بنات واولاد

بنات اولاد ١١

بنات اولاد ١١
زينب الموسوي
فكرت هواي وتعبت من التفكير صعبه  عليه اتزوج غير احمد وكل مااغمض عيني افكر بيه اني اعيش مره وحده ليش اخلص عمري ويه رجال واني اتمنى رجال ثاني صحت خواتي وگتلهن راح افسخ الخطوبه وارجع كلشي لقاسم مااگدر اكمل
جواهر لچ تخبلتي الرجال مكيف وكل شروطچ نفذها وسحر وجعفر عركهم واصل لسابع جار
معليه بجعفر والي يسويه هو حطم حياتنا من يوم الرجع احمد راح يتزوجني ويخليني اكمل واتعين ومااعتقد راح يقصر بشي وياي
زهره خلص هسه اخابر قاسم ونفضها وياه واذا يريد زوجه اشوف وحده من صديقاتي  اله
هدى هسه رجعتي لعقلچ الفلوس متفيدچ ولا الذهب اهم شي بالزواج الرجال مشتريچ شوفي اني سنين وياه ومن شاف حياته بخطر انهزم وعافني وعاف بناته وهاي جواهر تمرضت ذبه وذب ابنه وطلگها احمد يريدچ لاتخسريه وانتي حرگتي گلب سحر كافي بعد سلميهم بيد الله وحقنا ميروح
اتصلت جواهر بقاسم وفهمته متريدك وتسرعت وتحب ابن عمتها وحلالك كله يرجعلك بالبدايه صار عصبي ورا يومين ودا ناس على ذهبه وحتى نبدي اجراءات ارجعله البيت عن طريق محامي
اتصلت باحمد ميجاوب دگيت على عمتي غلطت عليه وسدت التلفون 
بيوم راجعه من الكليه صاحتني جواهر للغرفه تعالي اگولچ شي صار اسبوع اتصل بقاسم ونصبت عليه حتى ياخذني
لا بشرفچ صدوگ تحچين اگول المكياج واطلعات لچ طلعتي وياه
لا رحت للمحل مالته ولطخت وجهي مكياج وشمرت عليه كم كلمه ذاب
لج هذا صدوگ الوحده راح تموته شنو حچيتي وياه
گتله اني وحدانيه مثلك ومحد الي وشفتك طيب وشهم وعفاف ماقدرتك بس اني حبيتك وانت بكيفك واني قريبه من عمرك واداريك مااريد الاملاك واحرم بناتك منك الي تنطينياه راضيه بيه
بس خليه يكتبلچ بيت سياره مو هيچ. ترى هم انتي بعدچ زغيره
المشكله مهند اخاف ميقبل احچي وياه انتي
بسيطه عوفي مهند عليه بس اگلچ انتي مسويه نفسچ مريضه وتراجعين اطباء
سمعت بالزواج صحيت كلشي مابيه
بالعافيه عيوني تدرين سحر اذا سمعت تتخبل
اي اتذكر من تصيحلي عرجى هسه العرجى راح تاخذ ابوها
وظلينا نهوس عروجه بنتي. كل البنات تزوجت ظليتي انتي دخلن اخواتي وجهال زهره وعرفن وظلينا نرگص ونهلهل
باليل حچيت ويه مهند صار عصبي فهمته
مهند لاتفكر بنفسك وبس انت صار شهرين مامريت وسالت عليها تخرجت ورحت تشتغل بالميناء للبصره مافكرت تأجر بيت رتاخذها وامك انظلمت وانحرمت هواي لاتصير اناني
ولچ مو اناني بس الناس شتكول عليها
الناس تحچي حتى على الانبياء هي ممسويه شي خطا تتزوج وتلگه رجال يلمها بيت ويسترها
بس هي چبيره هذا تصرف بنات شابه
الرجال الي ماخذته هم چبير فدوه لعينك خابرها وگلها موافق
رجع قاسم من جديد لبيتنا وخطب جواهر
ظليت كل يوم اتصل بااحمد ميجاوب ومرات يرفض الاتصال صارت اول محكمه بينا وبين جعفر سمعوا من المحامين وطلبوا ادله ان التنازلات صارت بالغصب وتاجلت تلث اشهر
بالمحكمه جعفر صاحني گلي ارجعي للبيت گتل رجع البيت النا ارجع عرفت هو خايف من شي ومن حچي عمامي عرفنا زوجته صار سنتين تراجع اطباء  علمود الاطفال
رجعنا للبيت بخيبة امل احتاجيت احمد احچي وياه اتصلت طول ما. التلفون يرن ادعي يارب يجاوب جاوبه
احمد الحمد لله جاوبتني اخيرا
خير شرايده
اكو اغنيه عراقيه تكول والتمت بروحي المحنه واشتهيت اخباركم متذكرت عايفكم وعفتوني رد من جديد الشوگ بين عيوني
اي وهسه اني لازم اكون منتظرچ شوكت تحنين وترجعين
اذا بعدك تحبني لاتقسي عليه
ياحب الي تحچين عنه نسيتچ بعتيني مره علمود كم فلس عد واحد شايب شلون اذا تزوجنا وتمرضت احتاجيت فلست شتبيعين ساعتها
كلامك يأذي معناها بعدك تحبني
روحي عفاف احسن مااذلچ واهينچ اكثر ولاتتصلين بعد
ميخالف احچي عليه اتحملك اني غلطت بحقك وفرطت بحبك وتندمت
اتندمتي متاخر گلبي مو فارغ هسه عندي بنيه تحبني وتحس بيه
شنو اسمها انطيني رقمها احچي وياها
