دهاليز القدر للكاتبة
Nuha-d-h
رفعت ست فوزية الغطة عن الصينية ما شاء الله ماباقي شي ما حاطينه بالصينية لحم شوي وكيمر عرب وعسل وكاهي وخبز عروك حار(متكون من طحين ولحم وكرفس و وبصل وكركم وينخبز بالتنور )
وترمز حليب عرب وترمز جاي والريحة تجنن يمة قربت الصينيه علية وصاحت المعلمات الموجودات وكعدنا ناكل بس عمري ما ماكلة هيج اكل طيب وتازة
زهراء -مشكورة ست فوزية تعبتج وياي وعاشت ايدكم والله صارلي شكد ما ماكلة هيج اكل
ست فوزية- طبعا هذا الحليب والكيمر والخبز واللحم كلة من حلالنا تازة احنا كلة ناكل يوم بيومة
امي الحجية تكول هاي رحمة الله علينا
زهراء-حقهة الحجية من تكول ما اعوف مكاني وناسي
فوزية-هاي انتي اول بنية شابة من المدينة تحجي هيج
كل المعلمات الي قبلج يكومن يحجن علينا شلون متحملين عايشين هنا
عبالك موتة ويظلن. يتأفأفن بدلع اوي. واوي
دخلت رفل كالعادة بدلع - عوع هاي شنو لحم وكيمر من الصبح
فوزية خزرتهة -استغفري ربج هاي نعمة الله يالله اني اترخص راح اطلع اليوم من وكت لان اليوم ابن اخوي راح يرجع من الخارج وصار دكتور فاليوم كلنا مسويين عزيما وملتمين ببيت ابوي الحجي ببيت الجبير فبنات الاسبوع الجاي كلكم معزومات على المولود لان الحجية ناذرة ان تسوي مولود بنجاح حفيدهة
زهراء وامنة -الف مبروك يارب تفرحون بالدكتور
زهراء بيني وبين نفسي ظليت احوم اتمنى اسئلهة منو الي راح يسوي للمولود الحلويات استحي اسألهة
فكلت خلي الباجر اجيب عينات مال حلويات للمدرسة اخليهم يضوكون من عندهة بلكي يعجبهة
الله لو استلم تجهيز هاي الحفلة شكد راح تفكلي عازة
رجعت للبيت كلش تعبانة برجعتي لكيت زينة تبجي وزينب همين تبجي وماما وبابا ماكو بالبيت
اني كلبي وكع بين رجلي
زهراءضربت على صدرهة والصوت كوة يطلع -يمة شكو شصاير
زينب -بابا تخربط ووكع واجة مثنى اخذهم هو وامي للمستشفى
يشوفون شنو بي
اني كعدت بالكاع رجلية بعد ما يشيلوني من الهبطة
زهراء-ربي سترك ربي هذا ابوي ربي لاتفجعني بي ورة ساعتين رجعت امي ومثنى
امي واجتافهة محنية وتبجي
اني ظليت بس اباوع على الوجوه مانطقت اي كلمة عندي طبع من اخاف لو انقهر ابد ما اطلع صوت او احجي وكأنما صوتي قنبلة مووقوتة اخاف اتكلم وتنفجر بوجهي
ماما ودموعهة على خدهة -ماما ابوكم گلبة كلش تعبان ويحتاج عملية تبديل صمام
زينب وزينة -اي ماما خلي يسوي العملية
مثنى بصوت حزين-صحيح احنا نكول خلي يسوي العملية بس العملية مكلفة يعني اذا يريد يسوي العملية وبالعراق وعلى حسابة الخاص تكلف بحدود ال١٥مليون لان هي عملية فوق الكبرى
زهراء يمة سودة علية بابا عمت عيني عليك شلون راح ندبر هذا المبلغ منين نجيبة
زينب تخربطت واغمى عليه وركضت يمه ورشيت عليهة ماي ورفعنا رجله للاعلى احتمال هبط الضغط عندهة من القهر وامي ايدهة على راسهة وتبجي وزينة حبيبتي كعدت مكرفصة بزاوية و تبجي شلون الطفلة
شفت روحي اني الوحيدة الدمعة عاندت وياي وشاطت ما تقبل تنزل
اني لازم اصير قوية حتى لو اتمنى بداخلي اصرخ بصوت عالي يرج اركان البيت وابجي واتمنى امي تخليني بحضنهة شلون الطفل واظل ابجي
اكو هواي انواع للضعف عند البشر بس اقسى انواع الضعف الي يكون بوقتها الانسان لاحول ولاقوة مابيدة شي يقدمة لاعز انسان حتى يشتري سنين عمرة ويبقى عايش بين عائلتة
وين اروح يارب وين انطي وجهي ضاكت بوجهي الدنيا ربي فرجهة عليه
زينب تباوع عليه بعيونه وكأنما تكول شلون زهراء شنو الحل شنسوي
وامي تباوع علي تريد نفسهة مني وعيونهة تكول زهراء دبريني شتصرف
وزينة تنظرلي وعيونه تكول زهراء اريد بابا احتاجة ما مستعده هسة اخسرة بعدني صغيرة على اليتم
دخلت للمطبخ وسويت شوربة لبابا وانطيتهة لمثنى راح هو يبات يم بابا بالمستشفى خطية مثنى اخ والنعم من عندة اخذ الاكل وراح
رحت على ماما وكومتهة ودخلته الحمام وسبحته مثل الطفل وبدلتله ووديتهة للغرفة مشطت شعرهة وخليته تتوضى وتصلي عفته وطلعت لخواتي
زهراء - يالله بنات كومو صلو اذن المغرب رحت اتوضيت وصليت ودخلت للمطبخ كعدت اسوي كبب وحلويات عينات. دخلت زينة للمطبخ
