صراحة مدعومة..طارق اللبيب

١١

ام الحسين بت السيد والدة الباقر .. مشت بعد الفطور طوالي لي ناس ناس السرة ..والنسوان هناك ما شاء الله كمية لا يستهان بها .. والقهوة مدورة . والبخور ده مايديك الدرب .. وام الحسين سلمت علىهم وقعدت .. وعيونها تفتش لي منو؟ للعازة .. وتنضم براها ..وينا العازة؟ القوالة الصواطة ام خشما" خفيف..  بس الليلة النلم فيها .. والله الليلة ادخلها في خرم ابرة ..
ووووب .. شافتها طوالي .. قالت ليها تعالي يا العازة..  ياختي الحي بلاقي .. والمغتا على الله مكشوف .. انتي متين انا قلت ليك ولدي الباقر خلا هنادي بت منى عشان سمعتها؟؟
مالا يا يمة هنادي بت منى؟ اريتا بت السرور .. العديلة الطيبة العاقلة .. المحتشمة.. مالا يا يمة هنادي؟ حايمة بالنوادي .. ولا شافوها في شارع الوادي ؟؟ مالا يايمة هنادي بت منى .. اريتا بت الهنا .. (طبعا بتتكلم بصوت عااالي وتسمع في النسوان) ..
هنادي كان فيها كلمة نحن كنا خطبناها لي ولدنا؟ اسمعن يا نسوان .. وحات الله الخلقني .. نحن هنادي ماعندنا فيها كلمة .. وهنادي هي الرفضت ولدي .. قالت ماعندها نية عرس .. عشان ابوها ايدو احدة .. وهي باقية ليهو ولد وبت ..
هسي كان فيكن واحد تقدر تقنع هنادي تأخد الباقر .. نحن قبلانين ..
والله سمعتها زي الدهب.. لكن ناس العازة .. الحمد لله ماعندهم شغلة غير الكضب في الناس ..
العازة قالت ليها عاد يا ام الحسين .. قبلك وحدك وبراك .. يعني انا الكلام جايباهو من وين؟
قالت ليها قبلك انتي.. البتألفي الكلام.. وتجي تقولي قالت لي فلانة .. عليكن الله يانسوان حصل يوم سمعتني جبت قول في زول؟
عليكن الله كان سألوكن .. القوالة انا ولا السارة بتقولن شنو؟
واحدة قاعدة هناك .. قالت ليها والله الموت حار يا ام الحسين نحن ماسعنا ليك قوايل .. لكن العازة النصيحة لي الله ..حياتها كلها قوايل وهجايم في الناس .. الحريم الباقيات قالن صدقت والله .. ام الحسين مافيها كلام ...
شادية خالة شروق .. طبعا حاضرة وانبسطت بسط شديد .. قالت ليها يعني يا بنات امي .. هنادي طلعت بريئة ومهجومة .. سبحان الله .. اتاريك ياشروق بت اختي.. مابتتكلمي من فراغ ..
الحمد لله ظهر الحق .. انا كان دقيت لي شروق وجات هسي عرفت الكلام ده ..والله يا العارة الا تمعطك ..
لكن مافي داعي مادام الناس عرفت كضبك وافتراك .. والعازة تحلف وتتقطع .. والله الكلام قالته لي ام الحسين.. ماقطعتو من راسي .. وام الحسين تقول ليها اسكتي يادجالة ..راسك بالسيف .. كمان تكضبي فوقي  قدامي .. وطبعا الناس كلهم صدقو ام الحسين لانو العازة معرفة بتاعة لخبطة ..
كل وكالات الانباء واجهزة الأعلام المعتمدة اخدت خبر طازة هههه
اما ليميا وصلت ناس هنادي.. في نفس المواعيد الكانت امها مولعاها بي جاي .. لقت ادريس قاعد برة في المعرض .. خالف كراعو بقرا ليهو في جريدة .. سلمت عليهو كيفك ياعمو .. ياعمو هنادي موجودة؟ .. نزل نظاراتو وقال ليها عليكم السلام .. انتي بت حاج عمر موش كدا؟ قالت ليهو ايوا ياعمو  انا ليمياء .
قال ليها اتفضلي هنادي جوة .. الليلة امها مصدعة شوية.. بتعمل لينا في الأكل .. قالت ليهو يعني الليلة مانجارة .. ضحك قال ليها لالا الليلة الموظف ماخد اجازة بدون مرتب ..
