عشنا وشفنا

الفصل السابع

#عشنا_وشفنا
#بقلم_أميرة_عادل

الفصل السابع
طلعت دانا البيت وحكت لمامتها كل حاجه .. ومامتها ساكته
دانا : انتي ساكته ليه يا ماما .. مبتروضيش
كريمة : خلاص يا بنتي اللي حصل حصل .. هقول ايه .. مش هنروحلهم البيت نديله الفلوس يعني .. عيب هيبقي شكلها وحش قوي .. يالا قومي لمي حاجتك وانزلي عشان متتأخريش علي شغلك
دانا (بخضه) : ايوه صح .. ( وبصت في الساعه ) يا خبر الساعه بقت 7 ونص ..
وقامت جري عشان تلحق تنزل شغلها
........................................................................................................
عدي يومين مفيهمش جديد .. وفي يوم بعد الدرس
حبيبه لصحباتها : بصوا بقا انا عايزه اعمل مقلب في سليم
ناديه وهي بتلم حاجتها : هتعملي ايه يا زيكو هانم
حبيبه : لسه مش عارفه فكروا معايا
ريتاج : نفكر .. منفكرش ليه
حبيبه (بغيظ) : نفسي اعمل فيه مقلب .. انا لن انسي انه صحاني من عز نومي عشان يعمل فيه مقلب قبل كده .. وانا مخدتش حقي
مي (بضحك) : ده انتي قلبك قاسي
حبيبه : قوي قوي
ناديه (بضحك) : انت مش بتحس
ريتاج (بضحك) : كده وكده
حبيبه وهي بتمسك موبايلها : هسس .. محدش يتكلم
كلهم  ضحكوا
ريتاج : هتعملي ايه ؟؟
حبيبه بتشارولها عشان تسكت خالص
رن موبايل سليم .. 
سليم كان قاعد بيذاكر .. سمع رنه موبايله .. رد  : حبيبتي .. خلصتي الدرس
حبيبه (وهي بتمثل العياط ) : الحقني يا سليم
سليم (بخضه ) : حصل ايه .. بتعيطي ليه .. طمنيني
حبيبه وبتمثل العياط والشحتفه : انا اتسرقت .. واحد حيوان شد مني شنطتي .. الحمد لله ان موبايلي كان في جيبي .. (وكملت عياط)
سليم (بقلق ) : طب اهدي بس يا حبيبتي .. انتي فين دلوقتي ؟
حبيبه (وقال يعني بتحاول تهدي ) : انا قبل بيتنا بشارعين
سليم وهو بيسحب مفتاح عربيته ومحفظته وبيقوم : طب انا 5 دقايق بالضبط وهكون عندك .. سلام دلوقتي
قفل سليم مع حبيبه .. اللي بصت للموبايل بغباء
ريتاج : ايه التمثيل ده كله .. انا هقدملك في معهد السينما
مي (وهي بتحرك ايدها قدام وش حبيبه) : انتي يا بنتي .. متنحه كده ليه .. هاي
ناديه (بقلق) : حبيبه .. حصل ايه
حبيبه فاقت وبصتلهم : سليم في الطريق جايلي
مي (بغمز) : ايوه يا عم الحب الحب .. اوعدنا يارب
حبيبه : انا قلتله اني قبل بيتنا بشارعين .. وهو في الطريق دلوقتي
ريتاج : يا خبر .. وبعدين
حبيبه : اجروا بسرعه خليني الحق اوصل قبله
ناديه : مع نفسكم .. انا هلكانه وعايزه انام .. باي .. ابقوا احكولي اللي حصل على الواتس
مشيت ناديه .. وجريت حبيبه وريتاج ومي بسرعه عشان يوصلوا قبل سليم .. اللي كان عمال يتصل على حبيبه وهي مش بترد .. وده قلقله زياده
لحد ما وصلوا الشارع اللي حبيبه قالت عليه .. قعدوا كلهم على الرصيف وهما بياخدوا نفسهم بالعافيه من كتر الجري ... رن موبايل حبيبه وكان سليم برضه
حبيبه بتفتح الخط .. وبتحاول تنظم نفسها عشان تعرف تتكلم : الو
سليم (بقلق) : مكنتيش بترودي ليه .. حرام عليكي الخضه دي.. انتي فين
حبيبه : انا قاعده قدام محل ...
سليم (وهو بيبص على الشارع ) : اه شفتك خلاص ..