زينة -شن🤔و? جاي تسوين
زهراء-جاي اسوي عشا وعندي كم طلبية اخلصهن
خطية زينة كعدت يمي واخذت تلف بالكبة وتكلي علميني شلون تسوين كيك عفية حتى اسوي وابيع بلكي نجمع فلوس العملية واني الف بالكبة وعيوني غوشت من الدمع
زهراء
زينة من هسة تريدين تحملين هموم الدنياعلى ظهرج وانتي صغيرة بعدج صغيرة ياوردة المثلج تحلم شتلبس بيوم العيد مو تفكر شلون تدبر فلوس عملية ابوهة
وكعت دمعة من عيوني على ايدي واني الف الكبة خطية زينة رفعت راسهة واشافتني كامت وجرتني لحضنه وكأنما بهذا اليوم زينة كبرت خمس سنوات على عمرهة
زينة-زهراء عفية ما اريد اشوفج هيج اني قوتي هسة جاي استمدهة من عندج مو وكتج تضعفين وتنهارين اني وماما وزينب نحتاجج
زهراء وهي تمسح بدموعهة بحسرة اني لازم اقوى حتى اصير سند لامي وخواتي -لاحبيبتي لاتخافين علية اختج بميت رجال ان شاء الله ربج يحلهة مايقصر ويانة
والله ثاني كعدت من الصبح وسويت ريوك وكعد ماما وريكته وسويت شوربة لبابا وريوك لمثنى خطية الولد عايف دوامة ومكابل بابا بالمستشفى
اجة مثنى من الصبح اخذ الاكل وامي وطمنا ان بابا حاليا مستقرة حالته بس الدكتور يكول كلما استعجلتو بالعملية يكون احسن لقلبة لان مو لصالحة التأخير
زهراء
جسمي كام كلة يرجف يا ربي رحمتك ربي انتى اعلم بحالنا.
وسمعت صوت هورن السايق اليوم اجة متاخر لان عندنا امتحان نصف السنة فاجة الساعة ستة ركبت واني حسبة تاخذني وحسبة توديني وصلت للمدرسة وعقلي راح يوكف من التفكير شنو اسوي وين اروح وشلون احصل هذا المبلغ اني عندي كم فلس جوة ايدي مليونين البقية شلون احصلهم
اول ما وصلت فتحت الحافظات ووزعت للمعلمات الحلويات وكعدت اسوي دعاية للحلويات وكعدن يسئلني عن الاسعار وفرحن لان اسعاري مناسبة مقارنتا بمحلات الكيك والحلويات الاخرى
وظليت احوم واباوع على ست فوزية
اخر شي ما اتحملت اخذت ست فوزية على صفحة
-ست فوزية ممكن طلب بس ما اريد احرجج بس انتو منو راح يسويلكم حلويات المولود
فوزية-والله يازهورة احنا تجينا سيارات خاصة بيهة برادات من الكويت خاصة كلهة معجانات وحلويات وكاكاو وشكولا متعودين كل مناسباتنا واعراسنة هيج نسوي
زهراء تهز بيدهة 🙄واني البطرانة جايتهة منو يسويلكم حلويات اني وين تفكيري وهمة وين الله يرزقهم من وسعة
ست فوزية-هَـا اي صدك اتذكرت بس اني ضكت الكليجة والكبة مالتج طبعا محد يلحك الكليجة العراقية فاني سولفت لام عمار مرت الحجي عن شغلج كالت تكدرين تطلبين من البنية تجينا من الصبح علمود تلحك على العدد وتكملهن
زهراء اجيت ابجي من الفرحة -اي خالة تدللين شوكت ما تريدين اني اجيكم
فوزية-خوش لعد انطيني رقم النقال حتى اتصل عليج ونتفق لان عكب باجر عطلة وما اكدر اشوفج
زهراء-اني ماعندي نقال بس راح انطيج رقم امي سجلي عندج
رجعت للبيت واحس الكاع ما شايلتني من الفرحة
دخلت وشفت زينة تطبخ وزينب تعجن
زهراء-گواكم الله بنات
زينب وزينة -هلة بزهورة شلونج
زهراء -اندعولي بنات اتفقت وية معلمة ويانة بالدوام راح اجهزلهم طلبيةعندهم مناسبة كلش ضخمة بلكي احصل فد مبلغ زين دسم يساعدنا
زينب -اني بعت التراجي مالتي ب260الف خليهن على الفلوس العندج
زهراء😧-لازينب ليش هيج سويتي هاي فلوس مهرج ولج ليش خاف مثني مايقبل
زينب -سودة علية مثني ميت قهر مايكدر يساعد وكال راح اقدم على قرض بلكت يكفلوني بس المشكلة الوضيفة مالتة عقد احتمال ما يشملة قرار القروض واني واستأذنت من عندة وقبل ابيعهن
زهراء شبكت زينب شوية وسمعنا صوت الجرس مال الباب
زهراء صاحت منو
-اني اني عمج نبيل فتحت الباب
ودخل عمي وجه اسود وتعبان من السفر لان هو عايش بغداد وهم خلفتة كلهن بنات خطية
نبيل-هلة عمي زهورة شلونكم بوية
سمعت بالخبر واجيت بسرعة شكو احجولي
زهراء حجيت كلشي لعمو
اباوع عليه شلون ظل يحجي بالنقال
حتى يجمعلة كم فلس وادري بي حالتة على گدة
بس يتمنى يساعد اخوه
نبيل -عمو اني كل الي عندي خمس ملايين
للكاتبة
Nuha-d-h
يتبع
