اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
#عقد_ياقوت
بقلمي السيدة العلوية
الجزء18
وصلت ام مصطفى للبيت ورجعت للمعرض لان عندي كومة شغل ..
حمزة: اكول خيتي راح ارجع للشغل محتاجين شي
ام مصطفى:لا خوية الله يوفقك ..وهنا واشوف مصطفى لزك بايد ابو المعرض ..
حمزة: احلى شعور مااكدر اوصفه الكم بحياتي ماجربته وماعشته .. من يكون عندك طفل ومتعلق بيك ويرفض يتركك ويرفض يقتنع انه تعوفه وتروح ويضل يبكي لمجرد انه انته بدأت تتحرك وتعوفه .. وفعلا مصطفى بدأ يكمشني بطريقة قوية ويحظني ..
حمزة: اني راح اخذه وياي للمعرض .. هسة ادخلي للبيت واني راح اخذه وياي .. وفعلا اخذت الي بدأ يكون سبب هوسي وجنوني .. يعني شي غريب من اكون بديت ادخل بعمر 43 سنه ويجي طفل عمرة 3 سنوات يقلب كياني .. طفل يكدر بكل سهولة يكون مصدر سعادتي وبكل سهولة مصدر حزني .. وكفت يم ابو سوبرماركت ومثل والد ماردت ابخل على قطعة من روحي .. كانما هسة بدأت احس الفلوس الي امتلكها الها قيمة لان تكدر تسعد حبيبي ..
هالفلوس الي جانت سبب حزني وسبب أذيتي .. هالفلوس الي اشوف اختي وزوجها يتقاتلون علمودها .. هالفلوس الي خلت الكل يطمع بيه ويمشي وياي مو حباً بية بس علمود مصلحة .. لو علمود حاجة .. هسة بديت احسج ياهالفلوس بيج منفعة ولو قليلة لان كدرتي ترسمين الابتسامة على وجه حبيبي مصطفى .. بس ياترى هي الي كانت السبب لو صدري وحناني .. وليش هالطفل بسرعة تعلق بية .. اني واعرف بروحي ماعندي ذرية وفاقد لشعور الابوة .. بس انته ياحبيبي شبيك .. شنو اليوجعك .. شنو البية عجبك وخلاك ترتمي لاحضاني .. لاتكول حبيبتني .. اني صح يمك بس حنين ويم غيرك اسد جوعان اريد انهش اي واحد يأذيني .. بس يمك احساس أب ومحاوط ابنه بأذراعه ..لكن يم غيرك هسة خليني اشوفك يم غيرك شلون اكون ..
