صراحة مدعومة..طارق اللبيب

١٦

هنادي قالت ليها عارفاها قصتو .. ابوي حكاها لي بالتفاصيل .. لكن كمال ذنبو شنو؟ معقول ابوي ممكن يرفض للسبب ده ؟ انا ماشايفة ده سبب مقنع .. كل نفس بماكسبت رهينة ..ولاشنو يا شروق؟ .. قالت ليها صاح لكن مجتمعنا ده بفهم ليك كدا؟
قالت ليها كدي اشوف راي ابوي .. ابوي عارف الامور دي اكتر مني .. لكن لو وافق .. انا بكون لقيت الانسان الفعلا بتمناهو والله .
شروق قالت ليها خلاص..  الشي البقولو ليك ابوك كلميني .. وطلعت منها سريع .. عمك ادريس مافي .. هنادي لقت امها رايقة كدا والصداع خف منها .. جات قعدت جنبها قالت ليها .. كيف الليلة يا امي؟ شكلك كويسة ماشاء الله ..
قالت ليها كويسة لكن المغسة كاتلاني .. انا لو مامشيت طربقت الدنيا فوق راس الباقر وامه .. قلبي ماببرد .. قالت ليها يا امي
انتي موش ماشة عشاني انا؟ انا ماعايزه اثير المشكلة دي تاني .
قالو يا امي الداير تكملو هملو .. والداير تهري اسكت خلي ..
ودا راي ابوي . انتي بس زي الكانك ماسمعتي .. والكلام ده ما أثر فيني اصلا..  وانا هسي مبسوطة..  وعايز احكي ليك كلام .. باسطني شديد .. ماعايزة تتبسطي معاي ؟
قالت ليها اها احكي ..
قالت ليها  شروق هسي لمن جاتني قالت قالت .. واتكلم معاها اسامة شخصيا.
قالت ليها.. والله كمال مافيهو كلام .. لكن طبعا المشكلة ..
هنادي قالت ليها المشكلة الزماااان حقة ابوهو صح؟
قالت ليها ايوة .. قالت ليها يا امي انا ماعندي مشكلة في الحكاية دي .. انا عايزاهو .. مالي ومال ابوهو المات ليهو 17 سنة ..
قالت ليها لكن ياهنادي الناس مابريحونا ..
قالت ليها الناس حريقة فيهم .. انا تاني ماشغالة بي كلام الناس .. كدي انتي انا بٍسألك سؤال . لو ابوك زمان حصل ليهو كدا.. برضو الناس المفروض يبعدو منك عشان ابوك؟
انا يا امي انا عايزاك تقيفي معاي..  وتتكلمي مع ابوي..  انا خايفة ابوي يرفض .. قالت ليها والله انا ذاتي الموضوع ده ما مرتاحة ليهو ..خليهو ابوك .. لكن بكلمو ..
اها لمن عمك ادريس جاء .. هنادي قالت لي امها يهدا ابوي جاء كلميهو . قالت ليها خلاص كويس بعدين .. وبعدين جات .. وابت تكلمو .. وباكر ما كلمتو ..
ماعارف منى فهمها شنو في التاخير ده ..
هنادي استعجلت الموضوع..  وقعدت ابوها وحكت ليهو الحاصل بالتفصيل .. قبل مايرد . جات منى وقالت ليهو .. غايتو يا ادريس الناس مابريحونا ..
قالت ليها دقيقة يامنى .. قبل على هنادي وقال ليها .. انا طبعا قبل كدا حكيت ليك بالحصل مع ابوهو .. انتي متذكرة ؟
قالت ليهو متذكرة .. قال ليها اها رايك شنو؟
قالت ليهو يا ابوي انا ماعندي مشكلة في حكاية ابوهو ..
قال ليها بتقدري تواجهي  كلامات الناس .. وتدافعي عن موقفك؟
قالت ليهو ايوة بقدر ..
منى هنا اتدخلت .. وقالت ليهو خليهم الناس..  نحن ذاتنا كيف نقبل بنتنا تتزوج زول ابوهو قاتل روح؟ ..
ادريس قال ليها يامنى انا بقول ليك كلام .. ربنا في كتابو قال .. ولاتزر وازرة وزر اخرى .. وكل انسان الزمناهو طائره في عنقه ..