ركن عربيته بسرعه ونزلها جري
سليم (بخضه وهو بيمسك ايدها وبيقومها من الارض) : انتي كويسه .. حصلك حاجه
حبيبه هزت راسها يمين وشمال بمعني لأ محصلش حاجه 
سليم اخد نفسه جامد عشان يهدي نفسه من التوتر اللي كان فيه : الحمد لله .. فداكي اي حاجه .. تعالي اوصلك
(أخد باله من مي وريتاج اللي قاعدين )
سليم وهو بيبصلهم : معلش يا بنات .. ازيك يا مي .. ازيك يا ريجو
ريتاج / مي : الحمد لله
سليم : تعالوا يالا هوصلكم
ريتاج وهي بتقوم : لا شكرا
مي وقامت هي كمان : احنا هنتمشي .. البيت خلاص قرب .. يالا باي
حبيبه (بتشاورلهم بايدها ) : باي
مشيت ريتاج ومي .. وركبت حبيبه مع سليم العربيه
سليم وهو بيمسك ايدها بعد ما ركب : ما تتصوريش كنت هتجنن عليكي ازاي ..
حبيبه (بحب) : ربنا يخليك ليا
سليم لسه بيلف عشان يبص قدامه ويسوق .. فجأه قرب من حبيبه قووي وهو بيمد ايده ناحيه رجلها
حبيبه (بقلق وخوف) : سليم .. في ايه .. هتعمل ايه
سليم مد ايده في الدواسه تحت رجلها ومسك شنطتها وطلعها رفعها لوشها وهو بيقول : ايه داا بقااااا
حبيبه (بضحك) : خضتني .. (وبصتله بمكر) بعض ما عندكم يا حبيبي
سليم قعد كويس : يعني ده مقلب ها
حبيبه هزت راسها باه وهي مبتسمه
سليم كشر وبص قدامه ومش بيتكلم ودور العربيه عشان يسوق
حبيبه (وهي خايفه يكون زعل ) : ايه يا حبيبي .. انت زعلت
سليم (وهو لسه مكشر ) : بصي كده علي منظري .. انا نازل بلبس البيت ونازل جري .. من غير ما اقول لاي حد حتي اني نازل .. عشان اتخضيت عليكي .. وكل همي اني الحقك .. وانتي بتعملي مقلب
حبيبه وهي بتضربه علي كتفه : خلاص بقا .. وبعدين انا عارفه غلاوتي عندك وأتأكدت منها .. وكبرت في نظري اكتر واكتر .. وبعدين ماله لبس البيت ما اخر شياكه وحلاوه اهو .. بنطلون اسبورت اسود وفيه خط جراي وتي شيرت جراي.. ماله يعني مش فاهمه
سليم ضحك : المشكله اني مش بعرف ازعل منك
حبيبه (بثقه ) : عشان بتحبني طبعا .. يالا اتفضل وصلني على اول الشارع عشان ما اتأخرش ... بسرعه قبل معاد رجوع حمزة ..
سليم وهو بيسوق : هانت كلها اخر السنه دي .. واتقدملك ... واوصلك قدام حمزة والناس كلها
حبيبه : ياارب
........................................................................................................
نفس اليوم بالليل .. دانا قاعده على السرير في اوضتها وحاطه اللاب توب علي رجلها وبتعمل شغلها .. رن موبايلها
ردت دانا : الو
حمزة وهو واقف في البلكونة : الو .. معلش انا لقيت الدنيا ليل وانا زهقان فقلت اتصل اتعرف ممكن
دانا وعرفت انه حمزة .. قالت وهي بتنزل اللاب توب من على رجلها: اه طبعا ممكن
حمزة وبعد الموبايل عن ودنه يتأكد انه اتصل بدانا .. لأنه تقريبا فهم طريقه تفكيرها واحترامها لنفسها وسأل عليها كتير فاستغرب من ردها .. رجع حط الموبايل على ودنه تاني : طب ممكن تعرفيني عن نفسك
دانا ( وهي ماسكه نفسها من الضحك بالعافيه.. اتكلمت بجديه) : انا اسمي دانا .. بشتغل في شركه ... جرافيك ديزانير .. والدي متوفي وعايشه مع مامتي واختي الوحيده .. اللي عندها عيب صغير قووي .. انها تعرف بنت اسمها حبيبه عندها اخ مبيتكسفش انه يتصل ببنات الناس يعاكسهم في التليفون (وقفلت في وشه السكه وهي مبسوطه قوي )
حمزة بص للموبايل اللي اتقفل في وشه .. وابتسم قووي وقال لنفسه
حمزة : الله .. احنا هنلعب بقا .. ماشي يا ست دانا
......................................................................................................
