دهاليز القدر
للكاتبة
Nuha-d-h
ترجيع باك للاحداث
ست فوزية وهي كاعدة وية ام عمار والحجية بالغرفة
والله يا ام عمار اني هم بالاول ماصدكت بحجيهن بس
من شفت بعيني بعد ما كدرت اسكت واذا ما تصدكيني
اجيب النسوان الي شايفينهة تمشي وياه
اكلج حتى يعرف اوصافة تتذكرين من رحنا للفاتحة مال ام حسين واجتني سعاد وكعدت يمي وحجتلي هذا الحجي وكالت هذا الرجال الي مرافگها
هو كاعد وية ابنهم وواصفلة حتى شكلهة وعيونهة ولون شعرهة وحتى يعرف اسمهة
خية واني ما حجيت لان ماصدكت هذا الحجي على زهراء لان ما شفت عليهة شي يخليني اشك بيهة بس ذاك اليوم شفت وجهة اصفر مخطوف من دخلت للمدرسة فشكيت بيهة وكعدت اراقبهة اكلج لحد هسة قبل شوية من ابني وصلني بالسيارة الكم لكيتة يمشي وراهة بالشارع ويسولفون
وبهاي الاثناء
اندك الباب ودخلت عليهم شيخة
شيخة واستغلت الموقف والفرصة اجت لحدعندهة-اي خالة ليش ماتصدكين
ام عمار بغضب -ولج شيخة شنو جنتي واكفة تتسمعين لحجينا من ورة الباب ادبسزز ماتبطلين هاي عادتج امشي طلعي برة والسمعتي اكسر راسج اذا حجيتيه
شيخة بقهر-لا حبوبة ما راح اسكت هلمرة لان جنتج مصختهة كل يوم وية رجال خليني ساكتة احسن
ام عمار سحبت شيخة من زندهة -اكول تحجين عدل لا ادور فجج بطراك واعلمج الحجي شقصدج كل يوم وية رجال
شيخة وهي تحس بالغل - خالة بعد ما اكدر اسكت ترة هي حتى كامت تتحارش بعمار وخبلتة بسوالفهة وجانت تتحايل علية علمود تصب الغدة لعمار تكلي كعدي انتي تعبانة وعندج جهال خليني اني اصب الغدة للشيخ عمار وتروح تتموع يمة وتدنك كدامة
واني سمعت عمار يحجي وية نوال والله بترس اذني الباجر الياكلهة الدود يكول ان هو يحب زهراء وميت عليهة ويكللهة حتى الذهب اختاريتة بيدي الهة واحتار شهديلهة ويكول بس بعد ما اكدر احجي شي ويكول لنوال سدي للموضوع هاي مرت اخوي
خالة انتي ما انتبهتي على عمار من دخلت علينا للبيت هاي العايقة وعمار كام ما يلفي على البيت ويشغل نفسة بالشغل وسفراتة صارت هواي بالاونة الاخيرة حتى مدالية سيارة خالهة بحرفهة Z
واذا مو مصدكتني اتصلي هسة على نوال وسئليهة هسة همة بالمطار
والله ام عمار ماجذبت خبر كبل اتصلت على نوال
ام عمار -الو هلة نوال شلونج
نوال -هلة يمة شخبارج
ام عمار -شوفي نوال عمار يمج ؟
نوال -لا راح يسلم الجنط ويختم الجوازات عند الكاشير كولي خالة
ام عمار -راح اسئلج واريدج تجاوبيني بَـــاي او لا
نوال عمار صدك هاوي زهراء
نوال بصدمة-ها يمة
ام عمار -كولي اي لو لا
نوال بارتباك- هَـا يمة اي هو جان يحبهة
ام عمار وايدهة كامت ترجف
نوال -بس اوكفي خالة لاتستعجلين خلي افهمج السالفة
ام عمار -مايحتاج تفهميني افتهمت كلشي يالله مع السلامة لاتجيبين سيرة بالسالفة لعمار ما اريدة يعرف بان اني دريت
وكامت وسدت النقال بوجه نوال
ونوال ظلت بحيرة ماتعرف شتتصرف ماتكدر تحجي لعمار الي صار
