اجيال

اجيال 2

صار تلث ايام من رجعنا واليوم كانت عدنا حفله خطوبه قريبه من النهروان فكرت امر على بيت عمتي اشوف حوري
كانت في سياره ترجعنا بس اني ماحبيت ارجع
اشوف تاليتها ويه گلبي شبيه
ياولد روحوا انتم اني ابات عند بيت عمتي وابو عجاج مر على البيت خبرهم ليظل بالهم عليه
صار تدلل جمولي لاتنسى باچر  العصر تمر علينا
بعيني الله وياكم
تمشيت في محل فاتح اشتريت كم حاجه اعرف الحاجات الي تحبها البنات دوم اشتري لاخواتي
دگيت الباب افكر بعذر ليش جاي ابات
طلع رجل عمتي ابو فلاح
هلا جمولي تفضل
هلابيك عمو والله تعطلت السياره قريب منكم والولد سحبوها للمصلح والوقت متاخر گلت ابقى عدكم الليله
صدگ چذب اهلا وسهلا فوت فوت عمتك جوى
فتت بيتهم نظيف وتعبان بنفس الوقت دخلت عمتي سلمت
هلا بعد عمتك شعجب ذكرت عمتك اليوم
كنت قريب وگلت امر اسلم عليكم
هلا بيك يمه حوري تعالي سلمي هذا جمال هنا
( ئي هو هذا المطلوب )
هلو جمال شلونك مرت خالي شلونها
زينين يسلمون انتي شلونج
الحمد لله من رخصتك اناوش ابوي المي  يتوضى
براحتچ اخذي هذي كم حاجه الچ
عمتي سعديه حوري وجهزي العشى بساع ليش كلفت نفسك يمه
شنو القصه عمه هي كم نستله وعصير لحوري

