شكو بيها لو انام واكعد واشوف كل هذا حلم
وحلم مزعج كل ليلة اكول يله هسه راح انام وراح اكعد واشوف نفسي بيتنا بغرفتي الي لونها كلها وردي الي تعاركت ويااهلي وظليت يومين مااقبل اكل علمود يصبغوها وردي
ويشترولي بردات لونها وردي ارجع لقبل سنتين من جنت ادلل
ومااقبل اكل هذا وهذا وما البس هذا وميعجبني فلان شي
وماااحجي ويا فلان شخص ارجع نفسها خيال الي لمن جان بابا يباوع بوجهي يكلي انتي شكلج مثل اسمج
جنت اضحك وكله شتقصد بابا يكلي يعني انتي حلوة
بطريقه خياليه اضحك اكله هاي لان بنتك تشوفني هيج حلوة
واذكر هم من جان يوصيني على مصطفي دائما
ويكلي شدن احميها من نفسها احميها من الكل
ردت ارجع لحظات ليورة يرجع بيه الزمن شويه شكوبيها
بس شويه ارجع للحنيه ولطيبت قلب امي
ولمن جانت تهددنا باابونه ودكول بس يجي اخلي يضربكم
ولمن يجي مدكله حتى ليعاقبنه ارجع لوكت جنت صغيرة
ويجي ابويه للبيت وجايبنا اكل وجايب مسواك وجايب
ايدن ههههه جنا نسوي جكارة ونضحك
اني عمري 16سنه بس احس نفسي كبرت هوايه
بطلت ادلع وادلل وبطلت اكول لا على كلشي بطلت
اعاند لان محد راح يفهمني من راح ارفض شي او من
راح اعاند او من راح اكول لا محد راح يحاول يرضيني اذا
زعلت واذا بجيت محد راح يمسح دمعتي تعلمت هسه
امسح دمعتي بيدي واعالج جرحي بيدي
تعلمت انهان وانضرب واسكت تعلمت هوايه شغلات
صار سنتين
على فراكهم راحو وعافولي مسؤوليه جبيرة اخوان اثنان
فجأة حسيت انو اني اخذت مكان ابويه وامي
حتى من جنت انام جنت دائما احلم بصوت والدي
يوصيني على اخوتي
انا لازم احميهم ولازم اظل محافظة عليهم بس مداكدر
اسوي شي شلون احميهم واني مااعرف احمي نفسي وين راح اروح بيهم
وشلون راح اوكلهم واعيشهم
واشربهم شلون راح احميهم من برد الشته وحر الصيف
ظليت اروح واجي بالغرفه وعيوني طالع اخوتي
وظليت افكر وافكر وافكر لحد ماتعبت ومليت من التفكير الي
بدون نتيجه ورحت نمت وحسيت ويا طرت الفجر وكعدو اخوتي
ومصطفى كالعادة جان جوعان بس اني استحي اطلع اجيبله اكل
وظل يزن مصطفى علىً راسي يريد اكل واني اسكته
لحد مابعد ماتحمل كام يبجي المشكله هو طفل
مديفهمً انو اني مااكدر كلشي اسوي ومديفهمً انو احنا وضعنا
تغير مومثل قبل الي يريدة يصير
اخير شي تعبت منه وكمت طلعت من الغرفه ومجان اكو صوت يدل
على انو اكو احد كاعد بهذا الوكت وكمت ادور على المطبخ ولكيته واول مادخلت تفاجأت انو هذا الشخص الي دافعلي كاعد الميز بالمطبخ
وكدامه فنجان ماادري جاي كهوة بس اني اول مشفته طلعت من المطبخ ردت ارجع للغرفه بس سمعته يكلي
....تعاي
رجعت للمطبخ وجنت امشي برتباك ودخلت ورحت وكفت كدامه
.....تريدين شي
....صراحه اخويه الصغير كلش جوعان وديبجي
،....وليش مدتنطي اكل
سكتت
....مو مااريد ازعجكم
... ماكو ازعاج من جوعون اوكلو وياريت لوتخدمون نفسكم
بنفسكم لان مثل مدشوفين ماعدنا امراة بالبيت
....اي صحيح اشكرك
....صيحي اختج واخوج وكعدو هنا اكلوو اني راح اصعد انام لان منايم بالليل وكام طلع من المطبخ بس اني جنت خايفه وجنت مااباوع بوجه من يحجي جنت مابين خوف وتردد ومابين انو وضعنا احنا حرج هذا الرجال جابنا ودافع عنه ميصير نستغله
ورحت على كيفي صحت مصطفى وشدن
...يله تعالو داسويلكم اكل
