عشنا وشفنا

الفصل الأول

الفصل الأول
لميس بتفتح عنيها على صوت خناق بين باباها و مامتها .. بتتنهد جامد وتدعك عنيها وتبص في موبايلها تشوف الساعه كام
لميس بخضه : ياخبر ده أنا أتأخرت قووي والنهارده اول يوم
قامت جري من السرير واخدت فوطتها وخرجت من الاوضه في اتجاه الحمام .. عدت على باباها ومامتها اللي كانوا واقفين في نص الصاله بيتخانقوا كالعاده .. وكملت طريقها للحمام من غير ما تكلمهم .. لأن ده مشهد اساسي في حياتهم اليوميه
( لميس بنت عاديه مش من البنات اللي يتقال عليهم حلوين .. ولا نقدر نقول عليها وحشه .. محجبه من اولي اعدادي بسبب رغبه اخوها .. في ثانويه عامه السنه دي )
اخدت دش وفتحت الباب وبتخرج من الحمام قابلت اخوها الوحيد في وشها
( قاسم اخوها الوحيد .. بيشتغل مندوب مبيعات .. شغله صبح وبعد الضهر .. متزمت جدا .. شايف ان البنت لازم يتشد عليها عشان تمشي عدل ومتعملش حاجه غلط .. وأن البنت مجرد عبء علي الراجل مش أكتر )
قاسم وبيكلمها وهو بيديها أوامر : حضريلي الفطار بسرعه عشان الحق اروح الشغل
لميس : الله يخليك يا قاسم خلي ماما تعملهولك أنا متأخره علي المدرسه والنهارده أول يوم
قاسم : وايه اللي صحاكي متاأخر يا هانم .. ما تلاقيكي سهرانه علي الفيس بوك ولا الموبايل .. انا شكلي هحرمك منهم
لميس (برجاء) : ارجوك بلاش .. انا نمت بدري .. بس راحت عليا نومه
قاسم : طب اتفضلي اخلصي .. وحسك عينك اشوفك بتكلمي اي ولد معاكي في الفصل .. انتي عارفه هعمل ايه .. هخلي بابا ينقلك من المدرسه .. وخليكي بقا كل سنه في مدرسه شكل .. مش فاهم بابا مش مقتنع اننا ندخلك مدارس حكومه تبقي بنات بس ونخلص من الهم ده
لميس ( وهي متعوده تسمع الكلام ده كل سنه لحد ما حفظته وكانت بتكرره وراه قاسم في سرها ) : متقلقش .. مش هتكلم مع اي حد لا ولاد ولا بنات كمان ..عن اذنك بقا
مشيت لميس من قدامه بسرعه ودخلت جري علي اوضتها .. ولبست لبس المدرسه وأخدت شنطتها وخرجت
كان باباها قاعد علي السفره عشان يفطر .. ومامتها بتجيب الأطباق وتحطها علي السفره وهي معيطه
(باباها مدحت .. رجل في أواخرالاربعينات من عمره .. ذو طباع حاده .. هديت نسبيا مع العمر .. بيشتغل محاسب الصبح في شركة مقاولات .. وبعد الظهر في مكتب محاسبةpart time  .. عشان يقدر يكفي مصاريف ولاده .. ملوش دعوه بتربيتهم .. كان سايبها لمراته .. ودلوقتي تربيه لميس تعتبر في ايد قاسم ابنه اللي ورث طباع باباه .. و هو المسؤول عنها في كل حاجه  )
لميس : صباح الخير
مدحت(باباها) : صباح النور .. اقعدي افطري يالا
لميس : شكرا يا بابا .. معلش مش عايزه أتأخر على المدرسه من أول يوم
دولت (مامتها ) : طب خدي أنا عملتلك ساندوتشات (وبتمد ايدها بالساندوتشات للميس )
(دولت مامتها .. بتشتغل محاسبه في شركه استيراد وتصدير .. ملهاش في الدنيا غير شغلها وبيتها .. الحياه بينها وبين جوزها زي ما شفتم كلها خناق .. بسبب أنها اتجوزته غصب عنها ومقدرتش تحبه ولا قدرت تتأقلم مع طباعه الحاده )
لميس أخدتها وباست مامتها ونزلت ..  وهي بتحمد ربنا أنها خرجت من البيت من غير ما باباها يتخانق معاها على أي حاجه كالعادة
وصلت المدرسه وهي سعيده بالجو الجديد وقلقانه في نفس الوقت
........................................................................................................
صحيت حبيبه من النوم على ايد مامتها بتصحيها ..