گعدت ربع ساعه يمكن عمتي انطتها تلث اوامر بنفس الوقت وهي كله صار وحاضر عمتي سعديه كلش سمينه متگدر تشيل روحها
اني عندي اخوات اكبر منها لكن مو مثلها ميشتغل ولسانهن طويل على الچناين
بعدها بشويه جابت الاكل
اساعدچ حوري
لا يمعود انت خطار واني ماعندي شي
ياخطار حوري  هذا بيتي
هلا بيك خويه
(الكلمه الاخيره يمكن گالتها بقصد )
اني صوچي شسوي بيتهم اشوف تاليها
كعدنا ناكل كلنا سوا كانت تداري ابوها ومسويتله شوربه وكل شويه تكوله اكل يابه
وابد ماباوعت عليه خلصنا العشى
حوري متطلعين تلفزيون الشباب اسمع الاستفتاء وين وصل
خلي الاخبار تخلص واديره
يااخبار هي مواطن روسي يستنكر الحصار الجائر على العراق
ههههه ىي والله هسه هذا المواطن الروسي ماعنده شغل بس يستنگر
الظاهر متقاعد  يله الله يخليج ديريه على القناه الثانيه خلي نشوف
حولت التلفزيون
تحبين هذي الاغاني تابعينها
مرات من افرغ
يامطرب تحبيه حتى اجيبلج توقيعه كلهم جماعتي
ماكو واحد معين كلهم يطربگون
هم صدوگ
ولاتنطي مجال بس هي زغيره مو مال هذي السوالف واني هم زغير وعندي سادس اعدادي
اخليها مركونه هسه
اخاف يزوجوها اهلها
مامعقوله امها محتاجتها متزوجها هسه احجي ويه امي واخليها بس تحجزها
خلصت الليله عدهم يمي عمتي ورجلها يسولفون ويتدولون اخبار ولدهم الي ميسالون عليهم ابد انقهرت عليهم راقبت حوري تشتغل بالمطبخ ومن خلصت فرشت لابوها واليه وفتحت الشبابيك ورفعت البردات الهوا حلو  بالليل
وراحت ساعدت امها تگوم واخذتها للغرفه وطلعت نزلت من فوگ دفتر وبعد ماشفتها
الصبح گعدت على صوت ابو فلاح رجل عمتي يطلع من الفجر يبيع لفات. للعماله
طلعت وياه بالطريق حجالي ان مرات يشتاق الى اولاده يروح يوگف يم بيوتهم يشوفهم ومرات يشوف جهالهم بالشارع يلعبون
عمي همه ليش عافوك ميخافون الله
من توظفوا تزوجوا نسوان اعلى منهم گالولي بطل من العربانه واحنا نتكفل بيك وبامنا
تركت الشغل سنتين النسوان ماعجبهن الوضع گطعوا المصروف عليه طلعت اشتغل من جديد احسن مااموت جوع استنكفوا شلون تشتغل بعربانه
لعد العربانه مو هيه الي وصلتهم وكبرتهم
الله كريم خايف لااموت ومايجون لجنازتي
عمرك طويل انشاالله عمي ويجي يوم يعرفون غلطهم
رجعت للبيت وحجيت  ل امي عن بيت عمتي وحالهم
يمه حالتهم كلش تعبانه ورجل عمتي واصل يموت
وشتريدنا نسوي اجيب سعديه عدنا تاكلنا بيوم وليله
اكول لو وسام ومحمد يتوسطون بينه وبين اولاده حرام هيج عايفينه والله يمه حرام والي يتوسط بينهم اله اجر وثواب
انشاالله احجي ويه الولد وبلكي يحاولون بس اريد اگلك شي البارحه انتصار غلطت على بيداء وبيداء  راحت لاهلها وسام زعل ومن البارحه لليوم مارجع
وانتي يمه شسويتي ترى انتصار طفله بس ماتحترم وبيداء مره جبيره مثقفه لازم تخلين حد يمه ترى حتى الناس من تسمع يكولون بناتهم مامربايات
انت احجي وياها واني هم احاسبها
انتصار اختي كانت حلوه ومغروره وتغلط على طول وامي فاتحتلها مجال
انتصار وينچ تعاي
خير شكو
من اصيحج تجين مو شكو تادبي ليش غالطه على مرة وسام بگدج هي وتغلطين عليها
يمه ليش ماتحجين الصار منو بدت بالغلط
اني ماجنت موجوده بالسوگ بس بيداء تگول گتيلها انعل ابوچ لاجابچ علينا هم نزل وهم يدبچ عالسطح
ولچ يانزل هذا بيت رجلها وبيتنا كلنا امشي گدامي تروحين لاهلها لا امددچ هنا
افتهم اول هي گالت شعندج بالسطح تاشرين للولد سدي السطح مو كلساع منظفين وراج
وانتي شعندج بالسطح منطقتنا كلهم مطيرچيه
صعدت اختنگت ميصير
لا ميصير يمه كومي اخذيها تعتذر من بيداء عيب
مااروح لو تذبحوني هي اتهمتني ليش متاخذون حقي اول منها ياولد الي ااشرلهم اخاف هي تاشر للولد ام السحورى الخايسه
امتنعت انتصار عن الاكل تلث ايام امي راحت اعتذرت رجعت بيداء لكن اهلها انطوا لوسام مده يطلع من البيت
وبدا وسام يشيل اغراضه ويطلع انصبت مناحه بهذا اليوم امي ماگدرت تتحمل طلعته
وسام يمه اني قابل وين رايح هو مشتمل بنهايه الفرع يمتى متريدين تعالي يمنا
يمه لو ميته ولاتطلع من البيت انت وجهالك ومرتك
وسام اسم الله عليج يمه بس هيج احسن انتم اعزاز ومرتي عزيزه
والايجار منين تدبره انت عيونك راحت من ااخياط والتفصيل
الله كريم تدبر وداعتج دكومي وياي اليله باتي عدنا هم بركه بالبيت تصير
راحت امي وياهم
وبدت عفاف تدور حجج حتى تطلع مثل بيداء
والعرايك محتدمه بين اخواتي وبين عفاف
بدت السنه الدراسيه وذبيت كل جهدي بالدراسه الاعراس بس الخميس والباقي دراسه ومرات يصير عندي وقت امر على بيت عمتي سعديه
لحد امتحانات نص السنه عرفت محمد ديبني بيت بدون علم امي
شفته يدخل للمحل مالته وهدومه كلها جص واسمنت مدمره
ها ابوجاسم شنو هاي
ها جمولي شجابك هنا اليوم
جابتني رجليه دتبني شنو
بلي جمولي بس مو تگول الله يخليك مااريد الوالده تنقهر
اكيد تنقهر اذا عرفت ابنها الچبير يبني بدون ميگلها گوللها محمد امي تحبكم وتريد راحتكم
اخاف تزعل وتشد ويه مرتي وجهالي
بكيفك اني گتلك ومعليه
رجعت للبيت وبعدي محمد كعد ويه امي وحجالها
يمه بديت ابني بيت اني وسام كل واحد مشتمل زغير
ها يمه محمد انت هم راح تطلع وتعوفني
ماعاش الي يعوفج يمه انتي الخير والبركه بس تشوفين انتصار وعلياء يوميه مبسوطات من جمال لو منچ وهذا بيتهن لازم يرتاحن بيه قابل نطرد خواتنا بالشارع
الله كريم يمه الله يسعدكم انشالله
بقى اشهر محمد وسام  يبني وكنا نساعدهم ونقصر على انفسنا في سبيل يطلعون ويرتاحون
امي حست ان راح يصير عدنا نقص بالايدي العامله بالبيت طول عمرنا مخدومين من عفاف وبيداء امي بس تشرف على العمل واخواتي بس يخبثن على الجناين بحجه جهالجهن الي يوصخون لذلك فكرت اتزوجني  اني
بهذي الفتره كنت اراجع للسادس وحتى التفكير بحوريه نسيته
وحجت امي ويايه
يمه جمولي شتكول اذا خلصت امتحانات اخطبلك
يمه ياتخطبين لخاطر الله اني لاشغل لاعمل
شبيك لاشغل لاعمل اشو تحصل خير من الله بس انت وافق واجيبلك بت خالك حوراء طير ذهب وبت بيت ومودبه
يمه حوراء طير ذهب و حلگها چنه العيساوي الله يخليج
دهر صابك حوراء مو حلوه
لا يمه مو حلوه الحلوه حوريه بت عمتي سعديه
يا حوريه ام كفشه ام السيم صدگ ماتفتهم
صحيح شعرها خشن بس ذهب والعيون والوجه الدائري وكلها تحفه والقران
ها ولك جمولي منسق امورك واني ماادري
والله لامنسق ولا حاجي وياها حجايه  غير السلام بس عاجبتني
خوش اذا عاجبتك احجي ويه امها ولو سعديه متنطيها مخليتها خدامه
يمه بالبدايه خلي نحاول ويه فلاح واخوانه ياخذون امهم وابوهم عدهم والله بيتهم ايل للسقوط
هابسيطه افشلهم گدام نسابتهم وغصبن ماعليهم ياخذونهم
لعد وينچ يايمه والله الج اجر وثواب والبنيه هم خطيه كل مااروح الهم نفس الدشداشه لابستها صيف شتى
بسيطه خليها عليه