دخلت البت..  وعمك ادريس مستغرب في البت دي..  الجابها شنو؟ اصلا ماقاعدة تجي .. بتجي تومتها التانية .. لونها فاتح اكتر منها شوية .. ليمياء قمحية .. ولينة بيضاء .. وما بتشابهو شديد كدا زي كل التوائم .. لكن يعني بتعرفو اخوات ..
المهم دخلت وسلمت على منى .. منى رابطة راسها وراقده في الاوضة .. وهنادي في المطبخ بتعمل في الفطور يادوب لابوها ..
سلمت عليها وقعدتها في البرندة ..قالت ليها لحظات بس افطر ابوي واجيك ..
قعدتها في البرندة .. ودخلت المطبخ شالت التلفون ضربت لشروق .. قالت ليها انتي وين براااحة كدا.. بالوسوسة عشان ديك ماتسمع .. قالت ليها انا في البيت ..مالك يابت بتوسوسي كدا ؟
قالت ليها تعالي سريع .. ليميا بت عمر جاتنا ماعارفاها مالا؟ تعالي انا محتاجة ليك ضروري ..
شروق قالت ليها جاياك هسي..  ماتتصرفي اي تصرف قبل ما اجيك .. قالت ليها حاضر راجياك .. تعالي سريع .. وهنادي حاسة انو ليمياء جاية تتكلم معاها في موضوع الباقر ..
المهم هنادي عملت الفطور لابوها وختت ليهو الموية وقالت ليهو افطر انا بفطر مع الضيفة دي ؟ قال ليها دي مالا ان شاء الله خير .. قالت ليهو لسة يا ابوي ماعارفة لكن بوريك بالتفاصيل .. اكل انت بالهنا ..
غسلت ليهو يدو وخلتو يفطر ومشت بيغادي ..عملت فطور وقالت لي
ليمياء تعالي جوة.. اخدي لي لقمة معانا .. قالت ليها انا فطرت والله يا هنادي .. اكلو راجياك ان شاء الله بالهنا ..
هنادي مشت ختت فطور لامها.. وقالت ليها انا بحشى لي عيشة وبطلع ليها .. منى قالت ليها دي عندها شنو؟ .. ماقاعدة تجينا اصلا.. قالت ليها شكلها جايبها الشديد القوي ..
المهم شالت العيشة ومعاها كباية عصير.. وطلعت لي ليمياء .. كباية العصير ختتها ليها قدامها .. قالت ليها مادام ابيتي الفطور اشربي البارد ..
وقعدت هنادي تاكل وتعاين لي ليمياء دايراها تنطق تقول ..
ليميا شربت العصير جيييييت .. وختت الكباية.. ومسحت خشمها وقالت ليها .. الموضوع يا هنادي .. طبعا انا متابعة الحاصل بينك وبين الباقر .. بالمناسبة يا هنادي الباقر ده نحن ماعارفنو مالو بتصرف كدا ..تصرفات غريبة في الايام دي ..
متردد وافكاره مشتتة .. امي قالت بكون مضروب عين .. لكن انا قلت ليها ده كلو بي سبب حب هنادي .. الباقر بحبك شديد ياهنادي .. وماقاعد نوم الليل من يوم اتفارقتو ..
هنادي قالت ليها لالا ياختي ..انتي مافاهمة الباقر عنده زولة رجعت ليهو ..انتي ماعندك خبر .. قالت ليها زولة شنو؟
والله هو براهو قال لي ماعندي اي زول غير هنادي .. وماعارف كتبت ليها قلت ليها كدا ليه ونهيت العلاقة؟ .. ماعندو ياهنادي صدقيني.. انا بعرف الباقر وبقرا رسايلو  ..
حتى الرسالة القاليك فيها الكلام ده انا قريتها..  ورسايلك انتي .. تلاتة رسايل بس ..واحدة اهلين الباقر كيفك .. وواحدة مساء الخير.. والاخيرة صباح الخير .. تاني مارسلتي ليهو .. صح ولا انا غلطانة ..
هنادي قالت ليها صح والله ياهو .. لكن الحاصل شنو؟ مالو الباقر قال ماعايزني؟ انا مالي غلطت فيهو في شنو؟
قالت ليها ماغلطتي.. وهو عارف كدا.. بس عمل حركة عبيطة .. وشكلو كان بهظر معاك.. وعايز يشوف ردة فعلك ..وتاني خحل ماقدر يرجع ليك ..بس  انتو استعجلتو .. ومشيتو كلمتو ابوي ..
