اجيال

اجيال 7

دخلت علياء الجامعه وبدت مصاريف جديده محمد دخل مشاكل مع اهل زوجته بسبب ديون اخذها منهم حتى يكمل بناء بيته وزوجته زعلت وتركته
انتصار محبوسه بامر محمد وكل ميتقدملها خاطب ومتصير تصب غضبها على حوري
حوري متحجي ويايه ولاتعاشرني الا غصب وبطلت اغصبها كافي حياتها صارت كلها غصب
امي بدت تلح على الاطفال سالت حوري اخذج للدكتوره
جاوبتني لا مااريد اطفال المن اجيبهم يشوفون امهم يوميه ينغلط عليها وتنهان
ليش كل ردودج عليه تقهر شبيچ وياي
اعتذر عيني بس لا جرحت احساسك نازله وتاركه الغرفه
اشو متنزلين واذ نزلتي اكسر راسچ
گعدت وفتحت راديو عدها زغير دوم تخليه على اذانه وتسمع برامج كله على المراءه والاسره
سدي الراديو واحجي ويايه
سدته شرايد تتعارك تضرب گوم سويها وفضني
يايوم ضربتج انتي الي ماطايقتني
وماطايقه نفسي والله يوميه انام ادعي ياربي لو تموتني لو تموتهم وتخلصني
حتى اني حوري لهالدرجه كرهتيني
تريد نتحاسب. لو تخليني ساكته
وين الدراسه الي حلفتلي تخليني ادرسها
وين السفر الي گتلي عليه
وين ااحلف متخون وانت يوميه مبدل ومتعطر وطالع اذا تريد تحب وتستمتع بحياتك ليش متطلگني وتفكني من هالخدمه
الدراسه اقدملج عليها من باجر والسفر يراد فلوس وتشوفين كل يوم اطلع من الصبح للكليه وبعدين للشغل ماارجع الا بالعشره باليل
واقسم بالله العظيم ماخنتج ولاحتى فكرت اخون ردت اثير غيرتج وترجعين زوجه وحبيبه
ليش اني شنو هسه
انتي وقفتي كلشي داخلچ من حب ومشاعر وصرتي مجرد
مجرد خدامه مو همزين گلت لاتعتب عليه جمال انتم موتوني مو قصدي التنظيف والشغل الالاف البنات مثلي لكن الاهانات والحجي والموامرات موتتني مااگدر اعيش شي ما شايفته مااگدر انهان من ناس واحب ابنهم
والتالي حوري تبقين كارهتني
خليني ادرس اطلع ساعه بالنهار اشتغل بصالون اي شي لاتتركني للاهانات والخدمه وتالي اليل تريدني احبك
اخواتك شابات اثنين بعمري شنو معناها گاعدات واني اكرب الشغل يتقسم ومرت محمد من ترجع تشيل شغل وياي احنا اربعه كل يوم على وحده هذا الحل العندي
حاولت ويه امي ظلت تصيح وگفت على الدرج
صار عيني حوري ظلي فوگ اني اشتغل بعد لاتنزلين
يمه ليش كلشي صياح دنتفاهم
خايب انت مابيك حظ عليمن طلعت ماادري متروح تسالها ليش متحبل ليش متگعد يمنا وتباوع تلفزيون ليش البچي بغرفتها ليل ونهار ولك ماتريدك مستحقرتك والله الا اربيها هالصفره الخبيثه
نزلت حوري للمطبخ سدت الباب واستلمت الشغل
طلعت للتربيه اسال عن شروط الامتحان الخارجي تنطبق عليها اخذت تاييد من مدرستها القديمه واستلمت كتب الها اريد افرحها بشي

حوري مااكتب شي بهذا الجزء بحياتي لان كله نفس الروتين اطبخ وانظف
وعمتي تگلي بنهايه كل يوم لو بيچ خير حبلتي مثل النسوان
انتصار كل خطوبة تفوتها تذكر المدرسه وتحملني مسوولية الي صار وبطلوها
علياء تتصور نفسها هي بشر واحنا جراثيم متعجبه دخلت كليه
جمال. اووووف جمال جمعت كل مشاعري وعواطفي اله وضعتهم بقارب ورق وتركتهم يغركون وسط بحر من هم مااريد احبه اكتفيت من وعوده الخائبه الي
ماعدت احس بيه صح يتعب ويحتاج زاويه مضيىه بحياته لكن اني طفيت ماگدر انطيه شي اني نفسي فقدته
ياخوفي يدور على الضوى بمكان ثاني
اليوم گلي قدملي على الامتحان الخارجي وانطاني كتب قريتها فكرت ابدل وانتظره وبعدين غيرت رائي ياما صدگت بيه وخذلني