اغتصبوا طفولتي ..حكاية رباب
للكاتبة ام نور
البارت الثاني
نزلنا بالتقاطع
شوفي هذا مكاني وهسة اعرفج على جماعتي
ليشتغلون وياي علمود لايتعرضولج
يعرفون بنتي
حسب مافهمته هو التقاطع بي اربع شوارع
كل واحد منهم لازم شارع
واذا اجه احد غريب يكتلوا ويطردوا
كلتلهم هاي بنتي رباب
راح تطلع مكاني بالايام لمابيه اطلع
واحد كلها اي الله يساعدج
بليل شغل وبالنهار شغل شتردين تصيرين
وضلوا يضحكون
تالي صارت الساعه بالتسعة الصبح
كالت تعالي تعلمي شنو اسوي انتي باجر تسوين
ضلت من يوكف التقاطع تفتر على السيارات
وتكلهم اني محتاجة
وعندي ايتام ابوهم شهيد
واذا ولد بعده شاب
تكله شما تريد انطيك
الله يحفضك لشبابك فدووه لهلطول
بس ساعد الايتام لعندي
وعلى هذا المنوال بقينا لحد
الساعة ٣ الضهر
وتالي اجه رجال
كلتله امي يله استلم شغلك تعبت اني
اي صار تدللين ام شفايف الحلوه
امي ضلت تضحك
هاي بنتج
اي
مبينه على امها حلوه
اي بس خل تكبر شوي واخذها الك هههه
رجعنا نتمشه تقاطع مو كلش بعيد وجو شته
حلو البروده بس مو كلش بارده
بيتنه جان حواسم وعدنا بيت ثاني
جانو كاعدين بي ناس نروح ناخذ فلوس منهم
امي من نروح نجيب لفلوس
تكلي ولج رباب هذا بيتنا اخاف اموت
بس اني مأجرته
صح بيتنه لكاعدين بي مو حلو من بره
بس من جوه كلش حلو وكلشي بي
عدنا ثلاجه ومجمده وتلفزيونات اثنين
نتمشه وامي تحجي ولج رباب
وين صافنه معزايه
لا امي وياج بس تعبت
ولج اذا ماسويتي نفس ماعلمتج
اموتج
جماعتي يكلولي اذا ماشتغلتي
واذا ماجبتي فلوس لاترجعين للبيت
اذبحج مثل الخروف .
وصلنا للبيت يله ولج بدلي
هاي لخلاكين لعليج ونضفي البيت
واني حسوي عشه
تعشي ونامي باجر من وكت طلعين
اي يمه صار
كملت تنضيف البيت وتعشينه
وره العشة رحت لفراشي
وضليت افكر امي شنو تشتغل
باليل هي بالبيت ليش يكلولها
انتي صبح وباليل تشتغلين
هو ماكو احد بتقاطع باليل
اني لازم اعرف امي شنو تشتغل باليل
اليوم ماانام بليل اخاف تعوفني
وتطلع لتقاطع بليل ويجي الجني
ياخذني
شوي واجت امي جابتلي كلاص عصير
شربت العصير وبقيت بفراشي
اشوف امي تطلع لو لا
بس ماادري بروحي وغفيت
ماكعدت اله الصبح امي كعدتني
يله كومي بت كويظم ماتشبعين نوم
ماجنها بس حباية
كعدت يمه كمت بسرعة
بدلت هدوم الشغل وطلعت
كلتلي اوكفي يم الباب
هسه يجي عليج ستار
يمه انا اروح بحدي اضوج منه
نجبي ولج تضوج منه
شعرفج بالضوجة بعدج بطول نعالي
اني اخاف منها شنو تكلي
اكلها صار .
طلعت كعدت يم الباب
كلش استحيت من ملابسي
جهال يطلعون حلوين لابسين ملابس
مدرسة .
صدرية نيلي وقميص ابيض
ومخلين شرايط بشعرهم فد حلوات
من اشتغل واجب فلوس اجيبلي
شرايط بيض واخليهن بشعري
اصير فد حلوه اخبل احلى
من ساره بنت ابو عبدالله
عود هي حلوه مخليه شرايط وماتقبل
تلعب وياي .
اجه عمو ستار ردت اصعد وره
كلي تعاي ولج رباب كعدي يمي
امج ماكو اليوم
صعدت كدام
هاا شلونج ياحلوه
زينه
شو مابستيني
ضليت ساكته
راح اوصلج والضهر اجي عليج
لا لاتجي
هو قريب اني ارجع بحدي
لا انا اجيلج امج ماتقبل
لاتكطعين رزقنا ويه امج .
نزلت وكفت بالشارع
الدنيا بارده ضليت بس افتر
على السيارات استحي احجي
هذا ليطيني ربع وهذا ٥٠٠
هذا ليكلي ليش واكفه بهلبرد
واكو ليسألني ليش عمو ماعدج مدرسة
اني بس ساكته مااجاوب
امي كلتلي ليحاجيج لاتجاوبي
ولادلين بيتنا اذا سألوج
وليسألج هواي عوفي وابتعدي
صارت الساعة ٢ونص
اجه رجال لي البارحة سلم
على امي
يله روحي انتي لبيت
اني هسه بمكانج وسلمينه على جنان
هههه هاي انتي مطفية مو نفس امج
ولج عوبة جنان امج
بتعدت عنه وضليت واكفة
انتظر ستار
صارت الساعة ٣ اجه عمو ستار
كال هاااا خلصتي
اي من مساع بس انت تأخرت
واخاف من امي تكتلني
ولج هذا يمته اجالج
ب ٢ونص
وانتي شلون خليتي
ليش البارحة ماما كالت هو ياخذ مكانج
اي ولج بس هاي نص ساعة
بيها رزق الج
بعد ب٣, يله تعوفين مكانج
حبوبي لاتكول لماما والله بعد ماعوفه
لحد ماتجي انت
هههه يله امشي ركبي مااكلها
شكد طلعتي ولج
ماادري مااعرف احسب
جيبي اني احسب
لا امي ماتقبل
هااا خوش
والله مخوفتج جنان
وصلت للبيت دخلت
امي امي وينج
سمعت صوت ضحك من غرفة امي
رحت اريد افتح الباب مقفول
يمه هذا الجني بس لا موت امي
لان عفتها بحدها .
وللقصة المزيد
طبعآ اكو بعض الاغلاط
تكرمون مثل ضربتني بالنعال
وغيرها
حاولت قدر الامكان اخفف من الغلط
بس مااكدر الغي لان هذه حياة رباب
واكثر من هذا الغلط تعرضتله
همتكم حبايب بتعاليق تحياااااتي
