#حب_وحنين
الجزء الثاني
nada hs
صوت اهلي ورايه صار يرعد.. ومااميز شنو يگولون.. بس اسمع دويه مال صوتهم.. الدكتوره طلعت من غرفتهه والطبيب الموجود همين ع صوت الهوسه الگبت.. ماتجرأت ومديت راسي من الباب حتى اشوف شديصير.. بس بوقتها يمكن امي وخالتي انضربن لان صار عياط قوي والكل يصيح هاي رجولتكم ومو عيب تضربون نسوان كبار... عاد من سمعت هيج گبل طلعت من الغرفه اريد اشوف شصار بأمي.. طلعت والهوسه ذاك حدها.. زلم هوايه وممرضين واطباء وهوسه صارت.. حتى امي مكدرت اشوفهه بس شفت ظهرهه وطلعوهن بره هي وخالتي... من بين الهوسه ولمحت وجه ابويه.. حسيت جسمي كله ارتعش ومااكدر انطق بشي ولااكدر اگله عن التقرير وفحص الطبيبه.. كل الي خطر ابالي راح يجون يضربوني...طرفت عيني للدكتوره تحاچي بيهم وبيدهه ورقه بس محد مهتم للي تگوله .. رجعت اباوع بوجه ابويه وگلت همزين احنه بمكان عام.. لان لو بلبيت چان گطعني وشمر لحمي للچلاب.. ابويه واعرفه.. ماعنده شي سهل.. چان حتى اذا اريد اطلع للسوك لازم يعرف شنو سبب الروحه وشنو اشتري ولو يقبل بعدهه لو يخلي امي هي التجيبلي الشغلات الاريدهه.. بلحظة حسيت ماكو اصوات يمي ولاكان اكو هوسه بس گلبي صار يدك بطيء والدگه تخيلت اسمعهه ويمكن صدك چنت اسمعهه وعيوني بعيون ابويه.. انتظر منه اي تعبير او اشارة.. وماادري شكد مر وقت واني صافنه بوجه...
ماحسيت اله شي ودخل ابطني عبالك شيش مال بناء ... باوعت لنفسي شفت دم بده يطلع ورجليه احسه ماعادت تشيلني مدري من الخوف مدري من الضربه.. رجعت شلت راسي شفت ناصر رافع سلاحه گبالي ويخازر بيه... طرفت عيني لابويه بس چان داير وجهه عني .. ردت انطق واكول اني ترباتك بويه محد لازمني بس ماكدرت.. وكعت بعدهه وصار ثگل بنفسي وكل مااجر نفس اتوجع بمكان الضربه حاولت الزم مكان الضربه واديه تلطخت بالدم.. اخر شي شفته هو اديه الي ملطخات وبعدهه ماادري شصار...
nada hs
اكرم..
اني اكرم عمري 28 سنة.. طبيب مقيم اقدم.. بيوم الي صار حادث حنين چان هو يوم خفارتي بالطوارئ.. من دخلن هي وامها وخالتها عرفت حالتهن مو تمام واكو شي .. زاد شكي من شاورت وحده منهن زميلتي دكتوره وصال.. سألت وصال ومكالت غير بس(لا الشغله مويمي) شفت حنين طكت من البچي ونزلت تتوسل بدكتوره وصال وتكول اثبتي برائتي وراح يموتوني.. تقريبا فهمت الشغله والصراحه چان ظني سيء بيهه لان ياما يجن للمستشفى هيج حالات يردن ترقيع ونزل طفل ويحاولن يستغلن الجانب الانساني وعطفهن بكم طبيبه ... تعجبت ع وصال شلون طاوعتهه وراحت وياهن.. مشيت كم مراجع من راحت وصال وچنت افكر بهاي البنيه وافكر بوصال واگول شورطج يا وصال .. اعرف بهيج ناس وكومه مرت علينه هيج حالات تحاول تستغل الطبيبه وتكول اني شريفه بس من تجي الدكتوره تتأكد يطلع كل كلامهن كذب وتبدي تنزل دموعهه وتتوسل الطبيبه تشوفلهه حل... ماطولت هوايه ودخلت وصال .. هزيت راسي الها بمعنى ها؟ شصار؟
حچتلي وصال حالتهه وگالت البنيه مبيهه شي وراح اسوي تقرير وهسه زوجهه حيجي وافهمه الحاله.. طبعا لو غير وصال مچان صدكت.. وچان گلت انطتها رشوه او استغلتها حتى تحجي هيج بس وصال لا... اعرفهه متخاف من اكبر واحد ولو مو رشوه ودموع وتواسيل متقبل تغش المقابل وتشتغل بظمير...
