تلث سنوات عشت بخيالي ويا زيدون برغم بعدة عني وغيابه بس جان دائما حاضر دائما احس بوجودة
زيدون من اخر مرة حجه ويايه طلع من البيت كالعادة واختفى وظلينا ندور عليه
ومابقى مكان مادورنا عليه
ناس كالو مسجون وناس كالو نقتل واهله وخالته مابقو مكان مادورت عليه بس ماعرفو عنه شي
اما اني
كمت يوميه ابجي لحد ماااتعب وانام واني دمعتي على
خدي
بس جان عندي امل انو زيدون عايش احساس بداخلي يوم عن يوم يزيد انو لا مستحيل زيدون
يكون ميت دائما اكول لا زيدون عايش وبمكان ما
مارضيت اقنع نفسي بهذا الشي الكل فقدو الامل وكالو
هذا نهايته طريقه
بس اني كلت لا مستحيل
هو عايش مدام بعدة عايش بيه معناته عايش
قبل تلث سنوات جنت ابجي لان انضرب واتوجع
وانجرح جنت اتصور هذا اقسى انواع الوجع
بس هسه لا عرفت انو الوجع مو بالجسد الوجع
بالكلب
واني كلبي ينزف اني وعيت وكمت اعرف مشاعري اكثر
كمت احس هسه ليش جان زيدون من يحجي ويايه يحترك
مثل الشمعه وجع زيدون بصفحه وحياتي الي مرتاحيت بيها بصفحه
بيوم الي حجه ويايه زيدون
وقبل ماااريح كلبه واكله كلمه وحدة عافني وراح
ديلبي النداء الي بداخله راح ديدافع عن وطنه الي اصلا هو مبيوع بيه القضيه
ديدافع عن مبدأ واحنا بزمن اصلا فقدنا المبادئ
راح وغاب والكل كالو مات
وماعرفنا عنا شي و بهاي الفترة بيبي تمرضت وكامت تتعب هوايه وقهرها على زيدون هد حيلها
وبعد مدة ابنها الجبير طلع من بيته لان هو كان مأاجر بيت واجى كعد يم امه بحجت انو هو حاليا ماعندة فلوس ياااجر بيت بس هما كانو يعرفون انو هي كبرت
فكالو اول وتالي تموت وناخذ البيت ليش ندفع فلوس
بس اني كنت الضحيه من كل هذا زوجت ابنها دمرتني
وكل شويه جانت طردني وتسويلي مشاكل ودكول بااي حق هي باقيه بالبيت هي واخوتها
بس بيبي جانت متقبل ودكول اذا يطلعون من البيت اني هم
اطلع وياهم
وتقريبا بعد غياب زيدون سنتين شدن اجه ولد تفدم لخطبتها
ولد جدا محترم وفقير وجان ماعندة احد امه متوفيه وابو ايضا وحالته الماديه اعتياديه
صراحه اني قنعت شدن انو تزوج ردت اخفف من الحمل
الي عليه ردت اشوفها مستقرة لان اني ومصطفى اذا ماتت
بيبي ننشمر بالشارع لونرجع لعمتي
لان صعب يتحملنا احد
وزوجت شدن وصارلها فترة و الحمدلله عايشه مرتاحه
اروحلها بس قليل وهي دورات تجي
بس زوجته محمد ابن بيبي كلش مو خوش انسانه
وجانت تغار على رجلها مني
واني كمت ادخل للغرفه مااطلع منها كلش قليل
ومصطفى دخل مدرسه وهالسنه صار ثاني ابتدائي
راحت عليه سنه بس ميخالف المهم هسه هو بالمدرسه
يوميه ابدله الصبح واودي
وارجع اخذة واكعد اقري عشت دور الام وياه
وكنت احاول اسويله كلشي يطلع بيدي
بس يوم عن يوم بيبي بدت تتمرض اكثر وبدت زوجتة ابنها تضغط عليه اكثر لحد ماطردتني
من البيت اني ومصطفى وشمرت غراضنا بالشارع
ورحت يم شدن بس حسيت نفسي كلش ثكيله
وظليت مايقارب الشهرين يم شدن
ومرة اجى ابن خالته لزوج شدن وشافني وخطبني
واني اضطريت اوافق ولكن بشرط يبقى مصطفى يمي
