دخل للغرفة ابو سعدي اني كاعدة ع الجرباية شلت راسي اباوعله شو كلش خفت من شكله رغم شايفته قبل وذب العباية وظل يمسح بشواربه ولحيته ويباوعلي من فوك ليجوا وراح اخذله حباية من يم راس الجرباية وشرب كلاص مي وبدا يتقربلي وهو مبتسم وتبين عنده سن ذهب ليكدام وسنون مكسرة شكله عبالك الوحش الشرير الي اشوفه جنت بافلام الكارتون
من وصل يمي اني وكفت و مثل السعفة ارجف
وكمت ابجي رغم والله ماجنت اعرف شراح يسوي بس كونه انسان غريب واني مفرعة كدامه وبغرفه مسدوده بابه علينا صرت ابجي واتوسل عمو ابو سعدي لا تأذيني خليني اروح لخوتي الله يخليك
بس هو شو عبالك مايسمعني..ظل يتقربلي ويعاين ع جتف البدلة النازلة من كبرها.. اني كمت الطم واصيح وهو يريد يخلي ايده ع حلكي يسكتني دفعته وهو شايب مابيه حيل يقاوم
جان يكلي اسكتي يالعرمة خلص راح اطلع
طلع اسمعه يكوللهم هاي العرمة فضاحة
ودزلي مرته وبناته شبعني كتل
ولج ماتستحين خايفة بيج شي ينكس روس اخوتج لهذا ماتخليه يتقربلج مو؟؟
واني ابجي واكول والله مامسوية شي ومافاهمة الموضوع
لزمتني ام سعدي من شعري كالت
شوفي ولج يدخل ابو سعدي هسه ياخذج اكتمي واسكتي وظلت تشرحلي شراح يصير وشلون اتصرف واني خايفة وابجي مصدومة من الي اسمعه طلعن دخل ابو سعدي اخذني كوة واني اعض بالمخدة لحد يسمعني
وخلص طب سبح ورجع نام ويشوخر ظليت الليل كله ضامه رجليا بحضني وابجي وشعري مكفش والمكياج ملطخ وجهي لحد ماصبح الصبح... كعد هو كبل طلع للصاله واسمعهم يحجون ويضحكون متجمعين ع الريوك..
واني ميته جوع محد صاحلي ولاجابلي نص بيضة
ورا شوية دخلت ام سعدي كومي لج سبحي ورانا كومة شغل...
ومن يومها ظليت يومية مثل الخدامة شايلة البيت بالنهار وتالي اليوم مجبورة اتحمل رغبات شايب عايش ع الحبوب... ماخذني حديثة جسم بس عقلي صار عقل عجايز
بعد شهر يلا سمحولي ازور اخوتي.. وسفانة جانت يومية تجي تزور اهلها وفرحانة كاظم مدللها.. .. جان وجهها مورد من الفرحة من اجت ذاك اليوم تبشر اهلها بالحمل..
سفانة حامل بأبن اخويا الي انطيت عمري ثمن وجوده وسعادته
واني حامله الهم والقهر واكول الله كريم
شحجيلكم من الي شفته ابيت ابو سعدي اويلي.
بس الحق بالشهر جان ينطيني مصرف 50 الف هههه هلكد جان حصتي من كوم الاملاك والمال الي عنده
وهاي هم من جنت ازور اخوتي اخليها بجيب واحد بيهم اكول خطية اخاف يحتاجهن
ظليت سنة ع هالحال اكنس وامسح واخدمهم استقبل خطار وااودع
واروح اخدم المريضة والجايبة ابيتها من الجناين والبنات
بعد كم شهر جابت سفانة ولد سموه رافد حليو يخبل
وصرت من اروح لأخوتي مو حسد والله بس شكد حلو اشوف سفانة تدلع وكاظم مدللها هي وابنها جنت اتمنى لو اني هم متزوجة شاب وعايشة مثل ماالناس عايشة بس جنت ارجع اكول يلا هي قسمة بعد
بعد السنة ابو سعدي كلش اتمرض ومسؤلياتي زادت هالمرة وبنفس تعب البيت انوب جيبي ياهاجر وودي وبدلي ونظفي بهالشايب وياريت يرضى وتبين بعينه...الا هو لسانه زفر ومرته وبناته ع اقل شي يمدن ايدهن عليا حتى شعري الطويل من وراهم كصيته من كثر ماجان يسحبوني منه
تعبت وهلكت صرت امشي واوكع لااكل مثل الناس ولانوم...
و بيوم رحت يم اخوتي ابجي واشكي
كاظم جان لاهي بزوجته وابنه شكد حلو شفتهم عائلة صغيرة انوب سفانه هم حامل وعلاء جان طالع مالكيت غير حسين يسمعني
الحمدلله كلت اخويا صاير حنين عليا طبطبلي ع ظهري ومسح دموعي وكال
ياخيتي والله من الاول اني اعرف هيج يصير شتتوقعين من شايبب رجل بالدنيا ورجل بالمكبرة
وانت حسين خويا شخبارك ويا مياسه بعدك تحبها.
