وفعلا وره سته اشهر من زواج وطبعا ضليت كاعده عند عيالي بس شهرين جرعته بمرار تطلگت واني بعمر الورد تطلگت واني عمري ١٣ سنه وتسميت متطلگه ومن يشوفني ينقهر عليه شلون ذبلت وصرت كنت مثل الورده المفتوحه هسه صارت صورتي مكسوره ما اعرف شنو طلاك ولا اعرف شنو يعني وحده متطلگه كنت طفله وما عشت مثل باقي الناس والحمدلله والشكر ما حملت وصار عندي طفل هذا بفضل الله اكو بنات غيري بنفس العمر وشايله هم مسئوليه واطفال وهي اصلا طفله وبدل ما تعيش حياتها رجعت بيت اهلها هي وطفلين او طفل المهم گلتلكم تطلگت وعمري ١٣ وصارت عندي عقده من الزواج وصارت عندي حاله نفسيه واكتئاب واغلب الليالي اكضيها بجي وقهر وكلما احد يتقدملي ارفض بغض النضر زين او مو زين لان كنت رافضه فكرة الزواج اصلا وارفض كولشي يذكرني بالزواج صارت عندي عقده واكره الزواج وبقيت عند اهلي معززه ومكرمه صحيح قبل ما كنت ارتاح عدهم بس بعد الي شفته بيت اهلي جنه ولو يذبحوني ما افكر اتزوج
مرت الاشهر والسنين واني عند اهلي عايشه حياتي قررت ارجع ادرس خارجي والمهم اخذ شهادة الثالث وفعلا مكان يرفضولي طلب بسبب الي صار والحمدلله بديت ادرس واجتهد بدراستي واخذت شهادة الثالث وبديت استرجع نفسي شوي شوي وبدت ترجع الثقه بنفسي وارتاحت نفسيتي كولش والحمدلله من صار عمري ١٨ سنه تجاوزت المحنه والحمدلله وبقيت عايشه حياتي وكاموا ميجيبولي طاري الزواج ولا يحجون بيه وكنت كلما اروح لعرس او حفله وحده من اقاربنا او صديقاتي انقهر عليها واكول شلون راح تتحملين اليوم وشنو راح يصير بيج عبالي الناس كولها تعاني مثلي مثل ما عانيت كانت تجربه جدا قاسيه عليه وتخطيتها بصعوبه المهم كنت كلما اطلع او اطب اشوف جيرانا ولد حلو وحباب واخلاق وعمره تقريبا ٢١ سنه كلما افوت للبيت او اطلع يضل يباوع عليه ويحاول يتقربلي بس اني بحكم الحاله الي مريت بيها اتجنب من كل شخص ورى فتره دز امه وخطبتني اله وهي جيرانه وتعرف بوضعي وامي كالتلها والله ما نلگه احسن منكم بس البنيه متريد تتزوج حالتها النفسيه تعبانه المهم حاولوا وياي ومقبلت بيوم من الايام اني رايحه لبيت عمتي قريب علينا بالشارع الثاني واجه الولد جيرانه اسمه كان علي المهم اجه وراي ويصيحلي لهفه اني التفت عليه
لهفه : نعم خير ان شاءالله
علي : شبيج يمعوده والله اني احبج والله رايدج على سنة الله ورسوله وصدكيني الي تردينه يجرالج اي شي تطلبينه اني موافق
لهفه : علي الناس منا ومو وكته هالحجي الناس تباع علينه
علي : خلاص هذا رقمي ولازم تخابريني ضروري
لهفه : اوكي احاول بس اشرحلك وضعي وخلاص
المهم اخذت الرقم ورجعت للبيت وخليته بموبايلي وكتبت عليه اسم بنيه كانت صديقتي كنت اضوج منها هههه بس حتى لا انساه وطبعا اخذته وما دكيت عليه لان مصارتلي فرصه ورى اسبوع اجانا اخو علي الصغير وطلب يشوفني كان عمره ست سنوات وكال اريدج بس تقريني قراءه وفعلا قريته ومن راد يطلع كال لهفه علي ينتضرج ويكول لازم تخابريني اليوم واذا متخابريني والله اجيلكم للباب واني تفاجئت يااا عزه روح حبيبي ان شاءالله خير لا يسمعونك اهلي ويضربوك وهو خطيه ركض وبيني وبين نفسي شنو هذا ميمل هسه شلون ورطه تانيت يجي العصر وطلعت للسطح كتلهم راح اصعد فوك اغير جو وفعلا صعدت ودكيت عليه
علي : الوووو
لهفه : مرحبا علي شلونك
علي : لهفه واخيرا حنيتي عليه ليش هيج قاسيه
لهفه : لا اني مو قاسيه انت ما تعرف شنو ضروفي
علي: مهما تكون ضروفج وربي قابل واتحمل بس ارضي عليه
لهفه : اعذرني صدكني ما اكدر وصعبه عليه