من حچتلي انصدمت وحسيت نفسي ظلمت البنيه واني فكري راح لبعيد والعتب مو عليه العتب ع الحالات الي شفتهه بحياتي..
بدت وصال تكتب وماكو ظرف دقايق گبت هوسه برا.. مانطينه اهميه لان دوم تصير هوسه بره والموظفين او المرضى يتعاركون منهتم..شويه ودخلت حنين .. وجهه اصفر وترجف ومدري شتحچي واتمتم مينفهم عليها شي..
طلعنا اني ووصال دنشوف شكو.. شفنه امها وخالتها يضربون بيهن والناس تفاكك بيهم.. عرفت هذول اهل حنين.. ومبينين ناس رجعيه ومتخلفين من عگلهم وبيهم واحد نازع عگاله واكع دك ع مرته معرفت منو يكون ابوهه عمهه خالهه.. المهم حاولنه ندخل بتفاهم ووصال ماترددت ولا لحظه راحت تحچي وياهم وتگللهم لتسرعون وبتكم مبيهه شي اني كشفت عليه.. كل الحچي چان هباءا منثورا.. منو يصدك ومنو يرحمها..
الناس كدرو يطلعون امها وخالتها من المستشفى وبقت وصال تشرحلهم وشفتهه بدت تعصب عليهم وهمه ماعدهم لاعيب ولامستحه فخفت ع وصال لزمت ذراعهه سحبتهه شوي ليوره وهمست الها لتتورطين اكثر عوفيهم..!
وصال مسمعت الكلام وبقت تحجي وياهم وهمه خلو المستشفى هوسه وصياح .. اشرت لابو الاستعلامات وكلتله اتصل بسرعه ع الدوريه خل تجي تاخذهم! مادري شوكت طلعت حنين وشوكت واحد منهم لزم مسدس وسحب اقسام وضربهه..
التفتت ورايه شفت حنين مصدومه وتباوع لنفسه وماكو ثواني وكعت مثل جثه هامده .. ركضنه اني ووصال عليهه واجو الممرضين التمو يمنه وحتى جماعه الصيدليه اجو ع صوت المسدس..
شفت النبض بعده بيهه وتتنفس.. گبل دخلناهه لصاله عمليات الطوارئ... نزفت دم هوايه ومااعرف اذا اصابتهه اذت كل اعضاء البطن لو استقرت الرصاصه بمكان واحد..
دخلو اطباء وياهه للعمليه واني مكدرت ادخل لان عندي مناوبه ومااكدر اترك الطوارئ والناس الي تجي..
من رجعت لغرفتي چانو اهلها ولاواحد منهم باقي وكلهم اخذتهم الشرطه.. ارتاحيت من بلغوني اخذتهم الشرطه... بس بقه بالي مشغول ع هاي المسكينه الي ممكن تموت بسبب طيشهم وهمجيتهم...nada hs
صارت تقريبا 1 بالليل واجه ممرض گال البنيه الضربوهه اهلهه طلعت من العمليه وبعدهه حالتهه ممستقره وراح ننقلها للأنعاش
بقت وصال ذيج الليله مدنگه راسهه وتبچي .. سديت الباب وقربت كرسيي يمهه.. لزمت اديها ورفعت راسهه بيدي الثانيه..
-خلص كافي! مشبعتي بچي؟ وكأنج اول مرة تسمعين واحد ممكن يموت.. بعدين هي ممكن تعيش وترجع حياتهه طبيعيه!
