سرقتي قلبي

البارت 30 الأخير

#سرقتي_قلبي
للكاتبة ميار الشمري
الجزء 30 والاخير
#قصص_عراقية_حقيقية
زهور ،،،حبست نفسي بالغرفة لان من بعد ماانجلط ابوية وانسجن اخوية من تحت راسي اهلي انكلب بيتهم كلب وجانو كل ميشوفوني يتفلون بوجهي من سمعت بالشيخ تسمم من تحت راسي اتخبلت وظليت الوم بنفسي واعض اصابيعي ندم
كنت اريد احصل عليه بأي طريقة حتى وان كان بالحرام تالي جنت اموت بي واني مااعرف والمصيبة اقتل بي وبفلوسة هم
كمت مكدر انام من كد الكوابيس الي تجيني اكعد اصرخ نوب اشوف عبير تخنك بية ونوب اشوف ام وزان تعذب بفيصل ونوب اشوف فيصل ميت ويكولي ابني يتمتي قبل ليجي للدنيا واكعد مثل المخبلة وتأنيب الضمير دمرني وعذب حالي
وبعد مكدر اصلي واحس نفسي مربطة اثناء الصلاة ومن اوكف على السجادة انسى كلشي لا ذكر ولا دعاء ولا حتى الايات عبالك رب العالمين طردني من رحمتة وبعد حتى توبة ميقبل مني
كمت اكعد بالزاوية وبس ابجي واشوف واتخيل اشياء مو حلوة وعبالك ضرب عقلي
الحجية ،،،جنة كل شوي نتصل بيهم لأول مرة بحياتي اتحسر واتمنى رجلي تشيلني واكدر اوصلك وليدي فيصل واحضنك كون بية ولا بيك
دائما جنت اباوع لفيصل واحسة ابن آخرة اظل الليل كلة اصلي وادعي كون ربي يفرح كلبي ويسلمة من كل شر وابجي ندم انه فرضت عليه زهور فرض وهي الي وصلتة للي هو بي
وغمضت عيني دقائق واني على سجادتي شفت الشيخ ابو فيصل يهمسلي انه مكدرت احافظ على فيصل ولا كدرت اخلي ينسعد جان لابس كلة ابيض وكلي راح اكعدة اخذة وياي جنت اتوسلة يتركة عزوة وذخر الي ولخيتة
وجان يحاول يفيق بفيصل حتى ياخذة ويا فزيت اصرخ وابجي
فرات ،،،اسم الله عليج يمة كابوس هذا صلي على النبي وابجي واكول بكلبي اوف يمة شلون اصبر بيج قلب والدة وابنج بين الحياة والموت جانت صورتة وهو يتألم ويكلي فرات معدتي تكطعني متروح من بالي جنت اول مرة اشوف فيصل ضعيف ويتألم ومكسور سودة علية خوية كون يومي قبل يومك