وهو قبل الشرط
لان هو كان مزوج ومنفصل عن زوجته
ماجنت احبه او حتى اتقبله بس جنت مجبورة
وين اروح منو يتحملنا هاي البنيه الي ماعدها اهل ومجرد نخطبت يعني كلام ماكان اكو شي جدي برغم شكد خطبوني سابقا بس جنت ارفض بس هسه فاض بيه
بعد وتعبت
جنت اكول وينك يابابا تجي تشوف حالنا من بعد ماراحت تعال شوف شلون
ظلت الدنيا تخبط بينا وظلينا حايرين بدنيانا واحنا مومومال حيرة اويلي على الظلم الي شفنا
بحياتنا صار خمس سنين عيوني مابطلت دمعها وكلبي مابطل حزنه
وارد واكول
وينك يازيدون وين رحت ليش مارجعت
وجنت احس نفسي خجلانه من زيدون وجنت اكله
سامحني مجبورة ازوج مجبورة انزف لغيرك
سامحني
جنت احجي ويا روحي مثل المخبله
جنت ابحث عن شي بدااخلي جنت اريد شي يخليني اصبر على وجعي
واليوم الظهر
ندكت باب بيت شدن
وركض مصطفى يفتحها بس مصطفى تاخر
ورحت عليه وشفت
حلم مانسيته شفت ضوء بنص صحراء ظلمه
شفت زيدون كاعد يحجي ويا مصطفى ومدنك عليه
اول ماشفته
كتله
..زيدون
رفع راسه بسرعه ونظرات الهفه بعيونه
رحت يمه بسرعه وسمعت صوت شدن
دكله
،...حمدلله على السلامه الحمدلله انت عايش
وهو ميحجي بس يباوع عليه
...كتله
....ليش هلكد رحت
اتقرب من يم اذاني كلي
.... خليني اشوفج زين خليني احسج بلا
صوت
وابتعد ورجع وكف كدامي
وشدن جانت تباوع وعلى وجهه ابتسامه
مقبل يدخل جوة لان زوج شدن ماموجود
وخاف يسبب مشكله مع العلم زوج شدن يعرف بزيدون
انوهو الي ساعدنا
شدن جابتله كرسي وخلته بالكراج وهو كعد عليه وبدة
يسئلنا وشلون عايشين وشدنسوي
وجان يتفحصني بنظراته
وبعد مايقارب ربع ساعه اجى زوج شدن
وعرفنا عليه وطلب من زيدون انو يتفضل
لداخل البيت وزيدون وافق
وبعد مادار كلام بينا
كلي زيدون
.....انتي ومصطفي راح تجون ويايه
زوج شدن
كله ميصير خيال تروح وياك هي هسه بحكم المخطوبه تبقى هنا لحد متزوج
دار وجه عليه
واني نزلت راسي وماكدرت احجي شي
وماكدرت اخلي عيني بعينه خجلت منه
كلي
...خيال ممكن احجي وياج
وكام وكف وطلع
واني كمت طلعت ورا و راح للكراج وجان مندار على الباب
واني جنت بظهره
جان داير وجه عني
لان اكيد اكو الم بعينه ميريدني اشوفه
تمعنت بي جان اضعف من قبل بس جان حلو
يمكن صاير احلى من قبل وبرغم جان ميت سؤال اريد اسئله عنه وهو وين جان وشصار بي وليش راح كل هالمدة
بس ماكدرت لان داحس اكو بركان بداخله
جان ديشعل جكارته
عرف اني واكفه ورا كلي
....راح تزوجين
....مجاوبت
....جاوبي راح تزوجين
...اي
...منو
.....ابن خالت احمد زوج شدن
....تحبي
هم سكتت وماكدرت اجاوب
....جاوبي عد تحبي لولا احجي
...لا
ندار عليه
..لعد مراح تزوجي
....شلون
....بدون شلون
...هزيت راسي يعني اي
.....كوليها اذا ذكريها
عرفت شيقصد اخر مرة حجى بيها ويايه كلي كولي احبك بس اني جنت مترددة من انو اكولها ولمن ردت اكولها
ماقبل كلي لتحجين شي متحسي
...خيال
....نعم
.....اني بعدني احبج وكل الي مريت بي مخلاني انساج
