جنح نثية

الجزء الخامس/جنح نثية

اطلكت واجيت كعدت وياهم بس قدر الامكان جنت اتجنبهم حسين وكاظم رادوا يضحكون عليا وياخذون كم فلس ماانطيتهم ضميت كلشي لعلاء خطية
علاء صارلي سند وظهر منهم ماجان يقبل احد يتعرضلي
صرت ادورله ع مره بيوم اجتي وحدة لبيتنا حلوة وصغيرونه  طلعت صديقة مياسة اني بس سلمت وعفتهم لان علاء جان راجع من الشغل رحت احضرله هدومه والغدا يكعد يتغدا وعينه بالهول كتله خويا شبيك
كال هجور هاي منو كاعدة ويا مياسة
كتله صديقتها يمكن سمعت اسمها زهراء او ازهار ما ادري
بس حلوة
دكل واسكت خويا صديقة مياسة اكيد نفس اطباعها ماتفيدك
لا بس اكول الله يستر عليها حلوة
اني ادري علاء انسطر بيها بس اني ثولتها
صار هواي ايام تجينا البنت ونفس الوكت الي يرجع بيه علاء افتهمت الشغلة مو صدف وكلما تجي تتودد الي  اسلوبها حلو
ومياسة بدت تتقربلي وتريد تصير زينة بس اني ابد ما جنت ارتاحلها
اخر شي علاء دك رجل الا هاي لو مااريد غيرها اشكد حاولت اغير رايه ماكدرت اني الي اسبابي جنت اخاف لاتطبك ويا صديقتها وياذوني واني ماالي سند غير علاء  من شفته مصر اتوكلت ع الله كلت يلا شسوي ورحنا خطبناها البنت اسمها زهراء وسلمت كل العندي لعلاء خليته يرفع راسه يم خطيبته وسوينالهم عرس مرتب
بيوم العرس جنت فرحانة كلش ع فرحة اخويا  من جهة واشوف حسين وزوجته ويا ابنه وبنته عبدالله وفطم وكاظم ويا زوجته وابنهم رافد ومحمد وعلي فرحانين يدكون ويركصون من جهة ثانية كلت فرحتهم كلهم جانت ع حساب حياتي وماندمانة ولا مقهورة واكيد هم بگلبهم يحبوني ويقدرون تضحيتي الهم ومصارين البطن تتعارك واكيد نتصافى بيوم
بين ماباوعلهم وافكر فات من كدامي كرار اخو مياسة وسلم تذكرون جنت احبه بيني وبين نفسي؟؟
اووووف باوعت ع نفسي بالمراية ايبااااه هاجر الحلوة ام الضفاير شبسرعة كبرتي والعمر عدا كلشي يعدي من كدامج وانتي بس عمرج الي عدا يلا الحمدلله والشكر
صاوا 3 جناين الله المعين صرت اشتغل اغسل واطبخ وانظف واربيلهم جهالهم وزهراء حملت بعد شهر وصرت اداريها فوك شغلي اليوم كله وبالليل اوكع ع وجهي انام عبالك جثة من التعب بس مياسة وسفانة رغم كلشي ماجانن راضيات ومابطلن مشاكل مرت 9 اشهر وجابت زهراء بنت سموها فاتن
وجان تبدي رحلة المعاناة من صدك
زهراء دكت رجل تطلع بيت بوحدها وبدت تطلع قهرها مني واني ابلع القهر واسكت وذنيج يظلمن واسكت واخوتي يضربون وحتى علاء يرزل واسكت لحد ما صحتي كالت لهنا وبس وكعت بالفراش مريضة ومحد دارلي بال حتى جهالهم ماحنوا عليا وتالي هه كال كاظم راح اخذج لبغداد للطبيب استغربت جرني جر وخلاني بتكسي وطلعنا لبغداد من وصلنا يم فد مستشفى نزلنا واني لا اقره ولا اكتب كال اروح اشتري جكاير انتظرته الساعة والساعتين و... لحد ماخلص الدوام
راح كاظم وماشفته بعد عافني ع كراسي المستشفى ولافلس وياي اجوي الحراس ماقبلوا ابقى لا اوراق لا هوية ولا فلوس طلعوني بره
هم جان عندي امل يرجع ياخذني لا فوكاها ظل بالي عليه
جنت تعبانة والمرض ماكلني حتى مابيا حيل ابجي واجاني الليل واني بالشارع كاعدة ع طرف رصيف الجاي والرايح يباوعلي ناس تذبلى 1000 وناس تنطي 250 
وسيارات وهورنات جنت احس روحي بكابوس ليلة ليلتين واني افرش كارتون وانام ليلة الثالثة الفجر جماعة شباب بسيارة  وكفوا يمي مبين عليهم شبعانين خبز حاولوا وياي ياخذوني ماقبلت رادوا يجروني للسيارة كمت اصيح وابجي وصلت سيارة الشرطة جانت بالصدفة تمر خلصتني منهم سالوني حجيتلهم ع وضعي كلتلهم ضيعت اخويا طلع بيهم واحد اصله من الناصرية اسمه عباس اتكفل يوصلني للناصرية ولبيتنا بليلتها طلعنا اني وثقت بيه لان ماجان عندي غير حل واخذني للناصرية ودليته ع ديرتي ع وجه الصبح وكدرت الكه بيتنا وطرت من الفرح عبالك حتى مرض مابقى بيا دكيت الباب واني متانية الي يفتحلي الباب ياخذني بحضنه وابجي ع صدر اخوتي هه
فتح الباب علاء اول ماشافني وياي الشرطي عباس باوع باستحقار وتفل بوجهي.... كال ارجعي وين ماانهزمتي من كاظم وعيشي يم الي لفوج ليلتين
ماألج عيشة يمنا بعد وسد الباب اني انصدمت والرجال احتار شيسوي
كال اختي اني وصلتج انتي بعد اتفاهمي ويا اخوتج حقه الرجال سوه الي عليه وبزيادة
رجعت ادك الباب وابجي واصيح ولك علاء اني هاجر شلون هيج تظن بيا لك كاظم اطلع كوللهم انت عفتني وضعت ولكم خافوا الله بيا اني اختكم المن اتعوفوني وبعد ماحاولت كللش طلع كاظم بيده حزام طكني طك جاب الدم من اذني وخشمي وحلكي وذبني مثل الجلب بالباب ايام وليالي ماحنوا عليا
اخوتي الي ضيعت نفسي عليهم ضيعوني
اخوتي الي لميتهم جوا جنحي وحضنتهم بعوزهم ومرضهم عافوني للشارع والرصيف والناس الماترحم صرت افتر وادور ع اكل صار الرصيف فراشي
طبعا محد لفاني ابيته لاكرايب لاجوارين لان كلهم صدكوا اني منهزمة من البيت وعقلي مو تمام مرات الغربة جانوا ينطوني لكمة اكلها واسد جوعي
لحد ما اجيتي انتي ست رؤى ويا المنظمة وشفتيني بالصدفة واخذتيني للدار

النهاية.....

احبتي اتمنى تكونوا استمتعتوا بالقراءة
اتمنى دعمكم الي اهنا بالواتباد
وبالأنستا والفيس