#حب_وحنين
الجزء الثامن
nada hs
حنين
بعد ماسويت الغدا ونظفت المطبخ وتغدينا اني والحجيه اخذتهه ع الغرفه ونمنا.. نمت نوم مصاير.. اول مره احس نفسي هيج مرتاحه بالنومه وماكو لا الم ولا افلاونزا ولا خايفه من المكان الاني بي.. گعدت لگيت الدنيا ظلمه.. والحجيه مطلعها اكرم للصاله ويوكل بيها تفاحه..
اكرم:صح النوم.. تعالي اكلي..
-لا مو جوعانه.. راح ادخل حمام..
دخلت سبحت وبطريقي غسلت الغساله الي چانت عبارة عن طبقات وسخ مااعرف شلون يغسلون بيهه.. جلفتها جلفه زينه وغسلت ملابسي بيها ولگيت ملابس لأكرم همين غسلتهن بطريقي كملت ولفيت شالي فوگ المنشفه الي براسي وطلعت.. همزين اكرم وامه گاعدين بالغرفه... كملت شر الملابس ع المنشر ودخلت للغرفه يمهم..
-شتحبون اسوي عشا؟
اكرم:امي متريد شي اكلت فاكهه واني هم مااشتهي.. اذا تحبين سوي بس الج..
-اني هم مو جوعانه.. راح اكل فاكهه..
انتبه عليه بعدني ممشطه خله وطلع.. بديت امشط واباوع عنفسي بالمرايه واگول وين چنت اني وشجابني هنا وكأني مو مستوعبه الي صار ويايه.. وبكل لحظه چنت اسأل نفسي هل سؤال.. معقوله الي صار ؟!
كملت تمشيط وخليت شالي ع راسي وطلعت اكل فاكهه حتى انام ولو ادري مااگدر انام بعد النوم الي نمته الظهر..
چانت الصاله فارغه اخذت راحتي بالگعده وبديت اكل واباوع اللتلفزيون بس ممركزه هيج مجرد مخليه نظري علي..
شويه وطلع اكرم من غرفته وراح لغرفة امه ورجع. عدلت گعدتي واجه هو گعد بطرف القنفه الي اني گاعده عليها..
-نامت؟
اكرم:اي .. اي؟ شلونج؟
رفعت اكتافي بمعنى ماكو شي..:مثل مداشوفني.. ماادري شگد راح اعيش.. وبأي لحظه راح يلگوني.. ومادري اذا راح اتعذب قبل لا يموتوني لو گبل موت..
چنت مدنگه واحچي.. رفعت راسي من كملت حچي چان مخلي ايده جوه حنكه ويباوعلي..
اكرم:كل هذا مراح يصير.. اهلچ عبالهم متي.. وحتى.. حتى نصبو فاتحة ..
الخبر چان مثل الضربة صارت بگلبي.. صبت دموعي وماگدرت احچي شي بوقتهه..
اكرم:اني اسف حچيتلچ.. بس لازم تعرفين.. وبعدين همه رادو يتخلصون منج بكل الاحوال.. وهم من سوو فاتحه يعني نسوج ومراح يتعبون نفسهم ويدوروج!
گمت اشهگ وابچي ماادري بنفسي:لاا! انته متعرف اهلي.. هسه سوو فاتحه بس تلگه عينهم متنام.. ميرتاحون لحد مايلگوني.. ياريت لو مخليني ميته بذاك اليوم! ليش عالجتوني! چان خلصت وخلصتكم من بلوتي..nada hs
اكرم
معبالي هيچ راح تتأثر من حچيتلها.. صارت تشهگ وكوه تحچي.
كلش انقهرت عليها ومااعرفت شلون اواسيها.. ظلت مدنگه وتبچي .. انطيتها كلنس چان قريب عليه.. وفكرت يجوز تاخذ راحتهه اذا عفتهه وحدهه.. رحت لغرفتي والصراحه مگدرت اگعد ولا انام بقيت بس افتر واني اسمعها صارت تبچي بصوت.. ربع ساعه هي جره وحده تبچي ومسكتت.. متحملت وطلعت الها چانت گاعده بالگاع مقرفصه وضامه راسهه بين رجليها..
اقتربت منها ونصيت بمستواهه..
-كافي بچي.. اله ماتنحل..
جاوبتني وصوتهه مبحوح من البچي:شتنحل دكتور شتنحل! باوعت بوجهي والدموع تارسه وجهه حالها يصعب ع الكافر وگالت:ليش ماخليتوني اموت.؟ ليش نقذتوني؟ يعني اني احسب نفسي عايشه هسه لو شنو!
حطمت گلبي وبدون مااتردد سحبتها من ايدها وخليتها بحضني ضميتها حيل لصدري وهي مستمره تبچي.. مادري شنو خطرلي احضنها.. يمكن چنت اشوف هل شي افضل مواساه وحل الها وصدگ بقت تبچي واطلع الي بگلبها واني لافها بأثنين اديه ومخلي راسها ع صدري.. ظلت تبچي وشوي شوي هدت بس دمعتها مانشفت.. انتبهت ع وضعنا..توترت وابتعدت عني.. مشالت راسها بعد.. بقت بس تمسح دموعها كل ماينزلن.. چان لازم اساعدها واخليها تنام حتى ترتاح وهي اصلا الساعه صارت 12 ونص.. رحت طلعت من ادويه امي فاليوم 10 وانطيته الها.. شربته وراحت للغرفه .. بقيت اراقب خطواتهه لحد مادخلت مشت بثقل ويأس.. كلش قهرتني حالتها.. اني هم رحت لغرفتي وطولت يله گدرت انام.. منظر حنين وصوتها وبچيها ميروح من بالي.. من حضنتها عبالك حضنت طفله معرفت شون اداريها..
ثاني يوم الصبح چنت مجاز.. بس مگدرت ابقه بالبيت.. لان شفت حنين مطلعت گدامي غير مره ومتباوع بوجهي.. فهمت انها خجلانه من حضنتي الها البارحه.. من شفتها هيچ تمنيت ارجع احضنها وانيمها يمي.. بس مردت ازعجها بوجودي .. اتصلت بصديق اليه ورحتله للبيت.. گعدنه شويه وبعدين طلعنا نفتر وصار وقت غدا تغدينه ورجعنه.. من رجعت شفت الكراج مغسول ويمكن صارله شي3 اشهر مغاسله اني وتخيلو شنو من تراب واوارق اشجار بي.. مچنت الحك بين دوامي وامي منا ومرات اني همين اسوي اكل بالبيت وشغلة البحوث هم تاخذ من وقتي
عرفت هاي سوالف حنين.. مسويته يلمع والگرانيت طالع شكله بعد ماچان مغيم.. گبل فتت لغرفتي ومطلعت بعد.. سمعت صوت ام ضياء بالبيت العصريه وهم مطلعت..nada h