وصال:لا اكرم! حياتهه چانت بيدي! اني المفروض احميهه ومااخليهه تطلع لحد لمن اتأكد صدكو بيهه بريئه! انته متعرف شديصير بيه هسه! راح اموت من القهر والله..
-مبيدج شي انتي! اذا همه عقولهم محجره شلون تنقذيها!
كافي وخلينه ندعيلهه تگوم بالسلامه..
وصال:اذا ماتت راح يكون دمهه برگبتي!
-ادعيلهه وصال وكافي موتي نفسج!
بقت وصال مزاجهه مو تمام ومالهه خلك واقل حچايه تبجي.
. هو الصراحه اني چنت معجب بيهه وهي تعرف بهل شي مو لان مصارحهه ،لا.. بس نظراتهه واسلوبهه ويايه كأنها تعرف.. صح هي مچانت ذاك الجمال وقزومه شوي واني اطول منها بهوايه يعني هرقل هههه بس تعجبني شخصيتهه ونزيهه ومااطخ راسهه لاكبر واحد.. كملت مناوبتي وطلعت للبيت...
الشوارع فارغه والناس كلهه نايمه ذاك من ذاك الي طالع.. صفيت السياره گبال الباب ودخلت.. رحت مثل مامتعود بكل خفر اليه من ارجع الصبح اروح اشوف امي..امي متكدر تتحرك وكله ع كرسي متحرك.. صارت عدها جلطه وشلت نص جسمها الايمن .. حاولت بكل الطرق ارجع اخليها تمشي مكدرت.. حتى سافرنه بيها للهند وتركيا ومفاد .. فبقت ع هل حال وحتى حچيها ممفهوم ..
قبل مرت اخويه هي الي چانت تعتني بيها وتنظفها.. بس اخويه معايش ويانه ومرته تجي بس بيوم خفارتي تبقى يمهه.. وهوايه مشاكل صارت بهل سالفه .. طبعا من طرف فرقان مرت امجد اخويه..
ع ابو ها ليش اختكم متجي تعتني بيهه وبس اني والى متى واني مليت وهي متحبني بس تصيح عليه!...
چانت ع عمى عيونهه تجيهه بيوم خفارتي واختي متزوجة بغير محافظه ومو يوميه يمنا وولا زوجهه يقبل ع جيتها دائما... يمكن مره كل شهرين تجي ولو تصادف خفارتي لو لا...
خليت اكثر من ممرضه بس كلهن مااشتغلن عدل ودائما الگه امي ضايجة لو ممنطفيها عدل لو ينسن ينطنها دواهه مال الضغط.. لذلك چنت اصرفهن ..
لحد ما صار وحچيت ويه وصال .. ووصال مقصرت حچت ويه وحده من الممرضات عدنه بالمستشفى وصارت تجي الممرضه ام ضياء تنظف امي وتسبحها كل يوم او يومين وتبقى تنام يمها بيوم خفارتي.. شويه ارتاحيت واكدر اطمئن ع امي بأيد ام ضياء مره فقيره ومن اهل الله .. وچانت كلش خدومه وتفرح انطيهه زايد مو ناقص..
دخلت لغرفة امي وشفتهه نايمه ع السرير وام ضياء ع الارض ابتسمت لااراديا بشوفه امي.. عفتهم نايمات ورحت لغرفتي الي چانت مقابيل غرفة امي.. حضرت تراك وتيشيرت ودخلت حمام شويه انتعشت وحسيت جسمي خف..
اول مخيلت راسي ع المخده اجت ابالي حنين.. وتذكرت الصار بيهه والليله الظلمه المرت ع الكل بالمستشفى كأني مو مستوعب الي صار .. بقيت اتگلب ممرتاح ع غير عادتي من اجي من الخفر گبل اخذ دوش وانام للعصر يله اكعد..كلش استخطيتهه واتذكر دموعه وهي تتوسل بوصال .. مادري شلون اجاني النوم بعدهه...
يتبع...
لعيون الي صوتو وعلقو 😍☺️
