بنات. اولاد ١٠
زينب الموسوي
كان قصدي من دخلت جعفر بموضوع الخطوبه والاملاك اقهر سحر واعيشه نفس الشعور الي عشته راح تشوف بيت امها الي عاشت بيه وتربت يصير الي وذهب امها يصير عندي واريد جعفر يعرف سحر ورثها راح يصفى اليه رغم خوفي من الي اسويه وترددي كل مااشوف مكالمه لم يرد عليها من احمد عرف جعفر وماوافق على الخطوبه وهددني بالقتل اتصلت بسحر
سحر دريتي ابوچ خطبني وراح ينطيني بيت امچ وذهبها شگد تقريبا يسون تعرفين
لچ انتي صدوك متستحين وحده سافله
وانتي من اخذتي بيت ماما وذهبها شنو سافله لو بت اوادم هذا قليل راح اخليه يحرمچ من كلشي وهسه تشوفين ورا عشر دقايق اجتي سحر علينا تغلط وتصيح عرفنا متصله بابوها وحاچيلها كلشي وظلت تصيح حراميات متستحن واخواتي ماقصرن وياها طلعت والحرگه الي بگلبها متنوصف بردت ناري بيها ونار امي الله يرحمها قاسم اتفق ويه محسن على خطوبتنا وانطاني الذهب حتى البسه بالخطوبه لبسته وصورت نفسي ودزيته لسحر
وبدا جعفر يودي ناس علينا حتى نتراجع ويتصل بقاسم حتى ميكتب البيوت باسمي فد يوم العصر اجتي عمتي فريده وهي عصبيه وثايره
صدوگ هاي الاخبار عفاف مخطوبه لقاسم جاوبتها زهره اي عمه صدوگ ماگدرنا نمنعها تريد تسويها وحده بوحده وي سحر وجعفر
وابني الي صار سنتين ينتظرها تضحك عليه مو بعينها لو مخليته احتياط عمه ابنچ الله يعوضه ويسعده ويه غيرها طبعا الله راح يعوضه الي وياه بالشغل كلهن دكتورات وهن يتوسلن بيه وهسه تشوف عفاف منو الي يخسر وبالعافيه عليها الشايب
طلعت ورا ساعه احمد حرگ تلفوني اتصالات مجاوبت لان اعرف راح يغلط الصبح عرفت من محسن قاسم كاتب تنازل عن البيت النجف الي ومصدقه بالمحكمه وباقي يدور بيت قريب يشتريه صورت التنازل وديته لسحر كتبتلها ماكو مبروك
رحت على الكليه شفت سياره احمد وهو واگف باب الكليه
تعاي اصعدي
وين اصعد عندي امتحان
اصعدي لا اجرچ جر وافرج الكليه عليچ
صعدت من الخوف سديت الباب عله اصابعي وصحت اي اصابعي
حيل تستاهلين شنو هذا الطمع الي عاميچ راح تموتين على الفلوس والبيت وتحچين على سحر وجعفر اثنينهم احسن منچ
بشنو احسن مني جعفر اخذ فلوس ابوه من اخواته وسحر هو انطاها البيت ما خططت تبيع نفسها لشايب علمود بيت وذهب كلكم عائله مسمومه والفلوس عدكم اهم من البشر
وديني على البيت اذا اني هيچ شكو جايني من الصبح وديني على البيت اصابعي ورمت
مااوديچ للبيت اذا مااحرگ گلبچ مثل ماسويتي بيه
وين موديني تخبلت انت
اي تخبلت هنا بيت صديقي حواسم فارغ ومحد بيه اخذچ اله واسوي الي اريده. وراها شوفي شايبچ ياخذچ لو لا ادري دگه ناقصه بس انتي البديتي
احمد ادري اني غلطانه. بس خليك بمكاني والله اني احبك بس اريد بيت مثل العالم واريد اقهر جعفر ومرته
لچ شنو بيت شنو تقهرين جعفر انتي الي راح تنقهرين من تبيعين روحچ لقاسم وبعد قاسم من يموت او يتركچ هم تشوفين واحد يشتريچ اني هسه راح امنعچ من هذا الزواج
اكيد انت دتتشاقى مستحيل تسوي هيچ
ليش مستحيل. لان تحبني ومستحيل تأذيني. وانتي عفاف ليش اذيتيني من البارحه لليوم ادگ تلفونات واحس گلبي يريد يطلع من مكانه اذا تعرفين احبچ ليش تجرحيني گدام امي واخواني لچ من هالگد مااحبچ حتى امي مخليتها تدعي عليچ
احمد والله اني هم احبك بس مابيدي اسوي شي تلث نسوان وبنات هدى اثنين نايمين بغرفه وحده ويه اطفال زهره الحمام نستحي نفوته وحلال ابونا تتنعم بيه سحر وجعفر والمحاكم هذا ثاني تبليغ يجي لجعفر يلگون مموجود فدوه رجعني للبيت
كل الي گلتيه مو سبب اني ااجر بيت واخذچ واخواتج يعيشن بيه وانتظري المحكمه تحكم
شلون تأجر وتطلع انت الچبير عمتي مترضى
ااجر لاخواتچ بيت اني ادفعه واني وياچ نعيش ويه اهلي
وانت ليش تدفع الايجار شنو ذنبك لك محل واحد من محلات ابوي تسوا مليارات
شگد شايف ناس ميته على الفلوس بس مثلكم مشايف
انت شگد مااحچي وياك ميفيد مچلب ماديين وطماعيين يله اني طماعه وحقيره واريد اتزوج واحد غني مااريد. واحد عايش على الراتب افتهمت خلي عندك احساس عاد
خلص عفاف روحي تزوجي الغني مالتچ انتي متسووين حتى انقذچ من شر نفسچ واول ليله من يزفوچ اله. وتلگين نفسچ ويه شايب ترضين رغباته مقابل بيت وذهب تذكريني وتخيلي روحچ وياي حتى تعدي الليله مثل ماهو يريد ومن تگعدين الصبح تلگين بصفچ شايب بدل ماتلگيني اياني واياچ تتصلين بيه بعده لان مااجاوبچ
احمد سامحني والله موقصدي تتاذه وانشاالله تلگه وحده تحبك وتحبها
اكيد الگه بس ماانسى جرحچ الي
وصلني للبيت باوعنا واحد. للثاني نزلت دموعي واني اشوف بعيونه توسل وكلمة لاتروحين. نزلت وگلبي يسال معقوله هذا الي اسويه بأول حب بحياتي واغلى انسان عندي
دخلت البيت تلگتني جواهر قاسم موجود وياه الشيخ يعقد شگد راح تخلين مقدم وموخر شوفي خمسين بخمسين لاتنقصين دينار زين
اگلچ اني مريضه ميصير يعقدون اليوم فهميه بعد خمس ايام. منو گال ميصير يصير. اني سامعه ميصير وتعبانه اريد انام فدوه لعينچ اصرفيه هسه شنو اصرفه لچ جايب جنطه فلوس وياه واني ايدي تحكني الظاهر راح احسب الملايين اليوم
أنت تقرأ
بنات واولاد
Romansaقصه تتحدث عن ظاهره اجتماعيه سائده في مجتمعنا الان وهو حرمان الفتاة من الميراث واثر ذلك على العلاقات العائليه
