عقد ياقوت

13

#عقد_ياقوت

بقلمي السيدة العلوية

الجزء 13

حمزة .. اني ادري بأهلي كلش زين اغلبهم افكارهم ماديـة ماعدا وحدة بس بيهم وهالوحدة ادري بيهة مامسموعة كلمتها كدام اخويـة الكبير .. هي زوجة اخوية .ز لكن للاسف اختي واخوية يتمنون اليوم قبل باجر يحصلون من عندي الي يكدرون عليه ... ومعاهم حق .. اني شعندي متمسك بالحياة والاموال .. المن اريد اضمهم ياترى .. اشو هي نهايتها الهم

كاعد بالمكتب اخلص شوية شغل ودخل علية ابو عصام مفور واعصابة كلش : شوف ترى اني مخلي احساب للملح والزاد والا ادخل العشاير واسويها اطلابة

حمزة: فرزن كلامك عدل واعرف ويامن تحجي .. شبيك ابو عصام شصايرلك

ابوعصام : احنه مو اتفقنه العقود مال السيارات اني اختص بيهن ؟؟

حمزة: ومنو هسة لعب وراك

ابوعصام : حضرتك

حمزة: انته شجاي تحجي ؟؟

ابوعصام : تفضل اقرأ

حمزة: هذا لا توقيعي ولا اني .. ومن ثم مبين هالعقد مزور مو من معرضنا .. شبيك ابوعصومي ماتنتبه للختم والانواع ..

ابوعصام : يعني ؟؟

حمزة: يعني الملعوب اعرفه واعرف صاحبة وروح يمي السالفـة محلولة .. طلع من عندي ابوعصام وصحت على العامل البنغالي .. خليته يصيحلي عمار زوج اختي .. لان اعرف كل هالاشكالات من وراه وكل هالسرقة هو السبب بيهة ..

ثواني واشوف عمار اجاني .. : كول حجي

حمزة: عمار الى متى نضل نعلب مثل القط والفار اني وياك

عمار : شبيك حمزة شجاي تحجي

حمزة: تعرف كلش زين شجاي احجي ولاتغشم نفسك .. ابن خالتي على عيني وراسي .. زوج اختي على عيني وراسي .. بس مال تقترب من مالي لا حدك توكف .. لان مو سفيه اني او مريض حتى حضرتك تجي تلعب من وراي ..

عمار : حمزة ترى مااسمحلك ومخلي خاطر لسلامة لا والله لاانته ولاهي احطكم براسي من تصير الشغلة يم كرامتي ..

حمزة: لك بابا محد جاي يمك ولا يم كرامتك بس مال تريد تبوكني عيني عينك وحسبالك تفوت لا .. ولعلمك ترى ابوعصام راد يفضها بالشرطة والعشاير بس لخاطر القرابة وكفته ..

عمار : {شكد اتمنى هسة اخنكك بأثنين ادية .. بس اووف مضطر اصبر عليك لحدما اكدر اخذ منك الي اخذه .. } عفت حمزة ومشيت رحت لبيت من البيوت المشبوهة المتعود اروحلها وسلامة حسبالها اني مغرم بيهة وحاب عشرتها متدري بية مضطر اصبر عليهة وعلى عائلتها في سبيل الفلوس .. ..رجعت للبيت مسوي نفسي ضايج ..

سلامة : الله يساعدك ابو رقية

عمار: تسلمين .. سويلي كلاص جاي ..

سلامة: شنو ماتتعشى

عمار: مااشتهي

سلامة: ليش صاير شي ..حمزة بس شي .. اكو شي بالشغل ؟؟

عمار : اهوووووو شكد تلحين ..

سلامة : يمعود هدي اعصابك .. ..كالعادة قاسية وية الكل ولكن هالشخص يستغفلني وادري ومقتنعة ...

ياقوت : من بعد استشهاد مهدي .. اوضاعي المادية كلش تدهورت ومااعرف المن انطي وجهي بعت الذهب مالتي علمود انطي فلوس الايجار بس الحلقة مال مهدي ماكدرت ابيعهة .. وصار لازم اطلع من البيت لان صاحب الملك يريد مني الايجار وماعندي .. لهذا صار لازم اروح لبيت عمي ..بس اذا اروحلهم .. شلون .. خلي اروح والله كريم ..

ثاني يوم الصبح .. كعدت وادري هاي اخر يوم الي بغداد واخر يوم الي وية مكان مهدي ومكان امي ..طشيت عيوني بالمكان كانما اريد احصل اكثر على صور من المكان واريد احفظه لاخر مرة بحياتي .. من تروح اصحاب المكان شيفيدك المكان .. بس تهزك الذكريات المزعجة .. تحركك الموجة بدموع تبدي وماتنتهي ..

لبست مصطفى الملابس الشتوية ودفيت نفسي مو خوفاً على نفسي خوفاً على قطعة مهدي البداخلي {الجنين } ولبست عباتي وصعدت من الكراج للمحافظة البيهة بيت عمي .. بعد 4ساعات طريق وصلت واني كلش تعبانه وبالكوة وصلتلهم ..

شتتوقعون .. راح يستقبولهـا ..