( حبيبه بنت أمورة  .. صاحبه عيون عسليه وشعر ذهبي ناعم .. محجبه ورقيقه جداا.. في ثانويه عامه )
سهير : حبيبه .. بيبا .. يالا حبيبه ماما .. عشان تلحقي المدرسه
حبيبه وهي بتفتح عنيها وتدعكها بضهر ايدها
حبيبه : صباح الخير يا ست الكل
سهير : صباح الخير يا قلب ماما .. يالا قومي خدي دش واجهزى على ما أحضرلك الفطار.. يالا بسرعه .. أخوكي مستنيكي عشان يوصلك قبل ما يطلع على شغله
حبيبه : ثواني وتلاقيني جاهزه
(سهير والده حبيبه .. مديره حضانه .. حياتها هي بيتها واولادها وشغلها وبس )
(عبدالرحمن والدها .. دكتور عظام .. اب متفهم ومحب لاولاده ومراته جداا )
دخلت حبيبه الحمام واخدت دش واتوضت وصلت ولبست .. خرجت شافت بابها قاعد علي السفره ومعاه اخوها ومامتها
حبيبه : صباح الفل يا شعبي العزيز
بابا حبيبه ( عبدالرحمن ) : صباح الورد يا ملكتي
حمزة اخوها : صباح الخير ياختي .. كل ده تأخير .. كلي بسرعه .. عندي شغل ومتأخر
حبيبه وهي بتاخد قطعه جبنه على توست : انا جاهزه يا باشا .. ده كفايه انك هتوصلني بالبدله الميري دي .. ده البنات النهارده كلهم هيتجننوا
حمزة وهو بيقف وبيخبطها على قفها : طب اجري قدامي ياختي
حبيبه ( وهي بتدعك رقبتها ) : اخص عليك .. قلتلك ايدك تقيله ياخي .. انت فاكرني مجرم بتحقق معاه .. ايه ده .. ياساتر 
سهير: يابني ارحم اختك .. دي بنت مش ولد .. ايه الهزار السخيف ده
حمزة (بضحك ) : يعني يرضيكي انزل من غير ما اصبح عليها
عبدالرحمن : ربنا يخليكم لبعض .. بس خف ايدك .. انا عايز بنتي حبيبتي سليمه
حبيبه بتقرب من باباها تبوسه : قلبي انا يا ناس .. يالا يا كابتن خلصنا
نزلت حبيبه مع اخوها اللي وصلها المدرسه
حبيبه : مش هتيجي تدخلني لحد جوه
حمزة : ليه بيبي هتوهي
حبيبه : لا بس عشان اتمنظر بيك شويه .. الواحد ميعرفش يستفيد منك باي حاجه
حمزة : اذا كان على المنظره .. استني بقا
ظبط حمزة مرايه العربيه عليه وأتأكد من شكله ورفع نظاره الشمس على شعره  .. بص لحبيبه وقالها
حمزة (بغمز) : ايه رايك كده
حبيبه (بضحك) : انت جاي تتعاكس .. يالا يا خويا
حمزة وهو بيرفع ايده كأنه هيضربها علي قفاها تاني : هااا
حبيبه وهي بتحط ايدها علي بقها : سكت اهو
نزل حمزة مع حبيبه ومشيت وايدها متعلقه في دراعه
حمزة (بضحك) : انتي ماسكه فيا كده ليه
حبيبه : بأكد حقوق الملكيه حبيبي
حمزة ضحك قووي
........................................................................................................ مي : الحقي يا ناديه حبيبه جت اهي ومعاها اخوها حضره الضابط
(مي بنوته مليانه شويه .. ملامحها حلوه .. دمها خفيف جدا .. صاحبه الكل .. نفسها تحب وتتحب )
ناديه : انتي لسه زي ما انتي
(ناديه بنت بعيون بنيه .. وشعر اسود طويل .. مهتمه بنفسها .. مذاكرتها ومستقبلها رقم واحد عندها )
مي : ضااااابط ... ضااابط وبالبدله الميري يا بنتي .. انتي ايه .. بصي شياكته ولا شعره التقيل الاسود .. وعيونه السودا .. ولا جسمه الرياضي .. ايه ده .. الراجل الغامض بسلامته متخفي في نضاره
ناديه ضحكت قووي : طب اسكتي عشان قربوا علينا
وصلت حبيبه عندهم ومعاها حمزة
حبيبه : صباح الخير يا بنات
مي /ناديه : صباح الفل
حمزة : صباح الخير على الحلويين
مي (بهيام) : احلى صباح والله
ناديه / حبيبه / حمزة : بيضحكوا
قرب منهم سيف و أمجد وحسن
(سيف .. شاب رياضي .. مهتم بجسمه وشكله .. شعره اسود وعيونه سودا .. قمحي البشره )
( أمجد ... مدمن لعب كره قدم .... الدراسه مش هدفه الاساسي .. حلم حياته يلعب في النادي الأهلي)
(حسن .. عبقرينو .. بيعشق المذاكره والكمبيوتر .. مدمن اي حاجه تخصه .. وده اللي خلاهم يسموه كده .. حاطط قدامه هدف السنه دي يدخل هندسه عشان ينمي شغفه للمجال ده والاختراعات .. شاب ملامحه رجوليه جذابه .. بعيون سود وشعر بني غامق غزير .. وجسم رياضي )
كلهم : ازيكم .. اخبار الاجازه
حمزة : يالا همشي انا يا بيبا .. عايزه حاجه
حبيبه : ربنا يخليك ليا .. سلام
حمزة : هترجعي مع الباص .. تمام
حبيبه (وهي بتحرك ايدها بالتحيه العسكريه ) : تمام يا فندم
مشي حمزة .. ووقفوا الأصحاب يتكلموا شويه ويحكوا لبعض عن الأجازه لحد ما سيف قال
سيف (بفضول) : شفتوا البنت اللي هناك دي شكلها جديده هنا
كلهم لفوا بصوا ناحيه لميس
مي : استنوا رويتر تيجي .. هتجيبلنا قرارها كله
كان في بنت قربت منهم وسمعت اخر جمله ..
