#حب_وحنين
الجزء الثاني عشر
nada hs
حنين..
اليوم الي طلعت بي من البيت چان اكبر خطأ بحياتي.. ظليت بيومهه افتر بالشوارع لحد مااخذت تكسي ورحت لبيت وحدة من صديقاتي الي چانن وياي بالمدرسه..التخطيط الغبي مالتي ورجليه مااعرف شلون ودني يمهه.. مافكرت بعقل.. واصلا تفكير طفل چنت.. من دخلت يمهم جانت دنيا عصر.. هم بيتهم قريب من مدرستي قبل ودائما تاخذنه يمهه نشرب مي لو ندخل تواليت لان احنه بيتنه ابعد بهواي.. امهه وابوهه واخوتهه كلهم تعجبو من جيتي .. حتى هي لمياء.. تعجبت بعدين كيفت.. طبعا عبالهم اني ميته بس مابينولي.. حچيت قصتي الها كلها و چانت ثقتي عميه بيهه .. ثاني يوم من الصبح گعدوني گالو اهلج يردوج
ماصدكت حچيهم وگلت يجوز متوهمين.. دخلت للأستقبال وشفت ناصر واگف بالباب .. مااسولف عن الخوف الخفته بذيج اللحظه
رجليه گوه شالتني ولساني انبلع وريگي نشف..
ماادري من ياجهه ارگعها.. عن موتي..عن غيبتي ل4 اشهر وهسه رجعت..عن علاقتي بأكرم.. منين مااسدها تنفتك..
اخذني ناصر من ايدي بكل هدوء.. وطول الطريق ماحچه شي..
وصلنه لبيت اهلي وماادري شنو من گلب عندي حتى اتحمل كل هذا.. گوه خطت رجليه عتبه الباب..
امي چانت ترش بالحديقه وستوهه غاسله الگراج.. من شافتني وگعت الصونده من ايدها.. شفتها صايره هلگدها ..ضعفانه ومتغيره كلش.. تمنيت اركض واحضنهه.. بس ادين ناصر مچلبه بيه ومااكدر اتحرك منا لهنا..
-يمه حبيبتي.. اشتاقيتلج..nada hs
هي دمعت عيونهه وماقربتلي وظلت جامده بمكانهه..
دخلنه للمطبخ ونوب الصاله ودفعني خطوتين حتى اصعد الدرج امشي ومتأكدة راح اموت من صدگ هل مره.. اباوع للبيت بكل طرف الي بي ذكرى.. هنا لعبت وهنا ضحكنه اني واختي هنا اكلنه وهنا تزاعلنه.. كأن عمري لحظة وحده ورجعت انعادت گدامي بكل صورهه..
صعدني ناصر فوگ وخلاني بالغرفه المتروكه .. چان بيهه غراض قديمه ملابس وتايرات سيارة ابويه وتخم قديم.. ربط اديه ورجليه بحبل واني مااحچي بس اباوع بوجهه ودموعي تصب.. ماباوع بوجهي ولا طرفت عينه اليه.. ظلت ساكت ويشد برجليه حيل وثبت الحبل ع الشباك.. اخوتي فالح وفاضل مشفتهم وحتى ابويه..
ظليت محبوسه من الصبح للظهر محد اجاني..
للظهر دخلت عليه امي.. اريد اگوم الها مااكدر صرت اقرب جسمي الها حتى تجي يمي.. هي نزلت عليه وحضنتني ودگ بچي اني وياهه.. ماسألتني وين چنتي ولايم منو ..
شويه ودخلو اخوتي كلهم وابويه ومرت ناصر واگفه بالباب وراهم واختي ماشفتهه مادري وينهه..
ابويه وهو مدنگ راسه وميباوعلي:وين چنتي كل هل مده؟
باوعت بوجهه هواي وانتظرت منه نظره بس ماباوعلي.. بقيت سكته مجاوبت.. مااحس اله دفره بوجهي اجتني ..
ناصر:احچي ياعار! سويتينه عار گدام العالم ياسگط!
دنگت وصار الحچي مدري منين يطلع مني:اخوي.. ناصر اخوي الچبير.. الكتلني بغمضه عين واني بريئه.. بريئه مثل وصله بيضه ما لازمهه بشر ولابيها نيشان.. ماسمع مني ولا سمع من اليثبت اني رفعت راسه ومابيوم نزلته..