مصطفى كام يكمز ضحكت على حركاته شكد بريئه و احلامه بسيطه مجرد ماكلتله اكل كام يكمز وفرح
وديتهم للمطبخ وفتحت الثلاجه وجان هوايه بيها اكل
وسويتلهم لااخوتي واكلو وشبعو وجانت اكو ابتسامه مرسومه على وجوهم صار هوايه مشايفتها
ورة ساعتين سمعت صوت طه
...صباح الخير خيال
....صباح الخير
....ها تريكتو
...اي من زمان
...ليش من شوكت كاعدين انتو
....وياطلوع الشمس
.....شعدكم من هيج وكت كاعدين
....موعمتي جانت دكعدنا هيج وكت فمتعلمين نام من وكت ونكعد من وكت
....اوكي
.....انت جوعان اسويلك ريوك
.....والله ياريت
...اي تدلل
....تسلمين
سويتله ريوك وبعد ماكمل ظل كاعد يسولف ويضحك
ويشاقه ويايه وياااخوتي
شكد جان انسان طيب ومحترم وكلش ارتاحيت لااسلوبه
ولكلامه
وبعد ما كضينا فترة طويله نسولف ترخص وكال
اروح إقرأ واني همين نظفت المطبخ وكمت دخلت اني واخوتي للغرفه وظلينه لحد الظهر كاعدين بالغرفه
صارلنه هوايه ماكدين هاي الكعدة لان عمتي اظل طلعنه شغل وتخلينا نوكف على رجلينا من نفتح عينه لحد منام
وماادري صارت ساعه بيش وسمعت صوت باب الغرفه تندك
كمت فتحتها شفت طه
....يله تعالو تغدو
....اي
....شدن مصطفى يله كومو دنتغدة
مطصفي كام يكول ...اي ويكمز
وطه يضحك على مصطفى وطلعنها ورحنا للمطبخ جان اكو اكل
مغلف مبين من مطعم بس بعدين شفت عم طه كاعد ومن شافني
اشرلي انو اكعد واني هم كعدت اخوتي وكعدت وبدينا ناكل
بدون كلام
وبعد متخلصو الاكل شلت الغراض وسويتلهم جاي
ويسمعت عم طه يكلي
.....انتي شنو اسمج
هو جان يحجي ويايه ومندار على الشباك
....اسمي خيال
اندار عليه وكام يردد الاسم
....خيال ....خيال
....اسمج غريب مو سماج خيال
...والدي الله يرحمه
......الله يرحمه
..... ليش سموج خيال
.....ماااعرف بس بابا جان يكلي اناي شكلج مثل اسمج
....اي صدك يحجي
وجان يباوع عليه ولمن رفعت عيني وباوعته
كلت بكلبي سبحان الي منطيك هالعيون الي متناقضه وياشكلك هو اسمر وطويل وخشمه طويل وعندة لحيه خفيفه بس عندة عيون
سبحان الخالق زركه بلون المي لون عيونه متناقضه ويابشرته وملامحه بس منطيته جمال من نوع اخر
وهيبه والا رهبه والنظرة بعيونه وبوجة
يرادلها عمر
......رد سئلني عندج اهل ام اقارب احد غير هاي عمتج
....لا
....انتو شلون متحمليها هاي مجنونه
.....شنسوي مجبورين وين نروح
.....احسج هوايه فاهمه واعيه شكد عمرج
....16سنه
.....معقوله انتي صغيرة
.....بس كبرت قبل وقتي
.....وهوايه كبرتي اظاهر دائما المأاسي تكبرنا وتخلينا اانكون اعقل وافهم في سبيل نفهم الحياة ونستوعب الي ديصير
بس اني حاير هسه وين راح اوديكم
....اني اكول نرجع لعمتي نستسمحها بلكي ترضا ونخلص
ماعدنا احد
ورفعت راسي للسما عدنا بس الله الي خلقنا يتولانه
.....خيال والله تموتنا وين تريدين ترجعينا يمها
....سكتي شدن ماعدنا مكان خوما اخذج انتي ومصطفى وافتر بيكم بالشوارع احنا محد يريدنا
جان صافن عليه من اني داحجي
......محد راح يظل بالشارع اني راح اشوفلكم مكان ومراح
ارجعكم يم هاي عمتكم المخبله
شدن ومصطفى كامو يضحكون وجان هو يبتسم على ابتسامتهم
بس اني جنت حاسه هذا الانسان راح يلعب دور جبير بحياتي
او راح يغير بحياتي يجوز هذا الامل الي جنت منتظرته
وسمعت طه يكلي
