Möcüzədən Uzaqda

2. Qızlar :ölümcül dava

5 dekabr 2017

Səmimiyyət nədir ?

Niyə bəziləri səmimiyyəti deyib gülmək , bütün sirlərini kiməsə açmaq kimi başa düşür ? Səmimiyyət necəsənsə özünü elə o cür də göstərmək deyilmi ?

Məsələn , mən Ruslanla səmimiyəm . Çünki ondan zəhləm getdiyi halda üzünə gülmürəm .

Amma sinif rəhbərim ilə davranışlarımda  səmimi deyiləm . O kişini  heç sevmirəm . Ondan bəzi asılılıqlarım var deyə  hörmətlə davranmağa məcbur oluram .

Səmimiyyət haqqında yazmağıma bir səbəb var . Bu səbəbin adı Leyladır . Hətta bu gecə  gündəliyə növbəti yazımı yazmağıma da səbəb odur .

***

İbrahimin verdiyi fotokameranı çox sevmişdim . Ad günüm cümə gününə düşdüyündən sahib olduğum hədiyyə haqqında dostlarıma üz-üzə deyil , dörd nəfərlik whatsapp qrupumuzda məlumat  verməli olmuşdum  . Əsasən o qrupda müəllimlərin , zəhləmiz gedən şagirdlərin və dərs mövzularımızın müzakirəsini aparırıq . 

Fizzə həmişə online olan , bütün yazılanlara cavab yazan tiplərdəndir , Səlim isə whatsapp-a gec-gec girir . Gərək ona ünvanlamaq istədiyin şeyi qrupa deyil , şəxsən özünə yazasan . O saat cavab verəcək . Əsəd isə Allahın vurduğu bəndədir . Marağını cəkməyən mövzuları iki göy xətt edib cavab yazmır . Səbəbini soruşanda da gah deyir dərs oxuyurdum , gah da deyir hazırlıqdaydım .

Nəisə . Artıq bir kameram olduğuna görə sərgidə iştirak edə biləcəyimi qrupa yazanda bu mövzu hər üçünü də sevindirdi .

İbrahim haqqında məlumat verdiyim zaman Fizzə inbox-uma yazdı ... Nə imiş ? Bu cür adamlara güvənmək olmaz imiş . Fizzəyə görə ,  İbrahim məni məlum məqsədlərinə alət etmək istəyə bilərmiş . Ona görə hədiyyə ilə başımı qatırmış .

Nə deyim ? Fizzənin yazdıqlarına xeyli güldüm . Mənim kimi çoxbilmişi kim aldada bilər axı ?Ən xırda hərəkətdən hər şeyi anlayıram . Həmçinin kişi cinsində hələ ki , məni cəlb edən heç nə olmadığı üçün  hədiyyələrlə tora düşməyim mümkün deyil .
Əlbəttə Fizzənin düşündüyü tip adamlar yer üzərində doludur . İbrahimin elə insan ola biləcəyini düşünmürəm . Olsa belə bunun üçün nə şansı , nə də cəsarəti olmayacaq .

Səlim İbrahim haqqında qrupa yalnızca bir cümlə yazdı : " Suyun lal axanı , adamın yerə baxanı ."

Əsəd isə ya öz dünyagörüşünü göstərmək üçün , ya da həqiqətən mənə görə narahat olduğu üçün bir şey soruşdu : " Pedofillər  haqqında eşitmisənmi , Möcüzə ?"

Bir sözlə , hər üçü də eyni düşüncəni bölüşdülər. Əziz gündəlik,gəl sənə Möcüzəyə məxsus bir tərif deyim :" Sevincinizi qursağınızda qoyan varlığa dost deyilir ."

***

Həmin həftənin sonu kursa getməkçün ayaqqabılarımı geyinirdim ki , atamın İbrahimin həyətindən bizim həyətə keçdiyini gördüm .  Divarın arxasından İbrahimin mənə baxdığını gördüm . Donuq üz ifadəsiylə baxdığı saniyələrdən sonra evinə girdi .

Atam qarşımda dayandı . Ayaqqabımın ipini bağlayıb ayağa qalxdım .

- Kursa ? -soruşdu .

- Hə .

- Yaxşı . Get . - önümdən çəkildi .

Bir addım atıb dayandım .
Marağıma güc gələ bilmədiyimdən - İbrahimlə nə danışırdın ki ? - soruşdum .