اغتصبوا طفولتي (حكاية رباب )
للكاتبة ام نور
البارت الاول
في احد الايام وفي ذلك اليوم تحديدآ
بدأت عندي الذاكره
لااعرف ماهو تاريخ وماهو اليوم
فقط اعرف اني بدأت
اتذكر منذ ذالك اليوم
كنت طفله صغيره لااتذكر شيء
من طفولتي سوى اني طفله صغيره
انام واستيقظ من نومي
جوعي من كان يوقظني
افتح عيناي الصفيرتان
لارى امرأة تدعي انها امي
تضع قطعة قماش على فمي
لارجع الى سباتي مستسلمة
للجوع والنوم
وتحت اشعة الشمس الحارقة
هذه هي طفولتي
ابنة أمرأه تتفنن في التجارة لتكسب المال
تتفنن حتى في تعذيب صغيرتها
ومن الممكن ان تكون هذه الطفولة
هي من جعلتني ان اكون مجرمة
وقاتلة في شبابي
اني رباب اول يوم لبديت اذكر بي
جان عمري ٤سنوات
اني رباب ابنة المتسوله (المكداية)
اني رباب ابنة امرأه
ماعدها مانع تبيع اي شيء
في سبيل لفلوس ...!!
من جان عمري ٤سنوات
مااتذكر شي
بس جنت اكعد وارجع انام
وماتنطيني امي بس وجبه وحده
باليوم صبح بس كلاص حليب
وبليل لفه وعصير اكلهن وانام .
علمود لاتصير بيه عافية واكطع رزق امي
ابوي مااعرفة بس اعرف اسمه كاظم
كل حجاية وثانية امي تضربني
وتصيح عليه أكعدي بت كويظم
ابو العرك الله ياخذج
مثل ابوج وارتاح منج .
لو مابيج رزق ماخليتج
من صار عمري ٦ سنوات
بديت افتهم شنو يصير
يمكن البيئة لربيت بيها
واكثر وقتي بالشارع
صرت افهم الحياة اكثر
من اي بنيه من بنات جيلي
بديت استوعب شنو وضعنا !!!
عرفت ناس كلها ماتحبنه وتجنبنه
وجنت من اشوف البنات بالمنطقه يلعبن
احب العب وياهن .
بس من اروح يشردون مني
ومن اركض وراهن يضلون يبجون
ماما هسه تكتلنا اذا نلعب وياج ؟؟
انتي وصخه مو حلوه
وحتى ليريد يلعب وياي اهله يجون يسحبوا من يمي ويطردوني
جنت اكول يمكن لان اني وصخه
وامي ماتقبل اسبح
وماتقبل تمشط شعري
اني جنت اتمنى يصير شعري حلو
نفس البنات بس مااعرف امشط بحدي
حتى من امشط ينزل بس لكدام
وبنص يبقى يابس ماينزل ؟
ومن اكل ل امي عفية مشطيلي
كل مره نفس لحجاية تكلي
سكتي لوصخه بت كويظم ابو العرك ؟؟
ومن اكلها ماما شنو عرك تلزم نعال وتضربني حيل
اضل بس اعيط واصرخ لحد ماانام
اشوف البنات يرحون للمدرسه
ومن اكلها اريد اروح للمدرسة
تكلي بعدج صغيره من تكبرين
يمته اكبر واروح ماادري
يوميه تكلي بعدج صغيرة
ضلت من تطلع الصبح ماتاخذني
تعوفني بالبيت
وتكلي اريد البيت يلمع لمع
لااذبحج نفس الخروف .
اني يومية انضف البيت
وانام وهو نضيف بس ماادري منو يوصخه باليل
من نكعد نشوفه كله قواطي
وهدوم امي بالكاع
ولفراش معفوس
من اسئل امي تكول هذا الجني
يجي باليل
انتي من تسمعين صوت باليل مو طلعين
تره جني ياخذج وياه .
تطلع امي واعيش برعب
وانضف بسرعه بسرعه
علمود لايأذيني الجني
واروح اضم روحي بفراشي
مرت سنتين واني هذا وضعي
وصار عمري ٨ سنوات
امي كالت اني بعد تعبت
منا ورايح انتي طلعين لشغل مكاني
ياشغل اني مااعرف
باجر اخذج واعلمج شنو تسوين
انا اخاف من امي
شنو تكلي اكلها صار ميخالف
ثاني يوم الصبح
لبستني دشداشة قديمه وحجاب اميره مزروف
واخذتني وياها
اجه علينه رجال بسياره
طلعنا اول ماصعدنا
باس امي
وكرص خدي
ها ياحلوه
اني ضجت كلش شنو يكرص خدي تأذيت ؟
ليش امي يبوسها وتضحك وانا يأذيني
بالكرصه
خو بوسني نفس امي علمود اضحك
ضليت مغندبه طول الطريق
وللقصة المزيد
حبايب قصة اغتصبوا طفولتي
راح يكون بيها عدة حكايات
واول حكاية هي رباب
قصة بيها نوع من الجرأة
ومواضيع جريئة بس هذا مايحدث
فعلآ بمجتمعنا ولازم نتقبل الواقع
حبايب اريد دعم قوي لبداية القصة
همتكم وياي بالتعاليق ..
