زبيدة تلفونها اتصل من الصباح عاينت في الشاشة لقتو دة رقم امها ردت طوالي الو امي صباح الخير امها :والخير يجي من وين يا زبيدة زبيدة :مالكم في شنو يا امي. امها قالت ليها :اخوك الدلاهة ماجد عايز يعرس في مرتو زبيدة :دة كلام شنو يا امي ولدك دة شكلو جن علي الاخر هسة ملاك دي مرة بعرسو فيها امها :الكلام م بنفع في التلفون لو لقيتي طريقة تعالي علينا. اتكلمي معاهو انتي الوحيدة اللي ممكن يسمع كلامك زبيدة :حاضر يا امي عندي شغل اخلصو واجيكم. اصلا لو جيت هسة ماجد حالقاهو طلع الشغل وعلي الاقل هشام برضو يكون موجود لانو الكبير فينا وكلمتو زي السيف امها :خلاص تمام وانا في الفترة دي احنس ملاك واطيب خاطرها ما تنسي انو البنت يتيمة وامها وصتني علليك زبيدة :خير يا امي الله يسهل القاسي ملاك دي اصلا بنت اخت منال ' امها ماتت بعد الولادة بي كم يوم جاتها مضاعفات ومناعتها ما قاومت المرض واتوفت لكن قبل تتوفى وصت منال علي بنتها ووصية الميت تنفذ . ومنال شالت ملاك وربتها زي بناتها. ويوم ورا يوم ملاك كبرت وبقت عروس زي القمر. وخالتها حبت تسترها وتزوجها وقالت مافي احسن من ماجد بطمئن علي بنت اختي معاهو والولد ولدي والبنت بنتي وزيتنا في بيتنا. وملاك وافقت علي ماجد لانها بتحبو من صغيرة ولحد كبرت حبها كبر معاها. المهم تمت مراسم الزواج كلها وملاك ما زالت عايشة مع خالتها في بيتها. ولانو مافي طريقة تعيش. في بيت منفصل عشان ماجد شغال في مكان بعيد وبجي في الاسبوع مرتين زبيدة اول حاجة استأذنت من غسان انها تمشي بيت ناس امها.ووافق ليها ((ودة الصح الاستئذان واجب. ما تتطلعي ساي دون علم زوجك ولو قال ليك ما تطلعي خلاص اسمعي الكلام وبلاش عناد وبي رواقة كل حاجة عايزاها بنفذها ليك)) زبيدة خلصت شغلها وبعد العصر مشت بيتهم سلمت علي امها ودخلت لملاك في غرفتها وبقت تطبطب عليها قالت ليها: يا ملاك انتي قبل ما تكوني مرة اخوي انتي اختي وبنت خالتي. وما بنرضي فيك ملاك :انا ما زعلانة عشان عايز يعرس فيني يا زبيدة. نعم دي حاجة بتحرق المرة من جواها. لكن انا غضيت النظر عنها. عشان ما نصل لطريق مسدود. انا زعلانة لانو ماجد اخر المطاف قال لي انتي عاقر وما بتجيبي اولاد. كلامة دة زي السكين البتقطع في حشاي قولي لي ذنبي شنو لو ما ولدت. لانها دي ارادة ربنا كدة وقسمتو انا اعمل شنو. مشيت الدكتور وفحصت ولقيت ما عندي اي مشكلة تمنع الانجاب. وكلمتو قلت ليهو ما عيب الزوج وزوجتو مع بعض يفحصو ويشوفو الحاصل. طلبت انو يقابل دكتور اخصائي عقم وامراض الذكورة. رفض قال لي انا سليم وما فيني عيب. العيب فيك انتي ودكتورك المشيتي ليهو دة فاشل زبيدة :سجم خشمي دة كلو يطلع منك يا ماجد ملاك :والله ماجد دة ما كان كدة لكن ليهو فترة متغير وبقي يفتعل المشاكل معاي. زبيدة :كدي خليهو بعد يجي عندي كلام تاني معاهو . هشام جاء من الشغل وشكلو مرهق شديد. دخل لامو في المطبخ سلم عليها. وقال ليها :عايز كباية قهوة مظبوطة يا امي. حاجة منال :حاضر يا عشاي هشام :مصدع صداع فظيع حاسي راسي حيتكسر من التفكير في ولدك وعمايلو. امو :اخوك دة التقول مسحور. دم ما ماجد ولدي الانا بعرفو. امشي سلم لزبيدة اختك جاتنا ذاتها بي سبب الموضوع دة واخد راحتك لحد ما اجيب ليك القهوة ماجد جاء واخوانو اتكلمو معاهو وناقشوهو. واستخدمو معاهو كل اساليب الضغط كل ردو ليهم :دة حقي الشرعي وما ارتكبت شي غلط بي كلامو دة سكتو كلهم الا امو. قالت ليهو :ما عافية منك لو عرست في ملاك ومن الليلة لا انا امك ولا بعرفك..كل دة من برة قلبها عشان تخليهو يتراجع عن قرارو
يتبع.....
