اجيال

اجيال6

حوريه
اخر الاخبار جمال يريد يطلكني الظاهر معجبه بس احتركت يريدني اموت همه اني الك جمال
اليل مااگدر انامه من الالم ولااگدر اتغطى الملابس تخرمش جسمي
وهذا شعنده مكابلني وگاعد مويريد يطلكني

جمال حوري تتالم گبال عيني شنو الي اخذته من زواجها مني
ومتحجي ويايه ولاترد عليه ونزلت تنام على الكاشي لان بارد على جسمها  عبالها اكرهها من گلت اطلكها
لان ماعندي حل ثاني اني طالب مااگدر افتح بيت وهي زغيره اخاف عليها لوحدها واني النهار كله لو شغل لو دراسه
حوري شلون صرتي ليش متنامين
ليش متردين
كامت طفت الضوى اعرف تريد تنزع الملابس لان متگدر تنام بيها ومتريدني اشوفها بالمستشفى شفت قطع قطن لازكه بجلدها
اجيت يمها احجي وياها
جمال والنبي اذا تقربت مني لااصرخ والم البيت كله عليك اني بياحال بعد شرايد مني اختك المصون گاعده ومتونسه واني تريد تطلكني اشو الا تطلگني وهسه يله شعندي گاعده عدكم مجرمين كفار حتى الموخر مااريده اخذه الك بس طلگني
حقچ تكولين هذا واكثر حجايه گلتها حتى تخلصين من هالزواج الورطتج بيه اني لكن مدام محروگ گلبچ من الحجايه معناها تريديني ومااعوفج لو اموت حبيبتي حوري والله الحرگ بيه واكثر اني گلبي الي احترك كل ميدخل دكتور يشوفج اموت والله تدرين شگد احبچ والله
اريد اروح لاهلي علاجي يطول منو الي هنا يداريني ومااريد اشوفكم
باچر ارجع من الدوام اخذچ
ليش تبچين
جسمي كله يحركني اريد انام مااگدر
اشيل السجاده ونامي على الارض بارده
نامت على الارض بس متمدده متگدر تغفى
اخذتها لاهلها ثاني يوم لبست عبايه لان متگدر تخلي شي على جسمها دخلت يم اخوها كالت وگع عليه قوري الچاي صار اربع ايام
اخذتها امها للغرفه اسمع صوتها تبچي وتصيح يمه راح اموت
اخوها حقق ويايه گتله نفس الشي طلعت مخنوگ منهم ودي ابچي مارجعت للبيت رحت عند صديقي خلصت اليل اخذت قرار اطلع جواز واترك العراق
بطلت احجي ويه اهلي او اكل عدهم  حتى ملابسي اني اغسلهن غرفتي ادخل ابدل بيها وانام بالهول
امي حتى تراضيني
جمال يمه ماتجيب مرتك اشوفك متبهذل بدونها
قصدج انتم تبهذلتوا عفاف جابت واخواتي يردن خدامه
جا انت يمه منين زعلان انتصار وبطلتوها ومرتك الحمد لله زينه مابيها شي  اليوم اروح اشوفها تمشي وياي
لا روحي انتي ولاتحجين شي ترى اهلها ميدرون واخذي هذي الفلوس الها
يمه سبع الالف ستسوي بيها
العصاره الوحده بخمسه الالف هم حارگيها وهم اهلها يصرفون سلميلي عليها يمه
مرت الايام والشهور شهريين وهي متقبل ترجع كل خميس اودي امي تسالها تگلها ماارجع ومااريد جمال يجي
كتبتلها رساله وديتها
حوري تعرفين مااعرف اكتب رسايل
ترى محد متاذي غير اني وياج
وانتي صبيتي كل غضبچ عليه
طلعت جواز سفر وراح اسافر اذا مترجعين