هنادي دي من الكلام ده اتأثرت.. تأثير شديد خلاص .. وقالت ليها يعني الباقر لغاية هسي باقي علي؟؟؟
قالت ليها ايو نعم ..والله باقي عليك لو مامصدقاني انا هسي بخليهو يضرب ليك.. ويعتذر منك بي نفسو ..
قالت ليها انا ماقادرة اصدق .. وهنادي فعلا فرحت شديد .. وبقت تفكر تكلم امها وابوها كيف؟ ..
قامت قالت لي ليمياء  يازولة اضربي ليهو .. خليني اسمع الكلام ده منو واي شي بتصلح .. مافي مشكلة انا قلبي بسامح ..
في اللحظة شروق جات .. سلمت .. وقعدت . هنادي قالت ليها يا ليمياء شروق دي زي اختي بت امي .. اتكلمي قدامها عادي ..عارفة عني اي حاجة ..
لمياء قالت ليها المهم ياهنادي.. هسي الباقر منتظر منك الرد ..
طبعا شروق طيرت عيونها .. قالت ليها الباقر منو ا ليمياء؟ .. قالت ليها الباقر اخوي ..
قالت ليها رد في شنو يعني ؟ قالت ليها طبعا حصلت بينهم سوء تفاهم ..هو وهنادي ..وهسي هو رسلني ليها بعتذر ..
شروق قالت ليها ..يفتح الله يختي .. تاني هنادي  مستحيل ترجع للباقر ..  هنادي قالت ليها في شنو ياشوشو؟؟
شروق قالت ليها اسكتي ياهنادي.. خليني اتكلم معاها..لوو سمحتي ..
وقبلت علي ليمياء .. قالت ليها .. انتي الباقر مارسلك .. عارفة ليه؟
لانو الباقر قال لامه .. خليت هنادي عشان سمعتها ماكويسة .. وامك كلمت العازة .. والعازة قالت الكلام للنسوان في القهوة والخبر ملا الحله .. مادام هنادي سمعتها ماكويسة .. انتو عايزين بيها شنو؟
طبعا هنادي هنا طيرت عيونا .. وحيلها مات.. وبقت تتمتم في الكلام .. وفي حاجة خنقتها في حلقها ..
اول مرة تسمع كلام زي ده في حياتها ..
قال ليها يا شروووووق .. ده كلام شنو البتقولي فيهو ده ..؟؟
قالت ليها دي الحقيقة ياهنادي .. ولو ما مصدقاني اسألي شادية خالتي وسمية فاروق  زوجة اسامة .. وكل النسوان حاضرات الكلام .. انا ياهنادي ما ممكن اتبلى على انسان .. لكن هم عايزين يوسخو سمعتك .. وانا مستحيل اخليك ترجعي للناس ديل ..
هنادي قالت ليها انتي ياشروق بتثبتي على كلامك ده ؟ قالت ليها ايوة بثبت.. ومستعدة اصل بيهو القانون .. وعندي شهود ..
بس هنادي انفصمت في ليمياء ..
قالت ليها اسمعي .. اطلعي . اطلعي .. اطلعي من بيتنا ده.. قبل ما اجيب الكبريتة واحرقك .. وقولي للباقر انتظرني .. والله الليلة
الا تشوفو ليكم بلد ترحلو ليهو ..
ليميا قامت خايفة ..ومطيرة عيونها من الهيجة الهاجتها هنادي ..
وطلعت من البيت.. وجمب الباب اتلففت وقالت لي شروق منك لله ياشروق يامفتنة ..
قالت ليها اطلعي يلا امشي.. يا ناس يا ما بتخافو الله .. والليلة ارجو الجاييكم ..
هنادي قالت لي شروق انتي الكلام ده جبتيهو من وين؟ .. قالت ليها والله ياهنادي انا ماكنت عايزة اكلمك.. خايفة عليك من الزعل .. لكن مادام تاني جوك .. انا لازم اتدخل .. سمعتو يوم القهوة الفاتت عند ناس السرة .. هنادي رمت دموع حارة خلاص.. وقالت ليها حرام عليك ياشروووق .. الناس يتكلمو فيني وانتي ماتقولي لي ..
مشت طوالي نادت ابوها .. وعيونا حمر وتبكي بكى مر ..
عمك انزعج شديد لمن شاف هنادي تبكي كدا .. قال ليها امك مالا.؟قالت ليهو امي كويسة ..تعال شوف الناس قالو فيني شنو يا ابوي .. تعال شوف بتك البتفتخر بيها.. بقولو عنها شنو؟
الى اللقاء ..