مشكلة الوالد لاتقدح في سلوك الولد ..
عارفة يامنى نحن لو اشتغلنا بي رايك ده .. حيكون عندنا راي في سيدنا ابراهيم عليه السلام .. اقول ليك كيف .. سيدنا ابراهيم ابوهو كافر عديل .. خلي ده الابوهو مسلم ..
وهنادي تعاين لابوها مبسوطة تتبسم .. وابوها يتكلم ..
قال ليها بعدين يامنى .. ده راجل مات وهو بدافع عن شرف انسانة
مابعرفها .. عليك الله في شهامة اكتر من كدا؟
المرحوم  ده بحكم معرفتي بيهو اللصيقة والجوار .. مات شهيد ومظلوم الله .. بعدين فرضنا انو قتل ليهو زول كدا ساااي عنترية .. موش اتنفذ فيهو حكم الاعدام ..
يبقى تاني ماعليهو ذنب لان الحد لمن يقام على الانسان بيسقط عنه العقوبة في الاخرة ..
منى قالت ليهو .. طيب وكلام الناس؟ .. عاين ليها كدا وبسم .. وقال ليها .. اسمعي يامني..  انا رغبة بنتي عندي اهم من الدنيا دي كلها ..
انا معاك يا هنادي .. بس انتي اقنعي امك دي .. لانو الكلام البتقول فيهو ده كلام جهل ..
والله كمال رجل والرجال اقله .. والله انا بعرفو من شافع .. كفاية انو هو من طفل مسك مكان ابوهو..  وعاش امه واخته.. و مامدا  يدو لي راجل .. بداها من طلبة في البنيان .. لغاية مابقى مابقى مقاول يمسك بيوت بالملايين
وعرس لاخته .. وبار بامه .. وصلاتو في مواعيدها ..
انتي يامنى قولي الحمد لله..  انو ربنا أنقذ هنادي من الباقر .. الانتي عارفاهو وانا عارفو ..
وقام علي حيلو مشى..  هنادي قامت جارية لاحقاهو..  ومسكت يدو وقبلتها .. وقالت ليهو دايما داعمني .. وواقف معاي الله يخليك لي دايما سند..
قال ليها وانتي تستاهلي .. لانك ماحصل دسيتي علي حاجة .. كل اسرارك بتديني ليها بكل ثقة وامان .. وصراحتك معاي هي راس مالي والله ياهنادي ..
هنادي جات لامها .. امها تتبسم وتعاين ليها مع ابوها .. قالت ليها اها يا امي شفتي راجلك ده عسل كيف ؟ خليك زيو ياخ ..
قالت ليها يازولة مادام اتفقتو الاتنين .. ان شاء الله ربنا يسعدك ويتم ليك على خير .. انا دايرة شنو غير سعادتك وراحتك؟
اها تاني ابوك بلقا ليهو نجارة وين..  تساعدو بعد العرس .. قالت ليها ..
هوووي انا نجارتي مابخليها .. شرط اساسي .. كمال يخليني اواصل في شغلي .. لو رفض انا ماعايزاهو ..
امها ضحكت .. ووقالت ليها نتي مجنونة صدقي.. يابت نجارة شنو بعد العرس ؟
المهم يازول هنادي كلمت شروق .. وشروق فرحت جدا .. ومشت كلمت اسامة .. واسامة بعد كم يوم..  جاب كمال وخيلانو واعمامو والناس المقربين ليهو .. وجو لادريس في البيت وطلبو هنادي وادوهم ليها ..
وتاني يوم الخبر ملا الساحات ..
وبي غادي .الباقر سمع بي انو كمال خطب هنادي..  والحكاية اكلت معاهو جنبة شديد .. لانو كمال صاحبو .. وهو كان عارف انو الباقر بريدها شديد .. فالحكاية دي ماريحت الباقر كلو كلو ..
وبقى يعمل في الفتن والقلاقل .. بين كمال واصحابه .. تصدق الزول ده من شدة الحقد .. بألف كلام من راسو .. ويقول قال لي كمال ..
