الخطيئة

الجزء 5

#الخطيئه
بقلمي فردوس عبد اللطيف
الجزء. 5
مروه بقيت كم يوم افكر ماعندي غير حل وابوفاضل انسان طيب وساعد ابوي بالغربه وابنه شكله حلو ومرتب مبين عليه ابن دلال خلي اوافق واروح لايران بلكي ربي كاتبلي ارتاح من بعد عذاب هالسنين الي عشتها بطفولتي
بعد اسبوع كظو بالزياره اجوي بيت ابو فاضل
سألتني امي ها بنتي صفيتي على راي الناس اجوي ويردون جوابج
مروه والله ماما مادام ابوي مقتنع بيهم اني راي من رأيكم انتو بكيفكم
بوستني امي ونزلت دموعهه ولج بنتي حاتعوفيني وتسافرين بعيد اشلون افاركج اني هم بجيت بين حا افارك اهلي وبين خسرت مهيمن
ام حسن ولج يمه لاتبجين هذه دموع الفرح اشو إنتي كلبتيهه مناحه
مروه. مسحت دموعي وبقيت اشهك اني من ابجي تلزمني هذه الحاله ابقى اشهك فتره
ام حسن كومي غسلي وجهج لا تجي ام فاضل تشوفج تبجين
كمت غسلت وجهي وبدلت سمعت هلاهل ام فاضل واجوي امي وأم فاضل بوستني ام العريس فرحانه بعروسه ابنهه
رحنا اشترينه ذهب لان الذهب بايران صح شكله ونقشته حلوه لكن عيار 14 يعني هنا مينباع وحتى لو ينباع بسعر زهيد. بقو يمنه كم يوم تقربت لفاضل  وشفته انسان محبوب
وبديت أتعلق بي واعامله باحترام
طبعا هما بايران الوضع بالعكس السيطره بيد الزوجه والعريس يجيب ذهب ويسجلون عليه غائب وحاضر يكسر الظهر ياما يدخلون العروسه بحصه بملك بيت اهله مثلا يعطوهه اسهم ربع البيت او مبلغ ضخم بحيث طلاقات عدهم قليله لان القانون يفرض عالزوج دفع المبلغ
اما العروس فاهلهه لازم يجهزوهه جهاز بيت كامل كهربائيات فرفوري وملابس ولازم يوضع جهازهه بغرفه بالبيت والأقارب والاصدقاء يجون يتفرجون يعني فوك مينطون بنتهم لازم يخسرون مبلغ مو قليل للجهاز
احنا كلنالهم نمشي على  تقاليدنه معلينه بتقاليدكم بس ابوي خلى الغايب مبلغ عشره ملايين كال حتى لا يبهذلج
انطوني مبلغ للجهاز ولازم احضر جوازي قبل مايسافرون كالو لازم نمهر
سوينه حفله صغيره بس اقاربنه عمامي وخالاتي وخواتي ورحت للصالون ولبست فستان بنفسجي ابو التله وطلعت كأني أميره بس فاضل احسه خجلان ميباوع مو كأنه ملهوف
بس يالى بعدين أتعود عليه يجوز خجلان لان بيت اهلي
سافرو بيت ابو فاضل يوم الثاني بعد المهر
واني قدمت على جواز ابوي كان بوقتها هم يراجع على تعويضات اخوي يأخذني كملت الجواز بطلعان الروح واتصل ابوي بابو فاضل وحددو موعد العرس على فرحه الزهره اشتريت ملابس وحاجيات لان هناك ماعدهم استيراد كوله محلي صحيح هما فنانين بالخياطه بس ميهتمون بهيج شغلات لبسهم كوله بنطرون ومانتو وعليه جادر(الجادر) قماش اسود فوق الرأس يلبس مثل العباءه العراقيه بس القماش يختلف وخياطته هم اسهل من العباءه العراقيه
اقترب موعد زواجي واني بديت اضعف وما اكل افكر اشلون حا اروح بالغربه وافارك اهلي وشعرف عنه فاضل اشو ساكت ياريت يبطلون ولو اني حبيته وعجبني بس خايفه من الايام الجايه شضامتلي
كملنه جوازاتنا وتحدد موعد العرس وأهلي وصلوني لبيت العريس قبل العرس بيوم واستقبلونه بترحيب والناس ما قصرو ويانه كانو مشترين شقه لابنهم فاضل وماثثيهه اثاث مرتب وحلو كولش عجبتني وأهله كولهم كانو فرحانين
