#باحثةللعشق
البارت السادس
#قصةوفة
في بيت عمر، دخل البيت والساعة دكت ب 11 ما اتأخر هواي ابيت حماه حتى ليلى ما كعدت وياه ولا حجوا كلمتين على بعض الا بوكت العشا، محتار شلون حيتصرف وقرر انه لازم يكلم ليلى ويتقابلون حتى يتكلمون فجاءة سمع امه تصيحله
الام: عمر انت جيت يا حبيبي.
عمر: هسه دخلت ، شلونج هسه يا أمي.
الام: الحمدالله أحسن، شبيك يا حبيبي شكلك مايطمن بخير.
عمر: ماكو يا أمي، لاتشغلين بالج.
الام: صار شي متزاعلين انت وليلى، ابوها كالك شي ضايقك طمني يا عمر.
عمر: ماكو والله، هذول حتى يسلمون عليج هواي .
الام: لعد ليش تضم على امك
عمر: ليلى راح تسافر بعثة لامريكا.
• الام: شنو هالمفاجآت هاي، انا جنت مفكرة انه حاجاك علمود تروح وتتفقون على موعد العرس
عمر: لا والله عمي بلغني بخبر البعثة بعد العشا حتى ليلى ما جانت كاعدة ويانا.
الام: لعد وين جانت نايمة.
عمر: لا هي وامها اتعشن ويانا وبعد العشا اخذنا المهوة بالحديقه وهي وخالتي اختفن تماما.
الام: الظاهر محرجة منك يا ابني وعلمود هل شي ابوها اللي بلغك.
عمر: كنت حاب احس اني مهم عدها وكان لازم هي اللي تبلغني بالموضوع هذا كنا حجينا وفكرنا سوا.
الام: ليلى بنت ممتازة يا عمر ومتربية خوش تربيه ومن بيت طيب، انتوا بس محتاجين تعرفون بعض اكثر وهذا راح يجي مع الوقت والعشرة.
عمر: لعد الخطوبة ليش سووها ما هو علمود هل شي يا امي، انما اللي يصير وياي غير هذا تماما، فترة خطوبتنا ضايعة بالطلعات والونسه وبس.
الام: وانت مو طلعت وياها لهسه ما عرفتها يا عمر ليش تطلعون
عمر: طلعاتنا كلها ضايعه صديقاتها والحفلات والمناسبات، لكن ماكو مرة اكوللها نطلع لوحدنا الا وقابلنا احد يعرفونه ويكعدوا ويانا.
الام: زين ليش ماتحجي وياها وتفهمها.
عمر: حجيت هواي وحاولت كثير.
الام: عمر يا ابني اني راح اكولك شي مهم، هذا زواج وعشرة عمر وحياة وعائلة مو طلعه وونسه وبعدين كل واحد يروح لبيته.
عمر: عندج حق يا أمي، فترة زعلي على ابوي خلتني مالي نفس لأي شي احتمال جنت سلبي وياها وماارفض الها أي طلب.
الام: حبيبي انت ممكن تنفذ الها كل طلباتها بس ما تجي على حساب نفسك، فاهمني يا حبيبي.
عمر: طبعا يا امي فاهم جدا، لا تقلقين عليه اني راح ااكلمها واتفق وياها نتقابل ونفكر شراح نسوي.
الام: ربي يوفقك يا حبيبي وينورلك طريقك باذن الله، تصبح على خير.
عمر: وانتي من أهله يا ست الكل.
عمر دخل غرفته ولزم الموبايل يريد يتص بليلى وبعدين اتردد الوقت اتأخر، غير ملابسه وقرر يتصل بيها باجر الصبح قبل ما يروح الكلية ويحدد موعد يتقابلون ويفكرون شراح يسوون
هاله وملك راحن للكلية، دخلون القاعه جانن يدورن على أي مكان يكعدن بي شافن نادر يأشر الهن
هاله: هذا ليش يأشر، قصده يسلم يعني.
ملك: ما اعتقدت حضرتك، هو الظاهر رايدنا نروحله تعالي.
نادر: تعالوا اقعدوا اني منتظرجن من الصبح ليش اتاخرتن
ملك: شكرا يا نادر كلك ذوق. (ملك باوعت لهالة بمعنى اكو شي)
هاله: شكرا يا نادر، ماجان الها لزوم اتعب نفسك.
نادر: ماكو تعب ولاشي هاله
