دهاليز القدر
للكاتبة
Nuha-d-h
طبعا من وكعت زهراء واغمى عليهة
وياسر كعد بالگاع وانتجة على الحايط وخلة ايدة على راسة ما جاي يستوعب الكلام اللي سمعة من شيخة من اول ما دخل للبيت وشاف الوجوه مخطوفة سأل شبيكم
وشيخة حجتلة كل اللي صار مع بعض الكذب
ياسر
من سمعت حجي شيخة وشفت باب غرفة بيبيتي الحجية مقفول وزهراء وامي وعمتي فوزية وبيبيتي موجودات جوة بالغرفة عرفت ان حجي شيخة كلة صحيح وسمعت امي تصيح وتضرب بزهراء
اني برج من دماغي طار اتخبلت ردت بس الزم زهراء والله اجنزهة واذبهة للجلاب اني الساقطة هاي تضحك علي وتسويني علج بحلك اليسوة والمايسوة وتنزل راسي
سمعت صوت باب الشقة يندك بعد ما نهيت زهراء نهي بالواير ودفعتها
واغمى عليهة كمت فتحت الباب
اتفاجئت من شفت عمار بوجهي
عمار
استقبلنا ابن عمي هشام بالمطار وجان جاي وجايب سيارتي السودة العالية وصلنا اني ونوال للبيت جنت كلش تعبان لان الضغط مالت الطيارة لحد هسة بأذني
دكيت الهورن وطلع البنگالي فتحلنا باب الكراج استغربت شنو السالفة اشو لا اخواني لا ابوي محد اجة اخذنا من المطار اني متعود ان كل مرة واحد من اخوتي همة الي يجبوني من المطار
نزلنا
وعفت البنگالي ينزل بالجنط
سمعت اصوات الرياجيل بالديوان
عفتهم ودخلت من باب المطبخ اريد شوية اغسل وارتاح ونوب اروح اكعد يمهم بالديوان فدخلت ونوال وراي تمشي شفت بس الخدامات بالمطبخ اتقدمت لداخل البيت وبالباب مالت الصالة جاي ادخل وسمعت صوت ابوي يحجي بحرگة
ابو عمار -والله طلعت مو هينة بنت الجلاب شلون نزلت روسنا بالطين
والله لوما ياسر كاتلهة جان اني كتلتهة بنت المداس
عمار سمعت كلام ابوي وجمدت بمكاني
كل مايحجي ابوي كلمة اني تتوضح عندي الصورة اكثر
نوال كانت تمشي وراي واندعمت بضهري واشرتلهة ان تسكت اريد اسمع
ابوعمار -يعني ما اعرف شلون لفت عقل عمار اريد اعرف شوكت واحنا وين جنا زين عمار شلون يرضاهة على نفسة هاي مرت اخوه ولا والساقطة بعد تتمعشگ وتتواعد بالطريق وية هذا العار ناظم الا اشرب من دمة بس كون الزمة والله لو ما عندنا خطار وعيب جان اليوم اسويهة دم للرجاب
عمار احس كلام ابوي عبالك صعقة كهربائية هزتني هز وشمرتني بالگاع
دخل عليهم عمار-اي بوية كمل خلي اسمعك
ابو عمار بصدمة -ها بوية الحمدلله على سلامتك انت وصلت ؟
عمار بقهر-اي والله بوية ويا ريتني ما لفيت من كون لفاني البين ولا سامع هذا الحجي
ابو عمار -اوكف بوية خلي افهمك
عمار وبغضب -يصير خير بوية ما اريد اسمع اي شي هسة خلي يطلعون خطارنة وبعدين نتفاهم ياسر وين
ام عمار وهي تحجي بصوت مبحوح -اخوك فوك بشقتة
عمار عافهم وصعد
حتى ما سلم على امة ولا على ابوه حس ان اهلة طعنوه
عمار دك على باب شقة ياسر
فتح ياسر الباب وتفاجئ من شاف عمار واكف
عمار وبقهر وبصوت هادئ كلش يخوف -عفية عليك يابن امي وابوي هيج تاليتك تصفة بيد النساووين ويدفعوك
ما اتوقعت اخوي الدكتور ياسر اللي كلهة تحلف بيه يكون هيج تافه
ياسر وهو مدنك راسة -خوية انت لاتحجي لان ما فاهم السالفة شنو
عمار وبغضب وكوة لازم روحة -ولك اي سالفة شتحجي انت يعني اني الشيخ عمار اللي الناس كلهة تحلف براسي وتسويلي الف حساب يجي اخوي يرخصني ليش ولك شنو شفت مني
ياسر بقهر -محشوم يا اخوية انت شيخنا ورفعت راسنّا العيبة مو بيك العيبة بمريتي طلعت بنت شوارع
وساقطة واني العار اللي دخلتهة بيتنا وكعدتها بين اهلي بنت الزنى
عمار بقهر-عوفك من هذا الحجي وما اريد اسمع اي كلمة منا لحد ما يطلعون خطارنا ويتوكلون بعدين الي حجي وكعدة وياكم
يالله انزل جوة گدامي
