الجزء الأول
بقلمي شمعة امل
حب مع سبق الإصرار والترصد
طلعت مثل كل يوم الصبح وديت بنتي رهف للمدرسه هيه صف اول ابتدائي حبيبتي فرحانه لان بده الدوام وصار عدهه صديقات هوايه نزلت من السياره ونطيتهه كونية المؤووونه هههههههه تفاحه ونساتل وشربت وحليب كاكاو وحافضه بيهه شويه دولمه حبيبتي اشتهتهه البارحه فلفيتهه بالليل والصبح كملت طبخهه وخليتلهه بالحافضه
المهم دخلتهه للمدرسه وطلعت للسياره صعدت وشغلتهه
وبعدين كملت طريقي حتى اروح للمحل
نسيت اعرفكم بنفسي
اني اماني عمري 28 سنه خريجة تربيه رياضيات مامتعينه عندي بعد 2 اخوات وثنينهن متزوجات وعايشات بالخارج وربي يسعدهن
مطلقه وعندي بس هاي البنيه وهيه نور عيني بعد طلاقي من مازن والحمد لله قررت أكون اني مسؤوله عن نفسي وعن هاي الطفله صح اهلي حالتهم زينه وممحتاجين بس اني احب العمل وطبعا الوالد والوالده ماقصروا ويايه والوالد ساعدني وفتحلي محل كماليات جبير والحمد لله ديجيني من عنده مورد كلش زين
مازن زوجي السابق كان شكاك بكلشي عشت وياه سنتين ابيت اهله وكان يعاملني معامله سيئه وكأنه اني خدامه عنده وعند امه وكان ابوه ابد ميقبل عليهم بس مع ذلك هم ميكدر يحميني منهم على طول لان كان دائما بمحل الصياغه مالتهم ومازن ساعه بالمحل وعشره يم اصدقائه وامه كانت اتعايرني انه اني مااخلف واتريد اتزوجه غيري وخلت اباله هاي السالفه
وبيوم كتله مازن اريد اروح للدكتوره احس اوضاعي كلهه متخربطه واني اصلا عندي مراجعه يمهه باجر هو حسباله اني عندي علاقه بواحد ودااطلع اتواعد وياه واتعارك ويايه عركه شكبرهه وكتله شنو انت شبيك ليش انت موراح تجي ويايه
مازن .والنوب ترديني اروح وياج لعياده مال نسوان انتي اتخبلتي
اماني ..شنو اتخبلتي لعد انت مورجلي والمفروض تجي ويايه من اتمرض
مازن... مااجي وياج اخذي امي وروحي ..
اماني ..من البدايه كول مااجي واخذي امي ليش تتعارك بعد بس من اتريد تطلع ويه جماعتك يصير بيك كل الحيل واتروح ركض مو
مازن ...ولج شنو انتي اتحاسبيني على طلعاتي هذوله جماعتي أشرف منج ومن عشيرتج كلهه ..وكفشتهه من شعرهه وكتلتهه كتله زينه وعفتهه وطلعت ....
اجتي امه جنان ...
يمه اشبيكم صوتكم عالي ..ولج شمسويه يمعزايه ....
اماني ...شمسويه يعني شوفي ابنج شسوه بيه كل هذا على مود اريده يروح ويايه للدكتوره وهو مارضه رادج انتي تجين ويايه
جنان ...واني شعندي جايه وياج يعني قابل من راح اجي وياج للدكتوره راح اتفرحينه بخبر حملج عود انتي روحي واسمعي زين اذا وصلتي خبر لاهلج مازن كاتلج هيج متلومين إلا نفسج اكلهم مازن شافهه طالعه ويه واحد وكتلهه ...
اماني ...شنو انتوا متخافون من الله هيج عدكم الطعن بعرض بنات الناس سهل موانتي هم عندج بنات متخافين عليهن
جنان ..اسكتي لج بناتي أشرف منج .. اروح اشرب جاي أحسن راسي كام يوجعني من الكلام وياج ويكون بعلمج اني الاسبوع الجاي رايحه اخطب لمازن شلون لعد انريد انشوف حفيد النه ...
وخلت وطلعت وعافتني بنص حيرتي وناري واهلي كل مااحجيلهم يكولولي المره من تتزوج لازم تتحمل كل شي من الزوج والعيال