احبها خية بس مااكدر اتدنالها
ليش يابعد عيني اخطبها واتزوج بفليساتك
فليساتي شيسون ياخية فلوس جكاير يادوب
اي والله خوية زين اني شكدر اسويلك ماكو حل خية عوفي السالفة
وانا خيتك ترى طكت روحي اهناك مااتحمل بعد... ساعدني اطلك حسين والله مااكدرلهم
ها هجور شلونج
هلا سفانة مبروك ع الحمل الجديد
الله يباركلج يوم الج شنو ماناوية تفرحين ابويا بطفل هههههه
ابوج اشبعي بيه اني رجعة ماارجع لجهنم بعد
ماادري شلون اتجرأت بدقيقتها وهيج حجيت
شتحجين انتي روحي رجعي لا يكسرون حلكج ع هالحجايا
ماارجع وشماتسوون سوو اروح اشتكي عليكم اكول قاصر ومزوجيني غصب والدليل بالمحكمة ما كاطعين مهر
سفانة فقدت اعصابها واتهجمت عليا تضربني... بس لزمت ايدها وكلتلها
لومو حامل بأبن اخويا جان عرفت اجاوبج
اجا كاظم ع صوتنا العالي
شكو شكو صوتكم عد سابع جار
تعال شوف اختك المرباية تريد تشتكي وتطلك من ابويا.. صدك مو وجه نعمة عايشة بجنة تسميه نار.. ياعيني عليا اني شكول
ونزلت من عينها كم دمعة تمساح.
وكاظم بدا يسب ويعلي صوته اهنا ادخل حسين...
كاظم يكفي انت في سبيل تكون عائلة وتستقر دمرت حياة هالمسكينة
وصارت هوسه رادوا يتضاربون سفانة كامت تعيط ووكعت عود خافت ع رجلها كاظم شوية هدأ
حسين مصر يكمل كلامه وياه
كال هسه انت مستقر وياعائلتك
خلي البنت تخلص من الضيم الي ذبيتوها انت وعمي بيها... وحجتها بيدها المسكينة يضربوها ويهينوها فوك ماصايرتلهم خدامة
اجا علاء ع الهوسه هم طبك ويا حسين ورا ما هدأ كاظم هم كعدوا حاجوه بس هو مااقتنع الا دخل ويا سفانة للغرفة اشوية حجوا رجع موافق وكال هاي هي خية لاترجعين وحقج
ووكفولي اخوتي حتى اطلك هواي مشاكل صارت وحتى عمي جعفر عادانا لان مصلحته ويا ابو سعدي بس بالأخير اطلكت واخذت الغايب منه
و رجعت لحضن اخوتي وبيتنا حيل جانوا مدلليني
فلوس الغايب كاظم كال انطيني اضمها الج وانطيج مصرفج منه..
وحتى المصرف الي جان ينطيني اخليه بجيب علاء وحسين من يطلعون بلا مايحسون خطية شباب وادري بيهم جانوا محتاجين
وكاظم هم من جان يحتاج يطلع منه
بعد ما خلصت العدة اجاني حسين بيوم
خية عندي سالفة وياج
اي خوية احجي شمالك مو ع بعضك ليش
عوفيج مني المهم..
اليوم طلبوج مني
اني؟؟ منووو خوية ههههه اني بالجديد خلصت من ضيم الزواج
خية هذا شاب ابن اوادم صديقي غيث سامعة بيه مو؟؟ يدللج ويعوض ايامج خير وحالته المادية زينة
خوية سامعة بيه بس خلوني كاعدة اخدمكم ولا اخدم ناس وتالي ماتغزر بعينهم
اسمعي كلامي خية الزواج ستر واستقرار غير انتي حظج جان مصخم هي ذيج هم جنتي تسميه زواج الله يخليج... بعد اخوج اخذيلج يوم فكري وع السريع انطيني الرد
كلام حسين ظل ابالي طول اليوم بين الرفض والقبول وبين معاملة سفانة الي ظليت بحيرة وتردد لحد مااخر شي كلت يلا خلي اجرب حظي هالمرة هم
بالليل انطيته جوابي
حسين اني قابلة بس وكاظم شلون منو يكول يقبل
مو بكيفه هو زوجج المرة الاولى وشفنا اختياره
أنت تقرأ
جنح نثية
Romanzi rosa / ChickLitفي مجتمعاتنا الشرقية بشكل عام ومجتمعنا العراقي بشكل خاص هناك عملية بيع وشراء صفقة غير مشروعة تكون ضحيتها المرأة وهي صفقة الزواج القائم ع المهر التجاري قصة جنح نثية مستوحاة من قصيدة للشاعر المبدع شاعر العراق ابن الناصرية.. سجاد الغريب.. قصة تروئ بلس...