ولا دقيقه دائما جنتي بكلبي
بس ياترى اني جنت بكلبج فكرتي بيه جنتي اذكريني
لو من غبت نسيتيني
...لا مانسيتك وشلون انساك
جنت اريدك تجي تشوف من رحت شلون تبهذلنا وشصار بينا
....وعيونج لاااخذ حقج من كلمن اذاج بكلمه
..الحمدلله انت رجعت
....اني راح اروح واجي بالليل اخذج
..شلون يصير
....يصير كلشي يصير
....بس
...بدون بس
....مااريد اسوي لشدن مشكله ويازوجها
...خيال مبين زوج شدن لايحل ولايربط وهي اختج مسيطرة عليه يباوع على حلكها من تحجي
....ههههه لا بس خوش ولد
...اي امنا بالله خوش ولد وحباب بس موهيج
يله احسن
....وين جنت كل هاي المدة
..اوووو قصه طويله بعدين احجيلج عليها
....خفت لايكون صار بيك شي
....لتخافين الاعمار بيد الله
...ونعم بالله بس الكل جانو فاقدين الامل برجوعك لان اكو ناس كالول ميت اسم الله عليك وناس كالو مسجون يم الامريكان بس اني مافقدت الامل برجوعك جنت احسك موجود ومارضيت اقنع بغايبك
.... اعرف بس مجان بيدي ابتعد وبعدين اسولفلجً شنو الي صار ويايه بس هسه اريد اروح بس اريد اسئلج سؤال
بيت خالتي ليش عفتي اعرف ابن خالتي هناك طرودج هما
،.......صراحه اي طردوني والحقيقه مو ابن خالتك زوجته
كلش ضوج مني بدون سبب
واني كلبي مثل النار على بيبي
.....اني احلها
....زيدون
....نعم
....بعد ماكو امريكان المن تقاتل
....ماااقاتل بعد خلص
....صدك تحجي يعني بعد ماكو قلق وخوف
....لا ماكو بس بقت امور متعلقه واني خايف منها
....شنو
...لدوخين هذا الراس الحلو بااافكار
.....كلي وين جنت
....اكلج بس يرادنا كعدة طويله
....ليش داحس بيك شي متغير
.... لتفكرين حتى بهذا الشي
....شنوه
.....انو اني متغير عليج اني جنت احسب الدقايق والثواني
والساعات والايام حتى ارجعلج بس مامستوعب انو
اني لو مطول بعد شويه جان رجعت شفتج مزوجه كلش ضجت وحسيت هذا الشي كسر فرحتي
....جان سويت لو شايفني مزوجه
.....جان قاتلت هههه
....صدك
.....اكيد الي يقاتل علمود وطنه مايقاتل علمود وحدة
يحبها
بس ياخيال اني هوايه تاذيت ونفسيتي تعبت بهاي الفترة الي
غبت بيها
....بس داحسك مو ذاك زيدون
....اني نفسي بس انتي الي متغيرتي بعدج باردة
انتي محبيتيني يجوز شفتيني كدامج وشفتي واحد
يحبج بس محبيتيني انتي موصحيح
،،،.
انصدمت بكلام زيدون هو يشوف انو اني مااحبه معقوله هو ديشوفني باردة وماعندي مشاعر لهل الدرجه
بس اني احبه اني اشوف الدنيا كلها بي
......ها وين صفنتي
...وياك
...استغفرالله اني تعبان والي بيه مكفيني وانتي وسكت
عالعموم راح اروح وبالليل اجي
....انتظرك
......مع السلامه
....مع السلامه زيدون
وطلع زيدون وراح ولمن غلقت الباب بعدة حسيت بفراغ
وبرد حسيته مختلف او يجوز اني الي مافهمته
((((عاد ذاك الغائب من بعد رحله طويله عاد
وكانت نظراته مختلفه عاد وكان يبتسم بحزن
عاد الى قلبي معا انه لم يخرج من قلبي ابدايتهمني بالبرود وانا احبه
ولكني انا بالحب خجولة))
يتبع ...
#الكاتبه #روجمان
