صراحة مدعومة..طارق اللبيب

٨

الحلة كلها بقت ماعارفة تصدق كلام العازة الناقلاهو من ناس الباقر .. ولاتصدق كلام شروق الانفصمت في الحريم ودافعت عن صاحبتها دفاع مستميت ..
سمية زوحة اسامة بعد رجعت من ناس السرة والقهوة الملعونة .. كلمت راجلها بالحصل .. وانتشار الخبر في النسوان..  والكلام الحصل كلو والردحي بتاع شروق .. حتى كلام شروق عن ميادة بت العازة .. ما خلتو كلمت بيهو راجلا ..
الراجل بسمع فيها .. قال ليها انا كلمتك..  قلت ليك تاني ماتجيبي سيرة زول .. ياخي انت ماعارفة البتكلم في اعراض الناس يجي اليوم الناس تتكلم في عرضو؟ انتي ماخايفة على اطفالك ديل..  في يوم من الايام يجيبو ليك فيهم اتهامات مكذوبة ؟؟
انتي يامراة ماسمعتي من ستر مسلما ستره الله في الدنيا والاخرة؟
ياخي لو شفتي واحدة  بي عينك بتعمل غلط .. ما المفروض تفضحيها .. او تشيلي خبرها بالحلة .. المفروض تلاقيها وتنصحيها وتوجهيهيا..  او على الاقل تكلمي اولياء امرها .. 
قالت ليهو الكلام ماجبتو انا .. ولا الفتو انا من راسي .. الكلام ده انا سمعتو زي زي الناس .. قال ليها طيب .. انتي عارفة شنو يعني الافك؟ قالت ليهو وريني .. قال ليها الافك هو نقل الكلام البتسمعيهو في الناس .. اما التأليف اسمو البهتان .. والاتنين ديل من الكبائر .. وفيها عقاب في القانون .. وعقاب الله اشد ..
قالت ليهو استغفر الله العظيم..  تاني عاد انا خشمي وعندي .. لكن داير اسألك يا اسامة .. انت ميادة بت العازة دي صحي كدا؟
قال ليها اعوذ بالله منك انتي ياخي .. ياخي غوري من قدامي الله يشلك شليتي اعصابي .. والله انتي لو جاتك لعنة ب.. تجيك بي سبب البت الاسمها هنادي دي وحدها ربنا بنتقم منك ..
عاينت ليهو كدا .. وقالت ليهو شايفاك من البارح بتدافع ليها .. ان شاء الله خير؟ مايكون انت برضك خاتي عينك عليها ..
بس الزول ده قام  .. وهاج في المراة .. وتف ليه في وشها ..وقرب يكفتها .. قال ليها اسمعيني كويس .. اقسم بالله العظيم..  لو بضمن ابوها يديني ليها..  اكان أتزوجها فوقك واحرق ليك فشافيشك ياحاقدة ..
الزول الاسمو اسامة حمد .. ده بقى اليوم كلو زعلان داير ينشق من الكلام القالوهو في هنادي ..
مشى الصباح لي بيت اهلو .. ساكنين في نفس الحلة طرف كدا .. يسلم على الوالدة .. عندو اخته   متزوجة .. سألته من سمية زوجته..
قال ليها كويسة .. عاملة زعلان الليلة من الصباح .. قالت ليهو مالا ان شاء الله خير؟ ..
قال ليها ياها القوايل البتقول فيها .. وسيرة الناس الدايمأ في خشمها .. اخته قالت ليهو اوع يكون برضو بتتكلم في شمار هنادي بت منى؟
قال ليها انتي برضو سمعتي بالكلام؟ .. قالت ليهو كلام يتقال في قعدة ناس السرة .. اتأكد انو ملا البلد .. سمعنا بيهو .. وحتى قالو الناس القاعدة تطلع معاهم هنادي .. وكلام كتير...
غايتو حسبنا الله ونعم الوكيل عليهم الحريم ديل ..
قال ليها انتي بتعرفي هنادي كويس؟ قالت ليهو ايوة بعرفها..