رجعت اجتني دفره واني مدنگه:اكلي خره ياساقطه! ولج فضحتينه ! صرنه ماندخل ببيوت العالم كلها تگول علينه اخوة السگط..
استمريت احچي وابتسم وبنفس الوقت دموعي تصب: بلا ذنب ولا صوج اجتني طلقه.. ياريتها من عدو ولا من اخوي.. اخوي الي يوجعني گلبي علي گبل لايشكي.. واني بفراش الموت تمنيته يمي.. مو بس هو.. لااا كلهم اهلي ردتهم يمي.. عافوني والناس رحمتني وهمه مارحموني..
اجه فاضل رفع راسي اله وعدلي براشدي احس اذني انسدت ومااسمع بيهه :ولج مو بس ناصر.. ناصر هم مابي حظ اني منه اوذرج وذر واذب لحمج للچلاب..
صرخت بعالي صوتي وگمت ارفس:ليش شسوووووويت انيييي ليشششش ليششش ماسمعتو من الدكتوره! اني الله خلقني هيچ! الله بلاني بشي حاله حال المرض!
صار الكفخ عليه عمل شعبي.. بس اسمع صوتي امي صارت تبچي وتشهگ ومن صارتلي فرصه شفتها واني جوه اديهم مخليه شيلتها ع وجهه وتصرخ..
شبعو مني دگ وقفلو الباب وطلعو... ظليت اني عظامي مكسره من الضرب وكل شبر بيه يون.. بذيج اللحظة تندمت الف مرة ع طلعتي من بيت اكرم وع روحتي لبيت لمياء..
ظليت ذاك اليوم بطوله بدون اكل ولاشرب.. ثاني يوم من طلعت الشمس چنت بيهه گاعده.. اجت امي بالبوكه وشربتني مي وانطتني لفه وكلتنياهه بسرعه بسرعه وطلعت..
مراح اطول بالمعاناة الي شفتها خلال 4 ايام سوده يم اهلي
كلها ضرب وغلط وفشار وشي تگول نقتلها هنا وندفنها وشي تگول ناخذهه للمقبرة ندفنها وهي عدلة.. وامي تجيبلي الاكل بسكوت بس متحاچيني شگد توسلتها تحاچيني مقبلت..
اليوم الخامس سمعت صوت الباب يندك ومادري ليش رف گلبي ويه صوت الدگه ..
سمعت صوت بس مگدرت اميزه لان الكهرباء مشتغله وهوسه صايره من صوت الاجهزه.. ع حظي وتطفى الكهرباء.. الصوت مو غريب ابد.. قربت نفسي من الشباچ صاير گبال باب الشارع شفتها هاي ام ضياء! شجابهه هنا معقوله اكرم دازهه.. استبعدت هل احتمال كلش وظليت ساكته.. بعدين خطر ابالي اصرخ حتى اسمعهه صوتي عسى تعرف صوتي او تكون صدك دازهه اكرم..عطت(اني هنااا ياناس ياعالم! ساعدوني! دخيل الله ساعدوني راح يموتوني!)
شفت ام ضياء التفتت بس سوت نفسهه مو سامعه ولا مهتمه وكملت حچي وي امي شويه وراحت.. صحت وراهه اني هنااا اني هنااا حنين هنااا! مسمعتني وراحت.. اجت مرت ناصر ضربتني ع حلگي وگال اذا تعيدينهه اگول لناصر..
اكرم
اجت ام ضياء وحچتلي عن صوت حنين الي سمعته ومتأكدة انها حنين... من سمعت بيها عايشه عبالك انكتب الي قدر جديد ورجعت الحياة.. گبل بوجهي لاقرب مركز شرطة وبلغت عن الحاله وطبعا گالو مندخل وماعدنه اثبات ومن هل كلاوات مال عجوزيه حتى ليتحركون.. سويت اتصالاتي ورجعت حچيت وياهم مره لخ وراويتهم هويتي مال مستشفى شويه تحركو وصدگو كلامي.. بين ما تحركت الدورية مال نجدة مرت يمكن ساعه.. حسيت الوقت ديضيع واني دااراهن ع حياه حنين.. الحمد لله شي من هذا مصار.. دخلو الشرطه للبيت ومالگو بس النسوان وابو حنين
چنت منتظر بالباب ومااشوف اله حنين گدامي بطولهه الحلو بس وجهه مينعرف من الضرب.. مزورگين عيونها وحلگها صاب دم وناشف وخدودها مورمه.. مااهتميت للموجودين وماگدرت الزم نفسي مااحضنها ونزلت دموعنا اثنينا.. شگد چنت مكابر ومانزلت دمعتي بغيابهه بس من شفتها گدامي ولمستها هي موجودة وعايشه متحملت.. خليت ايدي وره ظهرهه وورحنه ع سيارتي.. الشرطه گالو لحگونه للمركز..nada hs
طول الطريق لازم ايدها وابوسها وهي بس تبچي.. ماطلع من عدنا حرف احنه الاثنين.. عيونا چانت كافيه حتى تحچي عن التعب والمعاناة والالم..
