Nagsimula ang lahat sa isang tingin
Nakatitig sa isang kabigha-bighaning pigurin
Detalyado
Perpekto
Unang beses pa lang kita nakita
Hindi na matahimik ang kaluluwa
Tulala sa umaga
Gising sa magdamag
Nabibighani sa ganda
Sa malayo ay nagmamatyag
Hindi ko lubusang maisip
Na dadating ang araw na ika'y mapapasakin
Laging sa direksyon mo nakasilip
Di mapigilan ang sigaw ng damdamin
Madami ng nakaaway
Lahat ng lait ay tinanggap
Mga problema ay nagkasabay sabay
Para lamang makuha ang piguring pinapangarap
Sa isang kwarto
Nagmamatyag sa malayo
Humahanap ng tiempo
Isa dalawa tatlo
Ilang beses tumakbo
Ilang beses hinabol
Pawis at dugo
Isang iyak ng sanggol
Ngayon na nasa akin ka na
Hindi ka na muli makakawala
Nagsimula sa isang tingin
Nagsimula sa isang sigaw
Ang piguring nakalawlaw
Ang pinapangarap
Nakuha sa isang kurap
Sigaw ng pagmamakaawa
Isang piguring walang kawala
Lumipas ang matagal na panahon
Ng makita ka sa tabi ng balon
Panibagong istorya
Panibagong pigurin
Pinapangako ko na ikaw rin ay mapapasakin
Nagsimula sa isang tingin
Nagsimula sa isang sigaw
Natapos sa isang kurap
Ang aking panibagong pigurin
