حب مع سبق الإصرار والترصد ⚘
بقلمي شمعة امل ⚘
الجزء السادس عشر ⚘
اماني..... ليش مختفي صارلك فتره
رائد .....اني اخذت اجازه حتى ارتب بيتي المسدود ....
......اريد اتزوج كافي عزوبيه .....
اماني ....زين وشنو متعارك ويه الوالده ....
اماني ....رائد صارحني.... اخاف من ورايه اتعاركت ....
رائد ...عيوني انتي ليش اتدوخين روحج .....بهيج امور ....انتي الج الصافي ....
وبعدين اني نطيتج حجاية رجال
كتلج اتزوجج يعني اتزوجج
اماني .....لا ميصير هيج رائد يعني حياتنه نبديهه بمشكله والنوب ويه والدتك ميصير هيج
.....شوف رائد ....
اني من اتزوجت من مازن...... عشت وياهم بنفس البيت .......ولان كانت امه متحبني عشت وياهم حياة جحيم
شوفتني الويل ....
.......بس شكول سلمتهم بيد الله ...
.هو يعرف شلون ياخذ حقي منهم ....
رائد ....اماني انتي بعدج متعرفيهه لامي تره هيه كلبهه طيب هسه من اتشوفيهه راح اتحبيهه اني مو دفاعا عنهه تره بس اني احجيلج الواقع
.اماني ....ميخالف رائد ...هاي امك هم ملازم اتضوجهه ..ومو حلو زواجنه يكون موبرضاتهه
....اماني. .....اكدر اسال سؤال بس اتجاوبني بصراحه
رائد ....جواب .....
اماني ....هيه ليش ماقابله على زواجنه ....
رائد .....هوايه أسباب .....
اولهه اتريدني اتزوج فقار ....اخت ثريه مرة حسام اخويه ....
شنو ...اسمهه فقار ....
رائد ...هههههه ولج لا .هيه اسمهه وقار
..بس اني اصيحلهه فقار ....لان مااحس عدهه انوثه جنهه رجال ....
بس كاتله روحهه عليه ....وحتى اختهه كل متعزمنه ابيتهم اتدز عليهه بحجة تجي اتساعدهه بس هيه حتى عود نكعد سوه وبلكي اقتنع بيهه كزوجه الي
وشغله ثانيه...... من عرفت انه انتي منفصله .....كالت اذا اتريد لعد رجع مرتك لان هيه لحد الآن اتريد ترجع وعدهه اتصال ويه اختي
بس اني ماارجعهه لو تبقه آخر مره بالدنيه كلهه
اماني.......يعني هسه حسب مفتهمت الوالده مموافقه لان اني مطلقه واكيد من عرفت انه اني عندي طفله زاد رفضهه للموضوع مو
رائد .....مااخفي عليج فعلا هو هذا الي صار
بس صدكيني اماني ...
اني كلش متمسك بيج
ومامستعد اتنازل عنج لأي سبب كان
اماني ....كلامك حلو ..
.بس التنفيذ كلش صعب
رائد ...اماني اذا اتحبيني اريدج تبقين ويايه واتسانديني ...
كتلج اني متمسك بيج .......وماعندي اي استعداد اخسرج
اماني ...زين بس فهمني شنو الحل لعد ......
وجان يدك مبايل اماني ......
اماني ....طلعت المبايل من الجنطه. ....
....هذا شعنده داك النوب..... ...هيه جانت عايزه والتمت
رائد .. منو .....
اماني ....هذا مازن ....زوجي السابق ....
رائد .....انتي موكلتي ماعندج اتصال بيه ومشايفته من انفصلتوا لحد الآن
اماني .....وخلصت الدكات .....
....اي صح مشايفته من حتى قبل لاننفصل
بس شفته البارحه بعرس بنت خالتي
وكان هو يسوق سيارة الزفه. ...
هو كلي اريد احجي وياج بس اني مانطيته مجال
حتى لبابا هم كتله عليه
....وكتله اذا عنده حجي يريد يحجيه فيكدر يحجيه وياه اني ماعندي كلام وياه
.....
ودك المبايل من جديد ....
اماني ...هذا هم دك النوب .....
رائد .....ليش متجاوبيه ......
اماني ...اصلا مااريد اجاوبه ولا أريد اسمع صوته .....
رائد ....بس احتمال يريد يحجي وياج بخصوص بنته ....
اماني .... يجوز كلامك صحيح. ...بس خليه مااجاوبه هسه ...واكيد راح يدك النوب
بس هالمره... اذا دك....... راح اخليه يحجي ويه بابا أحسن
رائد ....براحتج ....خلي اشوف الاكل متت جوع اذا اتاخروا شويه بعد احتمال اكلج
اماني ...ههههههههه يمامييييي خوفتني ....
رائد ....ههههه فديت الحلو المبتسم ....
...... هااااا همزين اجه الاكل ....
واجه النادل وخله الاكل على الميز وراح ....
رائد ...يله عيني ... شوفيني شلوني بالهجوم اعجبج
اماني ....هههههههه الف عافيه مقدما .....
وبدينه ناكل ....
خلصنه اكل وطلعنه من الطعم
اماني ....رحت للبيت صعدت لغرفتي كبل ....
كانت رهف نايمه ....حبيبتي تجي تعبانه من المدرسه تتغده واتروح اتنام
اني هم حظرت ملابسي وطبيت سبحت وطلعت نشفت شعري وهم كبل اتدعبلت بالفراش اريد انام شويه حتى بعدين اكعد اقريهه وخليت المبايل صامت ...مااريد افكر بأي شي ممكن يعكر مزاجي ولا أريد اي اتصال بيه مغثه الي ....