اني هم فرحت بالحياة الجديده أصفهان مدينه جميله وبناياتهه حلوه ومايهم عذب جوهم حلو الأشجار والخضار فى كل مكان صار يوم العرس اجوي خواته واهله مخبوصين طبعا اني اطرش بالزفه كلشي ما افتهم من لغتهم يحجون وياي بس ابتسم حتى لو يسبوني هم ابتسم بس فاضل وابو يعرفون عربي ابوي معلمهم نسوانهم عجميات
أخذوني للصالون بس يلغن وسوولي بكيفهم تسريحه ومكياج الحلاقه كانت حلوه ومرتبه وتفهم بشغلهه طلعتني انسانه ثانيه
الكل تعجب علي هما عدهم بنات جميلات لكن احنا العراقيات جمالنه مختلف بي ملوحه هههههه
اخذنه صور وصارت الزفه
ودونه لشقتنا. اهلى سلمو على وسافرو للعراق بجيت عليهم
كلت هسه فاضل يعوظني فراك اهلي
اجه فاضل باوع علي
اني كنت خايفه وارجف عبالي حا يهجم مثل اي عريس بيوم زواجه
اول شي بدل ملابسه ويباوع علي اني كعدت عالسرير بعد ماتعبت من الوكفه باوع اشو ما بدلتي ماتغيرين ملابسج
اني هم فشلت كتله اي هسه أكوم اغير ملابسي
بس بيني وبين نفسي كلت شنو غشيم لو يغشم نفسه لو معاجبته
فاضل يالى فضيهه مشايفه فستان ابيض ماشبعتي منه
مروه ياربي هذا اشبي
غيرت ملابسي وكعدت انتظره
فاضل اكو عشا بالمطبخ روحي حضري الاكل حتى نتعشى
مروه حاضر
هذا اشبي خايف لو شنو موضوعه
رحت احضر العشا اتصل بي ابوه وأسمعه يحجي وياه بالإيراني وابو يصيح عليه.   اوووو اخاف هذا يحب وحده واهله جابري علي
حضرت العشا صحتله اجه تعشينا راح للغرفه بقيت ارتب المطبخ رجعت شفته كاعد ينتظرني ويباوع علي بحقد
اجه تقربلي وبدا يضرب لحد ما كمل وراها ضربني بدون سبب راشديات ومشع شعري وكفخ ضميت العلامه كلت مادام ضربني اخاف يريد يتهمني بشي بعد ما شبعني ضرب راح نام بقيت ابجي اكو زويه بالهول رحت بيهه وتذكرت طفولتي وأهلي كلت البنات يتزوجن يتدللن بيوم عرسهن اشو هذا بدون ذنب ضربني
يوم الثاني كعد الصبح لكأني نايمه عالارض غطاني صحيت
مروه صباح الخير
فاضل صباح النور
مروه اشبيك البارحه ممكن اعرف السبب الى خلاك تضربني اشو انت تاكدت اني بنت بنوت ليش ضربتني
اريد افهمج اني رجل هنا بالبيت وانت امرأة جبتج لخدمتي
ومنو كلك اني متمرده ومخادمتك هو اني تعلمت من امي كانت تحترم ابوي والزوجه لازم تطيع زوجهه  وانت أوامرك بالبيت ماشيه بس بدون ضرب وأهانه
مروه اني بالليل قررت ارجع لبيت اهلي لكن قريت وصيه  النبي (ص) للأمام علي ليله الزفاف
اني حبيت زوجي مثل كل بنت وأخذت طبع الوالده وعلاقتهه بوالدي كنت اشوف الحب والاحترام بينهم وكل مشكله تصير ماتحجي هي تحلهه وابوي فاهم ويحترم امي
حاولت أتقبل فاضل على وظعه واكول يمكن أتعود عليه
ما ردت افشل حياتي من اول ليله
مرت الايام وفاضل مايتقربلي يبتعد عني شهرين ثلاث
حاولت اعرف السبب ما فهمت لا اني بي خلل شكلي نظافتي
واني كأي زوجه اشتاق لزوجي لكن هو بعيد عني صحيح عايشين سويه نفس البيت لكن هو بعيد احاول البس ملابس مغريه اتعطر احاول بكل الطرق اجذبه لكن هو مو يمه الموضوع
للحكايه بقيه.  بقلم فردوس عبد اللطيف.  F
ترقبو الجزء القادم بي مفاجأة تعرفون سبب ابتعاد فاضل عن زوجته