خياااااال

الجزء الثالث

.....ان شاءالله يصير عندك
بس اني استغربت من كلي هيج واني عندي حركه اسويها من    انو اي شي ميصرفلي او مااتقلبه ‏ ارفع حواجبي وانزلها عالسريع بدون ماااحجي وجانت ماما تعرفني من اسوي هاي الحركه  وجانت تضحك و دكلي مثلج حركات ابوج بالضبط
بس اظاهر هو انتبه عليه فشفته ابتسم ابتسامه يادوب تبين
.....شوفي راح انصحج نصيحه واذكريني بيها ‏
انتي هسه كبرتي وراح تواجهين هوايه اشخاص ممكن يكلولج انتي حلوة او يمدحوج هوايه بس مو كل الي يكلج انتي حلوة معناته عندة فد غايه صحيح الدنيا صايرة غابه واكو هوايه ناس صايرة ذيابه بس مومعناتها الكل يطمعون بيج ويريدون منج شي
اكو يكلج حلوة لان هاي حقيقه لانج فعلا حلوة والي. راح يكلج
حلوة و يجوز هو بحد ذاته انسان  صريح وحب يعبر عن رائيه ‏ ‏بصراحه
او اكو شخص حب يجاملج
وانتي من راح تكبرين اكثر راح تفهمين انو كل رجال يباوعلج
من  نظراته  راح تعرفين شيريد ونظراته شتعني وشيريد منج وشنو غايته
ويبقى كلشي بيدج ويبقى ‏و انتي شلون تحافظين على نفسج
وتكونين ام واب لنفسج وتكونين ايضا قدوة لااختج واخوج
لان هما يشوفون بيج ام
افتهمتيني اني اتمنى انج تعرفين ‏قيمة نفسج ومتخلين احد يسترخصج
افتهمتيني
....اي افتهمت
...اي زين بس انتي حلوة فحذري  من الكل
.....اني مجان قصدي شي بس ماما دائما جانت ادكلي
من احد يحجي وياج شي او يكلج حلوة او يحاول يبين شي بكلامه
ابتعدي عنه واني دائما اذكر كلامها  وامشي بي
....عفيه عليج واني هم اكلج  سوي هيج بس راح تكبرين اكثر وتفهمين
اكثر وتعرفين انو اكو شغلات بعيدا كل البعد عن الجمال وكلمه
انتي حلوة اكو شغلات مختلفه   تحسيها متفهميها ويس افتهمتيني

هو يحجي واني صافنه على كلامه محسيته كلام اعتيادي حسيته ديحجي شعر شنو هلاانسان المختلف مزيج مابين انسان عدائي على انسان مثقف متفهم تكوينه غريبه
كتلها
...اي اكيد افتهمت
...زين هسه روحو غسلو وغيرو ملابسكم وتعالو تعشو
...اي
رحت للغرفه واني صافنه بعدني بكلامه وبااسلوبه
اكو ناس من نحجي وياهم نحسهم يكمشون كلبنا بكلامهم
ويخلون يدهم على نبضنا ‏
دخلت وشدن تحجي واني صافنه
...خيال  خياااااااااااال 
......ولج ليش تعيطين شبيج موعيب يسمعوج
....صار كم مرة اصيحج وانتي صافنه وبالج مو يمنا
....اووووف شتريدين شدن
....هاي شنو بيدج
.....ها نسيت والله هاي هدوم عم طه جابها
....ها زيدون  جابها
.....اي بس لصيحي زيدون عيب صيحي عمو انت هم مصطفى
....اي ميخالف
....يله مصطفى كوم ادخلك للحمام اغسلك
ودخلت مصطفى للحمام وغسلتله وطلعته ودخلته للغرفه وبدليتله
وجانت الملايس شويه جبيرة عليه بس اهمشي نظيفه وجديدة وجان فرحان وطاير بهدومه الي عليها رسم سيارات
وشدن هم غسلت وجانت هدومها هم شويه جبيرة بس هم
حلوة وبقيت بس اني كتلهم كعدو هنا اروح ادخل للحمام اغسل واجي لطلعون من الغرفه زين
...اي زين ننتظرج
وبعد ماخلصت حمامي شفت الهدوم جان بنطرون وبدي
لونه ابيض بس اني جانت الهدوم على كدي بالضبط
عبالك حافظ قياسي ومشطت شعري وطلعت رحت للغرفه شفت
شدن ومصطفى ماكو
رحت للمطبخ جانو ماكو رحت للصاله جانو كاعدين يباوعون تلفزيون
وجان كاعد طه وعمه زيدون واول مشافوني اثنينهم اندارو
عليه عم طه باوع ودار وجه بس طه ظل يباوعلي ويبتسم
اول ماكعدت جان عم طه يكوم وكال يله نتعشه
ورحنا للمطبخ واكلنه بدون ولاكلمه ولمن خلصنه
باوع عليه زيدون وكلي
....خيال انتي وشدن ومصطفى راح اظلون يمي منا لثلاث ايام وبعدين راح اوديكم يم خالتي مرة جبيرة وماعدها احد ولدها مزوجين وعايشه بالبيت وحدها اني رحت وحجيت وياها وهي كلش
حبت الفكرة وانتو راح ترتاحون يمها اني متاكد
من هذا الشي  وبعدين  انفكر شلون نرتب وضعكم

