😓...لكن السيارة علي ماحاولنا فيها مابتش تشتغل
فجرية: كيف هكي؟! وأني كيف ندير في عمري ياحليلي 😨
نسرين: مانعرفش...كان هاذا روحي لحوشك وخلاص...وبعدين قولي للمنجوه يجيبك 😒
فجرية: الحق فيا أني مانشعفش. ديما نسمع في كلامك وتجي علي راسي 😡
نسرين تغمز لبنت جيرانهم وتضحك: يافوفو شن بنديرو الله غالب 😁
فجرية: ياقردة شن تبيه يقول عليا متنكدة وخاطري في لمات 😡 وماشية نفرهد..
نسرين: ماتعدليش عليه وبالعكس هكي حتقهريه اكثر...متاع عايشة حياتك ومش مدورتيه👌
فجرية: ارزيني فيك يانسرين انتي وعمايلك 😪
نسرين: باهي يافوفو مشكورة 😢... غير المهم توا روحي معاه وبعدين ساهل 😁
فجرية: باهي كيف بنحي كل هاللبز اللي مدايرتهولي والتسريحة اللي حاطة فيها كيلو توكات ياهمي 😨
نسرين: انتي غير لما توصلي للحوش كلميني ونقولك.
فجرية : اووووف... اوكي سكري توا وحسابك معايا بعدين 😡
بنت جيرانهم: علاش الكذب يامسمومة السيارة مافيها شي 😕
نسرين بخبث: هههههههه عارفة... بس ضروري غسان يشوف فجرية بكامل أناقتها لو روحنا بيها كيف بيشوفها يافالحة 😉
بنت جيرانهم: وعلاش؟!
نسرين: نبيه يتحسر ويتندم علي عملته...فجرية تو نقريها ونزن علي راسها...نعرف كيف نخليه يتعلق بيها وتمرمدة تمرميدة الكلاب 🐕وتسيبه...
بنت جيرانهم: وووه عليا مقواك...
نسرين : الله غالب الدنيا هاذي مافيش مكان للطيب فيها ضروري من الخبث عشان تعيشي 👌
بنت جيرانهم: ماداما فجرية بيروح بيها راجلها خلي بنروح علي حالي...سلام
