صراحة مدعومة..طارق اللبيب

٤

طبعا وقت ادريس النجار ابو هنادي جاء لحاج عمر..  وبشره بالخبر ده ..فرح فرح شديد خلاص .. وقال ليهو ياسلام يا ادريس والله انا من مشيت مني..  في كل صلاة بقول ربنا يقسمها لينا البت دي .. البت البتصارح ابوها بكل كبيرة وصغيرة .. ابشر يازول .. انحن بنحدد ليكم مواعيد ونجيكم في البيت ناس جد..
بعد مافات ادريس . يادوب كدا حاج عمر ماشي يكلم مرتو ام الحسين .. وبناتو الاتنين .. قال ليها تعالي يابت السيد .. باقي قبال يومين انا طلبت هنادي بت ادريس للباقر .. وهسي الجماعة ردو لي بالموافقة ..
قولي ان شاء الله ربنا يتم على خير ..
قالت ليهو انت يا الحاج مابتشاور.؟ يعني نحن قاعدين في البيت ده طراطير ؟ هسع انت شاورت الولد ؟ قال ليها كلمتو ..واسمعي يابت السيد .. الموضوع اصلا جاء بطريقة غريبة .. ماني داير احكيها ليك .. بعدين  تعا نقولك.. انتي ما واثقة في اختياري لولدي ؟
كدي اسألي بناتك ديل قولي ليهن رايكن شنو في البت دي؟
في واحدة من التومات قاعدة جوة سمعت الكلام جات طالعة .. قالت ليهو منو يابوي . موش هنادي اخت هدى أدريس؟؟ قال ليها ايوة اها؟؟
قالت ليهو ديل بنات ممتازات شديد .. انا بعرف هدى .. لكن بحب هنادي اكتر منها .. زولة عسل عديل ..كل مرة بجي غاشياها من المدرسة .. بس عارف يابوي مرة باقر اخوي..  لقاني واقفة معاها قال لي تاني الزولة دي ما القاك معاها تاني.. اوعك تباري الاشكال دي..
انا لحدي هسي مستغربة انو الباقر قال لي كدا ليه؟ مع انها هنادي دي والله..  اكتر واحدة دغرية في الحلة دي ..
عشان كدا ّّّّ!!!!! مااعايزني اكشفو انو بحبها موش؟ يادوووب فهمتك يا فقري ..
عمك حاج عمر عاين لي مراتو كدي .. وقال ليها اها اتفرجي شوفي بتك بتتكلم عنها كيف..
انتي قايلة انا بقوم لي في موضوع ساي ؟
والله الباقر الكلب..  لقا ليهو مراة صالحة .. لو ماعارفة اعرفي .. والله هو ذاتو مابستحقها لكن الله غالب ..
ولو لقاها صرتو لاغرتو .. (يعني حظو)
اليوم ده  كلو حاج عمر فرحان يمرق ويدخل .. والله التقول هنادي دي داير يعرسها هو براهو ..
زي ماقالو اهلنا .. الراجل مابتمنى لزول يكون احسن منه الا ولده ..
دايما ولدك هو البتتمناهو يتفوق عليك ..
وبقى متحضر..  لمتين يجي الولد الاسمو الباقر ده .. ويبشره بموافقة البت ..
المهم حسين الكبير قام جاء قبل الباقر ..
حسين شغال في سوق ام درمان عنده محل بتاع اقمشة .. والباقر موظف في الكهرباء . الاتنين شغالي كويس ماعندهم عوجة ..
الحاج قال لي ولده الكبير .. تعال يا حسين النحكي ليك المستجدات .. انت لازم تكون اول زول يعرف وتدينا رايك..
.قال ليهو في شنو يا ابوي بشر ان شا الله خير ؟
حكى ليهو الحاصل بدون حكاية المعاكسة حقة اخوهو ..
بس قال ليهو .. عمك ادريس جاني هنا .. واتكلمنا عن بتو الاسمها هنادي وانا طلبتها منو لي اخوك..
قال ليهو والله مافي عوجة لكن .. نحن ناسينا ياحاج ولا شنو؟
هسع الناس يقولو فيني شنو..  اكان خطبت لاخوي الصغير..  وانا قاعد اطوطح كدي ..
ابوهو قال ليه اسمع يا حسين .. انا مابخليهو يعمل اي خطوة..  قبل ما انت تعرف البيك من العليك ..
حسين قال ليهو لكن والله يا ابوي هنادي مافيها كلمة علي القسم البت دي متكيف منها لامن مالية راسي .. والباقر يستاهلا ..
