هدى قالت ليها والله صراحة ياهنادي .. الزول ده مابعرف عنه حاجة .. بلاقيني في الشارع هو ماشي شغله.. وانا ماشة المدرسة.. بسلم علي بكل ادب .. ماحصل يوم حسيت احساس انو كدا ولا كدا ..
قالت ليها طيب ولاسمعتي عن صحباتك؟ .. قالت ليها ابدا والله ..
انتي عارفة صحباتي فضايح.. وبحكو لي بعض .. لو في واحد ساي عاين لواحده منهم .. تعملو موضوع وتبرمج بينا اليوم كله ..
ماقالو عن الزول ده شي والله ..اها تاني طالبة مني حاجة غير كدا؟
قالت ليها ابدا .. شكرا ليك ..
اها هنادي بقت شبه اطمأنت كدا .
المهم قعدت تفكر.. ياربي امشي طوالي اوافق لامي وابوي .. يقولو البت الخفيفة دي .. كدي خليني يوم يومين كدا .. لمن يٍسألوني بوريهم ..
بالمساء كدا جاتها رسالة من الباقر في تلفونها ..
مساء الخير.
قرت الرسالة وماردت ..
كتب ليها تاني .. ياناس ماتعبرونا .. انا منتظرك تعطفي علي ولو مرة واحدة ..
طبعا ياها نفس الرسايل البكتبها ليها كل مرة ..
وعادة هي لمن تجيها رسالة زي دي منو ..
مابترد ليهو .. مرة واحدة ردت ليهو قبل كدا قالت ليهو لو سمحت تاني ماترسل لي هنا ..
اها يازول المرة دي.. لمن كتب ليها الرسالة دي .. ردت ليهو ..
كتبت .. (اهلين .. الباقر .. كيفك) ..
كتب ليها .. ياهلا ياهلا .. انا الليلة الارض مابتشيلني من الفرحة .. انا من متين منتظر منك الرحمة والحنان ده .. الليلة الحصل شنو؟ خلاك تردي لي كدا؟
كتبت ليهو .. لانو الامور اتغيرت ..
رد ليها . اتغيرت كيف؟
قالت ليهو .. لانه الكلام وصل الكبار..
قال ليها كيف يعني ؟ مافاهم؟؟
قالت ليهو سأل ابوك ..
قال ليها أسال ابوي اقول ليهو شنو؟ انتي عملتي شنو يا بت؟ اوع يكون مشيتي فتيتيني ؟؟
اها تاني ماردت ليهو.. وعرفت انو لسه ماعرف الكلام من ابوهو ..
قفلت التلفون .. وبقت خايفة انها تكون بوظت الموضوع.. اظنو رسل ليها 15 رسالة.. بسأل عن كلامها ده.. معناهو شنو؟ وهي تاني ما ردت ليهو ..في النهاية قال البت دي شكلها بتخوف فيني.. ما اكتر .. وما اكترث للموضوع ..
هنادي ضربت لي شروق.. حكت ليها كلام هدى ..وقالت ليها انا غايتو اتصرفت تصرف.. ماعارفة صح ولا غلط.. رسل لي ورديت ليهو كيت كيت ..
قالت ليها غلطانة وستين غلطانة .. انتي مالك ومال ابوهو؟ كان تحافظي على شخصيتك الاولى .. خلاص بس ماصدقتي طلبوك وقمت تتراشقي .. غايتو جنس خفة!!
قالت ليها عارفة ياشروق.. انا والله خايفة انو الباقر ده يكون ماجادي..
وزيو وزي الغيرو ولا ماكدا؟..
قالت ليها انتي اصبري وشوفي النتايج ..
المهم يازول هنادي ماقدرت تصبر اليومين قامت بكرة .قالت لامها .. يا امي ابوي سألك تاني من الموضوع؟
قالت ليها ما اتكلمنا فيهو تاني .. انتي بقيتي على شنو؟
قالت ليها انا والله ماعندي مشكلة.. لكن لاهسي انتو ماعرفتو راي الولد .. الطلب جاي من ابوهو موش كدا؟ طيب انا ما حيتزوجني ابوهو .. لازم ابوي يسمع من صاحب الشان ..
المهم ... المراة كلمت راجلها ادريس.. وقالت ليهو هنادي ماعندها مشكلة.. وموافقة بالموضوع .. امشي في الموضوع ..
اها زووول طالت الايام .. وعمك حاج عمر بالليل انتظر ولده لمن جا
لانه الباقر بعد مايجي من الشغل.. بتغدى ويستحمى والعصر بطلع
يجي بعد العشاء ..
الباقر عنده اخو اكبر منه اسمه حسين .. وبتين تومات اصغر ليميا ولينه 21سنة..
اهااا عمك حاج عمر . قال ليهو تعال لي يا الباقر عاوزك .. هنا طبعا الباقر قلبو تح ترح ترح ترح .. ياربي هنادي تكون كلمت الحاج ده والليلة غايتو بغطس حجري ..
جاهو قال ليهو ايوة يا ابوي .. جيتك مالك مساهر الليلة؟ .. قال ليهو مساهر راجيك ..
قال ليهو ان شاء الله خير يابوي .. جرا الكرسي وقعد قدامو.. وابوهو قاعد في السرير .. قال ليهو بتعرف هنادي بت ادريس النجار يا الباقر؟
قال ليهو ايوة بعرفها ..
