ماجد دة لانو الصغير ومن زمان طلباتو مجابة ولمن كبر راسو بقي قوي زي الحجر ما بسمع الا العايزو امو لمن قالت ليهو ما عافية منك ولا اشتغل بيها طلع طوالي من البيت وطلع طوالي وقفل الباب وراهو. يوم يومين ما جاء. اتاريهو مشى لواحد صحبو وقعد معاهو حكي لصحبو كل الحاصل وانو عايز يتزوج لانو مرتو ما بتجيب جناصحبو حكيم شديد قال ليهو طيب انت اسمع كلام مرتك وبرضو امشي افحص زي ما هي عملت عشان لو في مشكلة تتعالج بدري قبل الموضوع يستفحل . ماجد :يا زول انا راجل وكلمة ما فيني. عايزني افحص علي اخر الزمن. انا ما فيني عيب وسليم مية في المية. صحبو واسمو علاء الدين : يا ماجد يا اخوي مافي زول خالي من العيوب في الدنيا الكمال لله وحده. وحتي عدم الانجاب دة ما عيب لانو قسمة من ربنا والقسمة ما عيب العيب عدم الرضا والقبول بيها انت خسران شنو. امشي افحص وبعدها قرر يا اما تتزوج او ما تتزوج. ماجد :اسمعني انا فكرة الزواج دي دخلت راسي وما بتطلع نهائيا. انا غلطان اني جيتك اساسا. يلا معاك سلامة. اها ماجد مشي لاهل البنت العايز يخطبها ابو البنت سالو وين اهلك ما جبتهم معاك. ماجد :ابوي متوفي وامي مرأة كبيرة ما بتقدر تجي واعمامي وخوالي مقاطعننا ما شغالين بينا ابو البنت :يا زول نحنا بنشتري راجل. ابشر تب. ولا يهمك. انت جيت وانا اديتك بنتي وعلي بركة الله. هسة بعقد ليك ((حاجة تحير شديد. ويا حليل زمان. هسة الراجل يجي بدون اهلو ..يدوهو ولا يسالو من حسبو ولا نسبو شنو؟ ؟هي البنت دي كوز موية بدوها ساي كدة .. الراجل لو ما عرفو اهلو منو. ومن وين وتفاصيل تانية كتيرة مفترض ما يدوهو اصلا. لانو دة نسب وحياه واسرة. بيت واولاد. حاجة مصيرية ..وغلط انو اهل البنت يربطو مستقبلها بزول مجهول .)) ابو البت لملم الرجال وعقد ليهو بدون تردد وبسرعة عجيبة زي الزول العايز يتخلص من الحاجة ماجد بعد ما الناس اتفرقت قال عايز يسوق مرتو اهلها كلهم وافقو الا امها قالت ليهو ما بتسوقها غنماية هي تسوقها ساي. نحنا عندنا عادات بنعملها حتي بعدها نسلمك مرتك ماجد :عادات شنو يا خالة ام العروس :عندنا قروش العوايد وحق اللبن ولمس القصة وقطع الرهط ماجد هاج شديد دة شنو التخلف الانتو فيهو دة العادات دي قديمة شديد وهسة الدنيا اتطورت وانتو لسه شغالين بالحاجات دي انا ما عندي طريقة بعاداتكم دي واذا متمسكين بيها شديد فأمسكو بنتكم عندكم بديكم فرصة لحد بكرة فكرو وادوني خبر. وطلع طوالي منهم اها والد العروس قال لامها:يا ولية انتي جنيتي في عقلك دة. كدة بتطفشي الراجل عادات شنو نحنا ما عايزين منو حاجة غير البنت تعيش معاهو وبي كدة نكون اتطمننا عليها وبي عمايلك دي الموضوع كلو حيجوط ويا ويلك لو طلقها امها :خلاص بكرة نجهزها ليهو ويجي يسوقها ما مشكلة بعديها ليهو لكن بعدين بوريهو كيد النساء علي اصولو ماجد بعد طلع من اهل مرتو الجديدة كلام علاء صحبو بدأ يأثر فيهو وفي جواهو قرر انو يمشي يفحص نفسو ويشوف العله في منو. وفعلا مشي الدكتور وحكي الحاصل وبعد ما اتعرض لكل عمليات الفحص كانت النتيجة انو ماجد عندو دوالي في الخصية والحاجة دي حتي اذا اتعالجت بعملية جراحية فاحتمال حدوث الحمل ضعيف جدا ماجد حس الدنيا سودت في وشو من كلام الدكتور قام ع حيلو من الكرسي وهو بقول لا استحالة انا ما حاصير اب لالا الدكتور دة كذاب كذاب وشوية شوية بقي يرفع في صوتو لحد ما في العيادة افتكروهو مجنون طلع برة وقعد ليهو في مسطبة كدة قدام العيادة وهو يكلم نفسو انا معقولة خلاص كدة بقيت راجل عاقر ما منو فايدة في الحياة في اثناء تفكيرو جاهو سمع صوت تلفونو برن طلع التلفون عاين للشاشه كدة وعملو صامت ورجعو ختاهو في جيبو ..التلفون دة من منو حنعرف في الحلقة 8
يتبع....