ريتاج  : سامعه اسمي
(ريتاج .. رويتر زي ما بيقولوا .. تحب تجمع الاحداث كلها وتعرف التفاصيل .. مفيش حاجه تعدي من تحت ايدها من غير ما تعرفها .. وده مخليها صاحبه الكل .. شعرها  كرلي قصير بني اللون  .. عنيها بني .. قمحيه البشره )
مي : ياريتنا افتكرنا ربع جنيه
ريتاج وهي بتضربها علي كتفها : اخص عليكي اكيد انا احسن
ناديه : ريجو .. ما تعرفيلنا كده ايه حكايه البنت الجديده دي
( وشاورتلها علي لميس )
ريتاج (بثقه) : سيبوهالي
امجد : كده ماتت البنت يا عيني
كلهم ضحكوا
ورن جرس المدرسه اعلانا لبدايه الطابور
وقفت عشان اقول كلمتي وارحب بالطلاب في اول يوم دراسي
مجيده : احب ارحب بيكم كلكم بناتي واولادي في السنه الجديده .. يارب تكون سنه سعيده عليكم .. احب ارحب كمان بالطلبه الجداد اللي معانا السنه دي .. يارب تنبسطوا معانا وتعتبروا المدرسه دي بيتكم التاني .. اللي ميعرفنيش .. انا ميس مجيده مديرة مرحله الثانوى ... اتمني تعتبروني ام ليكم .. ولو اي حد عنده اي مشكله .. مكتبي مفتوح ليكم في اي وقت .. اتفضلوا يالا علي فصولكم عشان نبدأ .. وشدوا حيلكم من الأول عايزه افرح بنتايجكم الحلوه ان شاء الله
طلع الطلاب كلهم على الفصول .. وبدأ اليوم الدراسي ..
بدأت أمرعلى الفصول أتطمن على الاولاد في الفصول
دخلت فصل حبيبه واصحابها .. اول ما دخلت
كلهم : وحشتينا يا ميس قووي .. كان نفسي الاجازه تخلص عشان اشوفك يا ميس والله ..
وانهالوا عليا بكلمات الترحيب اللي بتدل اد ايه هما بيحبوني الحمد لله
مجيده : حبايبي انتوا اللي وحشتوني قوووي .. يالا شدوا حيلكم السنه دي انتوا ثانويه عامه يا حلويين .. عايزه ولادي يجيبوا اعلي مجاميع .. ومش عايزه مشاكل مع حد من المدرسين .. انا براهن علي فصلكم من زمان وانتوا عارفين
امجد : عيب عليكي يا ميس .. وراكي رجاله
مجيده (بضحك) : ماشي يا عم امجد .. هنشوف .. يالا سلام
جه وقت البريك
ريتاج : سلام يا حلويين
مي : علي فين
سيف : رويتر هتشتغل وتجيب كل الاخبار الجديده للمدرسه
ريتاج : انت اللي فاهمني يا سيفو
سابتهم ومشيت قربت من لميس اللي كانت قاعده مكانها علي الديسك
ريتاج : انا ريتاج .. وانتي
لميس اتخضت : ها .. انا لميس
ريتاج : سوري لو خضيتك .. انتي جديده في المدرسه صح
لميس : اه
ريتاج : كنتي في مدرسه ايه قبل دي
لميس : كنت في ....
ريتاج : بجد ده انا اعرف ناس كتير فيها .. تعرفي تقي .. وساره محمد .. وعلا .. و مصطفي
لميس : اعرفهم .. بس مش اصحاب يعني ..
ريتاج : طب وسيبتي مدرستك ليه ؟
لميس ( ومش حابه تحكي لحد حاجه ) : عادي يعني .. ( وكملت وهي بتقوم عشان تنزل ) عن اذنك
ريتاج وهي بصالها: اتفضلي (قالت لنفسها ) مالها دي .. اما اروح اشوف في مدرسين جداد ولا ايه
........................................................................................................