والله من كانت في المدرسة ماعندها غير صلاتها وقرايتها.. بت والله مافيها اي كلمة .. لكن هسي ماعارفاها والله طولت منها ..
قال ليها والله هسي مافيها  كلمة..  لو جات ماشة بالشارع ساي وشها مابترفعو من الارض .. ولو اتكلمت مع اي زول بتتكلم كلام زي السيف .. انتي قايلة نحن بنعرف اساليب البنات والله البت من مشيتها في الارض  تتعرف .. خلينا بلاي ..
والله سمية خدامة لي هنادي ماتنفع .. تجي تتكلم فيها ..
اخته قالت ليهو انت مالك هسي زعلان كدي؟ هندي اختك ولابت عمك؟ اوع يكون عندك فيها نية عرس ؟
قال ليها ياريت والله .. انا اطول هنادي ؟ ساكنة جارتي وبعرفها زي جوع بطني والكلام حارقني والله ..
طلع طوالي ضرب تلفون لي كمال..  قال ليهو انت وين؟
قال ليهو انا في الزلط .. ماشي امدرمان .. قال ليهو ماشي لموضوع ضوروري ولا ماشي ساي؟
كمال  قال ليهو والله ماضروري انت مالك؟ عايزني في شنو؟
قال ليهو لازم تجي نمشي نلاقي الباقر ده.. ونسأله من الكلام الطالقو فوق البت المسكينة دي ..
قال ليهو انت لسه في الكلام ده يا اسامة؟ .. قال ليهو يا كمال الخبر وصل ناس بيتنا .. والدنيا كلها تتكلم عن البت .. والكلام مؤلف والله الكلام ده حارقني في قلبي .. تعال ياخي ..
قال ليهو جاييك هسي ..
المهم الاتنين قعدو في صالون بتاع حلاقة.. حق واحد صاحبهم في شارع فرعي في الحلة .. والحلاق ذاتو طلع انو سمع الخبر من مراة اخوهو ..
يعني مافي زول في الحلة ما اتكلم في هنادي .. وهنادي لغاية الان ماعارفة الحاصل بي وراها.. وشروق ماكلمتها .. خايفة عليها من ردة الفعل ..
اها يازول اسامة قال لي كمال ..ياكمال والله انا ماعندي مصلحة في الباقر ولافي هنادي .. لكن والله الاشاعة في زول برئ حارة ..
اضرب للزفت ده..  خليهو يجي نسكتو من الكلام ده ..
كمال كررر ضرب لي الباقر .. قال ليهو يا الباقر تعال لينا .. في صالون النذير .. الباقر ما اتاخر جاهو طوالي ,,
الكلام ده ان قريب صلاة الضهر ..  لقاهم التلاتة قاعدين ..
اسامة قال ليهو انت يا الباقر بتعرف شنو على هنادي ؟
قال ليهو هنادي ادريس؟ مالا كمان تاني ؟
قال ليهو يعني انت ماعندك خبر؟ عن الاشاعة الانت طلقتها في هنادي؟
قال ليهو اشاعة شنو يا اسامة؟؟ يازول قول يالطيف ..
قال ليهو يا الباقر .. انت قلت لامك..  انا خليت البت لانها ماتمام ..
وامك كلمت العازة .. والعازة قالت الكلام عن ناس السرة .. في التجمع بتاع القهوة ..
الباقر .قال ليهو لااااا حولاااا ..اولا" الكلام ده ماكدا .. اول حاجة هنادي هي الكلمت ابوها..  وقالت ليهو ماعايزة العرس ده .. وابوها جا كلم ابوي..  يعني هي الرفضتني ما انا .. تانيا انا قلت لابوي احسن الرفضت .
امي سألتني..  قلت ليها الشباب بتكلمو عنها ماكويس ..
اسامة قال ليهو شباب منو يا الباقر؟؟
نحن عايزين نشوف الكلام ده اخرو وين؟ .. قال ليهو والله الكلام ده قالوه ناس محمد ود رقية وصابر ..
