بقينا اني وعلي شهر كامل على هذا الحال بس التهينا بالعزايم والخطار الي تجي وعشنا حياتنا طبيعيه وحاول اكثر من عشر مرات يتقربلي وماكو فايده وبده يضوج واني همين احتاريت ما اعرف شنو اسوي لحد ما سولفت لصديقتي المقربه واكثر من اختي وسن وكتلها لا تحجي لاحد اني هالشكل وضعي وشرحتلها كولشي
وسن : ياا عزه بعينج لج هاي انتي شمسويه بالرجال لهفه نصيحه مني الي ديصير غلط تالي يمل منج وهذا الحب كوله يروح حاولي تستلحگين على نفسج ولازم تجبرين نفسج صدكيني بس اول مره صعبه وبعدين راح تتعودين معوده حاولي
لهفه : لا معوده لا تخوفيني علي يحبني ومستحيل يضوج مني
وسن : اي انتي ضلي بهاي سوالفج وتالي گولي وسن گالت ومسمعت كلامها لج يعني انتبهي لنفسج والله الرجال اهم شي عدهم هذه الشغله احرميهم من الاكل ومن الشرب ولا تحرمينهم منها
لهفه : والله ما ادري شلون اتصرف ما اعرف شيصير بيه
وسن : لج توكلي على الله وخلصي لا تضلين هالشكل
لهفه : ان شاءالله احاول
سديته من وسن واني الف حسبه وحسبه ابالي فعلا كلامها صحيح لشوكت يبقى متحمل وشلون بيه واني ما اتحمل يربي شراح يصير بيه توجهت لربي وصليت واندعيت وبجيت لحد ما نمت عالسجاده من غير ما احس وحلمت وكأن في عالم الرؤيا انو اني بيت اهلي وكاعدين نسولف ونضحك ودخلت علينا بيبي الله يرحمها وتضحك ومشتاقتلنا واجتي يمي فتحت ايدي وانطتني محبس فضه وبيه كرستاله وراحت وهي تلتفت عليه ومبتسمه فزيت على صوت علي
علي : لهفه شبيج حبي ليش هيج نايمه عالسجاده
لهفه : مبيه شي حبيبي بس كنت داصلي ومحسيت على نفسي ونمت
علي : دكومي حبي صبيلنا عشى نتعشى لان كولش جوعان
لهفه : ماشي عمري
وفعلا تعشينا وخلصنا وضلينا نسولف ونتشاقى وتالي نمنا علي انطاني ضهره ونام اني بوكتها تخبلت اول مره يعوفني بدون ميبوسني او يحضني ضليت افكر الليل كوله بكلام وسن واخاف يصير صدك ويعوفني واني ما اكدر اعوفه وهمين اهله كولش احبهم وحبوني حيل المهم كعدت الصبح
لهفه : صباح الخير حبيبي
علي : صباح النور يعمري
لهفه : علي ممكن اطلب منك طلب وما تردني
علي : من عيوني خادم صغير لعيونج
لهفه : حبيبي ما تقصر بس اريد اروح ازور الامام الكاضم تكدر تاخذني العصر
علي : اي عادي مو مشكله العصر حضري نفسج وهمين ناخذ امي ويانا
لهفه : ماشي خلي اروح اكول لعمتي
وفعلا اتفقنا وطلعنا العصر ورحنا زرنا الامام دخلت للصحن مالته واحس هموم الدنيا كولها انشالت من على اجتافي حسيت اني خفيفه وما عندي لا هم ولا غم شنو من ريحه تدخل النفس وتغير احوالج من غير ما احس ودموعي تجري وصلت لشباكه وخليت راسي عليه وبجيت بحرگه مولاي يا باب الحوائج اقسم عليك بأمك الزهراء ما تردني ولا ترجعني من غير ما تنطيني مرادي انت اعلم بالحال واني مالي غيرك بعد الله اريد اتغلب على مشكلتي وتريح بالي وتخلي علي يرضى عني وما يحب غيري ولا يشوف غيري اريدها منك مولاي وانتم ماكو شي صعب عليكم بقيت ربع ساعه لازمه الشباك وادعي وابجي رجعت لعمتي وگلت خلاص انطاني مرادي مولاي خليت ايماني ويقيني بيه بعد رب العالمين وخليت الامام الكاضم وسيلتي لله وابتغوا الى الله الوسيله وكملنا زيارتنا واخذنا علاوي عشانا بره وتونسنا ورحنا للبيت من بعد ما رحنا للبيت صعدت بدلت دشداشه نوم وتمكيجت وتعطرت واجيت يم علي
علي : ها ولج تخوفين جايه ونيتج سوء واني انسان خجول ما عندي هالسوالف لا تجبريتي بعدني كولشي ما اعرف
لهفه : ههههه يمه منك ما عرفناك
هذا انت لو غيرك
علي : لهفه خلاص اني مقدر وضعج لا تجبرين نفسج لخاطري
لهفه : لا حبيبي مو داجبر نفسي هالمره اني اريدك واحبك
وبديت اتشاقى وابوسه وهو همين تجاوب وياي وخليت املي بالله واهل البيت وغمضت عيوني وتحملت ورحت وياه لغير عالم شلت كولشي من بالي وصار الي صار بس گوه لزمت نفسي بس من شفت علي شلون رقيق وياي وشلون ميحاول يأذيني سلمته نفسي
وكعد وهو مرتاح ومتونس وكل شوي يجي يبوسني ممصدك
وفعلا حسيت بفرحه وضلت السالفه بالنسبه الي عاديه وصارت حياتي طبيعيه مثل كل المتزوجين ورى شهرين حملت وبعدها بفضل رب العالمين واهل البيت جبت كاظم سميته عالامام الكاظم فدوه اروح لأسمه وعشنا حياتنا كولش مرتاحين من ناحية عيالي وزوجي
والحمدلله وزاد حب علي ألي قاطات وكلش حبيت حياتي الزوجيه وعائلتي الجديده والحمدلله والشكرلله
النهايه
نصيحتي الكم ديري بالج تزوجين بنتج وعمرها صغير وحتى البنات صدكوني الزواج مو بس لبس وطلعه ومكياج الزواج مسئوليه وبيت اولاد من راح تزوج البنت وهي صغيره هي طفله شلون راح تربي طفل وشلون راح تكدر عالحمل والولاده ومسئوليه الزواج صدكوني صعبه عليها اول وتالي راح تجيها قسمتها لا تستعجلين ورب العالمين اكيد ضاملها النصيب الزين لان ذكر بكتابه الطيبون للطيبات والخبيثون للخبيثات خليها تكبر وتاخذ حقها بطفولتها وشبابها وخليها تدلل وتتونس بجالج وبجال ابوها وبعدين من تشوفينها ناضجه زوجيها تكون واعيه وفاهمه وتعرف ان الزواج مسئوليه كبيره وتكدر على بيت واولاد وعيال ويكون عقلها ناضج واعي وتعرف شلون تصوغ المواقف لان هذه حياة مو لعبه وراح تعاشر ناس همين الناس شنو ذنبهم يتحملون طفله وربي يستر على بناتنا ويحميهم ويحرسهم ويخليهن من نساء الجنه
مع تحياتي
همس القوارير
احب اسمع ارائكم