عبير ،،،جان تحت المراقبة فيصل وكل ساعة يدخلولة يشوفون حالتة
عبير،، ابجي ووكفت الدكتور الله يخليك دكتور اكو امل يعيش
الدكتور ،،،بنتي الاعمار بيد الله حسب حالتة الصحية ومقاومة جسمة للسم احنة سوينا الي علينا وبقت عند رب العالمين
عبير،،،فدوة دكتور بس اشوفة من بعيد
الدكتور ،،،والله مااعرف شأكولج همس للممرضة دخلوها للعناية من بعيد بس ثواني
عبير،،،دخلت وشفت فيصل تحت الاجهزة وشكلة يكطع بالكلب تمنيت لو اكدر المسة لو حتى بس المس ايدة اخاف تكون اخر لمسة بحياتي بس طلعوني حضنت امي وبجيت وبعدين اتجيت على الحايط مرت كل صوري ومواقفي ويا وامسح بدمعي تذكرت اول مرة شفتة وشلون تهنة بالصحراء وشلون تعلقت بي اتذكر ضحكتة دمعتة عصبيتة عطرة حنانة اوووف فيصل حبيبي قاوم لخاطري ولخاطر ابنك وامك الي الله يستر شنو راح يصيرلها اذا صار بيك شي
كون من عمري على عمرك ياروحي من هالدنيا
ظليت الليل كلة اقرأ قرآن وادعيلة وايدي على بطني
ربي كون مينحرم الي بطني من شوفة اب ماكو منة بالدنيا
وفجأة شفت الدكتور ومعاه ممرضين دخلولة مغصتني بطني ووكفت ولزمتني امي من كتفي تبسمرت بمكاني وحسيت رجلي بعد متحملني امي تقدمت ورادت تسأل
ام عبير اباوع ع عبير ايدها ع بطنها والايد الثانية حاضنة المصحف همست عيني المريض الجوة خوما بي شي
الممرضة ،،،اعتقد فاق خالة ودخل الدكتور يفحص حالتة ويسويلة اللازم
عبير،،،كعدت بالارض ودموعي على خدي لله الحمد من قبل ومن بعد ربي رحمتك انت ارحم الراحمين
ام عبير حضنتها راح شرة يمة ان شاء الله مابي الا العافية
عبير،،،طلع الدكتور وكال ماشاء الله عليه عندة مقاومة وجسمة نشط وكدر يتجاوز مرحلة الخطر بس بعد مااستقرت حالتة منا الباجر نتابع حالتة واذا استقرت يطلع من العناية وتكدرون تواجهوا
عبير،،،اضحك ودمعي يصب الف الحمدلله والشكر ياربي
خابرت على فرات وطمنتها عليه حتى ترتاح الحجية وميظل بالها
كالتلي امي لازم تنامين شوي حتى ترتاحين انتي حامل ماطولج اطمنتي عليه كتلها ماما روحي للبيت اني راحتي هنا مكدر افاركة بتت بالمستشفى
وثاني يوم ظلت حالتة مستقرة والمغرب طلعوه من العناية بغرفة بوحدة جانوا ولد عمة ميبقون دائما لان جانوا يراجعون عمة الي بنفس المستشفى المجلوط
فيصل،،،حسيت نفسي بغير عالم وكعدت فتحت عيوني وجنت بصعوبة اكدر افتحها شفت نفسي تحت الاجهزة ومشكلة بية كومة وايرات واجهزة حسيت طلعت من الموت اول مطلعوني من الغرفة جانت دنيا الفجر بال6 ونص واول واحد قابلتة هو ابن عمي اخو زهور وصديقي الروح بروح حضني وبجة واعتذر مني جنت مافاهم شي حجالي كلشي وكلي عمي بسبب زهور والي صار بية انجلط وزهور اتخبلت وقافلين عليها الغرفة لان بعد متدري بنفسها وام وزان لازميها الشرطة واعترفت انه اكو مجموعة نطوها فلوس ودسوها حتى تعلم زهور وتنطيها سم تموتني ولان جاهلة كدروا يضحكون عليها وحسوها فرصة ذهبية اجتي الى يمهم وحجالي انه جانت تسرق مني فلوس حتى تنطيهم
فيصل،بالرغم اذتني زهور ودمرت نفسها وعائلتها بس انقهرت عليها لان شكد ماجانت تحبني ضيعت دنيتها واخرتها
فيصل،،،،اختنكت وبجيت حضني اخوها وبجينا على الي صار بينة
وظل عندي الى ان كعدت عبير واجتي ملهوفة استأذن ابن عمي وطلع
عبير،،،بوستة من راسه وكتفة وايدة الحمدلله على سلامتك ياروح الروح والله مامصدكة ارجع اشوفك من جديد
فيصل،،،نزلت دمعتي على خدي
عبير،،،اول مرة اشوف دمعتة مسحتها
فيصل،،،لو وحدة غيرج من بعد ماخونتها متباوع بوجهي عبير مااعرف شأكولج
عبير،،،خليت ايدي على شفتة اشششش لتحجي كلشي الفات مات فيصل الي صار ويانة لعبة جبيرة اكبر من عدنا وهسة مااريد الا ترتاح ومتفكر بشي عندي كومتك بالسلامة تسوة الدنيا والبيها
مرت الايام وطلع فيصل من المستشفى وذبحولة اهلة وعشيرتة وسولة عزيمة جبيرة لسلامتة
عبير،،،طلبت من فيصل انه نسكن بالمدينة لانه حياتة بخطر بالقرية ووالدتة ايدت هذا الشي لان خافت عليه كلش وفعلا اشترينة بيت بالمدينة بس ظل فيصل بالاسبوع مرة يراجع القرية والمضيف ويطلع على امورهم وشجعتة يقدم على الانتخابات لان احنة بحاجة لهيج نماذج تترك بصمة طيبة وتنهض بجيل جديد
مرت الايام وقربت والدتي وولدت بليث سماه فيصل وكبر بأذنة فيصل وهمس عبورة شو اسمر يمكن جانت ليلة الي صار بيها الدنيا ضلمة وحركناه ضحكنا والفرحة ماوسعتنا والحمدلله

انتهت قصتنا وياكم لكن ماانتهى مشواري انتظروني بقصص جديدة وممتعة وبحكايا وخفايا واقعنا
الي نستخلصه من قصتنا انه الحب من يجي منعرف هذا شنو ومنوين بيئتة وشنو عيبة والي يحب ممكن يتنازل عن امور كثيرة حتى يحافظ على حبة لان مو كل يوم ممكن نلكة الحب ولا كل يوم ممكن نلكة شريك مناسب يفهمك يقدرك يخلي حياتك جنة
وانه الحب من طرف واحد موت بطيء ديري بالج تتعلقين وتتأملين بشخص هو يعتبرج اخت الة وميكن الج اي مشاعر ودكولين ورة ازواج ممكن يحبني غلط حبي قد يحبج حب عشرة الي ينشأ بمرور الايام ونتيجة الروتين والاولاد لكن ايضا قد ميحبج وتكون حالتج مأساوية كحالة زهور دائما خلي كرامتج بالمقدمة ولتتنازلين بأسم الحب
وحذاري حذاري من الاعيب السحر والشعوذة كذب المنجمون ولو صدقوا والعياذ بالله الساحر ملعون في الدنيا والاخرة ومطرود من رحمة رب العالمين
لكن حبيبتي وان كان ولابد اكو السحر الحلال الي تلتجأئين بي لله عز وجل وعلى سجادتك والي توجهوا بي عبير وام فيصل ورب العالمين خلص فيصل من الموت واحياه بسبب سحر دعائهم وتعبدهم بعز ازماتهم
اسأل المولى عز وجل ان يسعدكم ولا يقهركم ويبعد عنكم كل شر
اسألكم الدعاء احبكم فى الله

ميار الشمري