تاني يوم الصبح .. دانا سايقه عربيتها عشان تروح الشغل وواقفه في اشاره
وبتبص جنبها لقت حمزة في عربيته واقف في نفس الاشاره و بيعملها باي .. دانا قلبها بقا بيدق جامد جداا .. وحست انها مبسوطه قوي .. بس رجعت تفكر نفسها .. مينفعش كده يا دانا .. عيب .. حرام .. رسمت علامه الجد علي وشها و شاورت بايدها علامه مجنون
اتصل بيها بالتليفون .. رن موبايلها شافت رقمه عملت كنسل
اتصل تاني وهو بيشارولها ترد .. ردت
دانا (بجدية) : نعم
حمزة (بحنان ) : الناس تقول صباح الخير الأول .. مش نعم
دانا (وهي بتلف وشها الناحيه التانيه عشان ما يشوفش ابتسامتها ) : صباح الخير .. نعم
حمزة (بابتسامه ) : النبي تبسم
دانا (بجديه وبصت ناحيته ) : عايز ايه يا حمزة .. اظن مينفعش اللي بتعمله ده
حمزة (وهو باصصلها وبيتكلم بصدق ) : هتصدقيني لو قلتلك مش عارف .. وعمري ما عملت كده مع اي بنت .. لأني مقتنع ان جو الصحوبيه والكلام ده حرام مش بس غلط .. وكمان عشان اختي .. براعي ربنا في كل بنت بشوفها .. عشان اختي تلاقي اللي يراعي ربنا فيها 
دانا ( وهي حسيت بصدق كلامه وشافته في عنيه .. قالت بهدوء ) : وايه اللي اتغير
حمزة (ورجع لمشاكسته تاني ) : مش عارف .. شكلي كده اتنيلت وحبيتك ولا ايه مش عارف
دانا وشها احمر قووي وقفلت السكه في وشه بسرعه وهي بتبص الناحية التانيه .. قلبها كان بيرقص بين ضلوعها .. كل خليه فيها كانت مبسوطه ومرتبكه ومكسوفه
نزل حمزة من عربيته اول ما الخط اتقفل .. وقرب من شباكها وخبط عليه .. وشاورلها تفتح الشباك
دانا بصتله وهي بتهدي نفسها .. فتحت الشباك وهي بتقول : ممكن تروح تركب عربيتك .. شكلنا هيبقي وحش قوي كده .. (وبصتله برجاء ) من فضلك
حمزة ( وهو بيبصلها بحب ) : اوك بس بشرط
دانا ( وهي بتهرب بعنيها منه) : شرط ايه ؟
حمزة (بغمز ) : تردي على الموبايل وتسمعيني ومتقفليش في وشي .. قلتي ايه ؟
دانا (بتفكير وتردد ) : بس
قاطعهم صوت الناس عماله تزمر لأن الاشاره فتحت وهما معطلينها
حمزة (بضحك) : قرري .. انا معنديش مانع افضل كده للصبح
دانا (بسرعه وكسوف ) : اوك .. اوك .. يالا امشي بقا
مشي حمزة يركب عربيته .. وهي اتحركت بسرعه بعربيتها .. وفعلا اتصل بيها حمزة اول ما اتحرك بعربيته
دانا (وهي بتفكر نفسها بدينها وتربيتها .. اول ما فتحت الخط قالت من غير ما تديله فرصه يتكلم) : بص يا حمزة انت بنفسك قلت ملكش في الصحوبيه والكلام ده .. ولا انا كمان ليا فيه .. ولا بحب اعمل حاجه ربنا مش راضي عنها .. بص يا ابن الناس .. لو انت زي ما بتقول يعني بت..( وسكتت اتكسفت وكملت بسرعه ) لو يعني .. تقدر تدخل البيت من بابه اعتقد انت عارف عنوان بيتنا كويس .. غير كده فانا اسفه مش هقدر ارد عليكي تاني .. سلام
حمزة (بسرعه وقلبه بيدق جامد وهو مبسوط جدااا ) : استني متقفليش
دانا (وهي بتتنهد ) : ايه تاني ..
حمزة (بحب) : عايز اتطمن اني لو جيت البيت مش هترفض .. عايز اتطمن علي رايك ..
دانا (بابتسامه ) : لما تبقي تيجي البيت تبقي تعرف رائي .. باي
وقفلت السكه وهي جواها مشاعر كتير متلغبطه .. فرحانه ومرتبكه ومكسوفه .. كلام حمزه كان بيتردد لسه في ودانها .. حسيت ان الدنيا حر من كتر احمرار وشها .. بصت لنفسها في المرايه اللي قدام وهي بتكلم نفسها
دانا : انا مال وشي احمر قوي كده .. انا مالي ايه اللي بيحصل بالضبط
ابتسمت .. وبصت قدامها عشان تعرف تكمل سواقه وتوصل شغلها 
أما حمزة أول ما دانا قفلت قال لنفسه بضحك : يا مجنونه .. والله لاحاسبك علي كل مره قفلتي فيها السكه في وشي .. يا .. يا مدام حمزة
.....................................................................................................