قال ليهو.. رايك فيها شنو؟ دايرين نخطبها ليك ..
قال ليهو والله مافيها كلام.. لكن انت فاجأتني بالموضوع .. خليني افكر في الموضوع .. واديك الخبر الاكيد ..
ابوهو قال ليهو انت يازول مستهبل ولاشنو؟؟ .. انت ما اصلك ساكها ومكرها الحلة والتلفونات .. تقول لي داير افكر؟
الباقر حاول يحول الموضوع بسرعة.. لانه شكله مفضوح قدام ابوهو ..قال ليهو ابوي لكن في مشكلة.. كيف انا اتزوج قبال حسين اخوي ..
المفروض الترتيب ؟
قال ليهو انت القالك منو ح تتزوج قبالو .. بس هسي دي شورة .. بعدين اقول لك حاجة .. انا كلمتك عشان يكون عندك خبر .. لكن انا طلبتها وانتهيت ..
هنا طبعا الباقر ارتبك ارتباك شديد .. لانه اصلا لمن كان بعاكس في هنادي .. ماعايزها مراة مستقبل .. سامع عنها في الحلة اقاويل .. وعارف انو سمعتها ما تمام ..
قال ليهو ياابوي .. انت ممكن تحكي لي القصة شنو؟
انت عرفت كيف اني ساكيها؟ وطلبتها لي متين؟ وكيف ؟
قال ليهو يازول امشي.. انا ماعايز معاك كلام تاني.. كلمتك عشان يكوون عندك علم ..
المهم الباقر مشى من ابوهو وما اداهو اي رد .. مشى رقد في السرير غلبو النوم .. قاعد يفكر .. وماعارف الموضوع ده اصلا تمه بي ياتو طريقة ..
وحسه فعلا" بي انو هو اتورط .. واتخوزق في انسانة.. ما كان بتمناها زوجة ..
بالليل كدا ضرب لصاحبو.. من اولاد الحلة اسمو كمال .. صحاهو من النوم ..
قال ليهو ..الو كمال .. كيف الحال نايم ولاشنو؟
قام الزول صوتو متغير شكلو جرس التلفون صحاهو .. من سابع نومة .. اهلا باقر .. كيفك يازول نعل مافي عوجة؟ .. تلفونك ده ماطبيعي.. ان شاء الله كلو حاجة تمام ..
قال ليهو اصحى يا مخلوق .. مافي عوجة شنو.. والله العوجة بايتة ومقيلة .. اصحى شوية.. انا ماقادر اصبر للصباح .. عشان احكيلك .. انت بتعرف هنادي طبعا؟ ..
قال ليهو ايوة النجارة مالا؟
قال ليهو ياخي الزوله دي زي ماعارف.. قبل كدا الشباب حكو عنها ..
وانا من اليوم داك .. بحنك فيها .. شي بالتلفونات .. وشي مراسيل .. وشي لمن الاقيها في الشارع ..
واصلو حنكي ابا يمشي فيها .. وشكلها زولة ناسات ..
اها يازول المهم حركاتي معاها دي.. وصلت لابوي.. ماعارف بياتو طريقة . ابوي قام طلبها.. قال ليهم عايزنها للباقر ..
وانا والله ماعايزها نهائي .. كمال قال ليهو مالا يعني؟ .. بس عشان كلام الناس ؟ انت شفت حاجة بي عينك؟ قادر تثبت حاجة؟..
.. شفتها ماشة مع زول؟ .. لاقيتها في حتة معاها واحد من الشباب؟ ماشين سوا؟
قال ليهو ابدا والله ماحصل.. لكن بس ياهو الكلام البقولو فيهو ده ..
قال ليهو ياخي عليك الله سيب الوسوسة وسوء الظن .. كلها مجرد اتهامات وكلام باطل .. في ناس اصلا بحبو يتهجمو على بنات الناس .. ويوسخو سمعتهن .. قال ليهو ياخوي العود المافيهو شق ماقال طق .. وقالو مافي دخان بدون نار .. انا الزولة دي حد الله بيني وبينها ..
قال ليهو يعني لو اي زول جا وعمل تأليف تهمة في واحدة من اخواتك التومات ديل .. انت بتقول العود المافيهو شق ماقال طق ؟
موش كدا ؟؟؟
ياخي اتق الله وماتتهم بنات الناس بدون بينة .. انا راسي ده موجعني خليني اكمل نومي نوم ..
الباقر قال ليهو انت اصلك اهبل.. ومابتعرف البنات ديل.. بعرفهن انا .. نوم لكن انا بعرف لي طريقة اتخارج بيها منها ..
كمال قال ليهو ياباقر نصيحة مني ليك .. اتأكد قبل ماتتصرف .. يلا مع السلامة ..
المشكلة انو باكر الصباح ادريس النجار مشى لي عمك حاج عمر وقال ليهو البشارة ياحاج هنادي وافقت بالباقر ..
الى اللقاء ..
أنت تقرأ
صراحة مدعومة..طارق اللبيب
Short Storyودايما الخير منتصر .. والشر والفساد منهزم .. ورواياتي هي امنياتي .. لمجتمع متعافي من كل مرض ..اللهم ثبت الخطى وتقبل العمل .. تحيتي خالصة ممزوجة بالحب والاحترام لهذه الارواح التي تجوب بين احرفي لتنال مايجبر الخواطر وينير الطريق .. وحفظكم الله وسدد...