خلص اليوم الدراسي وكل واحد روح على بيته ..
لميس دخلت بيتها .. وحمدت ربنا ان باباها واخوها كانوا لسه ما رجعوش .. ندت على مامتها
لميس : ماما .. ماما انتي هنا
محدش رد
لميس لنفسها : شكلها لسه ما جتش .. احسن .. خليني اعرف اخد نفسي شويه في البيت ده
مسكت موبايلها وشغلت اغاني .. وقعدت تقلب علي الفيس بوك .. لحد ما سمعت صوت باب الشقه بيتفتح
قفلت بسرعه الاغاني ورمت الموبايل بعيد عنها واترمت علي السرير عملت نفسها نايمه
دخلت مامتها
دولت : لميس حبيبتي .. انتي رجعتي
محدش رد عليها .. دخلت اوضه لميس .. لقيتها نايمه على السرير .. غطتها .. وطفت نور الاوضه وخرجت
أما لميس فتحت عنيها بعد ما مامتها خرجت وسألت نفسها ليه مش بتحس بحنان مامتها .. يمكن عشان عمرها ما وقفت معاها في حاجه ضد قاسم او باباها .. ملقتش اجابة .. اتنهدت وغمضت عنيها عشان تنام بجد
........................................................................................................
لميس بتحاول تتأقلم في المدرسة الجديدة .. كانت اول واحده بتوصل من الفصل .. وتطلع تستني في فصلها .. كل يوم كان في نظرات بينها وبين سيف من غير كلام ..
لحد ما في يوم .. جه سيف بدري وهو قاصد يقابل لميس لأنه عارف انها بتوصل من بدري
دخل سيف الفصل .. شافها قاعده لوحدها وساكته .. قرب منها
سيف (بابتسامه ) : صباح الفل
لميس : صباح الخير
سيف : انا سيف
لميس (بارتباك) : اه ما انا عارفه
سيف وهو بيقعد على الديسك اللي قدمها وباصصلها بحب : طب دي حاجه جميله
لميس (باستغراب) : يعني ايه !!
سيف ( وهو بيسبل لها ) : يعني بصراحه كده انا معجب بيكي
لميس (بكسوف ) : بس انت لسه متعرفنيش
سيف : مين قال كده .. انا كنت متابعك الفتره اللي فاتت دي .. ومش عايز اعرف اكتر من اللي عرفته بنفسي وشفته
لميس ابتسمت
سيف (بابتسامه ) : ايواا بقاا
........................................................................................................
في بيت حبيبه كانت قاعده بتذاكر .. موبايلها رن .. ردت بسرعه وهي ملهوفه
حبيبه  : حبيبي .. وحشتني قوي
سليم : وانتي كمان يا حبيبتي .. طمنيني عليكي عامله ايه في المذاكرة
حبيبه وهي بتلعب في شعرها بالقلم اللي كانت ماسكاه : اهو بذاكر ... ادعيلي اخلص السنه دي علي خير
سليم : ان شاء الله يا حبيبتي .. هتجيبي المجموع اللي نفسك فيه عشان تدخلي الكليه اللي انتي عايزاها
حبيبه : ياااارب
سليم : مش هشوفك ولا ايه ؟
حبيبه : مش عارفه .. بس انت عارف الدروس تقريبا كل يوم .. ومفيش وقت اعمل اي حاجه خالص
سليم (بيمثل الزعل ) : طب اعمل ايه انا وانتي وحشاني كده
حبيبه (ابتسمت بكسوف ) : انت كمان واحشني ونفسي اشوفك .. بس اعمل ايه بقا .. المذاكره اولا يا استاذ عشان اخلص ..ولا عايزني اجيب مجموع وحش ..
سليم : لا طبعا .. انا واثق في حبيبتي انها شاطورة
حبيبه (بحب) : ايوه حبيبي اللي علي طول مشجعني
سليم : وهو انا عندي كام حبيبه يعني
حبيبه : ربنا يخليك ليا
سليم : ويخليكي ليا يا حبي
(سليم .. في اخر سنه كلية علوم .. شاب متحمل مسؤوليه .. بيحب حبيبه من ساعه لما كان في ثانوي .. واعترفلها بده اخر سنه ليه في المدرسه .. وهي كانت بتبادله الشعور .. ومن ساعتها وهما علي تواصل )
........................................................................................................
كل يوم الصبح سيف كان بيروح المدرسة بدري عشان يقابل لميس ويقعد معاها .. لحد ما ف يوم .. وهما في الفصل بدري
سيف قاعد جنب لميس علي الديسك بتاعها وبيتكلموا سوا .. فجاه قرب منها وعايز يبوسها
#مستنيه رايكم