  الدنيا عذاب بدونج
ردي عليه لخاطر الله
امي تكول قرت الرساله وضمتها
وهي يمه شلون صارت بعدها تتالم
لا احسن بس اثر الحرگ باقي على اجتافها وراسها
وتشتري علاج لو لا
تشتري كل ماانطيها فلوس اشوف عدها عصاره جديده وصايره تخبل سمنانه
كافي يمه تقهريني تريدين
ليش اقهرك باجر رايحه هي وامها للكاظم وراح اروح وياهم تعال ويانا
صدوگ يمه انتظركم هناك اريد اشوفها
خوش اني اجيبها عليك وحاجيها ترجع وياك
ثاني يوم خليت امي بسياره عمر
يمه تصعديهن بسياره عمر
خويه عمر تندل المكان انتظرك بيه تجيبهم وتمر عليه
تدلل جمولي
وگفت بساحه عدن انتظر عمر يجيبهم
وصلت ماصدگت اشوفها صعدت ليگدام سلمت ردت امها وهي ماردت دارت وجهها على الزجاج نزلنا
امي وعمتي دخلوا للحضره واني اخذتها من ايدها
تعالي شنو مو بعينج متردين السلام
هم الك عين وتحجي وياي
ليش اني شمسوي
كلشي ممسوي شهريين ماكلفت روحك تجي تشوفني
انتي متقبلين اجي
واذا اني مااقبل مجربت تجي قابل اطردك بس انت تريد حجه تخلي امك تسالني تجين
شدعوه مكلف روحك تجي وتحاول مره مرتين
خفت اهلچ يطردوني ويهينوني ومااتحمل
بس اني لازم اتحمل اهانات اهلك  وشغله ثانيه منو الي حركني مو انتم ليش اهلي يدفعون فلوس العلاج والدكتور شبيكم فگر
لج اني الي ادفع كل اسبوع اودي ويه امي
شتودي شدعوه عليك هيچ بايع
صدوگ تحجين حوري والله كل خميس اودي خمسه الالاف  لو سبعه والله داحلف
انتم مينعرف صدگكم من چذبكم  موديلي رساله راح اسافر  ومتسافر ياهو اللازمك
قصدي نسافر سوا مو لوحدي
تعالي اشو لسانج صاير طويل
معاجبك طلگني مو گلت اطلكچ
ىي اطلكچ بس مو هسه من يطخ بعقلي
امشي ندخل نزور مو تنسين تدعين عليه
سكتت ماحجت
ورى شويه باوعت عليه شبيك صاير عود من خبثك
لعد مثلچ فراگي موالمج سمنانه ومرتاحه
احجي ليش تسكتين ترجعين ويايه حوري باوعيني بسرعه نسيتي جمال مگلتي حرام اعذبه بشي ماله ذنب بيه
الك ذنب ماگدرت تحميني وگتلي تحملي لحد مصار الكل يغلط ويتجاوز عليه ومحد يرد
شسويتوا لانتصار ها لو اني مسويتها سكتوا جان طلگتوني واخذتوا فصل من اهلي والله بطلوها من المدرسه عاى اساس من شطارتها هي
ارجعي وياي كم شهر ونطلع لسوريا
احلف نطلع مو تعوفني وتروح. يله هذا الامام واحلف بيه واذا على كم شهر اتحملها
حلفت الها نطلع ها ترجعين ويايه لو لا
تعال اخذني من بيت اخوي
صار حبيبتي والله ممصدگ تصدگين الغرفه مانمت بيها بعدج بس ابدل واطلع
ىي خطيه مقهور عليه وشنو هذا الگصه مال الشعر الجديده والعطر واصل لراس الشارع شعندك لو سوالف الكليه بينت
ياكليه عطله هسه وعلمودج العطر والگصه
بعد الزياره وصلت امها للبيت ودخلت لمت اغراضها استادنت من ابوها واخوها اخذها وافقوا
طلعت اجيب تكسي الها صحت امي عاتبتها على شغلة الفلوس ليش مموصلتها جاوبتني