قال ليهو ياخي انت تاخد كلام في هنادي .. من محمد ود رقيه؟
محمد ود رقية ده متين بقى راجل .. عشان يتكلم في بنات الناس؟ .. محمد ود رقية في نفسو هو شنو؟
وصابر نعلو صابر البسطل بالبنزين؟ انت يا الباقر والله زول تافه..  مع احترامي ليك ..
لكن انا والله الليلة الكلام ده احتمال اوصلو لي ابوك .. الباقر قال ليهو عليك يا اسامة .. ماتعمل لي مشكلة والله ابوي ده..  ممكن تجيهو ذبحة لو سمع الكلام ده ..خاصة لو عرف  انو طلع من امي ولامني .. قال ليهو طيب امشي نادي لينا محمد ود رقيه .. ونحن منتظرين هنا .. واسامة بتكلم وهو زعلان زعل شديد ..
مشو نااااادو محمد ودرقية .. جاء مفلفل شعرو..  ومشيتو في الواطة مامشية رجال .. ولمن يقيف بنفنس كدا .. ويغز كوعو .. زي البنات ..
اسامة قال ليهو ده يا الباقر الزول البتصدق كلامو؟ يهودا؟؟
الباقر قال ليهو انت اسكت يا اسامة خليني اسأله براي ..
ساقو بعيد .. كدا على اخر الشارع قال ليهو يامحمد ياخي انا عايز في مشورة وانت عارف الحلة دي كلها .. انا عايز اتزوج هنادي رايك شنو؟ قاليهو ظريف مالو ؟ هنادي والله قنبلة .. قال ليهو طيب .. رايك فيها شنو يعني زولة كويسة ولالا ؟ انت صاحبي وماتدس علي حاجة .. قال ليهو لالا يازول دي نهائي مابتتعاطف .. انا مرة كانت عايزة تديني كف عشان عاينت ليها ابتسمت..
قال ليهو طيب انتو قبل كدا قلتو الزولة دي ماعنده مشكلة .. قال ليهو ده ياسر القال كدا ما انا .. قال ليهو طيب صابر موش قال برضو؟ .. قال ليهو صابر كذاب ساي .. هو ذاتو مالاقي يتكلم معاها حكى لي كم مرة ..
الباقر قال ليهو صراحة يامحمد.. انا سمعتك انت شخصيا .يوم بتتكلم عن هنادي .. وانا ح اقول الكلام ده لابوها .. الولد قعد يتنايص .. زي البت الرايحه منها حاجة ..عليك الله ماتقول ليهو .. والله انا ماقلت كدا ..قال ياسر ..
الباقر قال ليهو يلا امشي نادي لي ياسر .. لو اتاخرت انا بفتك لادريس النجار ينشر ليك راسك ده بالمنشار . اوعك تكلمو عايزنو في شنو؟
الولد مشى خايف ..هو شكلو كدا قدر هنادي في العمر .. او اصغر منها بسنة .. المهم ود رقيه  مشى ينادي ياسر ..
والباقر جاء دخل الصالون .قال لي ناس اسامة وكمال ..قاليهم  والله الولد طلع كذاب ومجرم .. وماعندو اي علاقة مع هنادي ..
لكن قال ياسر هو العندو علاقة معاها .. انا متأكد انو ياسر بكون جاري معاها سلك ..دقيقة بس نشوفو لمن يجي ..
اسامة قال ليهو يا الباقر..  اسمح لي اقول ليك..  انت زول قلبك وسخان .. انت نفسك تطلع هنادي ماكويسة .. لكن انا بخيب ظنك الليلة .. وياسر بتكلم معاهو انا ..
انت المفروض تتكلم معاهم بالسياسة..  ماتهرشهم عشان نعرف الحقيقة القال الكلام ده منو .. وهل صحيح ولا افترا ..
كمال بس قاعد متمحن يعاين ..
ود رقية ضرب تلفون للباقر قاليو ياسر قاعد في الزلط في دكان بشرة وقال ماجاي .. اسامة شال عصاية وقال ليهو بمشي ليهو الكلب ..
كمال هنا اتدخل ..قال ليهو يا اسامة خلوني امشي ليهو انا.. ياسر صاحبي شديد .. وممكن يحكي لي الحقيقة .. مهما كانت ..
الى اللقاء ..