.....اني اشكرك هوايه بس حضرتك مامضطر تساعدنا  لهاي الدرجه
....اني ماتعلمت ادير ظهري وامشي لااي انسان محتاجني
واني قررت اساعدكم مولااجل شي لان هذا الي لازم يصير
.....شكرا
مجاوبني وكام وطلع برة بلحديقه
اني ماحجيت شي بس فجأة حسيته ضاج
....كتله ل طه
اني ماحجيت شي بس حسيت عمك تعصب كلش
....هو بطبعه عصبي بس كلبه كلش طيب
....اني ماتقصدت اضوجه بالعكس ماردت احس انو اني
داثكل عليه
.....ليش تحجين هيج ودائما تحسين انو الناس يشوفج فد ثكل عليهم عادي بسيطي الامور وخليها تمشي طبيعي والانسان اكيد يحتاج للمساعدة
....اني دائما اشوف الناس يحسوني ثكيله عليهم ومسؤولية  لهذا السبب مااريد احد يشوف  وجودنا ثكل عليه
..لاتحجين هيج بالعكس اني داشوف عمي فرحان بيج
وديحب يساعدكم وهذا الشي برغبته
اني اتمنى انج من تروحين يم خاله وداد ‏ تعيشين مرتاحه
هي  جبيرة وعدها احفاد وراح تحبكم كلش
.....بس اني مااعرف هي على اي اساس تتحملنا
....مدام عمي جابكم وهو كللها  تبقيكم يمها اذن هي راح تحبكم
صدكيني
...ان شاءالله
ومصطفى كام يصيحني ويكول نعسان
....شدن روحي ودي مصطفى ينام
....ميخالف يله كوم مصطفى
...خيال
....نعم
...انتي مراح تنامين
....لا والله ماادري شعجب اليوم منعسانه روح نام اذا نعسان
انت وراك قرايه ‏
....اوكي اني مابودي اتركج كاعدة وحدج بس داتعب  من ‏القراية  ودانعس
....لاولايهمك روح نام تصبح على خير
....وانتي من اهل الخير
ظليت شويه كاعدة وشفت شدن اتاخرت رحت للغرفه شفتها نايمه هي ومصطفى طلعت وسديت الباب ومجنت نعسانه بعدني
رحت طفيت التلفزيون ورحت على الشباك شفت زيدون كاعد على الكرسي ومرجع راسه ليورة وخال رجله على الميز
ظليت اباوعه وبعدين رحت للمطبخ جنت قبل من ماانام بالليل اسوي كوب حليب اشربه
وهسه اجى على بالي اسوي كوب حليب وجاي اشربه
لان بيت عمتي متقبل اسوي  ومرة ضربتني وكلش اذتني
علمود كعدت وشافتني بالليل مسويه حليب وجاي وداشرب
من اذكر عمتي واذيتها كلبي ينخمط
واحس وجع ضربها بعدة بجسمي
بديت احمي الجاي وادور على الحليب بس مالكيته و كلت اكيد بالكاونترات الفوك بس مجنت اكدر اوصله اني طولي اعتيادي
واني جنت كاعدة داحاول اوصل  واكمز وسمعت واحد يضحك
نداريت شفت زيدون واكف باب المطبخ ويضحك
.....قزومه انتي بس لابعد مطولين
.....لااطول بعد هوايه ورايه
....ان شاءالله طولين بس هم تبقين كصيرة يعني لتحلمين
اصيرين طويله
...يله ميخالف شسوي
اجى وكف يمي
.....كوليلي شدورين
....الحليب
....هناك بهذاك الكاونتر روحي جيبي اذا دكدرين
.....اي عادي اصعد على الكرسي
....ههههه وخري خلي اني اجيبه
....لااني اجيبه ‏
...بعد ساعه مجيبي ومشى ‏ من يمي وراح جاب القوطيه مال خليب وخلاها على الميز
انتي شسوين بالحليب بالليل
...احب اشرب حليب وجاي بالليل  تريد اسويلك
....لا مااريد لان راح اطلع
.....هسه
...اي هسه
....يا متخاف تطلع هسه هو منو اكو بس الذيابه
....ههههه لااني مااخاف بس من الخالقني
واخاف بس من انو افقد الناس الي احبهم بس مااخاف
من شي ثاني
وصدك انتي وين وصلتي بالدراسه
....ثاني متوسط وصار الحادث وبعد ماداومت واختي هم نفس الشي ومصطفى اصلا مراح للمدرسه اني احاول اعلمه الاحرف والارقام بالبيت
....انتي كلش سباعيه وقويه ونادرا ‏ مانشوف وحدة بعمرج
هيج تتصرف
....يجوز
...لا مو يجوز اكيد
....اني راح اطلع هسه تصبحين على خير
وطلع وسد الباب وسمعت صوت المفاتيح ديقفل الباب
استغربت يطلع هيج وكت بالذات بالمكان الي احنا كاعدين بي وين راح يروح بهيج وقت
هذا الانسان شخصيته غريبه  والاغرب انو هو يطلع هيج وكت
وحدة ياترى  شنو السر الى ورا  هذا الشخص
يتبع ....
#الكاتبه #روجمان