وانتي شكو حتى تحچين وياها وبعدين هي تغار عليه شراح تكوليله منو انتي
بت خاله واحبه وبلكي تقبل تتنازل عنك الي
وشتنطيها بالمقابل ترى مو كل الناس  مثلچ تتنازل عن حبها مقابل فلوس وذهب
شگد صاير متنجرع
وشجابرچ تخابرين اذا اني ماانجرع
گتلك محتاجتك
اني مو سلعه يمتى متريدين تاخذيها وبعدين تشمريها شايب ليش عافچ وخطب اختچ
اني عفته والله من رجعتني بالسياره تذكر ماگدرت اكمل حچيت ويه اخواتي وگتلهن اريد احمد مااريد غيره
متاخره عفاف گتلچ اعرف غيرچ
والله چذاب لو تحب ليش ماتزوجتها فدوه لعينك احچي الصدگ والله ماگدر انام لو ادري ممخابره
داحچي الصدگ اعرف بنيه وبس تعدي هاي الشهرين محرم وصفر نتزوج
بعد لمحرم اسبوع تگدر تتزوج
بعد الغرفه ناقصه كم حاجه
الغرفه اشتريته الي مو من حقك تتزوج غيري بيها
روحي اشتكي عليه گوليلهم ورا ماحبني ومات عليه واشترالي غرفه وتوسل بيه عفته وانخطبت لشايب اگلچ من لبسچ الحلقه شحسيتي هم باسچ اكيد
والله مباسني ولا لمسني
واني شعليه روحي عندي خط ثاني ولاتتصلين بعد
سد التلفون وحسيت بنفسي تيتمت من جديد والليل كله ادعي يارب ليكون عقابي بفراگ احمد
قبل محرم بتلث ايام تزوجت جواهر  من قاسم بيت عنده بالكاظميه
الايام الي بعدها كل يوم اتصل باحمد ميجاوب خلص شهر بيوم اكلتني الغيره عليه اذا صدوگ طلع حچيه وتزوج اني الي راح اكون بالموقف الي ردت اخلي احمد بيه من قبلت بقاسم اخذت تكسي من الكليه للمستوصف الي يشتغل بيه بغداد الجديده وصلت سالت عليه جاوبوني بالصيدليه من شافني استغرب كانت بالصيدليه بنات اثنين وحده احلى من الثانيه انتبهت على اديهن اثنينهن متزوجات الحمد لله
خير عفاف شتسوين هنا
ماكوشي اريد اشوف البنيه الي تحبها
تخبلتي اني بالشغل هسه
اي تخبلت وهسه اصيح بالمستشفى احبه وعافني وينها الي تحبها
تعالي لچ    اخذني من ايدي بالمستوصف حديقه زغيره ميته بس مبينه كانت حديقه
شجابچ من الوزيريه لهنا من وصلچ
اخذت تكسي ليش خايف عليه
تكسي لوحدچ شنو هالاستهتار
اگلك لتغير الموضوع راويني صاحبتك
ماتشتغل وياي جيرانه
وديني لبيتكم اشوفها
امي اذا شافتچ تذبحچ وبعدين انتي شعليچ بيه يجوز داضحك على البنات وعفتها
موگلت راح تتزوجها شلون عفتها
عفاف اطلعي من راسي لاتمثلين دور الي تحب وغيرانه
والله مدامثل والله احبك والله من يوم الي گتلي تحب الليل ماانامه حرام عليك احچي الصدوگ
لچ فضحتيني صوتچ وكافي تبچين هسه اخذ اجازه ونرجع للبيت
راح دخل جوا وشفت الرايح والجاي يتفرج عليه
اخذني بسيارته ميحچي والراديو عالي سديت الراديو لخاطر الله گول وخلصني تحب وحده لو لا
حتى لو لا اهلي ميقبلون اخذچ
لاتاخذني بس جاوبني تعرف غيري
متستاهلين اجاوبچ بس كافي تعذبتي ولعبت باعصابچ لا ماعندي وحده وكنت متاكد متزوجين قاسم وترجعين
اووف گلبي حيوگف شگد مكروه بس اموت عليك شوكت تجي تخطبني
ياخطوبه بصفر ومشايه وامي متريدچ اسمچ متطيقه
عمتي حبابه بس اني اتصرفت خطا وديني عليها اعتذر منها لحد متسامحني
خلي اخابرها حتى تحضر توثيه تفشخچ بيها خابر امه
يمه تعرفين منو وياي بالسياره وراح تجي وياي
عفاف جايه تعتذر منچ   سمعتها تدردم.  جاوبها لايمه انتي گلبچ طيب واني احبها لخاطري عاتبيها بس لاتقسين عليها
وظل يحچي وياها لحد خلص الرصيد وصلنا للبيت كانت بالمطبخ مقبل يدخل وياي گلي فوتي انتي
اول مشفتها بوستها عمه اني اسفه غلطت وفكرت بنفسي ومافكرت باحمد وظلت تحچي وتعاتب لحد ماشافتني ابچي گالت لاتبچين مسامحتچ لان ابني يحبچ وجاوبتها
والله اني هم احبه وهسه الايام تثبتلچ شگد احبه وظلت تسالني عن زواج جواهر وعن المحامين والورث وجاوبتها بقيت عدهم لليل احمد وصلني للبيت ونزل لبيت اختي وحچى ويه محسن گله انت شاهد بس يخلص الشهر اخطبها ونتزوج مو شهر وتگلي لگيت شايب لان الهمره اروح بيها اربعه ارهاب