نفس اليوم .. سيف بيكلم لميس .. وفاتحين فيديو كول
سيف : تعرفي .. نفسي قوي اخرج معاكي نتفسح .. امسك ايدك .. عايز احس انك قريبة مني
لميس : يا حبيبي ما انا معاك اهو ..
سيف : ايوه معايا بالكاميرا وبس
لميس (بحزن) : انت عارف انا مش بعرف اخرج من البيت خالص .. حتي دروس مش بروح
سيف (بغيظ) : عارف
لميس : وانت اللي مش عايز حد في المدرسه يعرف اننا اصحاب .. ومش بترضي نتكلم في المدرسه غير قليل قوي
سيف (بحب) : ياحبيبتي قلتلك قبل كده .. انا خايف عليكي مش عايز حد في المدرسه يقول عليكي حاجه
لميس (وهي متضايقه ) : هيقولوا عليا ليه .. ما في ناس كتير في المدرسه ومتصاحبين وكلنا عارفين عادي يعني
سيف (وهو بيقنعها بوجهه نظره ) : انتي عايزه الكل يعرف والكلام يوصل لاخوكي
لميس (بخضه ) : ايه .. لا طبعا
سيف (بابتسامه ) : شوفتي بقا انا خايف عليكي ازاي .. وبعدين انتي يهمك ف ايه هما يعرفوا او لأ .. المهم انا .. انا بحبك وبموت فيكي وفي عنيكي .. ( كمل وهو بيبصلها بنظرة شغف )  كل حاجه فيكي بحبها
لميس ابتسمت قوي .. وحست بجمالها وأنوثتها اكتر .. اللي سيف علي طول بيتكلم عليها
.......................................................................................................
نفس اليوم بالليل دانا راجعه من الشغل وفتحت بالمفتاح ودخلت البيت
دانا : يا اهل البيت .. ماما انتي فين .. ناديه هانم
ناديه (وهي خارجه من اوضتها بتدعك في عنيها ) : عايزه ايه .. داخله عامله دوشه كده
دانا (بضحك) : لازم اعرفكم اني وصلت عشان تيجوا تستقبلوني
كريمة خرجت من اوضتها ولابسه اسدالها : كنت بصلي المغرب .. حمدالله على السلامه حبيبتي .. يالا ادخلي غيري هدومك وصلي علي ما احضرلك الاكل
دانا وهي بتبوس ايدها : انا اكلت بيتزا في الشغل كنت واقعه من الجوع ومقدرتش استني لما ارجع .. بس لو عندك حته تورته شيكولاته من بتاعه امبارح يبقي فل الفل
ناديه (بغيظ) : بطلي اكل شويه هتتخني
دانا (بضحك) : يا حراام غيرانه عشان مش بتعرفي تاكلي براحتك زيي يا تخينه ( وطلعتها لسانها)
ناديه (بغيظ ) : بقا انا تخينه ..
دانا (بتهز دماغها ) : اينعم
ناديه (وهي بتجري على دانا ) : والله لأعضك .. واطلع عليكي مذاكره طول اليوم النهارده صبرك عليا
دانا بتجري منها وهي بتضحك : برضه تخينه .. عايزه تاكليني ..  يا ماما يا ماما .. خاف يا عيد
ناديه (وهي بتمثل الزعل ) : يعني هو ذنبي اني طلعت عندي استعداد للتخن زي ماما .. ده بدل ما ترفعي معنوياتي عشان اعرف اكمل مذاكره .. اه ياني يا مامتي .. مكنش يومك يا نادو يا جميله انتي يا حلوه
دانا (وهي بتضحك) : خلاص صعبتي عليا .. عايزه ايه يرفع معنوياتك
ناديه (وهي بتعد علي صوابعها ) : شيكولاته جالاكسي الكبيره ها .. وايس كريم ميجا فانيليا .. وشيبسي ملح عائلي .. وبيبسي دايت بقا عشان الريجيم
ناديه (بضحك) : كل ده يا مستغله .. وقال بيبسي دايت قال ( كملت وهي رايحه ناحيه باب الشقه ) عموما من عيوني هو انا عندي كام نادو يعني
كريمة اللي كانت بتتفرج علي بنتها وتضحك : يابنتي تعالي سيبك منها دي بتتدلع .. انتي لسه راجعه من الشغل واكيد تعبانه .. نتصل بالبقال يجيب وخلاص
دانا (وهي بتفتح الباب ) : مش هاخد وقت .. هجبلها اللي هي عايزه وارج
قاطعت كلامها اول ما فتحت الباب وشافت
#ياتري دانا شافت ايه 😉😉