قال ليهو والله مايستاهلا .. والله هي اخير منه .. يصرمح ويتحاوم الليل كلو ..
بس يازول مافي كتير كدي الباقر جاء داخل ..
ابوهو قال ليهو ادخل غير هدومك دي وتعال نحن دايرنك ..
قال ليهو جدا يا ابوي ..
عمك حاج عمر زول صعب .. واولاده بعملو ليهو الف حساب .. ياخي خلي اولاده .. ناس الحلة كلهم بعملو ليهو الف حساب .. وكلمتو بتمشي فوق اتخن دقن ..
الباقر جا ومطير عيونو .. وحاسي بانو الموضوع بقى جد ..
حسين عاين ليهو كدي وبسم .. وقال ليهو مبروك يا باشا.. مابتكلمني ياخي ؟
قال ليهو في شنو؟ هو في شنو بالضبط كدا ياجماعة؟؟ فهموني ..
حسين قعد يعاين لابوهو ..
ابوهو قال ليهو يعني يا الباقر عامل زي الكانك ماعارف ..
اسمع يا زول  عمك ادريس جانا هنا على حسب طلبي ..وقال البت وافقت .. وانا هسي دايرك تحدد يوم عشان نمشي نطلب منهم رسمي ..
قال ليهو يا ابوي انا لسع ما اديتك راي .. يعني الموضوع ده ماشي علي بالعافية كدا  ولاشنو؟
قال ليهو ايوة بالعافية .. اول انت وكت بتتكلم معاها في الشارع..  وبتراسلا بالتلفون .. قايل بنات الناس لعبة .؟
علي الطلاق ياكلب .. تقول كلمة جاي ولا جاي..  الا اكسر ليك راسك ده ..
انت قايل خلاص كبرت ومافي زول بوقفك عند حدك؟
انا اديت الراجل كلمة .. ومابكسر كلمتي .. شوف المواعيد وكلمني ماتكتر معاي الكلام ..
حسين قال في شنو يا ابوي؟؟ .. انا شكلي ماعارف خلفيات الموضوع ..
الباقر قال ليهو انا بحكي ليك ياحسين ..  وبعدين شوف انت ذاتك رايك شنو؟
قال ليهو جدا قام الباقر مشى ..
وابوهو طلع .. حسين لحق الباقر .. قال ليهو اصبر .. دقيقة انا عايزك تعال لي بي غادي ..
دخلو الصالون بتاع الضيوف .. وبقى حسين اخوهو الكبير يسأل فيهو ..
قال ليهو اولا .. انت يعني البت ماعايزها ؟
قال ليهو ايوة ماعايزها لو بقت اخر واحدة .. حتي لو عزيت حلف ابوي..  واتزوجنها بطلقها طوالي بعد شهر ..
قال ليهو مالا؟ عيبها لي .. بت ماشاء الله جمال وقوام وادب واحترام .. ومافيها كلمة ..
الباقر ضحك .. وقال ليهو انت مافاهم اي حاجة وزول داقس بس ..
البت دي ضاربة .. ومابتنفع مراة بيت ..
الحاصل ياخينا .. انو البت دي سمعتها  زي الطين .. وانا كنت براسلها بالتلفون .. وكدا ..
والوكت كله عاملة تقيلة .. وابت تديني وش ..
قامت كلمت ابوها..  ابوها شكاني لابوي..  ابوي طلبها طوالي ..
حسين قال ليهو طيب ياخي .. لو البت دي فيها اي كلمة  زي ما انت بتقول ..
موش كانت اتجاوبت معاك؟؟ .. اوعلى الاقل كانت سكتت .. لكن كونها تحكي لابوها .. معناها دي بت دهب ..
قال ليهو دي حركات بنات .. انت عارف هسي البنات البعملن كدا
عايزات ينضفن سمعتن . لكن هنوده  نحن عارفنها ..
حسين قال ليهو عارف ليها شنو؟ .. قال ليهو ياخي كم واحد من الشباب بحكو عنها .. وعن خفتها وحركاتها  وعلاقاتها .. بس علي انا عاملة لي تقيلة .. عشان تنفذ الخطة دي .. لكن دي مابتمشي علي انا ..
حسين قال ليهو والله مادام انت في راسك في موضوع ..  المفروض تحكيهو لابوك .. وابوك ما ممكن يزوجك انسانة زي دي ..خليك صريح الصراحة دايما مدعومة ..
قال ليهو اصبر .. انا مابحكي لابوي اي حاجة .. بس انا براي بخليها تغير رايها مني وتقول مادايراني ..
الى اللقاء ..