اللي كان متصل على ماجد دة نسيبو الجديد. لمن الاتصال اتكرر ماجد رد الو السلام عليكم يا حاج. والد البنت واسمو علي :وعليكم السلام. انا اتصلت عشان اقول ليك مرتك جاهزة تعال سوقها ماجد :حاضر بجي بكرة بسوقها وقفل الخط. ولسة بفكر في انو كيف حيواجه ملاك مرتو وهو غلط في حقها وجرحها بي كلامو لمن قال ليها يا عاقر وللاسف طلع العاقر هو. يعني مرتو ما عندها مشكلة ((ودة عيب المجتمع السوداني دايما بضعو اللوم علي المرة وبقولو عاقر رغم انو مشكلة عدم الانجاب ممكن تكون في الراجل لكن لا الناس م بتفكر كدة. بتفكر طوالي سلبيا تجاة المرة وكانو المرة دي وحدها البتجيب الاولاد او وحدها اللي ربنا كتب انها عقيم. لا العقيم ممكن يكون الراجل وممكن تكون المراة وممكن يكون ولا واحد عقيم مافي لكن في مشاكل متعلقة بالجهاز التناسلي في الانسان وعايزة علاج وعمليات جراحية. وبرضو ربنا سبحانه وتعالى بختبر صبرهم وقوتهم علي التحمل. وسبحان الله الراجل دايما ما بصبر وطوالي بجري بعرس واحدة تانية ظنا منو انو مرتو ما بتولد والشي العحيب الجديدة دي ذاتها ممكن ما تنجب فالحكاية قسمة ونصيب الناس تصبر وتحتسب ..ورغم انو احساس الامومة بكون قوي لكن المرة بتصبر وبتسعي في انها تتعالج عكس الراجل اللي ما بعترف بي عجزو او مرضو. وعلي فكرة عدم الانجاب دة لخير يعلمه الله فالزوج والزوجة ما بيعرفو الخير المخبي لانو الاولاد ممكن يكونو ما نافعين او ما بارين لذلك ربنا عالم بي خلقو) ). اها ماجد فكر يطلق ملاك عشان اسباب كتيرة. منها انو ماجد ما قادر يواجه ملاك بعد الجرح االي سببو ليها ومنها انو عايزها تشوف نصيبها مع غيرو وما تتحرم من احساس الامومة . بعد اسبوع من طلعتو من بيتهم رجع تاني ودق الباب فتحت ليهو الباب امو. قالت ليهو قبل يفتح خشمو بكلمة. الجابك شنو يا رمة يا ولادة الندامة ماجد :جيت اطلق ليك بت اختك وماشي. حاجة منال :طلقة في نص راسك شاحدة ربي. ادخل جوة وما تشمت فينا الجيران. توش دخل ولا سلم حتى علي ناس البيت. علي حس صوتو ملاك جات طالعة برة قال ليها تعالي جوة الغرفة عايزك في كلام مهم. بعد دخل الغرفة قفلها كويس عشان يضمن امو ما تسمع الكلام ماجد :يا ملاك انتي عارفاني دغري وصريح واللولوة ما حقتي. انا قررت انو انا وانتي نفترق ملاك :قصدك شنو؟ ماجد:قصدي واضح. ولو ما فهمتي انا عايز اطلقك. لانو خلاص انا عقدت علي واحدة تانية من يومين وما بقدر استمر معاك. ملاك والدموع مالية وشها :انا سويت ليك شنو يا ماجد؟ ؟غلطت معاك فب شنو؟ حصل اتلومت معاك. عشان تعمل فيني كدة. تعرس فيني واحدة تانية؟ ودة كلو عشان نحنا ما انجبنا اهاا انا نسيت دة حقك الشرعي زي ما قلت حقك انك تعرس عشان تجيب ليك ولد يشيل اسمك. ماجد وبعد سمع كلام ملاك انهار شديد من جواهو وقال :المشكلة يا ملاك مافي ولد حيجيني ولا حيشيل اسمي انا عاقر. انا علة في حياتك وحاحرمك من انك تبقي ام. انا يا ملاك خلاص مافي امل ابقي اب لكن في امل انك تبقي ام. انا حاطلقك عشان تشوفي نصيبك مع غيري وتسمي كلمة ماما. ما عايز اظلمك معاي يا بنت خالتي. ملاك :انا عايزاك انت ما عايزة حاجة تانية. كل مشكلة وليها حل وانا في عز مشكلتك ما بتخلي عنك ماجد :لا ما تقولي كدة لانو بعد زمن الموضوع حيفرق معاك وحتندمي كتير. غير كدة انا اتزوجت واحدة تانية والامور اتلخبطت شديد. ملاك :انا معاك والمرة الجديدة تطلقها هل حتتطلق ملاك ولا المرة الجديدة ولا مافي اي واحدة فيهم حتتطلق. حنعرف في الحلقة 9
يتبع....