عمار انتبهت على زهراء خطية واكعة بالكاع والدم ماخذهة اخيذة واني اتخبلت من دكيت الباب على ياسر بقينا واكفين على الباب نحجي وعيني كلهة على ياسر وياسر جان ساد الباب بطولهة وعرض اكتافة فما انتبهت من اتحرك ياسر وراد يطلع شفتهة واكعة بالگاع والدم تارس الگاع
عمار-ولك شنو مخبل انت ولك الابنية مدماية ولك شسويت بالبنية
كبل صحت بصوت عالي على نوال واسيل
اجن نوال واسيل يركضن على صوتي
واشرتلهم على الزهراء
عمار -سترنها ولبسنهة عبايتة وبركعهة خلي نوديهة للمستشفى
اقتربت اسيل من زهراء ونزلت بصفهة حتى تلم شعرهة بقراصة
اسيل بصرخة -عمار الحك هاي الابنية ما جاي تتنفس
طبعا من صرخت اسيل
اللي بالبيت كلهم صعدوا خطية حتى الحجية اللي مابيهة حيل كوة صعدت وصارت ناس تدعم بناس
ياسر اتخبل من شاف زهراء زركة وما تتنفس
ما عرف شيسوي هج وعاف البيت وطلع ومحد يدري بي وين
وعمار جاب شرشف الجرباية ولف زهراء بي وشالهة ونزل بيهة الدرج ونوال خطية فتحتلة باب السيارة الخلفي واسيل لابسة عبايتهة بالمكلوب خطية من الخوفة ما منتبهة راحت ركض وركبت من باب السيار الخلفي من الجهة الثانية وعمار دخلهة بالسيارة وصار راس زهراء بحضن اسيل ونوال ركبت كدام وعمار شخط السيارة وانطلق وطبعا البيت دخل بالانذار وواحد ظل صافن بوجه الثاني
ام عمار ارتفع سكرهة ووكعت وركضت عليهة شيخة وانطتهة دواهة ومحمد بقة وية ابوه وعمامة يم الخطار
الحلو ببيت الشيخ سلمان ان هو كلش جبير فهاي الاحداث كلهة اللي صارت والخطار ما حسو على شي لان همة الديوان مسوينة كلش بعيد ومعزول عن بقية غرف وصالات البيت بحيث اهل البيت ما يتقييدون بالخطار اللي يجيهم لذلك الشيخ سلمان استطاع ان يگوم بواجب الضيافة وية خطاره هو ومحمد واخوانة وكم واحد من ولد اخوه لان اولاد اخوانه البقية اتصل عليهم عمار وركبو سياراتهم وراحو ورة عمار
عمار من وصلنا للمستشفى حركت الدنيا عليهم بالصياح وخليت واحد يردم بالثاني واجة مدير المستشفى بنفسة يصير صديق عمار ظل يهدي بعمار
مدير المستشفى -يا اخي مايصير اللي جاي تسوي
هدي حالك وهسة الدكاترة جاي يشرفون على حالت المريضة لا تنخبص وتخبصنا وياك
نوال واسيل كعدن ينتظرن على الكراسي تصير مقابيل الغرفة اللي دخلو بيهة زهراء
نوال بصوت خاوي من التعب والهبطة-اسيل فهميني شنو الصار والله راح اتخبل احس روحي مثل الاطرش بالزفة كلشي ما افتهمت شبيهم زهراء وياسر
حجت اسيل السالفة كلهة لنوال من كلام عمتهم فوزية الى كلام شيخة لأم عمار الى ياسر واللي سواه من سمع بالسالفة
هنا نوال لطمت على وجهة عزة العزاج ينوال صخام الصخمج يمة سودة بوجهي البنية راح تموت واني السبب بموتها والله ما اسامح روحي اذا صار على البنية شي
ظلت نوال تحوم وماتعرف شتسوي
نوال وهي تدعي بگلبهة اللهي بحق حبيبك المصطفى اريدك تطلع زهراء بنت خلود من هاي الشدة
ربي يسر ولاتعسر ربي انت اعلم بالاحوال
طبعا كنت اشوف كلساعة ممرضة تركض تدخل وبيدهة شي
شوية وطلع دكتور من الدكاترة يسئل منو وية المريضة اجة عمار يركض عليه
عمار -هَـا دكتور طمنا بنتنا شبيهة
الدكتور -اولا بنتكم متعرضة للضرب ومضروبة براسها ضربة قوية
وهسة هي حالياً حسب التحليلات حامل والطفل مهدد بالاسقاط ووضعة كلش حرج وان شاء الله نسوي اللي نكدر عليه وننتظر لمدة اربع وعشرين ساعة حتى تفيق
واذا ما افاقت احتمال راح تدخل بغيبوبة
وبمرور ثلاثة ايام عمار ابد ماطلع من المستشفى يكمل اجراءات وفحوصات زهراء وزهراء نقلوهة للعناية المركزة وبعدهة ما فاقت من الغيبوبة ووضع الطفل كان حرج بس الحمدلله انطوهة ابر مثبتة وبعض الادوية الاخرى اللي توقف النزيف شوية تعدت مرحلة الخطر وبدة وضع الطفل يستقر بس وضع الام بعدهة بغيبوبة
هاي الاحداث كلهة صارت واهل زهراء ماعندهم علم ببنتهم شنو صار بيهة
يتبع