نمت وكعدت العصر ...
سويت فنجان كهوه الي....... ولرهف...... سويتلهه كاكاو وماما سويتلهه جاي....... هيه متحب تشرب غيره العصر
وطلعت شويه كعك وكليجه ....
خلصنه وجهت رهف على دراستهه عدهه كتابه بدرس القراءه
بعدين اتجهت للمطبخ حتى اشوف شراح اسوي بالعشه
طلعت كبه وشويه بورك وكلت اكلي طماطه
خابرت بابا حتى يجيب وياه صمون حار
بعدين سمعت الاذان كلت خلي اروح اصلي وبعدين ابلش بالعشه
رحت اتوضيت ...وفرشت السجاده ....
كملت صلاة ورحت سويت عشه
نصف ساعه واجه بابا
اماني ... الله يساعدك بابا .
ابو اماني. ...هله بيج بنيتي .. لعد وين امج ...
. اماني ...بالغرفه دتقره قرآن
.ابو اماني. ......هاااا خوش ..
.هاج بابا هذا الصمون بعده حار افرشيه على الميز خلي شويه يبرد حتى لايعجن ....
اماني ....صار بابا .. لعد هاي شنو العلاكة اللخ
ابو اماني. ...هاي غير طلبات رهف ....نساتل وعصاير. ونوتيلا ..
.والكم جبت حب ابيض وهم أشكال نساتل خاف يعجبكم تاكلوهن بالتعلوله .....
.........شكرا بابا الله يخليك النه ويديمك خيمه فوك راسنه ...
اشكرج بنيتي .....لعد اروح ابدل هدومي حتى اجي اتعشه ....تره ميت جوع اماني
صار بابا خلصت بين متبدل اني اكمل السفره
....اي عفيه ...
وراح بابا يبدل ملابسه واني بسرعه رتبت السفره
صحت رهف حتى تتعشه
خلصنه عشه وشلت السفره واني داارتب المطبخ اندكت الباب ....
....بابا هاي الباب اطلع اني ....
ابو اماني. ..لا بابا اني رايح .....
.....طلع بابا واسمعه يسولف ويه رجال ....
شويه واجه بابا فتح باب الاستقبال ومدري منو دخل وياه .....
واجاني
ابو اماني. ...بابا اماني حظري صينيه عصير وشنو عدكم نساتل لو كيك ويه العصير
اماني ......شكم شخص بابا ...
ابو اماني. ....بس واحد ......
اماني .....حظرت الصينيه ونطيتهه لبابا ....هو اخذهه وراح طب للاستقبال
..........منو هذا الي اجه هسه .......
رائد. ....بعد ماخلصت عشه رحت لغرفتي اتمدد وكلت اتصفح شويه بالفيس
وجان تجيني رساله على الواتساب ....
.....هلو شلونك .....
رائد ...جاوبتهه ...أهلا وسهلا. .....
.......شنو فد لا ماسح رقمي ....
رائد ....لا وليش امسح الرقم .....
.....وجان تتصل عليه .......
......الوووو شلونك .....
رائد ...ياهله
......كلت خلي اتصل أحسن من الكتابه .....
......يعني ....كلت اكيد عنده هوايه .....معجبات ....وميحتاج رقمي ....
...........دير بالك ...تره اني من النوع الي على كولت المصرييين
......مثل الفريك مااحب شريك ......
رائد ....ههههههه زين يافريك ....اتفضلي أمر خدمه ...
......لا شكرا لا أمر ولا خدمه بس حبيت اسولف وياك شويه ...اشو ضوجه وكاعده ماعندي شي اسويه
كلت خلي اسلم عليك ....
رائد .......الله يسلمج ..... بس امبين انتي عندي غير حجي ...مومسالة ضوجه .....
.......يعني شنو قصدك ......
رائد .....انتي كلتيهه انا زي الفريك محبش شريك.......
......هههههههه اي صح ......
.....بس هو الصراحه حبيت اتعرف عليك أكثر .....واسولف وياك شويه ...
....عندك مانع نتعرف على بعض .....
رائد ....لا ماكو اي مانع ......نتعرف ليش لا ....
......طبعا اني مخلصه كليه بس مامتعينه ....
وانت ......
رائد ....اني مخلص كليه ومتعين وعندي نجمه وتاج على جتافي وان شاء الله ناوي ازودهن
.....اي ليش لعد تستاهل والله ....ويلوكلك ..
رائد ...اشكرج .....
.........زين سؤال .....
رائد ....جواب .....
......انت متزوج لو لا ....
رائد .....لا منفصل ......
.....زين عندك اطفال من طليقتك ...
رائد ...لا الله ماقسم النه ......
......زين شعجب متزوجت لحد الآن.
رائد ...بعدني ملاكي بنت الحلال الي تسعدك
....يجوز هيه كبال عينك وانت مامتنبهلهن
...رائد. .....يجوز ...
......زين اكدر اشوفك باجر مثلاً .....
رائد ......ماكو مشكله .....
....رائد ....زين صابرين هسه اريد اروح انام
من رخصتج ....
تصبحين على خير
صابرين وانت من اهل الخير
اماني .. بعدني داارتب بالمطبخ وجان يجي بابا ....
ابو اماني. ..بنتي البسي حجابج وتعالي هذا مازن بالاستقبال يريد ي يحجي وياج
يتبع .......⚘
أتمنى يكون هذا الجزء قد نال رضاكم ⚘