....لتهتمين عمي زيدون يحلها هو مدام انطه كلمه بعد خلص معناتها راح يحلها لتهتمين
....ان شاءالله
وكام يصيح طه وكله
......اني راح اطلع هسه ولمن ارجع عود اشوف شلون
ارتب الوضع
وندار عليه وكلي
.....شكد قياس حذائج انتي واخوتج
......ليش
.....شنو هالسؤال الغبي
.....ها اسفه
طه كال
.....عمو زيدون اني هسه اسئلهم واكتبه بورقه وانطي الك
علما تغير ملابسك
...طه
.....هاعمو
......لتلتهي وراك دراسه مااريد اذكرك تعرف انت ليش هنا
.....اي عمو اكيد لتهتم
ومشى من يمنا وصعد فوك وجنت اسمع صوت خطواته على الدرج
صدك هذا الانسان مربك وجودة يخلي كلبي يطكطك من الخوف
بس طه لاانسان حباب ومرح واسلوبه لطيف
وبعد شويه عم طه نزل ولمن نزل جوة جتي عليه شدن
ركض كلتلي
....لج خيال عندة مسدسً
....لج منو
....هذا ابو عيون الزرك
....قصدج عم طه
.....اي هو
....شمدريج
.....هسه شفته نزل مجان لابس سترة وجان المسدس مالته
بالحزام اكلج خايف يموتنا اشو يخوف هذا
....هههههه لا يجوز هو عندة مسدس هذا الرجال ساعدنا
بس صدك شدن هذا نفسه الي مرة صيح عليج علمود الطوبه
.....ماادري ماااذكر
....يله بس اكلج لدكولين لمصطفى شي هذا صغير يكعد يحجي شي خاف عيب من الناس ساعدونا
وسمعنه صوت الباب وشدن ركضت على الشباك تباوع
.....خيال شوفي طلع باعي عندة سيارة وهناك هم اكو وحدة
باعي
.....اي شفت
....ها شدتشوفون
....ها طه اجيت عبالي رحت ويا عمك لان طلعت وياة
.....لا جنت داحجي وياة شدتشوفون
....عمك ديطلع شدن شافته
....اي طلع
وطه جان يباوع على عمه بنظرات اعجاب واحترام وكلي
تعرفين خيال اني كلش احب عمي زيدون احب قوته وسباعيته ميخاف من شي لهذا السبب احب هوايه اكون وياه
....اي صدك شدن شافت عندة مسدس وجاي كالت خاف يموتنا ههههه
....هههههه لا يمعودة بس هو من زمان يشيل مسدس وبالذات من يكون هنا تعرفين مكان مابي هالكد ناس يعني يشيله للحمايه
...اي اني كلت لشدن بس هاي مخبله متلام بيها عمتي
ههههه
....هوايه تختلف عنج طفوليه بس انتي واعيه
....اني دورات احسهم جهالي ههههه
شسوي ماعدهم غيري يعني يس اني الي اكدر احميهم تخيل لو اتخلى عنهم شيصير بيهم فكمت احاول استوعب الامور بشكل
اكبر من فهمي ومن عمري
....اي صحيح والله عفيه عليج سباعيه
...اشكرك واشكر مساعدتكم النا
....لاتسكرينا هذا واجبنا اني هسه راح اروح اقرأ
وانتو عادي اتصرفو بطبيعتكم زين
....ان شاءالله روحي الله يوفقك
....الله يسلمج
وشفت طه صعد فوك واحنا بقينا جوة نفتر ماعدنا شي
وكمت افكر بعمتي شعجب مو وصلت هنا وجتي علينا معقوله هيج خافت من عم طه
ولو هو يخوف من صدك والبارحه للحظه حسيته راح يضرب عمتي بس كمش نفسه وماضربها
وباوعت داير مدايري
وكلت لنفسي صارلي يومين كاعدة مرتاحه واباوع
مصطفى وشدن فرحانين ومرتاحين احس نفسي كلش سعيدة
ولو سعادة مؤقته بس ميخالف عيشني اليوم وموتني باجر
وظليتا نفتر منا ومنا وماشفت بعد طه
لحد ما سمعت صوت سيارة
وشويه ونفتحت الباب
ودخل عم طه وشايل بيدة غراض لمن شافني
صاحني كلي
....تعاي خيال هاي ملابس جبتها الكم
.....شكرا
...خيال ،،،،
...نعم
....لا بس كلش عجبني اسمج وحبيت اردده ان شاءالله اذا فديوم
من الايام صار عندي بنيه اسميها خيال مثلج
يتبع .....
#الكاتبه #روجمان