احنا احق بيها اشو اخوها عنده خير من الله
بس يمه اني رجلها گدامهم اني لازم اصرف على مرتي
لاتصيل فطير. كلشي مابيه تنگل بهاي العصارات وتحط لوجهه تريد تصير بيضه
يمه رحمه على والديج جوزوا من حالها ترى راح اتخبل
رجعت حوري اول ايام متحجي ويايه الا سؤال وجواب عفاف ظلت تتحجج اطفال ومريضه وعدها انزلاق اخواتي امي تگول شغلهن ميعجبني وظلت امي  تكوم للشغل جبرت حوري هي تشيل البيت والبنات يساعدنها ومع ذلك مرهمت اخواتي لو يتعاركن وياها لو يغلطن عليها ومحمد ياضارب هاي ياضارب ذيچ
صارت حوري الي عمرها ١٧بعد سنه من زواجنا خدامه البيت كله
انطفت رغبتها بالحب والمشاعر. گامت تاخذ ابعد مسافه ممكنه عني مو جسديا بس الا حتى بالاحساس تمر  ايام متغير الدشداشه نفسها ومن اسالها تجاوبني
على شنو اغيرها هي كلها ست ساعات انامها وگعد للشغل من جديد
كانت تحملني مسووليه وضعها التعيس بالبيت وتتصور خذلتها من بدت السنه الدراسيه وداومت بالكليه
گتلي كم شهر واسافر اشو راح تداوم كليه
السفر يراد فلوس مو هين وتشوفين المصاريف البيت واخواتي دكتور امي دراستي حوري الحمل ثگيل عليه
تسكت متجاوب وتعاقبني نفسيا ماادري تتعمد لولا
حتى بالاوقات الحميمه والحب تخليني احس هذا واجب تاديه مثل الطبخ والتنظيف ومره اتذكر كنت وياها بعد فتره وابوسها شفتها صافنه
حوري شبيچ ليش صافنه
افكر بالغدا باچر شسوي
سمعت جملتها دفعتها من السرير  وگعت
انتي صدوگ تحجين تخبلتي صار اسبوعين مجاي يمچ وتگليلي غدى ليش متحسين بيه متعمده كل هذا ادري
گامت تبچي وتخنگ  صوتها باديها
ماتت وتريد تموتني همين
تلك اليله ادركت ان حوري تصرفها وياي نابع من الطفوله الي ماتت جواها بسبب الاهانات والمذله الي تشوفها من اهلي كرهتمهم وكرهتني لان اني ابنهم
بعدها مرت شهريين تغيرت كل تصرفاتي صرت عصبي گئيب افتقد الانسانه الحبيتها لااني گادر استعيدها ولااگدر اتركها
لجئت لاثاره غيرتها اوكف گبال المرايه ساعه قبل لا اروح الكليه امشط واخلي عطر وادخل واطلع اصوفر
تباوع عليه ومتسال هي هم زيدت اهمالها الي
نزلت من السرير وظلت تنام على الارض
اشتم بملابسها ريحه طبخ وتنام بيها
المكياج نسته ودفنت روحها بنتظيف وطبخ وتعزيل ايام الجمع متصعد للغرفه تظل بالمطبخ  ويه امي جوه
ظليت اشتغل بالسوق العربي لان فلوسه اكثر وقت ماعندي ارتاح اصدقاء تركتهم كل حياتي تعب بتعب اتمنى اجمع مبلغ بسيط واطلع من العراق وانقذ عمري الي يتسرب من بين اصابعي وابث الحياة بگلب حوري وينبض الي من جديد
مجرد امنيه لكن الحصار  خنگ حتى الامنيات
ورغم عني اصبحت زوج مهمل وحبيب مهجور
وحوري اصبحت زوجه خادمه تخلت عن كل متع الحياة وتنتظر  المجهول يكتب نهاية تعاستها