#حب_وحنين
الجزء الحادي عشر
nada hs
حنين
راح اكرم لدوامه وبقيت اني انظف واجهز الغدا.. ونهاد يم امها بالغرفة والاطفال يلعبون ساعه بالحديقه وساعه يمي بالمطبخ..
اتغدن سويه واني وحدي گعدت بالصاله اكلت وبالكذب مگالت تعالي يمنه.. كلش لبستني وماحاچتني ابد.. حتى امها مخلتني الزمها .. كل مااقربلها وگالت لا اني .. عفتها براحتها وما طوخت وياهه.. للظهر اجه اكرم بس اني چنت نايمه من اجه.. للعصر يله شفته.. ماادري شنو الي اخذني لغرفته.. يمكن حظي راد يسويهه.. لگيته نايم بدون غطه وجسمه ونومته تخبل.. مخلي ايده ع عيونه والخ ع بطنه..
گعدت ع السرير يمه هو حس عليه وگعد..
اكرم:وردايتي..
حنين:اگعد كافي نوم!
اكرم:لج تعبان كلش ..ماشالله اليوم المستشفى انترست مصابين ودخلنه عمليات هوايه ..
احجي ويا والفلف بالتشيرت مالته:تغديت؟
اكرم:لا.. مااشتهي ولعبانه نفسي كلش..مااريد احچيلچ شنو شفت اليوم.. ولتذكريني بالاكل..
-اوكي.. بس اني مشتاقتلك وانت حابس نفسك من جيت ولهسه!
اكرم:هسه شويه واطلع .. راسي مصدع شوي..
-سلامتك روحي..
بسته من گصته وطلعت.. كملت كم شغلة بالمطبخ ومر الوقت بسرعه وصار الليل وع العشا كل ما تخطف مني نهاد تخزرني.. مو مثل خزراتهه العاديه.. لالا هل مرة بحقد او استضغار..
مشيت كل شي عادي وگلت يجوز مغثوثه من شي..
كملو العشا وبديت اغسل مواعين..اجه اكرم للمطبخ ..
اكرم:وردايتي.. اني طالع.. نهاد محتاجة كم شغله..
تفاجئت شنو الي محتاجته! وهي باچر ع اساس تروح! مسألت بس وره ماطلع اكرم عرفت شنو السبب الحقيقي..
كملت المواعين ودخلت يمهن بالغرفه.. گبل نهاد صاحت ع اطفالهه وطلعتهم من الغرفه.. بقيت اني متعجبه عليها ليش هلگد عصبيه وليش طلعتهم؟!
نهاد:انتي من شوكت هنا؟
-اربع لو خمس اشهر؟
نهاد:وكل هل فترة انتي ويه اكرم ؟ وتنامين يمه؟
انصقعت بالحچته وتخيلت امهه هي النطقت بس شلون؟ بعدين تذكرت لمن رحت لاكرم العصر..nada hs
نهاد:طلعتي وحده بت شوارع هاي اذا مو بت حرام! واني اگول شنو هل حنيه والطيبه ع امي والبيت يلج من النظافه والطبخ جاهز!
صبت دموعي ع كلامهه ونزلت راسي..
نهاد:اوي خجلتي مو؟ شوفي بعد السما عن الارض اخلي اكرم ياخذج.. بت شوارع تزوج اكرم! اكرم الدكتور الي كلهه تتمناه! لج مهندسات وبنات اصل وفصل يتوسلن اخذهن اله! تجين انتي الزعطوطه مسويه نفسج ام البيت!
-بس..
قاطعتني وگالت:لا بس ولا شي.. تتخطفين يمه وترحيله للغرفه شيسموهه! اول ماگلتي ابات هنا نغزني گلبي منج.. تدرين ليش؟ لان ماكو بنيه متربيه تبقى بيت واحد عزابي!
-خل..
هم رجعت قاطعتني:لا تحچين ولا حرف.. اذا باقي عندج شويه كرامه وشرف لتبقين هنا! اذا انتي صدگ شريفه ويمسج الحچي راح ترحين بدون مشاكل.. واذا لاوالله من ذولي الشلايتيات مراح تتأثرين بالي اگوله..
حچيها رجعني قرن زمان.. وين چنت احلامي كلها رراح تتحقق واتزوج اكرم وارتاح من كل مشاكلي.. رجعت لنقطه الصفر كأن كل هذا تبخر .. عفتها ورحت گعدت بالصاله وافكر بكل حرف گالته.. وبلحظه حسيت كل كلامها صح... اني الي تركت اهلي كل هل مده وعشت ويه ناس غربه وحبيت ابنهم لا وانطيته جسمي وحللت كل شي علي وعليه! ظلت دموعي تصب وحايره شسوي.. سمعت صوت الباب انفتح گبل دخلت للغرفة يمهن خفت لا يشوفني اكرم ويسألني .. فرشت فراشي ودرت ظهري لنهاد .. هو دخل انطاهه علاگة معرفت شنو بيهه وعباله اني نايمه ..احس كل هموم الدنيا بيه.. صار الفجر واني بعدني منايمه..
گمت ع اطراف اصابعي فتحت الكنتور ..اجت عيني ع الفلوس الي چان يخليها اليه اكرم.. صبت دموعي وعقلي يگلي روحي وگلبي يرفض.. سكتت كل شي بداخلي يمنعني اروح واخذت الفلوس لبست ردائي وطلعت..
چانت حوالي6 صبح.. طلعت امشي ماادري وين اروح وشنو اسوي .. خطرت ابالي دكتوره وصال.. بس ماردت شي يرجع يربطني باكرم.. بذاك اليوم كرهت نفسي من كلام نهاد الي صحاني من غفلتي...nada hs
مافكرت بأكرم وشنو ممكن يصير بي.. حتى تضحياته من يوم جيتي الهم لمعالجتي لاهتمامه لدلاله اليه.. كلهن نسيتهن بلحظه وكل همي اطلع من بيتهم واشرد لمكان بعيد..