وصلنه للمركز ورفضت تشتكي ع اهلها.. حاولت وياهه ماقبلت بقت تگلي خل نطلع منا.. نفذت رغبتهه بغير ما تشتكي ورحنه ع بيتنا..
خليتها تدخل گدامي واني امشي وراهه..
-ليش هيج سويتي بيه..؟
دارت عليه وحضنتني وبچت بچي فطرت گلبي..ضميتها لصدري وبقت تشكي من الشافته يم اهلهه ومن حچي نهاد..
طلبت تدخل الحمام ودخلت اني وياهه.. كل شبر بجسمهه ضاربي واذا مو المكان ازرك احمر..
-ليش مااشتكيتي؟! انتي خطأتي حنين! لازم بأقرب فرصه تشتكين واني اسويلج التقرير الطبي يثبت انج متعرضه للضرب
حنين:هذا اخويه! شلون اشتكي عليه!
-تعالي ياروحي شگد گلبچ حنين ياوردتي..
دلكت جسمها ع كيف وبمي دافي چانت تفز من شوي اضغط زايد بدون قصدي.. كملت الحمام وخليتها بغرفتي ورحت سويت الها اكل بيدي لان اعرف بيها تضوج من اكل المطعم حياتي ههه
سويتلها شوربة فوائد ههه.. وكلتها بيدي ومن كملت حضنتها من ظهرها ونامت.. بقيت اني اشتم بشعرها ورگبتها واشفي شوگي الها..
ما گعدت اله بالليل.. وحسيتهه افضل.. سألتني عن امي ومن طلعنا للصاله شافت الهوسه وهم سألت عنها.. اني هم عاتبتهه ع طلعتها
-هيچ اطلعين علمود كم حچايه لتقدم ولا تأخر؟!
حنين وهي مدمعه عيونهه:والله حچي مينجرع ومااتحملته.. اني اسفه.. اتهورت وطلعت..
-ياروحي.. لو مو يحچون لتهتمين .. اني الچ وانتي والي..
لفت اديها ع رگبتي وحضنتني:واني شعندي غيرك بهل دنيا..
مرت ايام ورجعت امي للبيت وحنين صارت افضل وبدت الاثار تخف شوي شوي .. اهلها معرفت عنهم شي من يوم الي اخذتها بس طلبت تكون دوريه شرطه قريبه يمنه بالمنطقه تحسبا لاي شي.. نهاد بقت بزعلتها ومفكرت ارضيها .. مرت الاشهر بسرعه وكملت ال18 سنه وصار نگدر نتزوج.. چان احلى يوم بحياتنا
رحنه ادينه بأدين بعض وطلعنا بيدنا عقد الزواج.. كل شي كملته من افضله غيرت بالبيت ترميمات بسيطه وغيرت الغرفه مال نوم وبدينا نستعد للحفله.. طبعا هي رافضه الحفله وچانت خايفه من اهلها.. بس سوينه حفله بسيطه وامجد ونهاد ماحضرو.. بس زوجة امجد اجت.. ووصال وعدد من الاطباء والطبيبات الويايه
طبعا كومه هدايا وتهاني اجتني .. بس كلها مصدومه من اختياري ههه.. كلها چانت متأمله بيه.. بس القلب ومايهوى..
بيوم العرس حسيت نفسي عبالك اول مره نتعرف ونكون قريبين من بعض.. رگصنا وفرحنا سوه وامي بذيج الليله اخذتها زوجة امجد وياهه.. بذاك اليوم اني يله ارتاحيت وگدرت اطمئن ع حنين من اهلها ومن كلام الناس عليها..
يتبع..
