بنات واولاد

بنات اولاد ١٢

النهايه 🌹🌹
بنات     اولاد
زينب الموسوي
صار يوم عرسي اني واحمد حضره اخوي جعفر شفته متغير وزنه نازل وسمعته كال الهدى خلي الزفه تطلع من بيت حجي نزار وقبلت دخلت للبيت تمنيت ابوس الحياطين البيت الي انولدت بيه وتربيت ريحة امي وابوي الله يرحمهم سحر وگفت يمي سالتها على جعفر ليش متغير گالت قرحه نفس ابوچ الله يرحمه انقهرت عليه وصلت الزفه اول مجتي عيني بعين احمد حمدت الله وشكرته مارتكبت خطا بحق نفسي وحرمتها من شخص شوفته عندي تسوا الدنيا والفلوس والاملاك  ولمن صرنا لوحدنا گتله احمد رغم اني خايفه بس فرحانه اتزوجتك والحمد لله مصرت لغيرك.  اگلچ هاي سوالف اني خايفه ومرتبكه بطليها اصلا انتي يوم الي اجيتي لشغلي لو گايلچ هسه نتزوج تقبلين.   صدوگ ماعندك اسلوب صوچي اني  اي والله صوچچ لو متزوجه قاسم احسن.   شرايح يخلصها وياك كل شويه قاسم وقاسم
داشاقى وياچ شبيچ.  هذا شقاك الحمد لله والشكر  تدرين شسويتي بيه من عفتيني تخبلت يوميه اگعد الصبح اكول اني ليش عايش وكم مره اجيت يم بابكم ومريت على الكليه   اشو مشفتك ولا مره     ماردت تشوفيني   لعد ليش من اخابرك مترد ًعرفتچ فسختي وتندمتي گلت خلي اشلع گلبها مثل ماشلعت گلبي
وهسه متعادلين صرنا بعد لاتشلع كلبي ولا اشلع كلبك   مرت ليلتنا احلى من الي رسمتها وتصورتها بالي گعدت الصبح كان احمد نايم احلى نتيجه ممكن توصل الها بقصه حب هي هاي اللحظه تصبح بوجه انسان تحبه نايم يمك وتحس انفاسه واديه تحيط بيك
سافرنا اني واحمد لايران اسبوعين باليوم العاشر من سفرنا اتصلت بزهره كان صوتها حزين سالتها عرفت جعفر مريض ويريدون ياخذوه لبنان  رغم قسوته وظلمه علينا من سمعت الخبر عرفت قيمة الاخ وحتى الفلوس والاملاك مكانت تسوا نتعارك ونوگف محاكم ضده
گلت لاحمد گلي عفاف تذكرين شگتلچ عن ورث ابوچ فلوسه كلها مغصوبه وملعونه ماطبت لبيت وسعدته شوفي حالكم انتي واخواتچ ومرض جعفر هاي الفلوس تخوف المفروض تنهزمون منها مو تركضون وراها
والله صدوگ حچيك خليها بلا محاكم هو من يوزع الاملاك شنو ينطينا كافي
لاعفاف اذا تحبيني كلشي متاخذين تنازلي مااريد فلوس ملعونه تدخل لبيتنا وتاثر على اطفالنا
ميصير اتنازل عن كلشي
زين هسه اذا گالوا تنازلي عن الورث واخوج يطيب شتختارين
اخوي يطيب
الفلوس مالها قيمه واني عندي راتب وسياره واهلي حالتهم زينه وتتخرجين وتشتغلين وعد مني مااخليچ تحتاجين اي شي طول مااني عايش
الله يخليك الي ومااحتاج غيرك
رجعنا لبغداد اجى موعد المحكمه مااحضرت ولا وحده منه وباليل اجتمعنا كلنا بيت حجي نزار انطيت لجعفر التنازل مقبل وگال لاخواتي البيت بيتنا كلنا تنازلت عنه سحر والمحلات توصلچن شهريه منها احمد حتى الشهريه مقبل بيها واصر مااخذ اي شي من ورث حجي نزار عدهم اعتقاد الفلوس منحوسه وملعونه
جعفر مصاب بسرطان الكبد ويعالج بلبنان. المحلات يديرها مهند ومحسن واولاده
الورث تقسم على اخواتي وعلى جعفر حسب الشرع والقانون هدى رجعت لوظيفتها وبناتها تزوجن وعايشه بيت حجي نزار جواهر صار عدها ولد من قاسم وسجل نص املاكه باسم الولد مهند اتزوج وعايش بغداد ويدير محلات جده اني ماخذت من ورث بابا اي شي ماعدا صوره عرسه هو والدتي الله يرحمها توظفت بنك وبنيت مشتمل بحديقة اهله وعندي اولاد اثنين احمد انسان غني باخلاقه وبعزة نفسه واكتفيت بيه عن الورث والاملاك
القصه تسلط الضوء عن ظاهرة حرمان البنات من الورث والابتعاد عندشرع الله الذي اوصانا باتباع احكامه السماويه وحذر من اكل مال اليتيم  وايضا تنبيه  للظلم مهما ظلمت الله راح ينصر المظلوم ولو بعد حين.   ولكل اخ عنده اخوات مظلومات وماقصد بس بالورث اي ظلم كان تدري البنيه من تنهظم اول متصيح اخ  وانت قدر حجم حبها وحاجتها لعطفك ولحنانك  الله يحفظ اخوي ويطول عمره ويحفظكم جميعا