من القصص الحصلت .. مرة عندهم صاحبهم .. اسمو منير .. منير ده عندو اخته كان كمال زمان معجب بيها .. اسمها هيفا .. وزمان كمال لمن اتكلم مع منير..  وقال ليهو انا عايز هيفاء  بالحلال .. منير كلم اهلو .. واهلو رفضو كمال .. بي نفس المشكلة بتاعة ابوهو .. ومنير صارحو كلمو..  قال ليهو والله ياكمال اهلي ماعندهم فيك راي .. لكن خايفين من كلام الناس ..
كمال قال ليهو يازول ما مشكلة .. اهلك معاهم حق دي بتهم .. ومن حقهم يختارو ليها اختيار كويس ..
والموضوع اتعرف..  انو اهل هيفاء .. رفضو كمال عشان مشكلة ابوهو .. ومن اليوم داك كمال مافكر يخطب .. الا لمن ظهرت قصة هنادي ..
القصة دي ليها اكتر من تلاتة سنة ..
اها هنا الباقر استغلا الحكاية استغلال سي .. لاقى منير قال ليهو انا عايز اقول ليك كلام سري .. بس توعدني ماتتكلم بيهو ..
انتو موش زمان رفضتو كمال..  عشان مشكلة ابوهو .. انت عارف كمال قال شنو .. قال هو اصلا اتضايق من هيفاء..  لانها بتشحدو قروش طوااالي .. وخلاها لانها شحاده ونفسها صغيرة ..
الباقر طبعا هنا استخدم ذكاهو شديد .. لانو هيفاء مشهورة بانها بتشحد من الاولاد قروش .. ومنير عارف الحتة دي ..
لكن طبعا الباقر ذكاهو ده ..مانفعو باي حاجة ..
منير قال ليهو اسمع يا الباقر .. انت متأكد انو كمال قال ليك كدا ؟
قال ليهو ايوة متأكد وبحلف .. قال ليهو طيب ياحلاف .. انا متأكد انو كمال مستحيل يقول كلام زي ده وبحلف برضو .. لاني بعرف كمال اكتر منك ..
الحاجة التانية .. انت من زمااان ماقلت لي الكلام ده ليه ؟ جاي تقولو هسي؟؟ بعد ما كمال شلب منك هنادي ؟
ياخي عليك الله شوف لك اهبل وغشو بي حقدك الاسود ده.. الله يقلعك ..
بعدين اسمعني ؟ انت مستعد اواجهك بي كمال ولابتخاف منو؟
قال ليهو مابخاف منو..  لكن الكلام ده بجيب كلامات..  وانا مافاضي للمشاكل .. قال ليهو يلا عليك الله اقطع وشك..  حتى لو كمال قال خليهو اليقول..  انا رضيان تاني عندك شي؟ .. بس موت بي غيظك
الشلبة حارة ياحبيبي ..
الباقر مستمر في الاشاعات..  وكمال بجهز للزواج .. كل مرة يسمع انو الباقر  مطلع فيهو كلام ولا شغال بيهو .. ولمن جات مواعيد الزواج دعاهو .. وقال ليهو انا عايزك  يا الباقر تبقى وزيري ..
قالو اليوم داك .. جاتو حمى من المغسه ..و مشى لي خالتو في جبل اوليا..
قبل يومين من العرس .. ونال مايستحق ..
وهنادي اتزوجت الانسان البستحقها .. وبقوري الاهبل .بقى مضحكة في الحلة .. رجع تاني يراسل في ناس ميادة بت العازة ..
وفي النهاية اساء لسمعتو .. وسمعة اسرتو واخته .. وهنادي نصرها الله .. بصراحتها مع ابوها .. ودعمه لها .. وحفظ الله عرضها .. وصان شرفها .. مع انسان ملائكي .. من عالم اخر ..
ودايما الخير منتصر .. والشر والفساد منهزم .. ورواياتي هي امنياتي .. لمجتمع متعافي من كل مرض ..اللهم ثبت الخطى وتقبل العمل .. والان اضع قلمي من الرواية السادسة والثلاتين ..
لكم الشكروالتقدير احبتي على متابعة هذه القصة ..
تحيتي خالصة ممزوجة بالحب والاحترام لهذه الارواح التي تجوب بين احرفي لتنال مايجبر الخواطر وينير الطريق ..
وحفظكم الله وسدد خططاكم وحفظ اعراضكم والسنتكم ..
طارق اللبيب ..
التاريخ الانفاس الاخيرة لسنة 2017